Norwegen

Am Morge hemmer Zmorge in Büsli gesse und eusi Zmittag-Sandwich gmacht. Bim Treffpunkt hed de Guide Kinge eus in Empfang gno. Nebe eus sind nomal 2 Schwizer, 3 Norweger und 4 Holländer uf de Tour gsie. Uf em Weg zum Parkplatz wo mer eusi Tour z Fuess los gaht, isch de Guide bi eim vo eusne Autos mitgfahre. Er hed gmeint sust folged eus Lüt sobalds sis Auto gsehnd. Er macht das sit über 20 Jahr und isch ursprünglich reine Wildtierfotograf gsie. Da er das so lang macht und d Ranger alli kennt, chan und döff er biz meh. De Normal Abstand zu de Moschus-Rinder sött ned chliner als 200 Meter si. Er chan teilwis bis zu 20 Meter a sie here. Er sig debi erst 3 Mal agriffe worde. En Agriff vo somene Tier gseht so us, das 200 kg wollebepackte Masse mit 60km/h probiert dich z treffe. De Letschi Agriff sig Vorgester gsie, vonere "crazy Cow" wo wahrschiendlich ihres Kalb verlore hed.
Bi de Fahrt hemmer scho de ersti Bull gseh. Isch aber anere sehr unübersichtliche Stell a de Hauptstrass gsie, das mer ned aghalte hend. D Ranger hend am Guide nochher verzellt das es mega gföhrlich worde isch und sie de Bull hend müsse wegtriebe das Touriste kei Umfall gmacht hend. Nach em parkiere hemmer als erst ums Gitter vonere Versperrte Brug müsse Chlettere.
Und denn ischs endlich los gange.
De Guid vorus, teilwiis mit sehr vell Abstand bi unübersichtlichem Gländ. Immerwieder mit Stops, so das er überall hed chönne luege ned das zwüsche zwei Tier gstande wäred. Wenn mer gwartet hend, hed er eus zeigt gha wo mer d Wolle chan Sammle vo dene Rinder. Es Kilo isch 1000 Dollar wert, und halted eim dütlich besser warm als normali wulle.
Die erst gruppe wo mer gseh hend sind 4 Küh, 1 eijährigs und 3 chälbli gsie. Idrücklich und doch au beängstigend es biz. Will genau die Crazy Cow au det gsie isch simmer wiiter. Uf em Rück weg hemmer die den au nomal gseh und leider immernoni nöcher als 100 Meter here chönne. Bi de Lunch-Pause hemmer nomal en Chueh und es Kalb gseh und en grosse Bull, leider amene Hang wo mer ned nöchher here cho isch.
Vellecht hemmer ja bim zwoite Spot no chle meh glück.Читать далее