Cancún (+ Playa del Carmen)

Nach Miami isch d Wahrschinlichkeit gross gsi, dass s nächste Ziil besser wird. So isches denn au gsi.
Spaat im Hostel ahcho, hani aber au gad en chillige Mexikaner mir Mariachihuet kenneglernt. Am nägste Morge hani denn en andere Ahgsproche ide Meinig es seg er. Cheibe ähnlich hend die usgseh. Aber besser, will de 2. isch Spanier gsi us Cádiz, het aber allne gseit er seg us Sevilla will er kei Lust het de Lüt die Spanisch Geografie z erkläre. Verstahni nöd, ich säg nämli immer allne ich chämi us Oberwinterthur.
Ganz cooli lüt gha ih dem Mayan Monkey. 6 Schwiizer känneglernt, ganz viel Panchitos und sogar 3 Shipis 👐
D lag vom Hostel isch super gsi, 2min vom Strand, und ei mal über d Strass und mer isch bim beste Burritoschuppe gsi. 6.- und heschen chönne zämmestelle wied willsch. Im Schnitt hani 2 vo dene pro Tag gha.
6 Täg dete gsi, 5 Mal in Usgang 🙂 Zum Teil sehr günschtig, zum Teil aber au us-amerikanischi Priise. Guet d Helfti sind eh Amis gsi.

De Bus isch au es highlight gsi. Er het überlal ahghalte wonem d Lüg gseit hend egal ob Autostrass, Wiese oder im Meer, nur d Bushaltestelle hetter ignoriert. Wenn mer die 12 Pesos (60 Rappe) zahlt het isch guet gsi, wenn nöd, ischs am Busfahrer au egal gsi. Er isch eh meistens während em Fahre ah sim Handy gsi 😂
Ganz spezielli Fiicher hets gha ide Lagune nebed em Hostel, sodass d Lüt sogar glaubt hend, wenn mer ihne gseit hend sie sölled schnädd übers Gländer luege, es seged grad 2 Krokodil mit Chräbs am Kämpfe 😂

Die eint Kollegin us Chile isch gliichziitig au no in Cancun gsi, sodass mer zämme en Tag mitem Party-Katamaran uf Isla Mujeres sind. Offene Alkoholusschank, Schnorchle. 3h ame mega schöne Strand und all you can eat Esse ischs echt wärt gsi fü 50.-

Woni s Axa Autöli gseh han, ischmer wieder in Sinn cho, dass de Axa CEO ja en Schwiizer isch und mer de Guido (ehemalige Chef bide Axa) gseit het, ich söllen doch go bsueche in Mexico City 🙂

D Verkäufer am Strand und uf de Strasse sind sehr sehr luut und zum Teil au rächt ufdringlich. Schlimmer sind aber d Promoter vo Stripclubs ide Usgangsmeile wo erscht ufhöred wenn sie ernschthaft frägsch, ob sie das ernschthaft unterstützed.

Für 2 Täg bini no uf Playa del Carmen will d Julie dete ihre 2 Monatig ufenthalt beändet het und zrug uf winti isch. Meh als e Abschiidsparty isches eig es Social gsi, will ihri Kollege sind au meh e Tanzcommunity als öppis anders gsi. De eint Strand in Playa isch grässlich und volle mit Sargasmo gsi, de ander wunderschön.

Fazit: Cancun isch e Kulturhochburg und die meischte Touriste chömed zum de Mayakaländer besser verstah. Tequila, Mezcal und Beachparties spieled e vernachlässigbari Rolle.Read more