Ab dur d Wüesti

Nachere mässig erholsame Nacht (d Welle sind so unglaublich luut gsi) ischs am Morge wieder los gange. Mer sind richtig Innland gritte dur mehreri chlini Dörfer und Maisfelder. Ageblich hends hie i de Region vell Wasser unter de Erde. Sie pumped das ufe und bewässered so d Felder. D Energie für das chunnd vo Solaralage. Es isch chli es komischs Gfühl wennd dur absoluts Niemandsland ritisch und denn ufeinisch z mitzt imne Maisfeld stahsch 😂
Churz vor em Mittag simer wieder am Meer acho, dasmal ned Strand sondern Klippene. D Ross hend e Pause becho, d Tiny hed sogar es richtigs Mittagspfüsi gmacht a de Sunne. Nach de wohlverdienti Mittaspause ischs de Klippe entlang wiiter gange und mer hend en richtigi Wüeste erfahrig gmacht mit all dem Sand. Mer sind zimli flott unterwegs gsi, fast immer am trabe und gallopiere. Mer hend d Ross sogar zwei drü mal richtig chönne lah renne, es unglaublich tolls Gfühl. Mer sind um die halbi siebni ume bim Hotel acho, hend d Ross versorgt und sind go dusche. Eini vo de beste duschene woni je gha ha, i de Höhli gester heds nemli nur chalts Wasser und en Lumpe gäh 😅 Nach em superfeine z Nacht (mer hend alli unglaublichi Mengene gässe), heds zimli gli gheisse ab is Bett.Læs mere