Und wiiter gahts

Nach Trinidad simmer wiitergfahre nach Caibarién. Vo dete us wers de Plan gsi, de nögsti Tag uf d Inselgruppe Cayo Santa Maria usezfahre. Die Insle sind ah de Nordküste vo kuba vorglageret und duren lange Damm für Autos und Lastwäge mit em Festland verbunde. Wommer denn in Caibarién es Casa für d Nacht gsuecht hend, hemmer schnell gmerkt, dass das Fischerdörfli d Blüeteziite hinder sich hett. Trotzdemm hemmer es Zimmer imene Casa gfunde. Das isch s schlächtische Casa vo de ganze Teis gsi. D Aircon hett tönt wie e kettesagi, bi de Duschi isch nur es salzigs Rinnsal usecho und bim Wc isch sogar na en Fisch us em Spüelkaste durab gspüehlt worde. Lang hemmer für es Restaurant zum Znachtesse gsuecht. Wills so kei Touriste het, hemmer defür au nur en drittel vom Pris zahlt wommer sust go esse sind. Nachere lange und heisse Nacht, simmer denn am 4i sm Morge vom Güggel gweckt worde. Mer hend denn eistimmig beschlosse, dass mer nid namal e Nacht dete verbringe wend. Also hemmer eusi 7 Sache zemme packt und sind uf d Inselgruppe use gfahre, i de hoffnig, dete es einigermasse günstigs Casa z finde. Da isch nüt drus worde. Die usländische Investore hend praktisch alles Land ufkauft und riisigi Hotelkomplex drufbaut. Mir sind denn mal schüch go frege was denn es Zimmerli dete würd koste. D frau ah de Rezeption het denn nur gseit: "It's very expensive." Mir hend denn nachli wiiter glueget und wommer denn immerna alles z tür gfunde hend, hemmer eus is Internet vomene Hotel ihglogt und eifach eis im internet buechet. (online hets halt glich fast 150.- weniger kostet 🙈) So hemmer also zwei Nächt im all-inclusive Hotel verbracht und eus denn au zerst grad ah de Poolbar mit Drinks versorgt. S Meer uf dere Inselgruppe isch wunderschön. S wasser isch klar, es het wiise Sandstrand und ih de Nacht chammer im Wasser sogar de lüchtendi Plankton gseh!
Am Dunnstig hemmer eus uf de zrugg Weg nach Havana gmacht. Die letschte zwei Nächt hemmer bi de Playas del este verbracht. Die sind zwar nid mega schön gsi aber dete hemmer nachli meh vo de kubanische Kultur gseh.

Am Sunntig morge hani früeh mösse uf s taxi für an Flughafe. Ich bin am samstig egstra zwei mal go nahluege öb min Flug würkli gaht. Will am Friitig hets en schlimme Flugzügabsturz in Havana geh. Viel Mensche sind gstorbe. Weg dem Unfall sind au alli Fahne in Havana uf halbmast gsi. De abgstürzti Flüger isch vo de gliche Fluggsellschaft gsi, mit dere ich am Sunntig gfloge wer.
Also bini am morge am 5i am Flughafe gsi und han denn uf de Ahzeigetafle gseh, dass min Flug abgseit isch. Nachere kurze Panikattake, willi kei ahnig gha han was mer denn muss mache, hani mi gsammlet und bin an Schalter vo de Cubana. Die hend gseit ich sell dete zu de anderne Reisene sitze und warte. Also hemmer gewartet. Werend demm hani mi mit em Marc und Dütschland und de Line us Dänemark zemmegschlosse. Die hend nämlich s glich Problem gha. Zwei Stund später hemmer es Flugticket nach Panama City und vo dete nach San Jose i de Händ gha.
Mit recht viel Respekt vorem Flug simmer denn nach Panama. De Ahflug uf die Stadt isch de wahnsin gsi! Weg mim Fensterplatz hani de Usblick uf d Grossstadt, de Panamakanal und über 40 riisigi Frachtschiff chöne gnüsse wo vornedrah am warte gsi sind.
Nach 5 Stund isches wiitergange nach San Jose. Und mit fast 12 stund verspötig bini denn glich na ah cho. Für d wiiterfahrt nach Monteverde hets denn definitiv nüme glanget. Also bini erschöpft ines Hostel.
Ich freu mich drum am Mäntig endlich d Vanessa z treffe, wo denn in Monteverde euses Abentür chan losgah 🙈Read more