Facing fears Pt.1

Hüt Morge simmer scho am 6i uf zum ga fische... mer sind dismal nid im runde Atoll vu Tikehau inne blibe, sondern sind durch en Öffnig im Riff ufs offnige Meer. Sofort isch sWasser ruhiger worde, statt de eher chline nervöse Welle hemmer etz grossi Woge gha. Da hemmer dRuete usglah und sind en grosse Chreis im Ozean gfahre - leider ohni Erfolg. Erscht womer zrugg ins Atoll sind, het de Sämy en Barracuda gfange :) leider isches bi dem einzige Fang blibe, dCrew isch dadervu nid sonderlich happy gsi, offebar sind Barracudas nur so mittelfein zum esse... sogar de Choch het gemeint, er sigi nid sicher öb en Barracuda fange würkli besser isch als kei Fisch zfange :) naja, eus hets gfreut und mier mend ne etz ja au nüm esse :D
Zum Abschluss vu eusne 3 Täg Tikehau simmer mal um eusi Resortinsle umegloffe - en wunderschöne Spaziergang im rosa Sand, mit türkisem Wasser und wehende Palme :) das hemmer denn au grad mit vilne Föteli messe dokumentiere, dadurch isch us eigentlich 20 Minute Umrundigs-Zit ca. sdoppelte worde :)
Ca. halbwegs het sich de schwarz Pitbull Colmar zu eus gsellt, isch aber scho gli ins seichte Wasser gschosse... da simmer ga luege was für Fisch as er am hinderherjage isch - da gsemmer vier Haiflosse usem Wasser rage! Vum Hund verschreckt sinds schnell wieder ins Tiefe gflüchtet, doch sie hend sich immer wieder mit de Welle la inetriibe la, irgendwie ähnlich wie Delfine. De Colmar het so schnell nid ufgä und isch de Black Tip Reef Sharks flissig nache, teilwis hend sie sich zimli durch sflache Wasser messe winde um wieder usezcho... doch trotzdem sinds immer wieder zrugg ihri Rundene ga dreihe, ganz so wiemer sich Haie us de Filme vorstellt: Flossespitze ca. 10-15cm usem Wasser :)
Am Mittag isches für eus denn mit Boot und Taxi zrugg an Mini-Flughafe. Hüt hemmer en richtigi "Anti-Flugangst-Kur" fürd Martina gmacht: zum zu euser negschte Insle Huahine zcho, hemmer ganzi 4 Mal messe lande! Zerscht Tikehau-Rangiroa-Papeete, denn numal ichecke und wiiter vu Papeete-Rangitea-Huahine... wie scho ufem Hiflug sind einigi Streckene sehr churz, so glicht der Flug mängisch meh amene HopOnHopOff Bus: zerscht de malerisch Abflug, gsäumt vu Palmewälder, und denn so Durchsagene wie "on your left side you can now see the Blue Lagoon / Vineyards of Rangiroa" - keis Wunder wenn mer nur ca. 500m Höchi erreicht!
Uf Huahine acho isches zerscht mim Bus und denn wieder mim Boot wiiter - und das under wunderschön klarer Milky Way! Mer freued eus, euses neue Inseli morn zerkunde :)
P.S.: öppis womer bi Fidschi vergässe zschribe und offebar nur det und nid i dr ganze Südsee üblich isch: wenn sich dFidschianer unterenander grüeft hend, hend sie en Art "Kussgrüsch" gmacht umd Ufmerksamkeit uf sich zzieh, wie miers mached zum z.Bsp. Chatze azlocke :)Read more