Jeep-Transfer nach Pokhara

Hüt Morge, nachdem üses Gepäck uf de Jeep verlade worde isch, sind mir losgfahre in Richtig Pokhara. In Pokhara werded mir üsi Nacht verbringe, da mir vo do us nur no öpe 2h bis zum Startpunkt vo de Trekkingtour hend.
Mit liiicht igschränkter Beifreiheit und praktisch nur über unteerti Holperpiste, hend mir en rund 8 stündige Transfer vor üs.
Mir hend en mega coole Trekkingguide wo super englisch chan und en lustige Fahrer wo voll dr Gfalle gfunde het an üserer Musig😂. D Stimmig isch super aber nach ca. 2.5h sind denn alli froh gsi uf en churze Kaffihalt. Da aber dr Kaffi do fast niene chasch suufe, han ich d Ziit für en Toillettegang und "Truckspotting" gnutzt (do macht das echt spass, will alli ihren LKW dörfed soo gstallte, wies wend. Dementsprechend bunt isch alles).
Uf de Hälfti vo dr Strecki, sind mir mitere Seilbahn en Hindutempel go aluege. Die wo hend welle (ich bin dr einzig gsii😅) hend dörfe live debii sie binere opferig vonere Geiss. Es isch liecht verstörend gsii, aber das isch do hald de Bruuch und ich has mega interessant gfunde.
S gopferete Tier wird nach dr Schlachtig, respektive Opferig am Bsitzer zruggeh und die tüend das Tier denn wiiter verwerte (Esse, Fell etc.).
Aschlüssend hend mir üs vomene alte Hindu e Tika (es Segenszeiche) uf d Stirn macheloh chöne.
Gsegnet und mit viel Iidrück hemmer denn de zweit Teil vom Transfer uf üs gnoh und sogar no Äffli gseh am Strosserand😃. Siiie hend aber nid so Freud gah wie mir und hend gfauchet.. Mr sind denn wiitergfahre😂.
Achoo im meega schöne Hotel, hend mir üs denn ready gmacht zum fein go zNacht esse und no es paar wenigi Sache bsorge fürs Trekking (WC-Papier, Trinkwasser etc.)
Jetzt heissts no Rucksack umpacke und parat mache für morn und denn ab go schlofee😊Read more