Polarchreis Pirate | FindPenguins

Newest first

Trip start
March 13, 2024
Polarchreis Pirate Traveler
Ab in Norde
March 13, 2024 in Norway ⋅ ⛅ -7 °C
Bi Rege und Früehligstemperature simer in Züri is Flugi igstige. Bi wunderbare Minustemperature und Schnee in Tromsø wieder usgstige. Mer hend üs grad heimisch gfühlt.
Nachere churze Busfahrt und elends müehsamer Schlepperei (mer hend sooo vell Sache debi) simer i üsere Unterkunft acho. D Ussicht isch en Traum, mer gsehd direkt an Huusberg vo Tromsø. Will mer ned grad im Zentrum sind hemer üs für en gmüetliche Abig und es selber kocheds zNacht entschiede und gönnd de öppe einisch go ligge.Read more
See translation
TravelerGeniesst es!!
3/15/24ReplyTranslate
TravelerDanke, möchemer 😊
3/15/24ReplyTranslate
5 likes
Polarchreis Pirate Traveler
Tromsø - Senja
March 14, 2024 in Norway ⋅ ☁️ -6 °C
Nachere super erholsame Nacht hemer üs uf Erkundigstour in Tromsø gmacht. Es hed bitz gschneit und gwindet darum simer de schnell imne Museum glandet. Und zwar es Museum über Troll. Mit dene Gschichte und Legende und ganz viele Spielsache hemer üs wunderbar chönne Ziit vertriebe. Z Mittag heds imne gmüetliche chline Bistro gäh und WOW, es isch so fein gsi. Einisch Rentiergulasch und einisch Lachs wos am Morge gfange hend. S Bistro isch direkt gegeüber vo de Stadtbibliothek gsi, darum simer die au no go aluege. Mer hend sogar en Büecherwurm entdeckt.

Am spötere Nami hemer üses Mietauto chönne go hole und hend üs uf e Weg nach Senja gmacht. Uf verschneite und liecht iisige Strasse simer 136km ohni Chreisel oder Abzwigig gfahre. Um die nüni simer bi üsere Hütte acho. D Toureplanig für Morn isch gmacht und mier freued üs wenn mer de s erst Mal uf de Ski stönd hie.Read more
See translation
TravelerSo cool, wünsche üch tolli toure 😍
3/15/24ReplyTranslate
TravelerDanke 👏 dier es tolls uslandsemester 😊
3/15/24ReplyTranslate
6 likes
Polarchreis Pirate Traveler
1
Kvænan
March 15, 2024 in Norway ⋅ ☁️ -5 °C
Am Morge simer bi liechtem Schneefall uf und hend üsi Sache packt. Eigentli hättis sölle schön Wätter si aber hie uf de Insle isch s Wätter no unberechebarer als dihei i de Berge. Bi mittlerwiile starkem Schneefall hemer üs uf e Weg as ander Endi vo Senja gmacht. Uf halber Strecki de Pass duruf hed ufeinisch d Sunne duredrückt. De Pass mit sine sagehafte 367m.ü.M. hemer de doch e chli härzig gfunde 😅
Churz drufabe simer a eusem Startpunkt acho, direkt am Meer. Leider isch de Gipfel voll i de Wolke inne gsi und es hed u megamässig fest gwindet. Spoiler: hed sich leider de ganz Tag nümme gänderet. Mer sind mit sehr kreativer Spurwahl dur es Birkewäldli ufgstige und hend die riesige Elchspure bewunderet wos im Schnee gha hed. Knapp i de hälfti vom Weg heds e Vorgipfel gha und mer hend de beschlosse det umzdreihe. Leider isch de Wind immer meh worde (s hed di uf de Ski retour gwindet) und d Wolke heds au immer meh id Ebeni vor em Gipfel abezoge. Aber d Ussicht richtig Meer isch absolut Traumhaft gsi. D Abfahrt isch nomal es Abentüür für sich gsi. Zum eine ischs zimli iisig gsi will de Wind de ganz Pulverschnee verblaset hed, zum andere hemer wieder dur e Wald müesse. Wür säge d Ski müend i Service nach dene Ferie, aber mier hend uu de Plausch gha um die Bäum umezkurve. Im Auto heds en churzi Tee und Snack Pause gäh und uf em retour Weg hemer no müesse es Autofotoshooting mache. Ufem heiweg simer no "schnell" go poste, da de nächsti Lade 40min, zwei Schotterstrassene und en eispurigi ... Brugg chammers eigentli ned nenne, vo üsere Hütte entfernt isch.
Jetzt möchemer üs no en gmüetliche Abig diheime, trinked e chli Tee und planed für Morn.Read more
See translation
Traveler 👍🏻😃
3/15/24Reply
8 likes
Polarchreis Pirate Traveler
4
Husfjellet
March 16, 2024 in Norway ⋅ ☁️ -6 °C
Mer sind uf und hend festgstellt das de Schnee üsem Auto e neui Heckform gäh hed. Mit dere super aerodynamische Form simer de schnell in Skaland acho, Startpunkt vo de hütige Tour. S Wetter vor Ort: Schneesturm. Also eigentli meh Sturm als Schnee. Gemäss de Tourebschriebig sind die erste paar Meter ufme Forstweg drum hemer eus dezue entschlosse eifach mal loszlaufe und de vorzue z luege wie wiit das mer chömed. Im Wald inne ischs tiptop gange und s hed schöne Pulverschnee gha. Chum simer uf em erste Hügel obe acho heds üs fast devo gwindet. De Wind in Kombi mitm Schnee und de ned vorhandne Sicht hed üs de leider zum umdreihe zwunge. Triebschnee isch hie echt es riese Thema und mer hend das beid nonie so idrücklich gmerkt wie hie. Bi de Abfahrt hemer mängisch blanks iis und zwei Schwüng spöter tüüfschnee bis überd Chnü under de Ski gha. Aber d Waldabfahrt isch wieder richtig toll gsi.
Dunne acho hemer üs vor em Wetter in nächsti Lade gflüchtet und hend det de grad no es Kaffi gno. Uf em Heiweg hemer no halt bimne Ussichtspunkt gmacht. D Ussicht wär de hammer gsi aber s hed u megamässig gwindet. Zrugg diheime hemer aber beidi gfunde mer sind no chli wenig uf de Ski gstande hüt und es hed sooo vell Powder um s Huus ume gha. Wür säge a Idee heds üs ned gmangled. Mer hend denn Skijoering gmacht, halt eifach mitm Auto anstatt emne Ross 😅
Nachdem mer üs im Schnee ustobet hend, heds wieder e gmüetliche Abig gäh.Read more
See translation
Traveler Es git Sache die will ich gar nöd wüsse! 🙈
3/17/24ReplyTranslate
Traveler😂😂 mer hend das voll durchdacht
3/17/24ReplyTranslate
TravelerIhr syt ja scho kes Gramm normal🙈
3/17/24ReplyTranslate
2 more comments
7 likes
Polarchreis Pirate Traveler
Flobjørn
March 17, 2024 in Norway ⋅ ☁️ -2 °C
Es hed Schnee! Also s hed ja scho vell gha wo mer acho sind, aber es isch sid gester konstant am schneie. Dem entsprechend vell Neuschnee heds. Mer hends mit üsem Auto grad no so zur Ifahrt us gschafft, aber mer hed gseh, s Auto hed müesse Schnuuzi spiele 😅
Wie mer vermuetlich merkt, hemer de mit em Wetter ned so breicht. Aber mer möched s best drus und lueged jede Tag wie wiit das mer chömed. Bi üsem hütige Startpunkt (mal wieder amne Strasserand im nüüt usse) ischs massivst am schneie gsi. Am Franco sin Rucksack isch i dere Ziit wo er brucht hed zum d Felli ufd Ski ztue usversehe underem Schnee verschwunde. Wo mer denn all üsi siebe Sache binenand gha hend, hemer üs wieder a en gmüetliche Ufstig dur es Wäldli gmacht. Chum zum Wald duss, heds Spure vo anderne Touregänger im Schnee gha. Mer sind scho chli froh gsi, simer ned die einzige wo sich bi dem Wetter ufem Berg umetriebed. Fliessig denne Spure na ischs immer wiiter obsi gange bis knapp under de Gipfel. Det hed sich d Sicht aber nomal rapid verschlechteret und de Wind hed afange zuenäh. Da mer weg dem ganze Neuschnee Konture e scho ned wüki gsehd und mer uf em Gipfel nur en schmale Grat zum ufelaufe bzw abefahre hed, hemer entschiede mer dreied um. Die einzige Mensche wo mer bis jetzt troffe hend, sind drü Österricher gsi, wo sich dezue entschlosse hend de Gipfel glich no z mache. Defür sind mier die erste gsi wo bi de Abfahrt hend chönne Spure in früschi Pulverschnee mache. Und wie mer de unberüehrti Pulverschnee usgnutzte hend. Leider hemer üs bitz verkalkuliert und hend bi de Strass acho nomal paar hundert Meter berguf müesse laufe.
Zrugg bi üsere Hütte hemer die frisch entdeckti Sauna igheizt und üs ufgwärmt. S obligatorische in Schnee ligge nachane hed natürli ned dörfe fehle. Will mer verpasst hend das hüt Sunntig isch und hie kei Lade offe hed und alli Restaurant ewigs wiit entfernt sind tüemer zum z Nacht eifach e chli Snacke und üsi Reste ufbruuche.
Am Franco sis Highlight vom Tag isch gsi, wo de Nachber mitm Traktor isch cho Schnee ruume i üsere Ifahrt und Stellewiis mit einere Fahrt 50cm Schnee weg gfräset hed.Read more
See translation
6 likes
Polarchreis Pirate Traveler
1
Narvik, Welpe und stundelangs Autofahre
March 19, 2024 in Norway ⋅ ☁️ 2 °C
Gester hemer üsi Sache packt und sind vo Senja uf Narvik gfahre. Us de prognostizierte 40cm Schnee isch leider de ganz Tag räge worde. Mer sind üs ned so sicher öb die wo hie für d Wetterinfos verantwortlich sind eifach random Informatione i das System igebed anstatt richtige Wetterdate. Aber voila, mer hätted e ned meh planed gha als Autofahre. In Narvik hemer u e tolli Unterkunft gha und sind denn Wetterbedingt au grad dete blobe für e Rest vom Tag.

Hüt simer de glich Weg wieder 2h retour gfahre, will mer üs spontan dezue entschiede hend go Hundeschlitte fahre zgah. De Franco hed de Schlitte souverän um alli Kurve glenkt und sich nur vereinzelt über d Bewegigslegastheniker vor üs ufgregt. D Hünd hemer konstant müesse bremse, die währed au gern einiges schneller unterwägs gsi. Wieder zrugg heds Rentierstew gäh und s aboslute Highlight, mer hend zu de Welpe chönne go knuddle. De Franco und ich sind überrennt worde und hend jedi Sekunde devo absolut gnosse.

Jetzt simer ufm Weg ufd Lofote, bzw sind scho da aber zu üsere Unterkunft duureds nomal chli. Da sie hie ned wüki en Autobahn hend und mer jede Fjord mitmacht, ziehd sich die ganz Aglägeheit id längi. Aber landschaftlich chömmer jetzt scho säge, es isch wunderschön hie.Read more
See translation
Traveler Hättsch mer au eine chönne mitbringe 😄
3/23/24ReplyTranslate
7 likes
Polarchreis Pirate Traveler
Svolvær
March 20, 2024 in Norway ⋅ ☁️ 3 °C
Nach dene viele Fahrstund und em Räge woner hüt füre ganz Morge agäh hed, hemer beschlosse uszschlafe. Na simmer gmüetlich in hiesigi Coop go poste und hend üs eeewigs imne Sportgschäft nebedra Ziit vertriebe.
Wieder retour heds es schnells z Mittag gäh und de Blick veruse zeigt: immerno Wolke aber endlich trocke. Also hemer üses Züg packt und sind direkt vo de Unterkunft us losglaufe. Zerst gmüetlich gradus und denn amne Bach entlang es churzes Couloir duruf. Det han vor allem ich es paar Mal gfluechet wills eifach nome müehsam gsi isch. Dobe acho hemer en chline, gfrorne See quert und en wunderbare Blick uf Svolvær und s Meer gha. Svolvær isch es chlises Städtli zimli i de mitti vo de Lofote und üses Diheime für die nächste Täg. Leider heds de wieder afange rägne und mer sind beid ned so motiviert gsi wiiter z laufe bi dem Wetter. Uf em abeweg han ich mier die plackerei im Couloir ned nomal welle atue und bi ufm Rägeschutz vo mim Rucksack durab gschlittlet. En riese Spass hani gha. Zum z Nacht hed mich de Franco mitere feine Pizza bechocht und mer hend üs zimli lang mit em norwegische Chinderspiel "Pakkesel" beschäftigt. So wie immer simer gli is Bett zum d Batterie füre nächsti Tag ufzlade.Read more
See translation
5 likes
Polarchreis Pirate Traveler
Varden
March 21, 2024 in Norway ⋅ ☁️ 2 °C
Hüt morge simer ziitig uf und wie die letzte Täg immer, isch us em ned so schlechte Wetterbricht vom Vorabig en sehr schlechte Wetterbricht worde. Aber was macht mer als verantwortigsvolli Touregänger, mer gahd glich go probiere. Nachme mega churze Afahrtsweg simer am halbi Nüni los. Die erste paar Meter sehr gmüetlich ufere Langlaufloipe meh oder weniger gradus. Um eus ume heds zwei italienischi Gruppene mit Bergfüehrer gha, wo fürd Uhrziit scho u wach gsi sind. Mer hend ihne denn unne am Bergrücke acho gern de Vortritt überlah. Währed dem ned so liechte Ufstiig, ufgrund vo iis und nur wenig Platz links und rechts han ich de uf halber Strecki d Ski abzoge und ufm Rugge treit. So hemer denn beid die ersti Steilstufe gschafft und sind heil ufm Felsplateau acho. Ufm ufeweg heds zerst afange rägne und uf einisch gschneit wie verruckt. Wo mer wiiter hend welle hed sich üsi Sicht nach em Motto: "Wie Sie sehen, sehen Sie nichts" verschlechteret. Hättemer ned vor und hinder eus en Gruppe mit Bergfüehrer gha wär det für üs de Ziitpunkt gsi zum chere. Aber mer sind denn schön brav de Spure vor eus nachegloffe und hend i dem Nebel inne regelmässig s GPS kontrolliert. ABER HEY, mer sind dobe acho. S erst mal hemers hüt endlich uf e Gipfel gschafft. Glichziitig mit öppe 5 anderne Gruppene. Mer hend müesse astah zum ufe cho, so vell Lüüt heds unterwegs gha. Darum hemer dobe denn sehr schnell üsi Ski ready gmacht für d Abfahrt und hend üs id Nebelsuppe gstürzt. Obe use isch de Schnee zimli toll gsi zum fahre, unne use hedmer de scho gmerkt dases die letzte Täg immer wieder dri grägnet hed. Eigentli wär das hüt u e tolli Abfahrt gsi aber mer sind unglaublich langsam und vorsichtig unterwegs gsi bis uf halber Höchi plötzlich d Sicht wieder besser worde isch. Mer hend no über es Bächli und en chline gfrorne Teich müesse und sind de wieder bi de Loipe acho. Uf dere simer de wieder gmüetlich zrugg gloffe.

Diheime heds es guets z Mittag und en wohlverdienti Duschi gäh und jetzt machemer üs no en gmüetliche Nami.Read more
See translation
5 likes
Polarchreis Pirate Traveler
Vo Å bis Svolvær oder umgekehrt
March 22, 2024 in Norway ⋅ ☁️ 2 °C
Hüt hemer so en richtige Touritag gmacht. Ersti Halt hemer imne chline Fischerdörfli gmacht. Ageblich sötts det sehr guete Kafi gäh aber leider macheds de erst ab em 11i (Franco: wer brucht denn no Kafi?!). Dur das simer de Ort im Schnee / Rägegestöber go aluege und hend gstuunet über die sinnvolli Nutzig vom natürliche Kanal.
Na simer wiiter zum Wikingermuseum. Das isch sehr interaktiv gstaltet und im nachebaute Langhuus hedmer sogar chönne alles alange und alegge und sich als richtige Wikinger fühle. Es hed Mitarbeiter ume gha, dere ihre Job ischs als Wikinger verchleidet alte Handwerkstätigkeite nache zgah und d Frage vo de Touris z beantworte. Scho zimli toll.
Denn ischs wiiter gange zum bekannte Surfstrand vo de Lofote, Unstad Beach. Mer hend ned schlecht gstuunet wo bi 2°C, Wind und Räge doch tatsächlich Lüüt am surfe gsi sind. Aber d Welle hend scho sehr beidruckend usgseh.
Im warme Auto simer an nächsti Stopp gfahre und zwar en Ussichtspunkt im Nüüt usse. Mit sehr beidruckendem Blick uf d Felswand vom Stjerntinden und uf de gfrornig Storvatnet See.
Uf üsem wiitere Weg simer dur ganz vell Bilderbuech ähnlichi Fischerdörfer gfahre. Vor allem Sakrisøya hed üs mega gfalle mit de gelbe Hüsli, wo zum Teil sogar is Meer use baut worde sind.
Vo det ischs na nömme wiit gsi bis zum üsserste Ort uf de Lofote mit em tolle Name Å. Es isch leider ned ganz s Endi vo de Lofote, aber de letzti zuegänglichi Ort. Na chömmed nur no Berge und Meer. Mer sind det es bitz umeglaufe und hend is Meer use gluegt, scho no speziell wenn de nächsti grossi Ort det usse Island isch.
Zrugg ischs wieder uf em gliche Weg gange nur bin dasmal ich gfahre und de Franco hed chönne zum Fenster us luege. Es Navi brucht mer hie ned wüki, s gid e nur die eini Hauptstrass. So simmer de pünktlich ufd z Nacht Ziit in Svolvær acho und hend üs es feins Pilzrisotto koched. Toureplanig für morn isch gmacht und mer drucked gaaanz fest Duume, dass de Sunneschii woner für morn agseid hed au wüki itrifft.Read more
See translation
7 likes
Polarchreis Pirate Traveler
Varden 2.0 oder so
March 23, 2024 in Norway ⋅ ☁️ -1 °C
Ersti Tat vom hütige Tag, mer sind go neui Felli für mich go poste. Wow, en riiiese unterschied. Scho klar lauft da jede so super entspannt de Berg duruf wenn die Felli e so hebed. Kei verglich zu vorane und ich ha d Tour hüt eifach nome gnosse. Eigentli wär de Plan gsi uf e Spistindan z gah, Nachbargipfel vom Varden. Aber mer hend üs es bitz verloffe 😅
Am Afang simer gmüetlich ufme Strössli gradus bis zumne Fluss, de hemer denn mit de Ski ufm Rugge quert und sind dur es Wäldli wiiter. Nomal über en Bach inegstägeret und denn hemer probiert bitz höchi z gwünne. Und irgendwo nachm Bach und em Höchi gwünne hemer e abzwigig verpasst. Wo mers gmerkt hend, simer scho uf halbem Weg richtig Varden gsi. Mer hend aber ned nomal uf de Gipfel welle, obwohl mer hüt vo de andere Siite am ufelaufe gsi sind und sich zum aller erste Mal d Sunne und de blaui Himmel zeigt hend. Mer hend s Gfühl gha mitere churze Abfahrt (inkl. Felli a de Ski) und emne Ufstiig uf de andere Hangsiite, sigemer wieder voll uf Kurs für de Spistindan. Simer de halt ned gsi. Wo mer gmerkt hend dasmer üs irgendwo im Züg usse befindet hemer de Hang mal gnauer agluegt. No paar Meter wiiter ufe und mer hend en perfekte Abfahrtshang ohni Spure für üs eleige gha. D Abfahrt isch, wie hie immer, sehr abentürlich gsi. De Bach hemer chönne um- bzw. überfahre aber für e Fluss hemer d Ski wieder müesse abzieh. Ohni nassi Füess hemers as andere Ufer gschafft und sind zrugg zum Auto gstöcklet.
Ufm Heiweg heds für e Franco no en riesige Burger mit 3 verschiednige Zwiebelversione gäh und für mich bitz Pommes. Wieder dihei, hemer de Abig im Dunkle vor em Fenster verbracht i de Hoffnig, dass mer d Nordliechter gsehnd. S einzig wo mer im Verlauf vom Abig gseh hend sind Wolke gsi. Jetzt luegemer no chli Hockeymatch und planed für morn.Read more
See translation
5 likes
Polarchreis Pirate Traveler
Sunne, Schnee und Autofahre
March 25, 2024 in Norway ⋅ ☁️ -5 °C
Am Sunntig Morge heds gschneit wie verruckt. Darum hemer üs für en gmüetliche Tag entschiede. Lese, ässe und wösche isch uf em Programm gstande. Nach em Mittag heds uf einisch strahlend blaue Himmel und Sunne gha, darum hemer beschlosse Svolvær no chli go erkunde. Mer gsehd guet, das Svolvær früehner es reins Fischerdorf gsi isch, de Kontrast zu de moderne Hotelbaute isch enorm. Während dem mer gmüetlich durs Städtli gloffe sind, hed s Wetter innerhalb vo Minute ine Schneesturm gwechslet. Mer sind de schnell wieder is Auto und hei id Wärmi gflüchtet. Am Abig hemer e Iladig vom Gastgeber becho, für e Tasse Tee und Chueche. Schlussendlich hemer gredt und philosophiert bis am Abig am zehni. So vollgässe mit Chueche, dass es nedmal meh es richtigs z Nacht brucht hed bevor mer sind go schlafe.

Hüt hemer üs leider müesse vo dere unglaublich tolle Unterkunft verabschiede und uf e Weg nach Tromsø mache. Uf de Autofahrt hemer vo Schneesturm und minus Temperature zu Sunneschii und blauem Himmel alles gha. Es isch immer wieder faszinierend was für en ifluss s Meer uf d Temperatur und de Schnee hed. Sobald mer nur es bitz is Landesinnere gfahre sind ischs grad düütlich chälter worde und hed au einiges meh Schnee gha. 6h spöter simer de müed und hungrig in Tromsø acho. Z Nacht heds imne Biffhuset (Steakhouse) grad neb em Hotel gäh. Unglaublich lecker gsi.Read more
See translation
4 likes
Polarchreis Pirate Traveler
1
D Magie vom Norde
March 26, 2024 in Norway ⋅ 🌙 -6 °C
Hüt Morge hed üs Tromsø mit strahlendem Sunneschii begrüesst. Nachme schnelle z Morge im Hotel hemer scho gli los müesse, s Auto go zrugg bringe. De Schlüssel abgäh hed de scho fast e chli weh tah, s Auto hed üs immer tiptop sicher dür Schlaglöcher, iis, Schnee und Kombi vo allem bracht.
Wieder zrugg im Touri Gebiet vo Tromsø simer is Polaria, es Museum über d Arktis und ihri Bewohner. U es tolls Museum. S Highlight isch definitiv d Robbefüetterig gsi, inkl. Darstellig vo verschiednige Tricks und Kunststückli. Und sie hend es mega härzigs Robbebaby gha, 8 Mönet alt und scho 35kg schwer.
Nachm Museum simmer nomal d Stadt go erkunde und hends schön gmüetlich gno.
D Action isch de am halbi siebni losgange. Und zwar simer de uf en Nordliechttour. Mer hend die extra für e letzti Abig planet, will mer eigentli demit grechnet hend dasmer si vorane Mal gsehnd. S Wetter isch die letzte zwei Wuche leider ned so uf üsere Siite gsi darum simer hüt ufd Tour. Nachere churze Autofahrt simer in Grøtfjord acho. Chum hemer s Lagerfüür gstartet heds am Himmel scho agfange Lüüchte. Am Afang hedmers nur mit de Kamera gseh und vo Aug fast ned, aber mit de Ziit sinds immer stärker worde und hend sogar agfange tanze. Eine vo de Gruppe isch uf em Is am Strand usgrutscht und hed sich d Schultere verletzt, darum hemer früehner als plant wieder zrugg müesse. Isch de aber mit verspötetem z Nacht am Meer in Tromsø selber, glich no halbi drü worde bis mer jetzt is Bett gönd.Read more
See translation
Traveler 😍😍😍
3/27/24Reply
6 likes
Polarchreis Pirate Traveler
Ab nach Hause
March 27, 2024 in Norway ⋅ ☁️ -9 °C
Hüt hemer nomal absoluts Traumwätter gha. Darum hemer beschlosse trotz em wenige schlaf öppe einisch ufzstah und z packe. Mer hend denkt als Abschluss vo üsne Ferie möchemer no ein letzti Gipfel und zwar de Fjellheisen. Husberg vo Tromsø. Mer hend chli gschummlet will mer mit de Seilbahn ufe cha, aber die letzte Meter zum Gipfel simer selber dure Schnee gstapft. Wills eher steil gsi isch hemer anstatt abelaufe wieder Mal beschlosse ufm Hosebode abezschlittle. Igschnebelet und mit schmerzendem Steissbei simer de wieder bi de Seilbahn acho, aber es isch en riese Spass gsi. Leider hemer de scho müesse an Flughafe pressiere. Det isch totales Chaos gsi wills nur 3 Check In Schalter offe gha hend und grad mehreri Flüg nachenand gfloge sind. Hends de grad no is Flugzüüg gschafft.
Jetzt, 4.5h spöter, simer wieder i de Schwiiz und uf em Heiweg.
Mer hend trotz em Wetter zwei unglaublich tolli Wuche gha, vell Sache gseh und no vell meh erläbt.Read more
See translation
TravelerSchöööön hei die Quale vo de Ferie ändlich äs Ändi gfunde🤣🤣🤣🤣
3/27/24ReplyTranslate
7 likes

Trip end
March 27, 2024