Reset search
Abentüür Schwede
  • Marco Kräutli
  • Thomas Hurni
  • Marco Kräutli
  • Thomas Hurni

Abentüür Schwede

Roadtrip abentüür mitem HornPorn und KrautStaub Read more
FollowInsightsInsightsCalendarCalendarPhotosPhotosShareShareBucket list
InsightsCalendarPhotos
  • Trip start
    August 16, 2024
  • Abentüür Schwede

    Hamburg at its finest

    Aug 17–18, 2024 in Germany ⋅ ☁️ 18 °C

    Es sind nonig mal 24h ome und üses abentür nimmt sin volli lauf.

    es hed agfange demit das mer binere pinkel pause uf de rastätte am morge am 4i währendem königliche uriniere en has öber de weg ghopplet isch und ich zerst mal gmeint ha das ich halluziniere.

    Tatsächlich bin ich en halb stond vor akunft in Hamburg so müed gsi das de Hurni het mösse witerfahre da ich mit sekonde schlaf afo kämpfe han, wer hetis denkt, er hets i dere ziit gschafft mit 40km/h zviel ine radarfalle ztappe und ged jetzt sehr warschindlech sin uswis ab für en monet 😂

    Am morge am 7i endlich acho in Hamburg hemmer üs en plan mösse afo schmiede was mer jetzt mached. beid total müed, fast nüt gschlafe, en herte vortag hinder eus und mir chönd erst am 15.00 ihchecke

    Gesagt getan hemmer üs motiviert ufe weg gmacht rechtig reeperbahn. Usem Parkhus usecho sind üs d möllberge vom vorabig dör d nase kroche und mir sind sofort ide realität vode grossstadt acho. Gmüetlich simmer den dör die reeperbahn gschländeret omgäbe vo psoffnige und krähende mönsche wo d nachtarbeiterine fast uf de strass vernascht hend. schnell hemmer probiert üs us dere situation usemanövriere. wer hettis denkt um de nöchsti huusecke gloffe gsemmer wie sech 2 Type eri gsichter ihschlönd und de eint im andere so en feste kick is gsicht gä het daser nömm gwösst het was obe und unde isch.

    nach so viel ereigniss uf so chorzer zit hemmers den ad elbe gschafft wo mer erfahre händ das die ersti bootstour erst am 10.15 startet. Die nöchsti beckerei ufgsuecht, es käscroissaunt schnabuliert und wiiter dörd stadt gschländeret.

    Den hets die faszinierendi tour gä wo mir tolli ihdröck becho händ wies läbe früener am grösste hafe vo europa gsi isch und wie das logistisch funktioniert mit dene gigantische container schiff. Denach simmer en leckeri pizza go ihverlibe und hend üs den welle en alte artilleriebonker usem 2. weltkrieg ahluege. Womer bemerkt hend das d warteschlange so gross isch wie min innehof dehei hemmer üs omentschide und hend die ziit totgschlage bes mer hend chönne ihchecke.

    Dementsprechend simmer jetzt fix und fertig und haued üs ufs ohr damit mers evtl. schaffed am 21.00 nomol ufzstah, und üs das nachtlebe wennd inezie da es am morge früeh scho so wild gsi isch 😅 natürlich werds det nor 1 Bier gä weil mer morn ja weder am 8i mönd ufstah zum d fähre nach dänemark am 10.30 verwötsche.    Read more

    See translation
  • Abentüür Schwede

    Fähre nach Dänemark

    August 18, 2024 in Germany ⋅ ☁️ 18 °C

    So nach dem mer eus entschiede hend nüm ad Reeperbahn z gah wel mer beidi vel z kapuut gsi send, hemer eus so rechtig übertriebe McDonalds bstellt und send dem im foodkoma ziemlich schnell igschlafe.😂

    Mer send deför fit und motiviert am 7i ufgstande und hend eus am 9i ufgmacht rechtig Fähre.
    Am 10.40 bi de Fähre acho hemer eus gfragt ob mer die einzige Schwiizer send und so vel mer gseh hend semer das au gsii.

    Nach dem mer uf de Fähre parkiert hend, hemer chönne ufs Deck die wunderschöni Ostsee aaluege met all dene riesige Schiff wo verschiedensti Güeter über die ganze Weltmeere verteilit.

    Sehr intressant esh au gsi wie send d schnauze vo der Fähre churz vorem aalege eifach über eusi chöpf erhobe het demet mer weder hend chönne usefahre.

    Nach dem mer weder feste bode unter de reife gha hend eshs den au sho über vieli beidruckendi Brugge rechtig Kopenhagen gange.

    Die beidruckendsti brugg wartet aber morn no uf eus😃    Read more

    See translation
  • Abentüür Schwede

    Wunderschöns Kopenhagen

    Aug 18–19, 2024 in Denmark ⋅ ☁️ 21 °C

    Ohni erwartige hemmer üses 2te und vorussichtlich letste hotel ahgstüred, scho bim äne fahre hemmer gmerkt das die stadt locker an schwizer standart änechond.

    Mir hend en gmeinsame schuelkolleg vo früener wo nach Kopenhagen usgwanderet isch. Ihn hämmer natürlich gfragt was must see‘s sind i dere stadt. Sine empfählige simmer den nachejagt und es hed üs öberwältigt. Big shoutouts an Fabio a dere stell 😁

    Im hotel hets rent-bikes gä wo mer ohni öberlege grad gno hend. s erste het en fählendi radmuettere gha, nach dem mer das gmäldet hend und es neus becho händ simmer los gradlet und gmerkt das mir absoluti shrott bikes becho hend. Naja das bremst üs ned us.

    Direkt id innestadt rechtig fort/militärkaserne hemmer gmerkt das en ironman ide stadt isch was üsi velotour zimmlich erschwärt het. paar föteli spöter sind üsi födlis wieder uf de bikes in rechtig christiania gsi was en alternativi wohnsiedlig isch wo vode regierig akzeptiert wird. ufem weg det äne bini liecht hangry worde was die grosse mönschemängene ned liechter gmacht het wo vom iron man ahzoge worde send.

    Churzerhand hani amene märt en total entüschende und föllig öbertürte churro gässe. Betzli gnärvt hemmer üsi velos welle sattle wo üs 2 locals ahquatsch hend.
    Mit dene hemmer ihres neu erstellte und sit eim monat releasde karte spiel gspillt und debi mega lostigi gspröch gha. Ich als annerkante kartespiel liebhaber ha die jungs natürlich understötzt und grad eis kauft.

    Endlich simmer in christiania acho, vo cannabiswolke und hippies omgä isch üs immer wohler worde und sind det gmüetlich omegschländeret. Denach hemmer no uf de torm vor de freslers kirke welle bis mer gmerkt hend das de beliebt isch und mer hetti mösse reserviere. Tja die onvorbereitete nimmts 🤷🏼‍♂️

    Zur spate stond simmer wieder ufd velos und sind am fabio sim tipp gfolgt - Reffen Streetfood park. Ich han det es wunderbars butter paneer miteme carlic naan (dänischi spezialität 😝) schnabuliert während dem sich de hurni mit raclettchäs öberbackeni pommes gönnt het. (esch ja ned so als wär das öbis neus für ihn gsi😉)
    Mer hend üs ned lompe la und hend je no en crazy bubblewaffle gha. vollgfresse hed üse weg es bus-boot krüzt wo die letsti fahrt in rechtig üses hotel ahträtte het. Ibootet und paar minute spöter ah üsem hotel acho hend üs die viele ihdröck zimmlich müed gmacht und jetzt gnüsemer de abig nachli am meer.    Read more

    See translation
  • Abentüür Schwede

    Spontan isch am beste

    Aug 19–21, 2024 in Sweden ⋅ ☀️ 19 °C

    Bis am 10i hemmer uspfused zum am 11i chönne uschecke. Direkt isches öber d öresund brogg uf schwede gange - ENDLICH HEMMERS GSCHAFFT!

    Planed wäri gsi das mer in süde vo schwede is vikinger muesum gönd, wie emmer z wenig vorbereitig betribe und das museum isch am mäntig gschlosse. Somit hemmer üs chorzerhand omentschide in norde z fahre, ufem weg det äne hend üsi födlis nach meereswasser gschroue. gesagt getan simmer an ersti strand.

    A dem Strand acho isches schön gsi aber chli onkomfortabel zum go bädele. Mir hend drufabe en campingpltz direkt am meer gsuecht und send föndig worde.

    D‘födlis weder is auto gschwonge semmer höcher in norde rechtig camping, en abschlänker ines ikaufzetrum zum üs mit de nötige verpflegig usröste und den ab uf de platz. De campingam mellbystrand isch wunderschön und halbe läär, per zuefall hends üs grad nebe anderi schwizer verfrachtet 😄

    Mir sind den is meer go bädele, temperature vom wasser sind föllig okee, mir fraged üs aber wieso das wasser so brun isch - velecht het öber en idee?
    Denach hemmer no gmüetlich znacht kochet und klinged jetzt de abig us.
    Morn gids en rest-day uf dem camping weil mer echt uf de schnorre sind und üs de platz so guet gfallt.    Read more

    See translation
  • Abentüür Schwede

    MellbyStrand Camping

    August 20, 2024 in Sweden ⋅ ☁️ 23 °C

    Nach dem mer rechtig lang gschlafe hend, voll entspannt ufgstande send hemer eus es feins zmorge gönnt.

    Aschliessend semer uf eusne Campingstüehl nochli hänge blibe und wo d sonne sech het aafange zeige semer a Strand und hend det no en gueti rundi tschuttet bis mer gnueg warm gha hend zum eus im Meer Kattegat gah abchüehle.

    Den hed au sho bald mal üsi Obigroutine aagfange, mer hend Teigware met Wienerli met Ei aabrötlet schnabuliert. Duschet und den de Abig no gmüetlich usklinge lah.

    Morn staht no Göteburg ufem Plan met gah Wäsche und den gahds den id Wildnis. 😁    Read more

    See translation
  • Abentüür Schwede
    1

    Planänderig…

    Aug 21–22, 2024 in Sweden ⋅ ☀️ 17 °C

    …nach dem mer am nöchste morge zielstrebig nach göteborg gfahre send isch üs bim erste reinigungslade gseit worde dases in ganz göteborg kei wäschsalon ged 🙃

    Chorzerhand und fest entschlosse simmer nacheme eewige ikaufstripp rechtig vänernsee ane am see entsprächend riisige campingplatz in ursand acho wo mer üs es chlises bungalo gmietet hend.

    Kleider send frösch gwäsche mir hend statt rauer natur nomol es gmüetlichs bett zum pfuse und sind umso me ghyped dases morn id wildnis gad 😄    Read more

    See translation
  • Abentüür Schwede
    2

    Natuuurrrr

    Aug 22–23, 2024 in Sweden ⋅ ☁️ 16 °C

    S auto gsattlet gads wiiter rechtig norde, öber wildi naturwäge, durch schroffi landschafte und unmängene a seee esches d’qual der wahl womer sich wott niederla füren overnighter.. Nach stondelangem spotte hämmer üs den doch no chönne entscheide füres schöns fleckli erde am bärsjön see.

    Ich has zelt föregno weils no vom campe nass isch, de Horn het sis hängematte set-up ufgstellt, mitem tarp hets no en chill-zone gä und de rege isch present sitt mer acho send.

    Nacheme Gmögige znacht esse und schöne lagerfür gspröch isch den scho bald mal chössi lose ahgseit gsi.    Read more

    See translation
  • Abentüür Schwede

    D Reis gad wiiter

    August 24, 2024 in Sweden ⋅ ☁️ 17 °C

    Am zweite Tag a dem schöne plätzli heds nor einisch gregnet vom morge früe bis am abig, deswäge isch de beschloss gfalle dasmer en gmüetliche tag under üsem tarp verbringed. Nichts desto trotz heds es füür gä, en rondi fuessball gspielt, es workout gmacht, sind go bade im see zum üs wäsche etc..

    Nachere windige nacht ohni räge isch all üses züg wieder troche gsi, die glegeheit hemmer gnötzt und hend schnell alles abbaut, zmörgelet und no en chlini wanderig ane ussichtsponkt gmacht.

    Wiiter rechtig norde hets üs nach Karlstad verschlage womer is Hammarön Naturreservat sind will das wie en zipfel in Vänern see isch mitere unglaubliche ussicht uf das „Süesswasser Meer“ 😅
    Am Zipfel acho isch de Horn ufd idee cho es spieli zmache. Wer chont uf de stei wiiter in rechtig wasser. Ich han das speil klar gwonne, de pris sind pflotsch nassi schue gsi weil de wellegang halt wie am meer isch und ich das ned bedacht han 🤣

    Im Trainerahzug und de Adilette esches den ines grosses ikaufszenter gange und ich ha usgse und gschmöckt wie de letsti assi 🤷🏼‍♂️ Was mech aber ned dra ghindered het neui freizit schue z kaufe da die andere ja soaked wet sind.. Bi dere glegeheit simmer grad no in Max üsi büch go vollschlah bevors wiiter rechtig norde gad.    Read more

    See translation
  • Abentüür Schwede

    Naren See

    Aug 25–29, 2024 in Sweden ⋅ ⛅ 17 °C

    Wenn mer scho in Schwede send und üse outdoor spass stark vo de erste staffle 7 vs. Wild inspiriert worde esch mümer natürlich go luege wo die jungs gsi send.

    Am Fritz sin spot uf ahhieb gfonde hemmer gmerkt dases det sehr suboptimal isch zum en mehrtägige shelter ufbaue - also simmer ufd suechi und hend am start ort wo sie is boot glade worde send en sehr schöne platz gfonde.

    Weils scho langsam dunkel worde isch, isch d idee gsi dasmer rasch s zelt ufbaued und üs am nöchste tag um de shelter kömmered.

    schnell sind üs d auge im zelt zuegheit und sind am nöchste morge zielstrebig ufgstande zum afo bastle. 2 wänd, en kak-tron, mächtig füürholz und eme legendäre tarp set up spöter hokemer jetzt da und koched gmüetlich znacht. Mir fühled üs pudelwohl und die witere täg werded zeige was mir no planed hend 😉

    Ah ja und mugge sind üs am ussuge als hettemer goldigs bluet. Soöbis hani nonie erläbt. Das isch echt en plag! 🤯    Read more

    See translation
  • Abentüür Schwede

    Adventure Tag

    August 27, 2024 in Sweden ⋅ ☁️ 17 °C

    Nach dem mer de gestrig Tag sehr gmüetlich met eusem Shelter optimiere, füürholz vorbereite, schnitze, guet esse und eifach Ziit ide Natur gniesse verbracht hend, hemer für hüt grossi Plän gha.

    Mer send no paar Sache gah ikaufe und hend den metem Auto im Survival Mattin und im Fabio sin Spot welle aafahre. Gesagt getan. Am Mattin sim Spot acho hemer festgstellt das es vo de Strass obe kei Weg get, dororm esh das en regelrechti Durchschlagüebig worde.
    Leider hemer den en riesige Sumpf vor eus gha wo eus de weg zu dem no ca 100m entfernte Spot versperrt het. Dummerwiis ben ech bi dem Sumpf no abrütscht und han min Turnschueh no müsse drin tauche🤦‍♂️
    Nachdere Aktion hemer eus entschiede de Sumpf nüm z umgah und mol zu eusem Shelter zruggzchere.

    Bim Shelter acho send bi eusne tägliche Schnitzarbeite und Füürholzvorbereitige sho die nöchste Plän gschmiedet worde und zwar die Spots metem Kanu abfahre.

    Am Nomitag het de Marco leider no es sehr truurigs Telefon becho, sin Vater esh bi sim Mittagschlaf verstorbe. Versuechend die Nachricht z realisiere und verarbeite, hemer eus im sehr erfrischende 12Grad warme Naren no gwäsche und aaschliessend no was feins Z'Nacht gesse. En komische Abig eshs gsi wel mer beidi met de Situation überforderet gsi send.
    Met gmischte Gfühl semer den gah schlafe.    Read more

    See translation
  • Abentüür Schwede

    Wikinger Bestattig

    August 29, 2024 in Sweden ⋅ ☁️ 21 °C

    Nachdem mer am Mittwoch ufgstande sind esh vo de Motivation für d Kanutour leider keii Spur ome gsi, da mer s Gfühl gha hend es würd eus vom See blase, und eusi wiitere Plän hemer den au no grad über de Huufe grüert. Statt am Donnstig no en Nacht in Smögen eine gah Smögen, und den am Friitig no en Tag in Kopi met eusem alte Schuelkolleg wo usgwanderet esh verbringe, bliibemer no en Nacht ii eusem ultimative Shelter, demet mer in Rueh no eusi Projekt chönd beende.

    Also hets nomol en gmüetliche Tag unter eusem Shelter gäh. Mer hend eus abglenkt met schnitze & bastle da mer für Marco sin Vater en symbolischi Wikinger Bestattig hend welle mache.

    Voll fokussiert send d Stunde wie im Flug vergange und mer beidi guet vorah cho bi eusne Projekt. Also hemer den am Abee no schnell was chalts gesse und no en schöne Abe gha met guete Gspröch & Spieli. PS: Mer hend de Abfallsack dusse vergesse über d Nacht und prompt esher am nöchste Morge 3 meter wiiter weg und ufgrisse glege.. Mer fraget eus emmerno was das füres Raubtier gsi esh.😳

    Im volle bewusst sii das das euse letzti Tag a dem wunderschöne See esh semer am Donnstig chli wehmütig ufgstande. Und hend nomol Füürholz und alles parat gmacht für de letzti Tag.    Read more

    See translation
  • Abentüür Schwede

    Ruhe in Frieden

    Aug 29–30, 2024 in Sweden ⋅ ☁️ 18 °C

    Min Paps hed scho immer mal uf schwede i die rough natur welle mit endlos wiite wälder und wonderschöne seee wo mer ned cha zelle weils so viel sind. Leider hed er das nie in tat chönne omsetze.

    Uf grond vo sinere vorliebi für schwede wo sini söhn ganz klar mit ihm teiled han ich mer denkt das en symbolischi wikinger bestattig sehr schön wär.
    De Thomas hed ned lang gfackled und es wördigs boot baut, wo ich mini letste wort uf Papier ha chönne bringe und mit is boot verflächte damit die zu mim paps is jenseits chömed. De ganzi prozess isch sehr emotional und schwär sowie schön und befreiend gsi.    Read more

    See translation
  • Abentüür Schwede

    Smögen

    August 30, 2024 in Sweden ⋅ 🌬 17 °C

    Uf und defo mitem gedanke das mir üsi röckreis ahtrettet, stüremer ufem heiwäg no en letsti destination ah wo mer ned hend welle verpasse. Somit nämemer en 2h omweg in kauf und fahred quer dörs land in rechtig smögen.

    In Smögen acho isch zerst mal de zivilisations shock cho und mir hend üs direkt entschide zum coiffeur zga, Endlich gsemmer weder us wie mönsche 😅 Denach heds en spaziergang dör das härzige fischerdörfli gä. Wie en anderi welt, en welt woni bis dato in schwede ned erläbt han. Öberall schroffi felse, zmetzt inne öberal härzigi chlini hüsli und alles isch wunderbar belebt. Das het sich uf jedefall glohnt.    Read more

    See translation
  • Abentüür Schwede

    Röckreis

    August 31, 2024 in Switzerland ⋅ ☁️ 27 °C

    Nachem chorzufenthalt in Smögen isches denn uf direktem weg hei gange.
    Insgesamt 25h röckreis a eim stöck.

    Es het uf de fähri vo dänemark nach dütschland en chorzi pause gä wo mer üs miserabli pömmes ihverlibt hend. Mir send det scho so dörre gsi das norno hirngulasch us üs usecho isch 😅 und trozdem simmer den nomol ca 10-12h heigfahre. Chorz vor de grenze ide schwiiz hets no en zwöschestopp in Lörach gä um üs mit gönstige dütsche war ihzdecke. Denach hemmer norno hei welle.

    D Reis isch en absolute Traum gsi und ich wörds jederzit weder mache 💪🏼🔥    Read more

    See translation
    Trip end
    August 31, 2024
  • 2026© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice