Suche zurücksetzen
Australien / Neuseeland
  • Manuela Michel
  • Manuela Michel

Australien / Neuseeland

Ein 92-Tage Abenteuer von Manuela Weiterlesen
FolgenÜbersichtÜbersichtKalenderKalenderFotosFotosTeilenTeilenBucket List
ÜbersichtKalenderFotos
  • Beginn der Reise
    26. November 2025
    Manuela MichelAustralien / NeuseelandReisender
    1

    Los geits!

    26. November 2025 in der Schweiz ⋅ ☁️ 1 °C

    Jetz isches so wyt...
    Vor 1,5 Jahr hani dä Urloub beatreit. Es isch viel passiert i dere Zyt, umso meh fröits mi, dass sich dä Plan nid het gänderet.
    Hüt hani Deheime no di letschte Sache erlediget, fein gässe u liebi Lüt troffe.
    Itz hocki im Zug uf Zürich u fröie mi uf alles, wo chunnt🥰.    Weiterlesen

  • Manuela MichelAustralien / NeuseelandReisender
    1
    Stirling Gardens und Government HouseThe Bell TowerElizabeth Quai

    Perth

    28. November 2025 in Australien ⋅ ☀️ 21 °C

    Nacheme Zwüschestopp ds Singapur bini guet ds Perth acho. Woni ds Singapur ha gseh, dass es vor Akunft bis zum nächste Boarding nume no 20 Minute geit, hani nid no Zyt gha z Fötele.
    Ds Perth bini no chli dür d Malls (isch ja schliesslech Black Friday) u ad Waterfront.
    Itz bini am umpacke, wülls de morn scho ganz früeh wytergeit.    Weiterlesen

  • Manuela MichelAustralien / NeuseelandReisender
    11

    Perth - Kalbarri

    29. November 2025 in Australien ⋅ 🌬 21 °C

    No vor 7:00 si mir hüt losgfahre richtig Norde. Mir si 10 Persone, drvo 9 Froue.
    Mir hei e Halt gmacht idr Pinnacles Desert, si über Geraldton am Pink Lake verbi bis uf Kalbarri gfahre u hei dert im Hostel üse Mehrbettschlag bezoge. O wenn mir üs chli meh Komfort würde wünsche si mir üs einig - für d Landschaft lohnt sechs.
    Zum Znacht hani mi mit zwöi bekannte Gsichter troffe, d Prawn-Pasta isch super gsi🥰.    Weiterlesen

  • Manuela MichelAustralien / NeuseelandReisender

    Kalbarri - Monkey Mia

    30. November 2025 in Australien ⋅ ☀️ 30 °C

    Wo mir hei ghört, dasses am 5i Zmorge git, simer nid so begeisteret gsi. Am 6i si mier fasch die Einzige gsi im Kalbarri Nationalpark, si zum Nature's Window, Z-Bend und River-Trail gloffe. Gäge Mittag het ds Thermometer chüeli 40-42 Grad aazeigt - da simer plötzlech dankbar gsi füre früech Start.🥵 Ds Jäggli, wo mir gester no mehrheitlech hei anne gha, isch hüt nume no Chopfchüssi gsi😉.
    Nachem Shell Beach si mir nähr uf Monkey Mia gfahre. S het nume chönne besser wärde nach däm schreckleche Hostel vo gester, hie isches es Paradies direkt am Strand. Es paar Meeresbewohner si o cho Hallo säge🩷.    Weiterlesen

  • Manuela MichelAustralien / NeuseelandReisender
    Ir Mitti vo AustralieEagle BluffCoral Bay

    Monkey Mia - Coral Bay

    1. Dezember 2025 in Australien ⋅ ☀️ 24 °C

    Am Morge si mir ga luege ob mir d Delfine gseh - sie si aber wyt usse bi de Boot blibe.
    Nachere Abchüelig im Meer u Bsuech vo de Emu's zum Abschied si mir Richtig Norde gfahre. Dr Halt bim Eagle Bluff isch uu schön gsi, mir wäre am Liebste ids kristallklare Wasser gumpet. Für das ischs doch chli z höch gsi. Itz si mer ds Coral Bay u fröie üs uf d Schnorcheltour morn.Weiterlesen

  • Manuela MichelAustralien / NeuseelandReisender
    1

    Coral Bay

    2. Dezember 2025 in Australien ⋅ ☀️ 26 °C

    Hüt simer dr ganz Tag ir Bucht ga schnorchle. Ds Ningaloo-Riff isch subtropisch u het drum d Farbe Bruun, Blau u Grüen. Ufem Boot ischs eifach herrlech gsi. Z Ziel isch gsi, e Manta-Roche z finde, gfunde hei mir 5😍. D Föteli vo däm tolle Tag het ä Profi-Unterwasserfotografin gmacht.

    Später si mir no uf Exmouth gfahre u hei z erste Mal i Cape Range Nationalpark gseh. Dert gö mir de morn nomal ga schnorchle.    Weiterlesen

  • Manuela MichelAustralien / NeuseelandReisender

    Exmouth

    3. Dezember 2025 in Australien ⋅ 🌬 27 °C

    Hüt si mir nomal a Strand, ga schnorchle ir Turquoise Bay. Vergliche mit gester het me aber nüt gseh. Ir Sunne ischs so heiss gsi, dass mirs nid so lang hei usghalte.
    Am Nami hei mirs gmüetlech gno, si id Stadt ga Glace ässe u später ga Bier probiere. Dr Tag hei mir bim Sunneuntergang la usklinge.

    Die Truppe geit morn no wyter ga campe ids Outback. I ga zrugg uf Perth.    Weiterlesen

  • Manuela MichelAustralien / NeuseelandReisender
    East Perth
    Kings ParkWar Memorial

    Perth

    5. Dezember 2025 in Australien ⋅ ☀️ 23 °C

    Gester bini ds Exmouth no ga zmörgele u de gäge Mittag a Flughafe. Zrugg z Perth hani im Hotel ichecked. Paar Meter wyter hätti AC/DC gspielt, s het viel Fans umenand gha. I bi de no ga iichoufe u ha nähr d Rueh zum Läse nach de letschte Täg gnosse.

    O hüt morge hani mir o Zyt gla u bi de ersch nachem Mittag no id Stadt. Zersch bini am Swan River entlang spaziert u nähr Richtig Kings Park. Es het hie d CAT-Busse, wo gratis si. Die 5 Linie decke so zimlech alles ab, wo me brucht.

    Wenni so a die letschte Täg zruggdänke, chani fasch nid gloube, dassi ersch e Wuche da bi...    Weiterlesen

  • Manuela MichelAustralien / NeuseelandReisender

    Rottnest Island

    6. Dezember 2025 in Australien ⋅ 🌬 21 °C

    E wunderschöne Tag mitem Velo uf Rotto😍.
    Chli meh Gäng wäre bi däm Gägewind gar nid so blöd gsi, aber es isch o so gange.
    Überall hei sech Quokkas versteckt - am eifachste findet me se aber dert, wos ds Ässe git. Leider verstöh o hie ganz viel Lüt "nid füettere" nid....

    Bim Bueche vor Fähre hani mi chli verta u hätt ersch am 7ni zrugg chönne uf Freemantle. Das hani aber am Morge problemlos chönne umbueche. D Lüt da si sowieso meega fründlech u hilfsbereit🙂.

    Zrugg ir Stadt hani mi dür gsperrti Strasse u viel "orangi" Chlöis müesse kämpfe.    Weiterlesen

  • Manuela MichelAustralien / NeuseelandReisender
    No ds Perth
    Apéro z Sydney

    Perth - Sydney...und time to relax!

    8. Dezember 2025 in Australien ⋅ ☀️ 23 °C

    Nachere erläbnisriiche erste Wuche hani mir fest vorgno, mi no chli z erhole, bevors de wieder 3 Wuche lang viel z verzelle git.

    Gester hani Wösch gwäsche, s het im Hotel alles gha u isch gratis gsi. Da mi e Buechreihe zimlech fesslet, hanis süsch nume a Pool und zum Znacht gschafft.

    Hüt morge ischs wytergange richtig Sydney. D Inlandflüg si mega entspannt, we me da 45 Minute vorhär uftoucht, passt das. Mit dr Zytverschiebig isch nähr scho Abe gsi.
    Itz bini für 4 Nächt da, morn Abe geit d Tour los.    Weiterlesen

  • Manuela MichelAustralien / NeuseelandReisender
    Darling HarbourSaint Mary's CathedralAnzac Memorial

    Darling Harbour und Hyde Park

    9. Dezember 2025 in Australien ⋅ 🌬 22 °C

    Sydney zum Erste...und es wärde wyteri folge😉.

    I bi vom Hotel us losgloffe dür Chinatown bis zum Darling Harbour. Dä beläbt Egge het mir meega guet gfalle. Woni nähr Richtig Hyde Park gloffe bi, bini uf ds Mal ire riiesige Shopping-Strass glandet. Es het überall Stüehl gha, perfekt für däm Ganze zuezluege.
    Am Schluss bini no düre Hyde Park u paar tuusig Schritte später wieder ids Hotel zrugg.

    Am Abe hei mir ds erste Träffe mit dr Gruppe gha u si nähr ga Thai ässe.    Weiterlesen

  • Manuela MichelAustralien / NeuseelandReisender
    Saint Mary's Cathedral
    Tower EyeManly2

    Manly Beach

    10. Dezember 2025 in Australien ⋅ ☁️ 23 °C

    Mir si am 9i losgloffe richtig Opere u hei drzwüsche no paar Stopps gmacht. Nähr si mir uf d Fähre und zum Manly Beach gfahre. Bi Fish & Chips am Strand hei mir de Surfer zuegluegt u i bi natürlech o bim bewölkte Wätter ids Meer ga bade. Am Nami isch nähr schöner worde u mir si bim Shelly Beach nomal ids Meer.
    Zrugg ir Stadt si mir no id Brewery grad näbem Hotel u drna für 5 AUD ga Dumplings ässe - die si super gsi😃.    Weiterlesen

  • Manuela MichelAustralien / NeuseelandReisender
    Dr dänisch Architekt wo die Dächer het zeichnet het ds Operehuus nie fertig gseh (vor Ort)Blasmusig ir Metro-StationDarling Harbour

    Quer dür Sydney

    11. Dezember 2025 in Australien ⋅ ☁️ 20 °C

    Hüt hei mir ä freie Tag gha. Am Morge bini zersch nomal chli dür d Läde u ids Chinatown. Am Nami hei d Laura und ig are Füehrig im Operehuus teilgno u si derna düre Royal Botanic Garden bis zrugg i Darling Harbour gloffe. Dert heisi ire Bar Salsa tanzet und mir si zwöine vor Gruppe ga zueluege.Weiterlesen

  • Manuela MichelAustralien / NeuseelandReisender
    11

    Ayers Rock

    12. Dezember 2025 in Australien ⋅ 🌬 33 °C

    Ab ids Outback....

    Mir si direkt zum Flughafe Ayers Rock gfloge. Dert wärde mir vo Adventure Tours betreut, die glichi Organisation hani ar Westküste buechet.
    Mir hei zwöi churzi Wanderige rund ume Uluru gmacht bi 42 Grad. Es isch rächt bewölkt gsi drum hei mir nid sone schöne Sunneuntergang gseh. Itz chuttets mega, de isch de vilech dr Sunneufgang besser. Nachere nid bsunders chüele Duschi si mir itz im Zält u hoffe uf paar Stunde Schlaf.Weiterlesen

  • Manuela MichelAustralien / NeuseelandReisender
    E Salzsee im Nirgendwo

    Kata Tjuta

    13. Dezember 2025 in Australien ⋅ 🌬 32 °C

    Am 4i si mir uf füre Sunneufgang, leider o mit wenig Glück. Dr lüchtig rot Felse hei mir nid gseh.
    Nähr si mir zur Kata Tjuta Formation, das si 36 einzelni Felse. Dert hei mir dr Walpa Gorge Trail gmacht, es isch o hüt wieder mega heiss gsi.
    Itz si mir ir nechi vom Kings Canyon ufem Camping. Es isch alles sehr eifach, drum isch dr älter Teil vor Gruppe rächt unzfriede. Für d Stimmig ischs öppe besser, we mir morn wieder im Hotel si🤣.    Weiterlesen

  • Manuela MichelAustralien / NeuseelandReisender
    Anzac-Hill

    Kings Canyon bis Alice Springs

    14. Dezember 2025 in Australien ⋅ ⛅ 28 °C

    Hüt het dr Wecker ersch 4:30 glüte. Am 6i si mir scho im Watarrka Nationalpark im Kings Canyon gsi u hei dert zersch dr South Rim Walk gmacht. Drna si mir no i Canyon ine gloffe.
    Nachem Packe u Verlade hei mir 5 Stund im Outo vor üs gha u si nähr guet z Alice Springs acho. Nachemne churze Stopp bim Anzac-Hill hei mir im Hotel iichecked. Am Abe hets äs feins australisches Barbecue gä, ds Highlight isch ds Känguru-Filet gsi.

    D Nachricht vom Bondi-Beach het d Busfahrt zrugg überschattet...    Weiterlesen

  • Manuela MichelAustralien / NeuseelandReisender
    Früecher Post, hüt e riiese Shopping Mall
    Immer zur volle Stund duet sech d Uhr uf u zeigt die FigürliParliament of VictoriaYarra River

    Melbourne

    15. Dezember 2025 in Australien ⋅ 🌙 14 °C

    Mir si dr ganz Tag unterwägs gsi u si guet z Melbourne acho. I ha mi nähr mit dr Evelyn troffe. Mit ihre hani uf dr Balkan-Reis z Zimmer teilt. Sie het mir d Stadt zeigt u mir si im Chinatown feins Pad Thai ga ässe.Weiterlesen

  • Manuela MichelAustralien / NeuseelandReisender
    Michela and the twins
    AC/DC LaneVictoria State Library

    Melbourne again

    16. Dezember 2025 in Australien ⋅ ☀️ 19 °C

    Am Morge si mir zum Queen Victoria Market. Es isch überraschend ruhig gsi. D Walkingtour drna hani ussegla, wülli gester scho so viel ha gseh. Drfür hani i Rueh chönne wäsche u i mim Buech läse. Am spätere Nami bini mit dr Michela loszoge zur AC/DC Lane, Victoria State Library und id QT Rooftopbar.
    Hüt isch scho z Abschieds-Znacht mit dere Gruppe gsi, wüll mir de morn dr ganz Tag unterwägs si.
    Die Reis cha me o nume i Abschnitte mache, drum isch d Route vilech chli komisch.
    Mir si gspannt uf die neue Lüt, wo mir de Übermorn wärde träffe.    Weiterlesen

  • Manuela MichelAustralien / NeuseelandReisender

    Cairns

    18. Dezember 2025 in Australien ⋅ ☁️ 26 °C

    Mir si früech abgholt worde für a Flughafe. Dr Flüger isch de aber afe 2h am Bode blibe wägeme technische Problem. Zum Glück hei sies chönne flicke u mir si nachem Mittag guet ds Cairns acho. Am Nami si mir i Pool, im Meer hets chli viel Krokis🐊.
    D Gruppe isch neu zämegsetzt. Es paar Lüt si wytergreist u Nöii si derzue cho.

    Das ischs gsi für die nächste paar Täg, da mir ab morn ke Empfang me hei.    Weiterlesen

  • Manuela MichelAustralien / NeuseelandReisender
    3Di giftligsti Pflanze im Rägewald2

    Mossman Gorge

    19. Dezember 2025 in Australien ⋅ 🌙 26 °C

    Hüt hei mir üs ufe Wäg gmacht zum Cape Tribulation.
    Mir hei unterwägs in Mossman ghalte u dert e Tour düre Rägewald gmacht. Im Iigangsbereich si mehreri grossi Spinnele gsi🙈. Dr Guide usem Stamm vo de Kuku Yalanji het üs verschiedeni Pflanze erklärt und wie sie als Stamm im Rägewald läbe. Zum Bispiel überchöme si Markierige (meh Narbe) für ihres Wüsse wo sie hei und o wytergäbe. Är het afe 4 vo 12.
    Am spätere Nami hei mir i üsi Unterkunft zmitts im Daintree-Rägewald iichecked. Gli druf si mir scho ine natürleche Pool ir Nächi gumpet. Da mir immer no im Croc Country si, isch ds Meer tabu🙂.
    Zum Znacht hets feins Känguru gä.    Weiterlesen

  • Manuela MichelAustralien / NeuseelandReisender
    2

    Great Barrier Reef

    20. Dezember 2025 in Australien ⋅ ☁️ 26 °C

    When dreams come true❤️

    Uf dä Tag hani mi scho meega lang gfreut. Mir si am Mittag öppe 30 Minute mitem Schnällboot usegfahre u nähr meh als 2h ga schnorchle. Es isch ungloublech schön gsi u nid i Bilder festzhalte. Da i ke Unterwasserkamera ha, si alli Ufnahme vo mine liebe Gruppemitglieder.
    Die andere si am Abe im Dunkle no freiwillig ga Spinnele u so luege, i ha das Gäld gärn gspart😉.    Weiterlesen

  • Manuela MichelAustralien / NeuseelandReisender
    2

    Port Douglas

    21. Dezember 2025 in Australien ⋅ ⛅ 27 °C

    Hüt si mir i däm härzige Städtli übere Märit - es hei alli verzwiiflet (oder o nid so verzwiiflet) nachem Wichtelgschänkli gsuecht🤣.
    Z Zmittag isch uungloublech fein gsi, Tempura Baramundi. Am Nami si mir wieder ds Cairns acho u hei die viele Iidrück chli la setze. Drna si mir nomal id Stadt ga ässe. Ufem Rückwäg am 10ni am Abe ischs no 29.7 Grad gsi.

    PS: chum si mir losgfahre gsi isch uf dr Strass e Kasuar (Cassowary) spaziert. Es isch eine vo de grösste flugunfähige Vögel u me gseht ne sehr sälte.    Weiterlesen

  • Manuela MichelAustralien / NeuseelandReisender
    Heiligabe mal anders ..😉Dr östlechst Punkt vo AustralieEs paar Haie...😉1Jonny isch dr ganz Mittag bi üs gsi

    Christmas in Byron Bay

    25. Dezember 2025 in Australien ⋅ 🌬 25 °C

    Gester si mir spät im Surferparadies Byron Bay acho. Nachem Iichoufe füre 25. si mir no ga Burger ässe. Drna si mir ire Bar mit Livemusig gsi, d Stimmig isch super gsi!
    Hüt morge si mir zum Cape Byron Lighthouse gloffe u so o am östlechste Punkt vo däm Land gsi. Unterwägs hei d Aussies a allne Stränd ihri Chüelboxe u Surfbrätt usglade u Wiehnachte miteme Barbecue am Strand gfiiret. Drum hei mir de das am Mittag o gmacht. Am Nami si mir nomal a Strand u am Abe hei mir versuecht, d Räste vom Zmittag z ässe - chancelos🤣.

    Happy Christmas 🎅🎄    Weiterlesen

  • 2026© FindPenguins
  • Start
  • Über uns
  • Gruppen-Tracking
  • Presse
  • Nutzungsbedingungen
  • Datenschutz & Cookies
  • Hilfe-Center
  • Impressum