Day 3: es fägt!

Wider Tagwach am 6:30, z’Morge am 7ni u Abmarsch um die achte. Mir tüe aube ds Gepäck scho usesteue, de chöi das üser vier Porter scho nä u loszöttle i Flipflops... Würklech beiidruckend wie die die Wägeli uuf u dserab loufe mit 30kg am Rügge. Ds Jagat hetts relativ viu Lüt gha. Mir hei e zimlechi langi Etappe vor üs gha. Munter simer loszöttlet, es fägt eifach mega dür die Landschaft ds schuene, ei Egge schöner aus dr anger. Mir hei oft Talsite gwächslet über die Hängebrüggene. Nach öppe 2.5 heimer Teepouse gmacht (Lemon Ginger Honey Tea isch aktuell hoch im Kurs) u de e Stung speter für ds Mittag. Dr Daniel bsteut für aui, so guet wie müglech ohni Zibele u Chnobli wòu das dr Hanspeter nid vertreit. Das isch aber meistens schwierig, wöusi das so zimli überau dri tüe: Hütt hetts Spaghetti mit Tomate (Zibele) - Sauce gä u Springrolls. Die Springrolls si gar nid so wie mr se kenne: Sisch e chle e Teig wie ne Beignets ire Form vore mini Calzone gföut mit ganz vilem feine Züg - hie ou mit Chnobli u Zibele. Dr arm Hanspeter hett chum gässe. I so Momänte bini froh, isseni aues. När ischs witer, es isch nume no schöner worde, a Tibetföhre verbi, immet mitem Fluss entweder lingger oder rächter Hang. Vorem z’Mittag heimer scho chönne ufne 7Tusiger spienzle. Wunderbar. Gäg die haube füfe simer ir Lodge acho. Leider si miner Chnöi scho gschwolle, beidi zäme. So ne Seich. Zum Glück tüesi nid so weh. Grüppele isch e chle doof, umso meg bi so Plumpsklos. Aber es geit aues u mir hei warms Wasser bercho zum Düshele, herrlech. Am haubi Siebni hetts de z’Nacht gä mit Dessert, Apple pie, ou so Calzone-mässig. Meeega fein. I ha de vor Rosa e haubs mit Chürbis dòrfe ha. Usem gliche Teig nimeni aah, gits zum z’Morge Tibetan Bread. När no es Tee und d Schieber. Hai isch das lustig, mir si e super Truppe. Fägt. I bi chle im Himmu. Darf ganz viu schlafe, loufe, spiele u ässe. Was wotti no meh 😊Leer más