Cuenca erkunde

Hüt bini ganz herzig vom Hostel-Büsi gweckt worde. Irgendöpper hetts wohl ih euse Schlafruum lah, und da ichs gester Abig scho sehr knuddled han, isches ih mis Bett gsprunge und isch nebed mir nomal ihpfuused. Geg die 8i simmer ihde Chuchi vo eusem Hostel gsi und hend üs Zmorge zuebereitet. Gli drufabe hemmer eus uf de Weg id Stadt gmacht. S‘Wetter isch wunderbar gsi und mir hend Cuenca bi blauem Himmel chöne gnüsse. Mir sind imene süesse Innehof zersch en Kaffi go neh. Am 11i simmer ahne Free-Walking-Tour und hend bis det nid scho zviel welle gseh🙈 wo mer denn nacher zum Treffpunkt gange sind hemmer nid chöne glaube wer au det staht. Es isch wieder das Päärli gsi, womer ufem Quolotoa-Loop und in Baños gseh hend. Die 2 sind würklich unglaublich sympathisch und es isch so witzig laufemer immer wieder ih sie ihne. D‘Walking Tour het sich echt glohnt. Eh Studentin het sie gfüert und eus sehr viel spannendi Facts und Gschichte über Cuenca verzehl. Nach de Tour simmer mit 2 anderne Schwiizer (Rico und Irina) uf en Ussichtspunkt gfahre. Bi de Chule Turi het mer echt en wunderbare Blick über d‘Stadt und d‘Berge gha. Mir sind na mitenand ines Resti mit wunderbarer Terasse go en chliine Snack go esse. Mir hends sehr guet mitenand gha und sind sicher öppe 3h det ghöckled. Es isch echt immer wieder lässig sich mit anderne chöne ustuusche und ihri bisherige Erlebnis z‘ghöre. Nacher hemmer no rasch es Taxi zum Busbahnhof gnoh, da mer s‘Busticket scho hend welle poste. Mir hend ez en Nachtbus uf Chiclayo in Peru wo ganzi 12h dethii het😅 De Bus sött aber sehr komfortabel sii, mir sind gspanne. De Grenzübergang stresst mich aber jetzt scho es bizeli. Da de Bus ersch am halbi 10 losfahrt, wirds sicher scho dunkel sii und da Jenny kei Spanisch cha, wirdi denn wieder für eus beid müesse denke. Ich hoff eifach es klapped alles…
Aber nachem Terminal hemmer eus na mit de Suraya und em Tobi troffe. Es isch au wieder richtig schön gsi mitere guete Kollegin us de Schwiiz en schöne Abig chöne z‘verbringe. Mir hends würklich sehr guet gha mitenand und sie hend eus au sehr viel, vorallem für Bolivie, chöne empfehle.En savoir plus