S letzte Mal...

In letzti volli Tag hemmer hüt gstarted. Zerst hemmer gmüetlich s letzte z Morgä gno i dem leere Hostel und hend eus de uf e Weg gmacht, ersti Halt: Hot Pot. Es letzts mal go Bädele. Es hed zwar es paar Lüüt gha, aber es hed mehreri Pools gha und so hemers numal so richtig gnosse. Nach dem gmüetliche Start, simer zunere Schlucht mitme Fluss wo bekannt für sini grüenlichi Farb isch, Brúarhlöð. Det hemer de per Zuefall grad anere Gummiboot und Kajak bergig chönne biwohne. Sind schlussendlich emel alli meh oder weniger trocke a Land gsi. Nächsti Halt isch de Gullfoss gsi, det simer wieder i de Tourimasse inne glandet, darum simer nume schnell go spienzle. Churz drufabe simer bim Geysir acho und hend ne sogar ganzi vier Mal gseh id Luft flüge. Aber alles i allem hemer d Schwefelschlammkrater bim Myvatn See beidruckender gfunde. Wiiter ischs de zum Nationalpark Thingvellir gange. Det hemer zum letzte Mal en Wasserfall agluegt, de Öxarárfoss und sind denn zum Ussichtspunkt gloffe. Det gsehd mer die Eurasisch und die Nordamerikanisch Kontinentalplatte uf ein Blick und au de Riss wo vo Jahr zu Jahr grösser wird. Denn simer für die letzti Etappe wieder igstiige und zrugg uf Reykjavik gfahre. Det hemer de s Auto no schnell chli entschlammt und üs de einisch quer durd Stadt zum hütige (und letzte) Hostel begäh. Will de au scho wieder siebni gsi isch, simer ufd Suechi nachme Resti gange und sind zum Glück au grad fündig worde. Imne chline und gmüetliche Resti hemer es uu feins letzts zNacht gnosse. De heds no e churze Spaziergang und es GROSSES ipacke, umruume, früsch packe gäh bis denn alles wieder flugbereit im Rucksack verstaut gsi isch. Und jetzt gahds de öppe gli einisch is Bett, will morn müemer richtig früeh wieder uf.Read more