Day 11: Königsetappe

Gester isch ja no lustig gsi: si dütschi no mit üs id gliche ‘containersiedlig’ gsi u de heisi diskutiert, wenn los. schinbar wei die iiheimische immer scho sehr frûeh los, wörum ou immer. dr daniel hett z morge uf di haubi füfi bsteut u losloufe so gäg di sächse, wes scho häu isch. nüt mir früüre da im dunkle. dr dütsch reisefüehrer hett scho am haubi füfi wöue zmörgele, dass hett de sini truppe nid wöue. auso haubi sächsi, da si scho mir gsi. drum nach langer diskussion zwüsche füfi u sächsi heisisech de uf 5:20 geinigt... jedefaus sisi scho da gsi womer cho si u aui hei ires zmorge bercho. dr rolf isch nid so zwäg gsi, hett nid möge ässe u dr arm hett die ganze nün stung, womer ungerwägs si gsi, müesse bisse. die cheibe höchi. hanim so chönne nachefüehle.
bim ufeloufe heimer no e frou u e maah gseh, wo emene muli hei müesse häufe usem iischwasser ds cho, es isch ibroche. zum glück heisis gschafft, nume hett die armi frou mit blutte fingere däm arme tier ghoufe, si hett so chaut gha. i ha de tee gä u d ruth es paar häntsche u de isch si gli ume witer. was fürnes angers läbe die lüt hei aus ig.
es isch aus i auem e ungloublech schöne tag gsi. die landschaft dett obe, eifach troumhaft. es fähle eim d wort. i bi so dankbar gsi, dasi dett obe bi gsi, dass es mr guet geit, dassi die zyt vorhär, wo so sträng isch gsi, gschafft ha, sisch richtig berüherend gsi, dett, mit däne tolle lüt, woni da ha dörfe lehre kenne. e unvergässleche momänt. sish de gad witer mit däre schönheit u grössi u witi näbe däne steinige riese mit gletscher wome is angere tal gseh hett. luege hett me de nume chönne, weme aghaute hett. es isch e schwierige abgang gsi, steil u gschlifrig. aber unbeschriblech schön. u aues unger dr sunne mit nume wenig wind. eifach toll. mir hei de öppe nach 700 höhemeter e suppepouse gmacht u si de witers bis uf bingham churz vor de drü. mir hei e super lodge, hei es bierli zwitscheret u de ume gwäschet mitem becki warmem wasser. ohni haar. weni die ds letschte mau gwäsche ha - ke ahnig. ou völlig wurscht hie obe. Iz heimer guet z nachtet mit öpfuringli zum dessert. gjasset heimer nid, e gruppe franzose hett es mega fest mit irne porters, sehr lustig gsi, aber ds bett hett de doch glockt.Read more