Island | FindPenguins

Newest first

Trip start
May 22, 2023
Island
Reykjavik
May 22, 2023 in Iceland ⋅ ☁️ 7 °C
Hüt hed üses Abentüür gstartet, d Rucksäck sind packt und bis obe gfüllt mit warme Chleider. Nacheme fast pünktliche Boarding in Züri hemer de no 30min im Flugi müesse warte bis es losgange isch. Nach 4h simer de in Keflavik acho. Det hemer nach einigem sueche üsi Autovermietig gfunde und hend üs scho gli drufabe uf e Weg richtig Reykjavik gmacht. Im Fiirabe Verkehr hed mich d Mischi souverän durd Stadt navigiert bis vor üsi Hostel Türe. Nachme schnelle ichecke und ipuffe im Hostel hemer üs ufd Suechi nach Ässe gmacht, da mer beid die 2h Ziitverschiebig zimli gmerkt hend und riiiiese Heisshunger gha hend. De heds no e chline Verdauuigsspaziergang gäh am Meer entlang. Jetzt liggemer im Bett und versuech de öppe einisch z schlafe, fühlt sich jedoch no bitz komisch a wills verusse immerno Taghell isch (am 21.30Uhr).
De Mischi ihres Fazit vom Tag: De Fisch hie isch eifach super lecker!🐟Read more
See translation
3 likes
Island
1 1
4 Jahresziite - 1 Tag
May 23, 2023 in Iceland ⋅ 🌬 3 °C
Nachere lange aber nur mässig erholsame Nacht im Hostel, simer früeh uf und Ready to go gsi. Eigentlich wär üse Plan gsi go Wandere aber s Wetter hed ander Plän für üs gha. Nachdem mer vo verschiednige Siite Sturm- & Hagelwarnige becho hend, hemer üs für en Citytour entschiede. Zerst hemer de farbig Teil vo Reykjavik agluegt, es hed a fast jedem Huus u tolli Graffitis gha. Na simer die gigantischi Hallgrímskirkja go aluege. Det hemer bis i Glocke Turm ufe chönne und so die ganz Stadt vo obe gseh. Bi stetig zuenehmendem Wind hemer üs uf e Weg is Penismuseum gmacht und nach genauer beguetachtig vo de usgstellte Objekt hemer üs no es richtig tolls zMorgä gönnt. Uf em zrugg Weg hemer no schnell en abstecher id Harpa gmacht (Operehuus vo Reykjavik). Denn hemer welle go Wellnesse, will de Wind mittlerwiile so starch gsi isch das sogar laufe müehsam worde isch. Leider hemer nach knappe 10min im Wasser s Bad wieder müesse verlah will sie ufgrund vom Wetter die ganz Alag hend müesse zue tue. Darum hemer eus denn uf e Weg nach Olafsvik gmacht. Uf de Fahrt det ane hemer alles erläbt, Sunne, Räge, Sturm und Graupel. Und mängisch sogar alles glichziitig. Nachdems üs in Olafsvik au fast umgwindet hed hemer üs für es früehs zNacht und en gmüetliche Abig im Hotel entschiede.Read more
See translation
cool! [Martina]
5/25/23Reply
😂 [Martina]
5/25/23Reply
4 likes
Island
1
Wind, Wind und no meh Wind
May 24, 2023 in Iceland ⋅ 🌬 3 °C
Vo Olafsvik us semmer de Snæfellsjökul Nationalpark go erkundä, ufem Weg dethi semmer bimene unglaublich schöne Wasserfall verbi cho wo mer richtig eis uf Touri gmacht hend und bitz sind go umechraxle. Na simer amene ultra usgstorbene Dorf verbie cho, wo deför umso meh Graffiti gha hed. Aschlüssend semmer uf Lüchtturm suechi und hend 2 gfundä, be beidnä heds steile Klippene und no meh Wind gha und mer hed gseh wies Meer gäge Klippe schlahd. Dur das heds meh als ein unfreiwilligi Salzduschi gäh. Dementsprächend chalt eschs gsi und miär hend üs wieder ufä retour Weg gmacht, wos de in Olafsvik z'Mittag gä hed. Nach afänglichä unsicherheitä heds fahrä uf de ultimativ holprigä Strassä richtig freud gmacht und die Ussicht...ohne Worte..! Und so semmer noch 3h fahrä ergendwo im Niergendwo acho wo üsä Schlofplatz esch.Read more
See translation
😂😂schaffid Ihr scho [Martina]
5/25/23ReplyTranslate
5 likes
Island
1
S westliche Endi vo Europa
May 25, 2023 in Iceland ⋅ 🌬 6 °C
Ja de wind hed eus au ide Nacht ned in Rueh gloh und hed e riese Lärm verastaltet. Darum ischs guet gsi, hemmer eineweg gli uf welle will mer üs für Hüt es riesigs Programm vorgno hend. Mer hend üs uf e Weg zum westlichste Punkt vo Europa gmacht. Und was für en Weg das gsi isch, dur malerischi Landschafte, Schiffswracks und a Sandstränd verbi uf Strasse wo, naja de Name Strass ned so ganz verdiened (en Emmithaler hed weniger Löcher😂). Nach knappe 3h simmer de endlich dete acho und hend üs chönne d Füess vertrampe. De Steilklippe entlang bis zum höchste Punkt (441m.ü.M.) simmer gange und währed em laufe heds immer wieder ganz vell Vögel zum beobachte gäh. Bi de erste paar Höhemeter heds di uf em hi- und zruggweg fast devo gwindet, vell Lüüt hend det denn wieder kehrt, zum Glück für üs. Mier hend d Klippene nur mit de Vögel müesse teile. Aber die Ussicht, WOW! Na hemer üs uf e Weg in richtig Holmavik gmacht und sind uf halber Strecki am Wasserfall Dynjandi verbi cho. Obe 30m breit und unde 60m, also en riiiese Wasserfall. Und unglaublich schön, also simer det au nomal bitz uf wanderschaft. Nomal 3h spöter (nach insgesamt 9h Autofahrt) simer endlich in Holmavik acho. Hie simer is Resti go zNacht ässe und jetzt liggemer völlig erledigt und vollgässe uf em Bett und gönd de öppe einisch go pfuuse.Read more
See translation
Traveler 😍 gsed scho verlockend us zum bade
5/26/23ReplyTranslate
4 likes
Island
Chilltag
May 26, 2023 in Iceland ⋅ 🌧 8 °C
Hüt hemer zum erste Mal richtig usgschlafe und in aller Rueh zmörgeled. Eigentlich hemer Holmavik no welle go erkunde aber es hed so grägnet das mer is Auto ghocked und losdüsed sind. Uf üsem Weg heds in Sælingsdalslaug en heissi Quelle gha. Mer hend denkt mer nutzed s schlechte Wetter grad us und lueged wie warm die Quellene wüki sind. Mer chönnd sege, sie sind wüki warm. Sehr warm. Nach dem d Mischi einiges a überzügigschraft brucht hed mich wieder us dem Pool z becho simer wiitergfahre zum Hvítserkur. Det simer am Meer entlang chli go laufe, wills nachme ziitli aber wieder agfange hed rägne simer zrugg zum Auto. Nach churzer Autofahrt simer de au scho in Blönduos acho, wo üsi hütigi Unterkunft isch. ZNacht hemer paar Dörfer wiiter imne super schöne Resti gässe.Read more
See translation
6 likes
Island
1
Sunne, Schnee & Meer
May 27, 2023 in Iceland ⋅ ☀️ 4 °C
..und scho isch Tag 6 vo üsem Abentüür.! Bi iischalte Temperature, Neuschnee uf de Berge und strahlend blauem Himmel hemer üs uf e Weg gmacht. Hüt esch vor allem für mich es Highlight agstande, nämmlich üsi zwei Stündigi Riittour mit Islandpferd. Nachdem d Mischi e churzi Instruktion erhalte hed wie mer ufme Pferd obe lenkt und bremsed isch es au scho los gange. Über Stock und Stei, quer dur es Hochmoor und sogar 2x dur en See. Nach vell Knuddeleinheite und Lobeshymne für die unendliche geduldige Rössli hemer üs wieder uf e Weg gmacht. Mier hend üs nochemene schnelle z'Mittag zunere heissä Quelle begäh, wo üsi Tourleiterin bem Ritä empfolä hed. Die Quellene sind ächt toll gsi und hend mega guet tah (bitz Prävention für de Mischi ihre Muskelkater vom Riite), so dass mer fast 2h det verbracht hend. Nachher ischs Ziit worde zum witerzieh richtig Unterkunft, es isch wieder mal e super schöni Autofahrt gsi - nachdem mer hüt Morge es bitz dur de Schnee sind - hemmer ufem Wäg d Sunnä mit em Meer und de verschneite Berge im hintergrund usennig gnossä. D Unterkunft vo hüt isch wohl bis jetzt die Best, inklusive Ussicht und Whirpool! Zum zNacht hemmer eus nomol 5min is Auto gsetzt und hend imene "Schiff" de Perfekti Abschluss vom Tag gnossä! Ah nei moment s Badä im Whirpoool dörf mer ned vergässä - s Tüpfli ufem i 🤗Read more
See translation
schnee juhe ! [Martina]
5/29/23ReplyTranslate
5 likes
Island
Usflug is All
May 28, 2023 in Iceland
Gschlagni 12h semmer hüt unterwägs gsi! De ersti Stopp am Morgä esch in Akureyri gsi, ja so früeh das es fast nu kei Mönschä unterwägs gha hed, so hemmer "d'Stadt" für üs gha und hend es gmüetlichs Spaziergängli via Botanischä Gartä und Bäckerei gmacht. Noch de sterchig semmer zum 1. Wasserfall: Godafoss. Wie emmer send Wasserfäll toll doch für üs biz z touristisch drum hemmer eus de rasch ufe witeri Wäg gmacht. Verbie am Myvatn See semmer de zu Stopp Nr. 3 s Geothermalgebiet Hverir und Namaskard cho, wo mer e chlini erkundig uf de "Venus" gmacht hend. De Schwefelgruch hed üs fast hineusegrüert darum simer ufe nächst besti Berg gflüchtet. Nach unglaublich steilem ufstieg, heds üs dobe fast weggwindet. Aber d Ussicht ischs allemal wert gsi.
So de hemmer eus z bädele in Husavik rechtig verdienet und hend de halb nomi im Thermal Bad rechtig gnossä. Entspannt hemmer eus de zum nöchstä Tourispot: Wasserfall Selfoss und Dettifoss ufgmacht und die send wörkli idrücklich gsi! De Dettifoss esch 100 Meter breit und 44 Meter gheit er id tüüfi. Ufem Wäg zu de Wasserfäll hemmer eus wie ufem Merkur gfühlt. Stei, Stei und nomol Stei.
Aschlüssend hemmer nu e zwüschä halt bem Asbyrgi Canyon gmacht (vo obä gsehds us wie es Huufise) inkl. emene enspannte Spaziergängli und churzer Chraxeltour. Denn los richtig Kopasker, denn det verbringä miär die hütgig Nacht! So und jetzt semmer beidi rächt müed und freued eus gli eisch ufs Bett!Read more
See translation
4 likes
Island
Summerfeeling in Island
May 29, 2023 in Iceland ⋅ ☁️ 16 °C
Früsch erholt nach einige Stund Schlaf, hemer alles zämepackt und sind an Strand go zMorge ässe. Herrlich wenn mer so chann i Tag starte! Denn simmer wiiter am Meer entlang zum nördlichste Punkt vo Island. D Strass det ane hemer üs mit ganz vellne Vögel müesse teile, wo s Gfühl gha hend das sig de ideali Platz für es Schlöfli. Churz drufabe simer zum Arctic Henge cho. Nach bestuunig vo dene gigantische Steitor simer wiiter. Und zwar zu üsem eigentliche Highlight vom hütige Tag, de Stuðlagil Canyon. Nach langer Fahrt dur absoluts Niemandsland und stetig wärmere Temperature simer de bim Parkplatz acho und das bi unglaubliche 16°C. Vo det us hed e gmüetliche 30min Spaziergang am Fluss entlang zu üsem Ziel gfüehrt. Mier hend üs uf em Weg dethi no gwunderet wieso alli Lüüt uf dem super Weg Wanderschueh a hend, wo mer de dete gsi sind hemers gseh. Tja, mit es bitz umestägere und kreativer Wegsuechi hemers glich mit trochne Füess gschafft. D Schlucht und de Fluss sind würklich atemberaubend schön gsi. Mer sind chli verwiiled und d Mischi isch ufd Suechi nach em perfekte Fotiplatz. Und hed en gfunde! Wo mer zrugg bim Auto gsi sind hemer üs entschiede no gmüetlich go Poste und selber zNacht zmache und zwar Salat. Mer hend üs beid unglaublich über bitz Grüenzüüg gfreut nachere Wuche Fish'n Chips und Pizza. Jetzt gnüssemer no de Abig bi herrlicher Ussicht i üsere Unterkunft.Read more
See translation
4 likes
Island
1
Tour de Foss
May 30, 2023 in Iceland ⋅ ☀️ 9 °C
Nachdem mer hüt gmüetich zmörgeled und üs Sandwich fürs zMittag gmacht hend, simmer ufd Suechi nach Wasserfäll (im isländische Foss). De ersti Stopp isch s härzige Dörfli Seyðisfjörður gsi. Uf em Weg det hi sind üs plötzlich ganz vell Autos mit unterschiedlichste Nummereschilder entgägecho. Vo Norweger über Schwiizer bis Spanier heds alles debi gha. Wo mer im Dorf acho sind isch üs denn au klar worde wieso, d Fähri us Dänemark isch grad acho und es sind immer no meh und no meh Lüüt usegfahre. Darum hemer nur ganz e churzi Dorfbesichtigung gmacht und sind de wieder wiiter. Nämlich zum 1. Wasserfall, em Gufufoss. Will de aber direkt neb de Strass gsi isch unds dank de Fähri vo Touris nur so gwimmlet hed hemer nur churz es Foti gmacht und sind de grad wieder wiiter. Churz drufabe simer bim Parkplatz vom 2. Wasserfall acho und nach öppe 20min berguflaufe hemer ne in voller Pracht vor üs gha, de Fargadafoss. Nachdem mer üs en churzi Nebelduschi gönnt hend isch wieder retour zum Auto und ab zum nächste Wasserfall gange. De Kliffbrekkufoss isch extrem abgläge imne wunderschöne Tal. D Strass det hi natürlich mal wieder ned asphaltiert und s Schmelzwasser hed au sehr düütlichi Spure hinderlah. Aber mittlerwiile simmer üs das Schotterpiste fahre so gwöhnt, dass es richtig Spass macht. Wo mer bim Wasserfall acho sind hemer no e churze Weg uf üs gno zumne richtig erkunde, da mer dur en Fluss hend müesse und mier mal wieder ned die richtige Schueh agha hend, hani mini halt abzoge und bi de restlich Weg Barfuess gloffe. Wieder zrugg bim Auto hemer d Abweseheit vo jegliche andere Mensche usgnutzt und zMittag gässe. Besseri Ussicht cha mer ned ha! Guet Sache packt und wieder retour unter Mensche und zwar zu Wasserfall 4 & 5 de Litlanesfoss und de Hengifoss. De Hengifoss isch de viert höchsti Wasserfall vo Island und wirklich sehr beidruckend. De 30min Marsch de Berg duruf hed sich mal wieder glohnt. Denn hemer üs in richtig Djupivogur uf gmacht, üsem hütige Endpunkt. Uf em Weg det hi hemer en Abstecher zumne Lüchtturm gmacht, als chlini Abwechslig. Wiiter ischs gange zum sechste und letzte Wasserfall vo hüt, em Folaldafoss. Nomal en wunderschön glägne Wasserfall. Nach churzer Autofahrt simer de au scho in Djupivogur acho. Mer hend no en gmüetliche Abigspaziergang gmacht und sind s Dorf es bitz go erkunde, leider heds kein Weg zum Djupivogurer Lüchtturm gäh, aber mer hend en us de ferni chli bewundered.
Was üs hüt am meiste beidruckt hed, isch die unendlichi Mengi a Wasser wos hie gid. Zum Teil heds all paar Meter wieder en Wasserfall wo de Berg abflüsst, mer chunnd mit luege fast ned hinedri. Würklich unglaublich schön und au sehr beidruckend.Read more
See translation
Dä sinder eisch suber 🤪 [Martina]
6/5/23ReplyTranslate
3 likes
Island
Vo Wal zu Rentier - hüt hemer alles gseh
May 31, 2023 in Iceland ⋅ ☀️ 10 °C
Am Morge simer gli einisch uf und los, zMorge heds im Auto gäh. Üse ersti halt isch de Strand Lækjavik gsi. Chum det acho schreit d Mischi uf, bis ich no halb verschlafe tschegge um was es gahd isch de Wal wo sie gseh hed leider scho wieder verschwunde gsi. D Lüüt um üs ume hend sich meh fürd Vögel interessiert, da mier die aber mittlerwiile bestens känned hemer en gfühlti Ewigkeit ufs Meer use gstarrt. Und tatsächlich hemer no e churze Blick uf e Walflosse und en Chopf chönne erhasche. Na ischs wiiter gange zum Hvalnes Lüchtturm, üs ischs det aber viel zu touristisch gsi darum simer grad wieder wiiter gfahre. Und was hemer uf einisch am Strasserand gseh? Ein Rentierherde nach de andere. Mer hend no e churze Abstecher zum Skutafoss gmacht, emene u schön glägne Wasserfall mit Höhli und chlinem Pool voredra. De simer wiiter zum Wikingerdorf in Stokksnes. Das hed üs nome halb so fest interessiert wie d Islandpferd wo die aktuelle Bewohner vo dem Dorf sind. Bi strahlendem Sunneschii hemer üs uf em schwarze Lavasandstrand no chli ustobt und d Füess bädelet. De heds no e churze Abstecher zum Lüchtturm gäh, wo ehrlichgseid ned so sehenswert isch, defür heds aber ganz vell Robbe uf de Felse voredra gha. Nach langem bestuune simer de wieder wiiter. In Höfn hemer en churzi Pause und en Shoppingrundi igleit. Nachere 20min Autofahrt simer de bi de Hoffell Hot Tubs acho und hend s warme Wasser mit em Blick ufs Meer und de Gletscher gnosse. Mer hend üs mal wieder komplett lah ufweiche aber mer muess säge, 11°C sind scho fast zu warm für 40° heisses Wasser. Na simer zum absolute Highlight vom hütige Tag, em Jökulsárlón Gletschersee mit em Diamond Strand voredra. S Wetter hed perfekt mitgspielt und darum heds eis ums ander Foti gäh vo dene gigantische iisschollene. Mer hend au wieder ganz vell Robbe entdeckt wo zwüsched dene iis Gigante umegschwumme sind, aber gnueg lang still ha für es Foti hends nie welle. Na hemer gmüetlich verrusse i de Sunne zNacht gässe und sind de i üsi hütigi Unterkunft. Det packemer jetzt alles e chli um und möched üs parat für morn, will denn gahds uf e Gletscher.Read more
See translation
Traveler~ Mama 🫶
6/1/23Reply
5 likes
Island
Zrugg id iiszit
June 1, 2023 in Iceland ⋅ ☀️ 14 °C
Hüt simer voller Vorfreud am Morgefrüeh uf, hend zmörgelend und Sandwichs gmacht und all üsi Sache packt fürd Gletschertour. Währed em packe hemer üs no Sorge gmacht öb mier echt gnueg guet usgrüstet sind und wie sträng das es ächt wird. Wo mer üs de churz drufabe mit 12 anderne i es Büsli quetscht hend isch klar gsi, das ganze wird en Spaziergang für üs. Es paar Lüüt sind ernsthaft in Turnschueh und Jeans dete gstande 🤨 Nachere sehr sehr holperige Hifahrt und ca. 15 min. gmüetlichem Marsch und vellne Infos zum Gletscher, hemmer de Instruktione übercho wie mer d' Stigise richtig aleit und de eschs los gange uf e Gletscher. De heisst übrigens Breidamerkurjökull, absolut unussprechbar, sogar für üse Guide de Michael. De hed üs defür au erklärt, das de Gletscher ned dräckig isch (was mier s Gfühl gha hend) sondern dass das Vulkanäsche isch. Diversi Windmühlene (Löcher im iis) hets z betrachte gäh, bis mer de ine Gletscherschlucht hend dörfe, was scho es zimli cools feeling gsi isch! Det hemer uf winzige Weg richtig is iis ine chönne und es chlises Fotoshooting heds au no gäh. Währed em warte dass alli ihres perfekte Gletscherfoti mached hemer unter vielne niidische Blick üsi Sandwich gässe und d Ussicht gnosse. Leider ischs de scho gli wieder retour gange. Da mer chli knapp im Ziitmanagement gsi sind hed de Michael vollgas gäh uf de holprige "Strass". Mier hend z hinderst im Büsli emel e richtigi Achterbahnfahrt gha. Na simmer wiiter zum Gletschersee Fjallsárlón, au de isch wieder idrücklich gsi, so dass d Mischi gfundä hed sie wetts mal uf em Chopf aluege. Churz drufabe ischs wiiter zum Múlagljúfur Canyon, wo mer de (meh oder weniger) usversehe en 3/4 stündigi Wanderig zum Wasserfall gmacht hend. Aber es hed sich meh als gloht, wo süst gsehd mer Berge, zwei Wasserfäll, en Schlucht, Schnee, Gletscher, iisschollene in Gletschersee, Meer und kilometerlange schwarze Sandstrand uf ei Blick. Und das no bi strahlendem Sunneschi, absolut perfekt! Wieder zrugg simer de doch scho bitz müed gsi und langsam au chli in Ziitdruck cho, darum hemer üses Programm bitz abkürzt. Aber ein Wasserfall hemer glich no müesse go aluege. Das isch de Grófarlækjarfoss gsi, idrücklich bi dem isch gsi, dass es rundume ganz vell Lupine und Löwezah gha hed. Wieder zrugg im Auto hemer die letzt Etappe no in Agriff gno bis zu üsere hütige Unterkunft. Det hemer schön verusse a de Sunne zNacht gässe und möched üs jetzt no e gmüetliche Abig.Read more
See translation
4 likes
Island
1
Mission: zrugg id Zivilisation
June 2, 2023 in Iceland ⋅ ☁️ 10 °C
Nachme gmüetliche zMorge i üsere Unterkunft hemer d Mission vom Tag gstartet: sich langsam wieder a Menschemengene gwöhne. Darum simer grad als ersts d Fjarðarárgljúfur Schlucht go aluege. Schön, aber mer hend halt scho so unglaublich tolli Sache gseh, dass es üs ned so vo de Socke ghaue hed. Wo denn e grosse Car cho isch, sind mier wieder wiiters (so vell zu üsere Mission). Nächsti Halt isch d Hjörleifshöfði Höhli gsi, besser bekannt unterem Name The Yoda Cave. Det simer no bitz go umestägere und hend de Blick über e unendlich wiiti Strand lah schweife. Churz drufabe simer de in Vik acho wos e churzi Shoppingtour gäh hed. Na simer a Reynisfjara Strand. Wo mer de Parkplatz und d Cars gseh hend, hätemer am liebste umtreit, aber mer hend en Mission gha! Also simer mit allne andere Mensche am Strand chli go spaziere und hend det zMittag gässe. Wiiter ischs gange zum Dyrhólaey Felse, eigentlich de Papageitaucher Spot, aber leider hemer e keini gseh. Defür aber wieder ganz viel Mensche. Also wieder ab is Auto und wiiter ischs gange zum Sólheimajökull Gletscher. E schöni Gletscherzunge wo sich de Berg abe windet und tragischerwiis sit 1930 fast 1.5km zruggzoge hed. Überall uf em Gletscher hedmer Mensche gseh und üs isch au ei Gruppe nach de andere entgäge cho für uf e Gletscher, die einte hend sogar no Turnschueh a de Füess aber Stigiise i de Hand gha. Mier sind wieder wiiters und nachere churze Autofahrt bim Skógafoss acho, det heds üs was Menschemengene agahd de endgültig üsghänkt (Mission erfolgriich gschiteret) und mier hend üs zum bitz abglägnere aber vell schönere Kvernufoss zrugg zoge. Vo det us simer direkt zum nächste Wasserfall, em Íráfoss. Dur das sind üsi soziale Batterie wieder so wiit glade gsi, dass mer wiiter sind zum Seljalandsfoss. Mer sind dra verbi ghuscht, hend en Hindernis Parkour um d Mensche gmacht und sind schlussendlich bim Gljúfrabúi glandet. Das isch en Wasserfall wo inere Höhli abechunnd, sehr beidruckend und vor allem sehr nass. Nach dere churze Duschi simer zum erste Mal hüt bitz e wiiteri Strecki gfahre. Bis zum nöchste Wasserfall em Hjálparfoss und s beste isch gsi, mer sind absolut eleige gsi. I dere Einsamkeit simer no schnell es paar alti isländischi Torfhüttene go aluege und de bi üsem Highlight vom Tag glandet. Em Háifoss, wieder mal en Wasserfall. Aber was für eine, de höchsti Wasserfall hie i de Highlands vo Island und mitere traumhafte Ussicht is Tal. Zrugg ischs mal wieder über en holprigi Schotterstrass gange zu üsere Unterkunft in Holaskogur. Es isch eigentlich es grosses Hostel, aber da d Saison erst gstartet hed hemer s ganze Hostel für üs eleige. Ned emal Personal heds ume, zahlt hemer hüt Nami bi de Bsitzerin diheime. Mier gnüssed jetzt no en letzte Abig d Rueh und Abgschiedeheit bevors Morn de wieder nach Reykjavik gahd.Read more
See translation
mou gadächi äh Wasserfall 😳 [Martina]
6/5/23ReplyTranslate
3 likes
Island
S letzte Mal...
June 3, 2023 in Iceland ⋅ ☁️ 9 °C
In letzti volli Tag hemmer hüt gstarted. Zerst hemmer gmüetlich s letzte z Morgä gno i dem leere Hostel und hend eus de uf e Weg gmacht, ersti Halt: Hot Pot. Es letzts mal go Bädele. Es hed zwar es paar Lüüt gha, aber es hed mehreri Pools gha und so hemers numal so richtig gnosse. Nach dem gmüetliche Start, simer zunere Schlucht mitme Fluss wo bekannt für sini grüenlichi Farb isch, Brúarhlöð. Det hemer de per Zuefall grad anere Gummiboot und Kajak bergig chönne biwohne. Sind schlussendlich emel alli meh oder weniger trocke a Land gsi. Nächsti Halt isch de Gullfoss gsi, det simer wieder i de Tourimasse inne glandet, darum simer nume schnell go spienzle. Churz drufabe simer bim Geysir acho und hend ne sogar ganzi vier Mal gseh id Luft flüge. Aber alles i allem hemer d Schwefelschlammkrater bim Myvatn See beidruckender gfunde. Wiiter ischs de zum Nationalpark Thingvellir gange. Det hemer zum letzte Mal en Wasserfall agluegt, de Öxarárfoss und sind denn zum Ussichtspunkt gloffe. Det gsehd mer die Eurasisch und die Nordamerikanisch Kontinentalplatte uf ein Blick und au de Riss wo vo Jahr zu Jahr grösser wird. Denn simer für die letzti Etappe wieder igstiige und zrugg uf Reykjavik gfahre. Det hemer de s Auto no schnell chli entschlammt und üs de einisch quer durd Stadt zum hütige (und letzte) Hostel begäh. Will de au scho wieder siebni gsi isch, simer ufd Suechi nachme Resti gange und sind zum Glück au grad fündig worde. Imne chline und gmüetliche Resti hemer es uu feins letzts zNacht gnosse. De heds no e churze Spaziergang und es GROSSES ipacke, umruume, früsch packe gäh bis denn alles wieder flugbereit im Rucksack verstaut gsi isch. Und jetzt gahds de öppe gli einisch is Bett, will morn müemer richtig früeh wieder uf.Read more
See translation
2 likes
Island
1
Heicho
June 4, 2023 in Iceland ⋅ ☁️ 9 °C
Nachere sehr turbulänte Nacht, s Hostel stahd direkt im Usgangsviertel vo Reykjavik, simer u früeh uf und hend üs us em Hostel gschliche. Wieder bim Auto hemer üs a die letzt Autofahrt zum Flughafe gmacht, dur es absolut usgstorbnigs Reykjavik. Au verständlich am Sunntig Morge am 06.30 Uhr 😅 40min. spöter simer bim Flughafe acho. Leider heds bi de Autorückgab no bitz Diskussione gäh, simer mal gspannt was det no usechunnd.. nach zMörgele und churzem Shopping Trip am Flughafe simer am 10i is Flugzüüg igstiige und vier Stund spöter, am Nami am vieri i de Schwiiz wieder usgstiege. Und wie warm das es hie isch, jesses! Aber bim herzliche Empfang hemer das scho wieder vergässe gha. Und jetzt sind die 2 Wuche leider endgültig verbi.Read more
See translation
schön sinder wieder guät dr Heimä a cho [Martina]
6/5/23ReplyTranslate
2 likes

Trip end
June 4, 2023