Reinicializar a pesquisa
4/7- Wältreis
  • Jasmin Steiner
  • Daniel Felder
out. 2024 – jun. 2025

4/7- Wältreis

De Dani ond d'Jasi gönd mol go luege, wies a anderne Orte so esch. Leia mais
+5
SeguirResumoCalendárioCompartilharCompartilharLista de metas
Os mais novos primeiro
  • 4/7- Wältreis
    1Röckfahrt noch La Pavona
    Playa Negra, wos üs ned so gfalle hedEs AgoutiHends üs no chorz öberleid ;)KapuzineraffAffemuetter met Baby huckepack of Ässens- oder Smartphonesuechi. Zweiteres förne Tuusch gäg Ässe.Im Cahuita NationalparkEinsiedlerchräbs. Ged no vel grösseri2Playa Blanca

    Tag 217 & 218: Cahuita

    18 de maio, Costa Rica ⋅ ☁️ 29 °C

    Am 18. semmer weder zom nöchschte Ort zoge. Im Gägesatz zo vorhär hemmer ned eifach chönne usem Hotel, is Auto sitze ond hopp, sondern hend weder zerscht per Boot zom Hauptdock vo Tortuguero ond vo det wiiter of La Pavona mösse. D'Fahrt esch agnähm gsi, paar Vögel ond ergend es tots Tier im Wasser hemmer au no gseh. Am zähni semmer de ändlech weder bem Auto gsi ond send Rechtig Cahuita losgfahre. D'Fahrt esch mehrheitlech ofere Autostross / -bahn (mer wössed ned genau, was es gsi esch) gsi, wo paar mol de Gägeverchehr ofgrond vo Baustellene of üsi lenggi Fahrbahn gleitet worde esch. Markierige, Abschrankige oder Warnhiiwis, dass jetz met Gägeverchehr grächnet wärde müess ond mer drom ned öberhole sött, send spärlech gsi.
    Ufmerksams ond vorausschauendes Fahren hed üs aber guet dör die Stelle brocht. Wos aber drom gange esch, es Restaurant förs z'Mettag z'gfende, hend üs die Fähigkeite plötzlech verloh ond mer hend öppe füüf Möglechkeite verpasst zom Usefahre, bes mer de ändlech hend chönne ahalte zom Ässe.
    In Cahuita acho hemmer üs iigrechtet ond hend de Räscht vom Nomittag am Strand welle verbringe. Leider esch die Playa Negra chli en Enttüüschig gsi ond so semmer ned lang blobe. Mer send nochhär go iichaufe ond hend denn in steter Awäseheit vo de Mogge üses gsonde z'Nacht zuebreitet ond gässe.

    Am nöchschte Morge hed üs üse Gaschtgäber, de Vladimir, för üsi Schnorcheltour abgholt. Z'Fuess eschs zonere Alegestell gange, wo mer met vier anderne Tourischte es Boot bestege hend. Am Horizont send scho donkli Wolche ond Blitz sechtbar gsi, üse Kapitän ond die bede Guides hed das aber offebar gar ned beunruhigt. Bem erschte Schnorchelspot semmer denn is Wasser gompet ond hend während ca. einere Stond s'Koralleriff of eigeti Fuuscht erkondet (die bede Guides hend zo desne zwoi Paar ghört). Debii hemmer Füürfisch, Languschte, Papageiefisch, e Scheldchrott (d'Jasi) ond en Roche gseh! Met de bede letschte hemmer üs scho glöcklech gschätzt, de semmer nomol is Boot ond ane andere Platz gfahre. I dem Riff heds zerscht ned so vel Spannends z'gseh gäh, bes es riesigs Tier diräkt onder üs döregschwomme esch. En Ammehai! Noch em erschte Schreck hemmer üs mega öber die Sechtig gfreut ond hend üsi Metschnorchelnde met "A shark! A shark!"-Rüef of das schöne Tier welle ufmerksam mache. Anders als mers normalerwiis be Hai-Warnrüef erwarte wörd, hend die meischte no probiert, dem (ongföhrleche) Hai nochezschwemme, send aber natürlech glii abghänkt worde. Glöcklech öber die spezielle Tierbegägnige semmer weder is Boot gstege ond zomene Strandabschnitt vom Nationalpark brocht worde. Det heds en chliine Snack gäh, was grad e ganzi Groppe vo Kapuzineraffe azoge hed. Die send sech Mönschebsuech offebar gwöhnt, wel sie send doch rächt nöch cho.
    Nochhär semmer weder a Usgangsponkt zrogg ond send i d'Onderkonft. Nochem Mettag hemmer no z'Fuess welle de Nationalpark go erkonde, was leider e chorzi Aglägeheit gsi esch, wel er am vieri scho zue macht. Vel Tier hemmer ned gseh - osser Mantelbrüllaffe, die hemmer bishär nome ghört -, aber d'Omgäbig hed üs gfalle.
    De Obig hemmer weder i de Onderkonft verbrocht met plane, ässe, schriibe ond ESC luege.    Leia mais

    Ver tradução
  • 4/7- Wältreis
    Dä Kaiman esch inere Hotelbadwanne gfonde worde. Wohrschiinlech es usgsetzts Huustier.1De Bluey esch en ehemalige Schötzling, wo emmer mol weder of Bsuech chond.Black-mandibled tucan. A dem Morge hemmer all drü Tukanarte, wo im Karibikteil vorchömid, gseh.D'Sansa esch eini vo de Metbewohnerinne vom Paco. Vo ehm hemmer leider keis Beld.11Z'Morgeselfie. Ged ned meh z'brechte.

    Tag 219 & 220: Cahuita

    20 de maio, Costa Rica ⋅ ☁️ 28 °C

    Wel d'Wälleprognose-App "Surfline" för Puerto Viejo för de hötig Tag am Morge die beschte Bedingige vorusgseid hed, semmer scho glii uf, hend gässe ond üs denn ofe Wäg zom Playa Cocles be Puerto Viejo gmacht. Rond 20' spöter semmer det gsi, die gross Uswahl a Surfschuele ond Vermieter vor Ort hed üs mindestens so lang loh öberlegge, wo as mer jetz s'Board weled go miete. Mer hend üs denn för "Rasta's Pura Vida" entschede. De Name esch Programm, de Bsetzer vo dere Schuel hed tatsächlech Rastas gha ond s'Pura Vida-Motto läbid do sowieso alli. D'Jasi hed nomol e Surflektion welle näh, während de Dani sälber esch go surfe. D'Wälle send do dütlech afängerfröndlecher gsi als in Santa Teresa ond ämu d'Jasi hed (au Dank de Onderstötzig vom Lehrer Greg) zemmli vel Wälle verwötscht.
    Wels noch em Surfe noni so spot gsi esch, hemmer üs no dezue entschlosse, a de 11:30 Füehrig dör s'Jaguar Rescue Center, wo ganz i de Nöchi esch, teilznäh. Üse Guide, de Ale, hed üs zerscht vel zo de Entstehig vo dere Uffangstation ond sinere Ufgab im lokale Wildtierschotz verzellt. Im Aschloss hed er üs dör de Sanctuary-Teil gfüehrt, wo die Tier es Dehei becho hend, wo nömm chönd usgwilderet wärde. Det hemmer die individuelle Gschechte vo de Bewohner ghört, wie zom Biispel die vom Bobo, emene Wiissbuuchtölpel, wo noch em zwoite erfolglose Uswilderigsversuech jetz im JRC läbt. Bobo chönnt mer usem Spanische öbrigens als "Dummbatz" öbersetze.
    Anderi Gschechte send gsi vo Waise, wo mer ned zrogg i ehri Groppe hed chönne brenge oder konfiszierti Tier, wo johrelang als Huusstier ghalte worde send. Eine vo dene esch de Paco: En Chlammeraffesenior, wo 27 Johr lang inere Garage agchettet gsi, met Riis ond Bohne, Ässensräschte ond Cola gfüetteret ond tränkt worde esch, wo mer d'Zäh zoge hed demet er ned cha biisse ond wo, luut Ussag vo de Bsetzter, "wiene Sohn gliebt" wärdi. De Paco esch jetz 35i ond mer gseht ehm sis Alter düütlech a. D'Gsellschaft vo zwoi jöngere Affedame tued ehm aber sehr guet ond jetz gnüsst er sin letschti Läbensabschnett im JRC, wo er jede Tag Frochtsmoothies schlürfe cha.
    Am Nomittag hemmer vo de Patricia erfahre, dass sie jetz au in Cahuita seig ond hend drom för am Obig no abgmacht zom eis goh näh zäme.

    So gärn mer Patricia au hend, met ehre chond ergendwie oft au de Räge... 😂 Üsi Plän, de Morge zerscht im Nationalpark ond denn de Nomittag am Playa Cocles z'verbrenge, hemmer drom abblose ond de Morge stattdesse läsend i de Onderkonft verbrocht. Förs z'Mettag semmer use, de aber weder zrogg i üse Container. Am Obig hemmer nomol met de Patricia abgmacht gha. So vel zo dem Tag.    Leia mais

    Ver tradução
  • 4/7- Wältreis
    Us dene Blüete enstönd d'KakaofröchtFermentierruumBohne am TröchneKakaobohneMmmhIyok Ami (Madre Tierra)❤️De beschwärlechi Wäg zom Wasserfall11

    Tag 221 & 222: Turrialba & San Isidro

    22 de maio, Costa Rica ⋅ ☁️ 15 °C

    Am Abreisetag vo Cahuita hemmer (leider) weder schöns Wätter gha. Geschter wärs üs lieber gsi... Mer send weder of em Highway zrogg gfahre ond send be Siquirres drab, vo wo ewägs stetig duruf gange esch. S'Ziel vom Vormittag esch d'Nortico-Kakaofarm gsi, wo mer e Füehrig buechet hend. Zäme met vier Studäntinne us Montreal semmer vom Aldo, em Bsetzer vo dem Betrieb, härzlech empfange worde ond hend vel dröber erfahre, wie die Farm gröndet worde esch, weli Asätz sie do bem Kakaoabau verfolged ond au, was sie förne Biitrag zo de Usbeldig vo benochbarte Kakao-Buure leischted. Das esch scho sehr interessant gsi, nochhär hed de Alex, en Agstellte vo de Farm, met üs e Schoggidegustation vo ehrne Schoggene gmacht. Dass die eint Schoggi zerscht Notene vo Melasse hed, denn Rum ond Honig chönd usegschmöckt wärde, hättemer nie errote... Noch dem Tasting semmer vom Alex dör d'Plantage gfüehrt worde, wo är üs diräkt de Notze vo de Pflanzediversität i de Plantage (Schatte, Sticktstoffspeicher, alternativi Fuetterquälle för Wildtier) zeigt hed ond mer e Frocht hend chönne pflöcke. Ändlech weder fröschi Kakao!
    Im Fermentierigsruum hed er üs die verschedene Behälter zeigt, wo d'Kakaobohne noch de Ärnti zerscht mol för 5 Täg ine chömed, bevors de a de Loft (ond idealerwiis a de Sonne) tröchnet wärded. Nochdem d'Bohne gröschtet worde send, hemmer alli es paar becho zom Schäle ond hend sie im Aschloss inere Möli zo Kakaomasse verarbeitet. Die Masse hemmer aschliessend, jede noch sim Gschmack, chönne met Zuetate wie Zocker, Zimt, Ingwer, Salz, Milchpolver ond meh, verfiinere. Üsi Kreatione hemmer förnes spöters Dessert iipaackt ond de no paar Tafele gchauft.
    Die vier Fraue hemmer grad no of Turrialba metgnoh (ned of de Ladeflächi), de semmer wiiter in Rechtig San Isidro de El General, wo mer of 2800 m im Iyok Ami abgstege send. D'Höhchi ond s'andere Klima gschpört mer do düütlech: Am Obig semmer be ca. 9° C met Thermoliibli, Faserpelz ond Heizlöfter im Zemmer ghocket. Hött Morge hemmer bem z'Morgeässe no gschwetzt...

    I dere Gägend sel mer bsonders guet chönne Quetzale beobachte, was au üses Ziel gsi esch, wo mer am nöchschte Morge ofem riesige Gländ vo üsere Onderkonft send go wandere. Die als "dificil" agschrebne Wäge send bi Nässi tatsächlech no asprochsvoll gsi met Kraxelei duruf ond durab, om zom Wasserfall z'cho hemmer sogar mösse d'Schueh abzieh ond im/näbem Bach laufe. Quetzale hemmer of de ganze Wanderig leider keini gseh, deför aber mehreri Vogelnäscht met chliine Bewohner denne. Ond de Wald sälber hed üs au prächtig gfalle.
    Nochhär semmer weder wiiter gfahre. S'genaue Ziel före Tag hemmer noni gwösst, Uvita esch mol als Zöscheziel userkore worde. Bes mer dete gsi send, eschs be teilwiis strömendem Räge e korvigi Bärgstross durab, mängisch hender Laschtwäge, was de Fahrer chli of d'Gedoldsprob gstellt hed. Wo mer in Uvita acho send, hemmer während em z'Mettag de Bsuech im Corcovado NP plant, was zonere Blitzbuechig vonere Zwoitagestour met Start am nöchschte Morge am sächsi gfüehrt hed. För üs heds drom gheisse wiiteri drüü Stond Auto fahre, demet mer d'Nacht in Drake Bay chönd verbrenge, vo wo us d'Tour afoht. D'Stross esch gäge Schloss emmer "interssanter" worde, sodass mer eigentlech no ganz froh om üse Hilux gsi send. Mer send denn heil am 18:20 acho, vom Gfühl här aber scho vel spöter, wels scho donkli Nacht gsi esch. Nochdem mer üses Plastikfläscheproblem (es daf kei Einwägplastik met i Park gnoh wärde) glöst hend, hemmer för d'Tour packt ond send i üsem schön klimatisierte Zemmer go schlofe.    Leia mais

    Ver tradução
  • 4/7- Wältreis
    Weder emol es Schild...
    1En Teil vom hötige Tag (met Ton lose)Tapir am Strand.TotechopfaffeBrüllaffeEn Tapir sech am ErfröscheFuultier (med Baby ofem Buuch)Klagetagschläfer (Common Potoo), ein Meister der TarnungSiesta im sehr offne, aber trotzdem z'warme SchlofsaalSchwarzkehltrogon (leider nor vo hende)Au am Nomittag hemmer weder vel Affe gsehEn jonge LeguanEn Ameisebär

    Tag 223 : Corcovado NP

    24 de maio, Costa Rica ⋅ 🌧 28 °C

    Träffponkt esch scho am sächsi gsi, wel mer för i Park vo Drake Bay us met em Boot zerscht mol öppe e Stond fahre muess. D'Emma ond de Jan us Berlin, wo au d'Zwoitagestour möched, hemmer in Drake Bay scho troffe, üse Guide Erick, so esch üs gseid worde, träffemer de im Park. In Sirena acho semmer de au tatsächlech vo ehm am Strand begrüesst worde, met de Wort: "Welcome to my office!" Noch emene Tag i dem Nationalpark chamer also säge: Schöns Büro!
    De Corcovado Nationalpark esch för üs bes jetz de ergiebigscht gsi, was Tierbeobachtige agoht. Die folgendi Situation beschriibt die Ussag guet: Mer hend üse erschti Spaziergang no chuum gstartet gha, de hemmer scho e Groppe Chlammeraffe obe i de Bäum gseh. Mer wend natürlech ahalte, luege ond Belder mache. En Momänt spöter schüücht üs de Erick regelrächt wäg, wel wiiter vore no e Groppe Coatis seig ond mer d'Affe eh no paar mol wörded gseh. Also hemmer üs am Ablick vo de Waschbär-Verwandte erfreut, do versetzt e Mäldig üse Guide weder in Ufruhr. En Tapir am Strand! Im Eilschrett laufemer Rechtig Strand, onderwägs raschlets i Bäum näbe üs ond mer gsähnd e Groppe Totechopfäffli! Jetz stömmer zwösche Wald ond Strand ond mönd üs entscheide, öb mer em Tapir oder dene härzige Äffli wend nocheluege. Mer hend zom Glöck Ziit för beidi gha.
    Wiiteri Tier, wo mer a dem Vormittag (!) gseh hend: Wildsäu, Agoutis, Brüllaffe, en Spächt, es Fuultier met Baby ond en Klagetagschläfer (Common Potoo). Nochem z'Mettag i de Rangerstation Sirena, wo mer au d'Nacht wärded verbrenge, hemmer no chli Siesta gha, bevors am drüü weder ofene Spaziergang döre Rägewald gange esch. No meh Tapire ond Affe hemmer gseh, osserdem no en Ameisibär. Dezue hemmer au no paar Ned-Süüger gseh wie en Mangroven-Schwarzfalke, Kronenhokko, Haubenguan, Blauscheitelmotmot, Schwarzkehltrogon, Fischadler, en Babyleguan, Roche ond Basiliske. Am allermeischte aber leider weder Mogge. Interessant esch au gsi, dass mer es Agouti bem Frässe vomene Chräbs beobachtet hend. Agoutis send Nager ond frässed normalerwiis eigentlech kei anderi Tier...
    Grad no vorem Räge hemmers zrogg i d'Station gschafft, wos z'Nacht gäh hed ond mer nochere Duschi i üsem offne Schlofsaal send go schlofe.    Leia mais

    Ver tradução
  • 4/7- Wältreis
    Morgestemmig nochem Räge
    1Do werds langsam nass...2... ond do esch scho alles verlore.Primäre Rägewald1D'Schueh send eh scho nass. De chamer au chli s'Chalb mache.Vo osse...... ond vo enne.2

    Tag 224: Corcovado NP

    25 de maio, Costa Rica ⋅ 🌧 27 °C

    E döreglägni Matratze ond die füechti Hitz vom Rägewald hed die chorzi Nacht ned so erholsam gmacht. Of die halbi füfi hemmer de Wecker gstellt gha, nor öppe füüf Minute gliiner als d'Brüllaffe im Wald, wo denn luuthals i Tag gstartet send.
    D'Instruktione vom Vorobe hend gluutet: Wenns am füüfi ned rägnet, gömmer of d'Morgetour, sösch chönemer legge bliibe. Tja, 04:55 heds agfange rägne... Das hed üs no d'Glägeheit förnes Kafi gäh, bevor mer de gliich no los send. Mer send zo de Möndig vom Río Sirena gloffe, wo mer ghofft hend, paar Vögel, Krokodil oder Tapire z'gseh. En Tapir esch tatsächlech ome gsi, aber am schlofe. Zo dem Ziitponkt heds scho weder agfange rägne. Ond denn heds gschöttet. Pflotschnass semmer zrogg zo de Station, wo die, wo hend chönne, i trochni Chleider gwächslet hend ond mer mol z'Morge gässe hend. Nochere chorze Pause semmer no einisch i üsi nasse Schueh gschloffe ond send i dä Teil vom Park, wo no sogenannte Primärwald esch, d.h., Wald, wo vo Mönschehand onberüehrt blobe esch. Vel Tier hemmer det ned gseh, deför aber "Dschungelfeeling" erläbt, metsamt Begehig vomene usghöhlte Baum. Zrogg of de Station hemmer üsi Schueh vom Schlamm befreit ond üs de langsam för d'Röckfahrt parat gmacht (= alles, was nass gsi esch, i ei Plastiksack, alles, wo ned daf nass wärde, ine andere Plastiksack. Also för d'Jasi. För de Dani eifach alles i Rocksack, do är - gmäss Vorschreft vom Park - kei Plastiksack debi gha hed. De Dani, dä obrigkeitsgläubig Bobo) ond send zom Boot. A dere Küschte send d'Alegemanöver wäg de permanänte ond doch rächt starche Wälle ned so eifach, üse Kapitän heds aber guet äne becho ond mer send "nor" bes öber d'Chnüü nass worde bem Iistiige. De hed s'Boot mol mösse is Line up use cho, zoms i Surfersprach säge. Was met em Surfboard scho müehsam cha sii, esch im Boot ned vel besser, s'Achterbahngfühl hed mer ämu secher vel stärcher. Wo mer de ändlech dosse gsi send, semmer nocheme Wiili i Räge cho. Zo allem äne hemmer de no mösse en Zwöschestopp iilegge zom no wiiteri Passagier uflade ond das esch denn wörklech es Onderfange gsi! Links ond rächts Felse, starchi Wälle ond zom d'Lüüt chönne uflade, hed de Kapitän s'Boot röckwärts usem Wasser mösse fahre (Bug bliibt aber im Wasser, was das Ganze sehr unkontrolliert mache cha, wenn s'Wasser onruhig esch). Noch mehrere Aaläuf heds de klappet, met em Motor usem Wasser hend d'Wälle met em Boot allerdings gmacht, was hend welle ond mer send plötzlech quer zom Strand ond de Wälle gsi - ned d'Position, wo mer wod. Gfühlsmässig semmer fascht kippt ond debii schön met Meerwasser tränkt worde, zemli es Abentür. Zom zwoite mol a dem Tag nass bes of d'Huut. Wo denn ändlech alli iigstege send, hemmer scho welle ufatme - de semmer nomol zrogg gfahre! Grond: Emene andere Boot paar Manne go uslehne, demet die bemene wiitere Zuestiigsmanöver chönd hälfe...
    Zom Glöck hemmer dem Ganze us secherer Entfärnig chönne zueluege. För die, wo müesse hend iistiege eschs chli weniger sicher gsi. En älteri Frau esch vonere Wälle erfasst worde, gstörzt ond hed sech debi verletzt. Ned nome de vierjährig i üsem Boot hed sech langsam Sorge gmacht. Denn ändlech semmer wörklech wiiter.
    In Drake Bay acho esch d'Jasi bem Usegompe au vo de Füess gschwemmt worde ond met ehre esch au de Rocksack go bade. Aber äbe, alles esch in Plastik iipackt gsi, vo dem här alles m.o.w. troche blobe (ged drom au leider kei Belder vo de Bootsfahrt).
    Üses Hotel hed üs för die Nacht no omquartiert, was heisst, dass mer im Aschloss no i üsne nasse Chleider is Auto hend mösse stiige ond einisch dör s'Dorf fahre. De ändlech hemmer d'Chleider chönne abzieh ond warm go dusche.
    Am Obig semmer ines Restaurant, wo mer dank Stromusfall im romantische Halbdonkel gässe hend.    Leia mais

    Ver tradução
  • 4/7- Wältreis
    Ofem Wäg zom z'Morge semmer dem Kaiman begägnet.
    Ofem Sendero DrakeSchwarzkehltogonFlossöberquerig vom Rio Claro a de Mündig.Ofem Röckwäg vom Sendero Drake esch nömm vel vom Strand vorhande.Massivs SchlaglochIm Marino Ballena NationalparkVo sehr wiit obe gseht d'Cola de Ballena anschiinend us wie en Schwanzflosse vomene WalIbisOfem Wäg zom z'Mettag esch de Wasserstand scho dütlech höcher gsi...... ond nochhär esch kei Strand meh ome gsi.

    Tag 225 & 226: Drake Bay & Uvita

    26 de maio, Costa Rica ⋅ 🌧 28 °C

    Es schiint, als ob mer noch de letschte Täg mol weder chli länger welle hend schlofe. Mer hend de Wecker also uf di sebni gstellt ond hend üs denn nochemene z'Morge, of Arote vom Gastgäber Alvaro, ufgmacht zom Playa Las Caletas, 20 Minute vo Drake Bay entfärnt. Vo det us semmer am Strand entlang ofe Sendero Drake, wo kilometerwiis de Köschte entlang füehrt. Wo mer los send, hed (meh oder weniger) Ebbe gherrscht, mer hend drom vel Platz gha, zom diräkt am Strand entlang z'laufe.
    Noch chli meh als einere Stond hemmer bim Punto Rio Claro aghalte ond im Meer badet. De Wasserstand esch onterdesse bereits chli höcher gsi ond en Teil vom Strand verschwonde. Zemli wiit obe bim Strand hemmer trotzdem en trochne Platz zom entspanne gfonde, zomindescht för paar Minute. Plötzlech esch en Schwall Wasser of üs zuegrast ond hed de ganz Strand inklusive Jasi onder sech begrabe. De frösch gwäschni ond tröchneti Rocksack esch scho weder nass gsi, de Inhalt inklusive Handy ond Kamera zom Glöck ned. Tüechli ond Sandale send öbere Strand verteil worde, aber wenigschtens ned im Meer glandet. De Dani esch glimpflich devo cho, nome es betzli vo sim Shirt, wo öberemene Ast ghanget esch, heds verwötscht.
    Mer hend üs denn drufabe dezue entschede, de Röckwäg azträtte, nüd me med entspanne also. De Grossteil vom restliche Strand esch au ofem Trail i de Zwöscheziit verschwonde ond mer hend s'meischte vom Wäg im agränzende Wald zroggleit.
    Rächtziitig vorem Räge semmer bim Auto acho ond hend üs of de Wäg noch Uvita gmacht, wo mer denn am spote Nomittag med reichlich Honger acho send. En Spaziergang dör d'Ortschaft hed üs zom früeche z'Nacht brocht.

    Am nöchschte Tag hemmer welle die "berüehmti" Cola de Ballena z'Fuess erkonde. Wel die Sand- ond Felsformation nor be Ebbe begehbar esch, semmer am achti bem Iigang vom Marino Ballena Nationalpark gstande ond hend üs Iilass erchauft. Noch wenige Schrett semmer amene wonderschöne Strand gstande ond send öppe einehalb Stond lang det omegloffe. Mer hend en Abstächer i Wald gmacht, wel det aber bösartigi Mogge of üs gwartet hend, semmer schnell, noch meh als 10 neue Moggestech aber leider ned gnueg schnell, weder am Strand gsi. Det hemmer chli gsönnelet, bes sech üsi Mäge gmolde hend. Wel mer ned a de Haupttouristross hend welle go ässe, semmer no 30' de Strand abe gloffe, nor zom det vor verschlossne Restauranttörene z'stoh. Mer hend de aber am Ändi gliich no öppis gfonde, ond send de met volle Büüch noeinisch zom Strand zrogg. Dä esch mettlerwiile aber nömme ome gsi, stattdesse weldi Fluete. Wo mer schliesslech realisiert hend, dass es met bade nüüt meh werd, semmer is Containerhotel zrogg. Do mer am Mettag so vel gässe hend, hemmer zom z'Nacht eifach g'aperölet met Chips, Popcorn, Bier ond Kombucha.    Leia mais

    Ver tradução
  • 4/7- Wältreis
    In Uvita am Strand
    Stränge Blick11Sexy

    Tag 227 & 228: Uvita

    28 de maio, Costa Rica ⋅ 🌧 28 °C

    Mer hätted in Uvita gärn no die vorläufig letscht Möglechkeit zom Tauche wohrgnoh. De Marino Ballena NP omfasst au d'Onderwasserwält vor de Küschte vo Uvita ond au d'Isla Caño wiiter südweschtlech esch för ehri schöne Tauchspots bekannt. Leider choschtet sone Tauchtag be allne Abieter, wo mer agluegt hend, mind. 200 USD pro Person. Das esch üs de doch z'vel gsi ond mer hend üs förs Surfe entschede. Det semmer au im Wasser ond wärded dezue no bruun (oder rot...). Bemene andere Parkiigang (in Uvita esch de ganz Strand Teil vom NP, drom zahlt mer emmer öppis zom a Strand z'goh) hemmer Boards gmietet ond hend üs zwoi Stond lang det ustobed, bevor mer üs i d'Sonne gleid hend. De Nomittag hemmer wägem Räge i üsem Containerzemmer verbrocht ond hend am Obig det no Chnoblispaghetti gchochet. S'Zemmer hed zwor före Räscht vom Obig noch Chnobli gschmöckt, aber s'Ässe esch fein gsi.

    De nöchschti Tag hemmer zemmli ähnlech gstaltet, eifach met em Onderschied, dass mer vorem Goh üsi Sache packt hend ond met vollgladnem Auto a Strand send. De Wasserstand esch üs no chli z'tüüf gsi, drom semmer zerscht chli a Strand gläge ond hend gläse. Debii hemmer d'Bekanntschaft meteme Kokosnossverchäufer gmacht, wo luut eigeter Ussag zäh Johr lang Tennis gspelt hed, vo Yonex gsponseret worde seig ond sogar zwoi mol international gspelt heig, bes ehn e Chnüüverletzig ond sini Frau (dä Teil met de esposa hemmer ned ganz verstande...) zom Ufhöre zwonge heiged. Sis Schattetennis hed üs sehr fescht ane Bekannte vo üs erenneret... Mer hend ehm versproche, noch em surfe no e Kokosnoss be ehm z'chaufe, hend d'Boards gholt ond send is Wasser. Noch zwoi Stond hemmer d'Boards zrogg brocht ond üs scho of d'Pipas gfreut. Die hemmer au becho, leider aber zomene Sonderpriis: 4'000 wärs gsi, mer hend ehm 10'000 gäh, s'Omegäld, woner "imene Restaurant i de Nöchi" hed welle go hole, hemmer aber nie meh gseh. Ehn au ned. Debii hemmer üs so guet met ehm onderhalte! Wo mer das am Parkiigang amene Wärter verzellt hend, hed er ned sonderlech öberrascht gwörkt.
    Grad vorem Parkiigang esch en Wohnwage / es Tiny House gstande, wo mer d'Garette vo dem Typ gseh hend. De Dani esch go chlopfe, d'Töre esch aber zue blobe. E Frau, wo üs gseh ond de gfrogt hed, was mer vom Bewohner weled, esch vo üsere Erzählig au ned bsomders öberrascht gsi... Zor Rache hätt d'Jasi dem Dieb welle d'Machete verstecke. De Dani, usnahmswiis mol de besonneneri vo üs, hed aber Nei gseid ond stattdesse zwoi Kokosnöss, wo mer jo zahlt hend, vo de Garette gnoh.
    So hemmer üs vo Uvita verabschedet ond send of Quepos gfahre, vo wo us mer die nöchschte zwoi Täg de Manuel Antonio NP wend erkonde. Mer hend üs es riichaltigs z'Nacht zuebereitet ond weder hed s'Zemmer noch Chnobli gschmöckt.    Leia mais

    Ver tradução
  • 4/7- Wältreis
    1Manuel Antonio NP
    Onbemerkt vom Aff schliicht sech de Dani i sim perfekte Tarnshirt aaSie hätted gschiider meteme andere Schluuch s'Auto abgsprötztGallo Pinto met Eier, Chääs ond ChochbananeFuessballnomittag1

    Tag 229 & 230: Quepos

    30 de maio, Costa Rica ⋅ 🌧 28 °C

    De Manuel Antonio esch de meischtbsuechti Nationalpark in Costa Rica, weshalb üs ChatGPT empfohle hed, möglechscht früeh z'goh, zom de Masse chönne uswiiche. Mer hend also online en früehche Slot buecht ond hend ofe 06.45 Bus ab Quepos welle goh. D'Grönd, werom mer de Bus hend welle näh, send gsi, 1. Wägem Erläbnis ond 2. Wel mer online gläse hend, das d'Parkplatzsituation bem Park chli dubios sel sii, wel sech Lüüt als Parkoffizielli usgänd, dech of ergend es Stöck Land lotsed ond deför denn omgrächnet 10 USD verlanged. Leider semmer chli spot dra gsi ond hend de gliich s'Auto gnoh. Dank üsne Recherche hemmer wenigschtens gwösst, was üs erwartet ond hend Gäld zahlt, zom üses Auto of 6 m² Wiese näbem Trottoir döffe abstelle.
    Mer send denn ohni Guide i Park, wo mer zerscht zomene Wasserfall send ond denn of guet usbaute Wäge zonere Cafeteria glangt send. Onderwägs hemmer Agoutis ond Kapuzineräffli gseh, nüüt Neus also. I dem vergitterete Kafi hemmer e chorzi Pause gmacht ond hend metbecho, wie dosse Groppene ufgregt zomene Baum ufegluegt hend. Wel das Spektakel secher 10' duuret hed, muess es es langsams Tier gsi si. Mer hend uf Fuultier tippt ond die Vermuetig esch denn spöter au bestätiget worde, obwohl mers sälber ned erkennt hend im Baum.
    Aschliessend semmer ofene Pfad, wo eim zomene Ussechtsponkt brengt. Onderwägs semmer em holländische Paar öbere Wäg gloffe, wo met üs in Tortuguero im Hotel gsi esch ond wo d'Frau schlächti Wetz dröber gmacht hed, dass ehre Maa es Fuultier seig. Hemmer also gliich no eis gseh.
    Mer send de no a Playa Gemelas gange, wo sech d'Jasi erfolglos als Immobiliemaklerin förne Einsiedlerchräbs versuecht hed. Dä Strand hed aber sösch ned so vel z'biete ond so semmer wiiter zom nöchschte Strand vom Nationalpark, em Playa Manuel Antonio, ond dä esch de wörklech schön gsi. Mer hend chli badet, bevor mer nomol wiiter of e Halbinsle send, wo mer i üsem Tierbingo es neus Tier hend chönne abhöggle: Es Reh.
    Noch dem Usflog semmer zrogg zom Auto, wo mer festgstellt hend, dass die 5'000 Colones ned guet investiert gsi send: Nochdem de Dani das Auto scho agspöitzt gha hed, esch es hött au no verbislet worde. Das Arme!

    Am nöchschte Tag hemmer usgschlofe ond hends chli gmüetlech welle näh. De Himmel hed ned so velversprächend usgseh ond so hemmer üs dezue entschede, statt emene Usflog a Strand z'mache lieber ines Kafi z'goh. Gueti Idee gsi, wel de Räge scho agfange hed, bevor üses Gallo Pinto öberhaupt brocht worde esch. Läsend hemmer de Vormittag det verbrocht, bes de Dani gmeint hed, mer chönnted luege, öb mer de Champions League Match of die eis chönnted luege. D'Snacks send schnell organisiert gsi ond mer hends üs ofem Balkon vo de Onderkonft bequem gmacht zom de Match luege. Nochem 2:0 hed d'Ufmerksamkeit chli nochegloh (oder eschs gsi wel d'Chipspackig läär gsi esch...?) ond mer hend denne weder chli gläse, während de Räge weder voll do gsi esch. Plötzlech rüeft de Dani luut us ond sprengt uf: En regelrächte Bach us Rägewasser esch vom Balkon här onder de Iigangstöre i üses Wohnzemmer gloffe. Nochdem alles in Secherheit brocht worde esch, hemmer das Wasser met Tüechli ond Bäse weder us de Wohnig chönne schaffe ond hend spöter grad no rächtziitig s'Znacht fertig gha, bevor de Strom usgange esch. Mer hend de also be romantischem Stirnlampeliecht gässe. D'Nachttour, wo mer a dem Obig hätted welle mache, esch natürlech au is Wasser gheit.    Leia mais

    Ver tradução
  • 4/7- Wältreis
    El viaje: Passends Bier för üse letscht Obig in San Jose
    Alti PoschtNationaltheaterIm JademuseumTschüss Costa RicaDank Ossekamera hed mer au ohni Fänschterplatz gseh, was dosse so abgoht1Zöri FloghafeDanke 🥰

    Tag 231 bis 233: San José & Luzern

    1 de junho, Costa Rica ⋅ 🌧 24 °C

    Ofgrond vomene technische Problem chond dä Iitrag chli verspötet. Sorry!

    De letschti Tag met em Auto! Obwohl mer d'Abgabeziit ned genau im Chopf gha hend, hemmer üs am Morge Ziit gloh met parat mache, send de zom Auto ond hend det festgstellt, dass 08:00 als Abgabeziit ofem Vetrag stoht. Das wär vorere Stond gsi. Jo, do hemmer jetz au nüüt meh chönne dra ändere. Mer send also losgfahre ond hend üs debii för d'Panormaroute entschede, wo üs chli i d'Bärge gfüehrt hed. Debii semmer anere Dirtjump-Aalag verbii cho, wo de Dani chli gnäuer hed welle go aluege. Leider esch grad kei guete Fahrer det onderwägs gsi ond so hemmer üse Wäg Rechtig San José fortgsetzt. D'Öbergab vom Auto esch riibigslos verloffe, keis Wort dröber, dass es scho am achti hätt mösse dete sii. Mer send denn met em Uber i d'Stadt, hend im Hotel glöcklecherwiis scho chönne iichecke ond send de go ässe. Nochem Kafi & Chueche hed s'Wätter sech zom Schlächtere gchehrt, drom semmer zrogg is Hotel. Use semmer de nor no förs z'Nacht, de semmer zom letschte mol of üsere Reis is Bett. Morn gohts hei 😊

    Am nöchschte Morge semmer vo ohrebetäubendem Huupe gweckt worde. Grad näbem Hotel goht es Bahngleis döre ond d'Zogfüehrer hend sech zor Onfallprävention lieber of s'Horn als ofs Andreaschrüüz met Blinkliecht welle verloh. Nochem z'Morge semmer of Sightseeingtour gange. Paar schöni Gebäude wie die alt Poscht oder s'Nationaltheater semmer go aluege, sösch hed üs d'Stadt aber ned so chönne begeischtere. Wel de Flog erscht am Obig gsi esch, hemmer emmer no paar Stond gha zom vertriibe ond send drom is Jademuseum. S'esch en interessanti Usstellig, leider hends aber so abegchüehlt i de Usstelligsrüüm, dass mer zwöscheziitlech sogar use send, zom imene Kafi üs chli go ufwärme. Wos denn drüü gsi esch, hemmer es Uber bstellt ond üs somet of d'Heireis afoh begäh. De Fahrer esch sehr abglänkt gsi dör sis Handy, was d'Fahrt ned so agnähm gmacht hed. Mer send aber wohlbehalte acho, hend d'Rocksäck ufgäh ond üs scho ofs Duty Free Shopping gfreut. De Duty Free-Bereich in San José esch andersch ufbaut als mers vo anderne Floghäfe könnt (praktisch nor Souvenirläde ond Ässensständ) ond ned mol gönschtig, was üsi Chaufmotivation zemmli brämst hed. Esch vellecht au guet so, mer hätted nämlech nor no meh Schoggi gchauft.
    Es onzfrednigs Baby hed de Nachtflog leider nor mässig erholsam gmacht, was üs aber hoffe loh hed, dass üs d'Müedigkeit am Obig dehei gäge Jetlag hälfe werd. Zwöschestopp Paris (DAS esch de mol en Duty Free-Breich im Sinn vo de Jasi!), denn semmer ändlech z'Zöri glandet. Voller Vorfreud semmer i Empfangsbreich cho ond send det vom Begrüessigskomittee, bestehend us Danis Eltere, Tante ond anere Fröndin vo de Jasi, de Stephi, empfange worde. S'nöchschte bekannte Gsecht hed dehei vorem Huus gwartet, nämlech de Jan, wo üses Auto ond üsi Wohnig verlässlech ghüetet hed ond üs au d'Schlössel weder öberreicht hed. E härzigi Öberraschig hemmer de no vor de Wohnigstöre gha, wo üsi Frönde üs es Startchörbli met z'Morgesache, Sauce ond Getränk henderloh hend 😊
    Discopizza hed d'Ehr gha, üsi erscht Mahlziit dehei döffe bereitzstelle. Nocheme lange Tag hemmer üs of d'Duschi gfreut ond send go schlofe.

    Drü Stond spöter semmer weder wach gsi. Noch mehrere Stond wach im Bett omelegge semmer am füfi denn use go spaziere.
    Ghört dezue...

    Mer danked allne, wo üs of dene 233 Täg vo nöch ond färn begleitet hend. Mer hend en onvergässlechi Ziit gha ond so vel schöni Sache döffe erläbe.    Leia mais

    Ver tradução
    Final da viagem
    3 de junho de 2025