Blindenzentrum in Nambala

Hüt hani därfe s'Blindezentrum NURU bsueche, wo eigentlich de Grund isch, warum ich jetzt in Tanzania glandet bin. Ich han nämli letscht Jahr de Bettina en bescheidene Betrag fürs Blindezentrum gspendet, und dur das simmer is Gspräch choo. Recht schnäll isch mir denn klar worde, das faszinierende Land möcht ich kännelerne. Es hät grad mega guet passt, dass d'Bettina grad ihri nächschti Reis plaaned hät. Und scho bin ich da... Und gsehne mit eigete Auge, was für e grossartigi Arbet dä Verein da leischtet!
https://nuru-tz.ch/
Die paar Franke woni gspändet han sind 1:1 aachoo und z'gseh, wie die Familie scho mit chliiner Understützig us de Schwiiz jetzt en Garte händ, wo ihne Erträg iibringe chan isch seh schön!
Au de Chindegarte isch e wahri Froid. Ich bin no immer rächt gflasht vo dem Tag!
Am spätere Namittag simmer no schnäll en junge Burscht go bsueche, wo im NURU uufgwachse isch. Er hät deet denn siini Uusbildig als Mechaniker därfe mache und als Abschluss hät er e Werkzüügbox überchoo, damit er usserhalb vom Zentrum go schaffe chan. Alli Investitione werded nöd als Spänd per se iigsetzt sondern es wird jewiils i öppis investiert. Segi das e mechanischi Nähmaschine, damit d'Miriam (e Tochter vonere Blinde wo deet wohnt) chan lerne nähe und sich denn wenn sie sowiit isch, en Läbensunderhalt verdiene chan. D'Bewohner chömed kei Geld und kei Ässe über. Sie chönd deet wohne, werded medizinisch versorgt und händ en Garte.
Falls ihr etz finded das isch doch e gueti Sach, denn spended doch au öppis. Jede no so chliini Betrag wird gschätzt und chunnt aah!
Nacheme Bsuech ufeme "iiheimische Märt" simmer zrugg is African House go de Pool no chli gnüsse. Morn gaht denn oises Safari-Abentüür los 🤗
🦒🐆🦏🦛🐘Read more