E Tag voller Snacks

Höt esch mol weder vell los gsi in El Toledo. De Emel, ehm wos ghört hed e Klassezämekonft gha. Drom hemmer de Gmeinschaftsbereich ond d Chochi höt nor begränzt chönne bruche ond hend zom gröste Teil weder us eusem Zimmer gschaffed. Ech ha e Stuel as Fenster gstellt ond vo det us gschaffet. Debi hani au laufend chöne d Leguan ond anderi Echsli beobachte wo dosse uf de Stei omegspaziert send. Öbere Mittag hend es paar vo eus gnueg vo de Hitz gha ond mer send eus chorz i de natürleche Pools go abchüele. Bim ne Versuech zom go es Kaffi hole beni am Nomi i de Chochi stecke blobe ond ha de Ivania gholfe Chäs-Sticks z mache. Die hed sie för eus ganz am Afang scho einisch gmacht ond mer hend sie alli mega fein gfonde. Drom hani die Chance gnötzt ond glehrt wie mer sie macht. Eigentli ganz eifach, nor Chäs riibe, met Maismehl, Wasser ond Salz mesche, de rogele ond im Öl abrötle. Die wärded meistens zom Kaffi gässe. Chli speziell wel mer jo eher öpis Süesses wörded näh aber ech be trotzdem e Fan. Ond es hed sech au glohnt i de Chochi gholfe z ha. E chli spöter hed mer d Ivania nämli no es anders Dessert brocht wo sie gmacht hed: En Art e frittierti Tortilla met Sirup drof. Fein, aber noch Reste Pizza zom Zmittag, de Chäs-Sticks ond dem Dessert bruchi zom Znacht de glaubs es Rüebli ;).Read more