Kitesurfing in Vella

Hüt isch wieder sensationell gsi! Mer sind zerscht mit euser üblich Nussschale zur Lagune gfahre, denn miteme liecht grössere Boot "Black Horse" uf Vella (wo offiziell Baththalangunduwa heisst), en Insle (oder besset gseit en Sandbank) wiiter im Norde. Die ca. 60min Fahrt gaht zerscht durch die ruhig Lagune deruf und denn en Strecki durchs offne Meer... doch dadezue später meh.
Nach de ruhige Hifahrt simmer vu Vella überrascht worde, im "Welleschatte" vu dere Sandbank isch sWasser putzflach, während de Wind ungebremst drüber hinweg blast - herrlich! Bi dene super Bedingige hemmer en top Kite Tag verbracht, de Sämy het mehreri 360° Backroll gstande und dMartina isch schön flüssig gfahre und gwendet. Zudem het sie ihre "Move" perfektioniert: de gecrasht Kite uf dr einte Siite starte und denn i eim Zug grad uf die ander Siite wiiterfahre :)
DRückfahrt isch denn chli ungmüetlicher gsi. Durch dThermik het de Wind am Namittag zuegno und dismal simmer gege die meterhöche Welle gfahre, nid mit... dementsprechend starch hets in de Welletäler gschlage... aber de Captain vu de Black Horse isch en erfahrne Fischer und het eus sicher zrugg ind Lagune bracht. Doch eusi Odyssee isch nu nid verbi gsi: ufem Heiweg mit euser Nussschale simmer nu ines Netz gfahre und hend denn "Begleitschutz" vu zwei Fischer becho, bismer denn endlich bi euser Lodge acho sind :)Read more