Träum wärded wohr im indigene Dorf

Höt Morge hani nomol früeh uf müesse. Vom 5i bis am 9i hani es Meeting online met Lüt us Europa gha. För es vierstöndigs Meeting esch das scho chli früeh am Morge gsi, deför hanis am 9i de au scho döre gha ond de Tag hed chönne starte. De ursprönglech Plan höt a Strand z goh hed leider ned klapped. Mer hend keis Auto gfonde womer im ne verhältnismässige Pris hätted chönne e Tag miete. Drom hemmer chorzfrestig e Planänderig gmacht ond send stattdesse uf Matambu. Das esch s einzige Dorf vo de indigene Bevölkerig i dere Region. Sie send Teil vo de Chortega, wo ursprönglech vom Norde (Nicaragua) chömed. Mer send am 10i be eus dehei abgholt worde ond rechtig Hojancha ond de uf desi Siite usem Dorf rechtig Matambu gfahre. Det acho semmer vom Ezequiel i Empfang gno worde. Er hed eus höt zeigt wie mer die traditionelle Vase vo ehne töpfered. Ech ha mi onglaublech uf das gfreut wel töpfere hani scho lang einisch welle. Bevors aber los gange esch semmer alli zäme a Tesch ghocked ond hend eus e chli kenne glehrt. Dezue hemmer es traditionnells Getränk tronke: Gmahlne Mais wo met Kakao, Zimt, Zucker ond Milch gchoched werde. Es esch sehr deckflössig, sehr mastig aber au sehr guet gsi. Ond tronke hemmers us chline Holzschäleli wo us de 'Fröcht' vom ne Baum gmacht send wos au be eus i de Unterkonft vell hed. Wo mer ustronke hend eschs au scho los gange. Eine nochem andere hemmer döffe ad Töpferschibe hocke ond (met meh oder weniger Hilf vom Ezequiel) eusi eiget Vase töpfere. Ech ha mi zemli müesse konzentriere aber es hed mega vell Spass gmacht ond ech ha s Gfühl es esch ned s letzt Mol gsi woni öpis töpfered ha. Im Aschloss hemmer no recht vell gredt. Er hed eus sogar e chli vo de Konflikt verzellt wos ged zwösche de indigene Bevolkerig ond em Rest. Aber ergendwenn hani de doch gmerkt dasi scho recht lang wach bi ond langsam nömme mag uf spanisch zuelose... Vorem Heigoh hed er eus no sis chline Gasthüsli zeigt woner baut hed. Es esch es chlises Holzhüsli metere einzigartige Sicht id Natur ond es wörd sech secher guet lo schlofe det! Weder dehei acho hemmer eus direkt öpis Zmittag gmacht, mer send nämli de doch relativ lang onterwegs gsi. De Rest vom Tag esch relativ ruhig vergange ond jetzt beni au müed för is Bett.Read more