E gmüetleche Tag im Hotel

Höt hani e gnüetleche Tag mehrheitlech im Hostel gha. Am Morge beni am 6i ufgstande ond als ersts e Halbstond i Wald (ech glaube es esch Rägewald). Ech ha ghofft dass so früeh am Morge e chli meh Tier wach send ond ech sie gseh. Leider hani aber ned so vell Glöck gha. Aber es hed trotzdem sehr guet do. Ech gniesse de Wald do rechtig. Es hed ganz vell verschednigi Pflanze ond öberall ghört mer d Tier. Am sebni hani de e Yoga Stond gha. Es ged i dem Hostel a de meiste Täg am Morge am 7i ond am Obe am 6i e Lektion. D Stond hed im ne Pavillon zmetzt im Wald. Es hed rechtig guet do de Tag so ruhig ond i dere Atmosphäre z starte. Nochem Zmorge hani de es paar Stond gschaffed. Ech mache emmer no es paar Sache för s Praktikum z Schwede fertig ond ha au no soscht es paar To Dos gha. Am Nomi hani eigentli welle ane Strand laufe. Ufem Weg hätti aber dor e Barriere mösse woni zemlech secher ned hät döffe. Drom hani omkehrt ond be stattdesse nomol i Wald. Ond das hed sech glohnt. Ech ha ganz lang ond vo zemlech nöch chönne i es paar Äffli zueluege. Leider hani aber d Kamera ned debi gha ond ha nor metem Handy chönne fötele. Zom Znacht hani nomol is Restaurant vom Hostel welle wels am erste Tag so guet gsi esch. Das woni das mol bstellt ha esch chli weniger guet (ond vorallem chli scharf) gsi.Read more