Viñales

Am 17. simmer mit em Bus vo Havanna ca 4h uf Viñales gfahre. Am Busbahnhof simmer abgholt worde vo eusere neue Gastgeberin, wo eus wieder mega herzlich in Empfang gnoh hend. Denn simmer als ersts go esse. Denn het eus eusi Gastgeberin en Salsakurs organisiert wo mega Spass gmacht het. Mer sind all so begeisteret gsii das mer nachher uf de Veranda na güebt hend. Nachher simmer no is Internet-Café nebedra, womer dank de kaufte Wlan chartene gschwind hend chöne is Internet & für exakt e stund isch nödd gredt worde. Denn simmer hei go schlafe. Am negste Morge het eus t gastgeberin zmorge gmacht & denn simmer los zumene chline Pferdehof, womer losgritte sind und e chlini Tour hend welle mache. Will ich aber sauschiss gha han uf dem Pferd obe sind de alain & ich scho vorher zrugg & hend die andere allei wiiter riite lah. Mir hend stattdesse Velos gno & hend welle zum Mural de la Prehistoria fahre, sind denn aber uf em weg vomene eltere maa ufgablet worde, wo eus uf e chlini wanderig uf en berg ue mitgno het, wo mer mega schön ufs ganz tal abe gseh het. er het eus no sini eigete zigarre probiere lah & mir hend no chöne honig chaufe. Uf em weg zrugg mit de velos simmer no ines mega feins, chlises resti go esse. Am abig hemmer eus all wieder troffe & nach emene päusli simmer spaat go znacht esse. Hütt hemmer eus entschlosse, will de alain & ich so begeisteret vom Roberto gredt hend, demm ahzluete damit er eus no die ander siite vom tal zeigt. Leider het er eus denn genau das zeigt, wo de juli, de lazi & dt moira sho gester uf de pferd gseh hend. Mer hend eus jetzt vor em Rege wieder is Internet-Café grettet & huet abig werdemer mit eusne Gastgeber bi ihne dehei Znacht esse. Morn gahts wiiter uf Cienfuegos.Leggi altro