Laternen Festival 🧡

Puhh schnallet eu fest, hüt gits en laaaange Pingu. Mir wüssed ihr hend suscht scho immer fliessig z tue mit läsä aber hüt münder eu bsunders ziit näh. 🕰️ Es isch mal wieder gaaanz viel schieff gloffe! So viel das mer jetzt nur no vom Pechtag bzw. vo dä Pech 48 Stund dünd rede. Dä 14 & 15 November gits nümme…😂
Also fang mer mal vo vorne ah chline Reminder mir hend ja am Flughafe pennt. Sind öppe am 8i ufgstande und scho umgäh gsi vom Alltägliche Flughafe Getto. Somit gar nöd unagnehm gsi dete under dä Decki fürä z schlüfe und ufzstah…(ACHTUNG IRONIE IST IM SPIEL 🤡 )
Guet hend denn mal gluegt ob mer eusi Underkunft no hend oder sie doch per Zuefall storniert worde isch und hend dä 1️⃣ i vo 5️⃣ Glücksmoment gha vo dem Tag. Ihr gsehnd sie sind also sehr rar gsi. 😯
Hend eus es Gipfeli gönnt und denn es Grab (quasi Uber) bstellt. Zerst hemmer öppe 45 Minute müsse warte und niemert het eus ahgno will ja d Underkunft am Arsch vo dä Welt isch…hend denn abbroche und studiert was mer suscht no chöntet mache. Da mer kei anderi Idee gha hend hemmers denn 20 min spöter numal probiert. WUHUU es het eus eis ahgno. Das wär somit dä 2️⃣ vo 5️⃣ Glückmoment gsi.
Guet sind denn is Auto und über 1h eifach dä Berg uegfahre. Dobe ahcho hemmer zu eusere Überraschig sogar no Netz gha!😆 Mir zelled das jetzt mal nöd als Glücksmoment sondern sind so fräch und nämed das als eigentlichä Standart. 😂
Zum no d ziit chli im Kopf z bhalte es isch 12i gsi wommer dobe ahcho sind. Hend denn zerst mal chli euse Rugge gstreckt da s ligge uf dene Stüehl im Flughafe doch halt eifach nöd so s wahre gsi isch. 🪨 🛏️
Am 12.15 hemmer eus ahgfange ready mache, doch devor hemmer no öppis müsse kläre: Wie chömed mir uf di 15.00 wieder abe id Stadt?! Hend denn d Rezeptionistin gfrögt weg Taxi ihri Antwort isch klar gsi: „hahah no we don’t have taxi“ 🚫 Supiii genau die Antwort wend drüü Mädels wo sich scho sit 6 Mönät uf das Fest freued, di letscht Nacht wenig pfusst hend und denn no am Flughafe, plus erst ein Gipfel im Ranze hend ghöre.🙂
Oke keine Panik auf der Titanik. Hend denn per Grab en Uftrag erstellt wo mer Taxis chan vorbestelle uf ä gwüssi ziit. Hend eis uf di 14.15 bstellt und denn isch s lange warte wieder vo vorne losgange bis eus en Fahrer ahnimmt. Öppe 45 Minute spöter denn dä 3️⃣ vo 5️⃣ Glücksmoment: „Mir hend en Fahrer!“
So sind denn sogar no bitz in Stress cho mit schminke ect. aber egal hend eus gfreut das mer doch as Fest chönd!😍

Kurze reminder d Story het nonig mal würkli ahgfange wenner also ä Pause bruchet vom läsä wär da mal s Kapitel 1 fertig. ☑️ ☕️

So wiiter gahts. Also sind denn dunne ahcho und hend au ziemlich schnell gseh wo mer härä münd, hät nämlich scho ä riese Schlange vo Mensche gha wo am Trottoire entlang ahgstande sind. Mir denn dete eini go frögä und sie eus gseit mer münd au id Schlange und denn uf d Taxis wo eus zum Fest fahred warte. 🧍🏽‍♀️🧍🏾‍♀️🧍🏻‍♀️🧍🏼🧍🏿🧍🏼🧍🏽‍♀️🧍🏻‍♀️🧍🏽
Wie chönts au anderst si isch d Schlange voll i dä Sunne gsi. 🌞 Hend öppe 20 Minute gwartet und denn simmer i es chlises Kärreli ihgstiege mit no 9 anderne Nase. Sind max 4 Minute gfahre und hend denn dete in Car müese. Da gseht mer schomal wie guet die Organisation isch. Mit laufe wäred die Mensche scho lääängstens det hine gsi aber nei alli münd sich ah dä sunnebrötle lah zum die 3-4 Minute z fahre chönä. Ja nevermind sind denn chli meh als 1h mit em Car gfahre und denn endlich bim Festgländ ahcho.
Det het eus bereits di nächst Schlange erwartet und anderst als di letscht isch sie nöd vom Fleck gange. Zu dem Ziitpunkt hemmer au nonig gwüsst was därä ihres System isch zum di vorbstellte Tickets becho. Ich erlütere eu das kurz: Es het usdruckti A4 Blätter mit allne Näme druf vo dä Lüüt wo Ticket kauft hend. Uf dene Blätter muss mer denn sin Name sueche…Jup wie mer gseht ABSOLUT KEIS SYSTEM. Tuusigi Lüüt und jede söll sind Name uf meh Papierfötzel sueche. Nei absoluti Katstrophe gsi mer het sich gfühl als wär mer zrugg i dä Coronaziite wo mer um WC Papier het müsse kämpfe.🙂
Irgendwenn hend au d Verahstallter gmerkt das es kei Sinn macht und mer kein Milimeter wiiter chunt sprich sie hend d Tor göffnet und jede het dörfe ufs Gländ ine. Sie hend denn gseit mer söll d Tickets chli spöter go abhole cho. 🎟️
Zum no euse Gmüetszuestand z erlüter mir hend erst es Gipfeli gässä gha plus z letscht am 13.00 im Hotel obe öppis trunke gha. Sit dete simmer scho zwei mal i lange Schlange am verbrenne gsi plus au no 1h mit em Auto und 1h mit em Car gfahre. Kurz gseit mir hend durst und hunger gha!😟
Dinne uf em Gländ hets zum Glück überall Eiskiste mit Wasser drinn gha. 🧊 Öppe s einzige wo guet Organisiert gsi isch dete. 👍🏼
Überall hets mega viel Lüüt gha und sorry aber die Asiate gebet en füechte uf dich. Die schupfed, drängled und eusi Füess gsehnd für die wohl us wie Stei wommer dörf druf stah. Sprich Luune stetig am sinke gsi 📉…
Hend denn gseh das es Buffet git. Eusi Freud isch riesig gsi und hend eus wie mer das so glernt hend vom Mami und em Papi id Schlange gstellt. Nach dem mer aber 10 Minute spöter immerno dä glich grussig Fläcke uf em Bode hend dörfe bestunne hemmer mal chli fürä guggt und was münd eusi Auge dah gseh: Die Drängled alli vorne ihnä! So Gedulds Fade jetzt am sidene Endi. 🫥 Es isch denn mal bitz fürä gange und wo mer s erste vom Buffet erreiched ratet mal was es no druf gha het: Richtig, nüt.😑 Guet Gedulds Fade isch am 18.02 somit grisse. Jetzt herrscht en andere Wind, mir also wie alli andere *BIIEEEEP* uf dä Siite ahgstande will mer das da wohl so macht. Mir hend no genau ein Satz zunänd gseit uns zwar: „fühled dä Teller mir träffed eus nachher wieder da“👊🏼 Los ischs gange in Kampf ums ässä. Sind ohni blaui Fläcke und mit meh gfüllte Teller usecho. Sind härä ghockt zum denn müsse feststelle das es im Gmüescurry s erste mal sit mer i Asiä am reise sind Crevetten drin het. Mir als Fischliebhaber hend gsprudlet vor Freud. (ACHTUNG ERNEUT IRONIER IM SPIEL) Hend dänn dä Reis mit Aromat oder besser gseit Aromat mit Reis abegwürg und hend denn beschlosse erneut in Ticketkrieg z gah. 😖

So Kapitel zwei au gschafft. Aber kei Angst dä spannendi Teil isch nonig verbii. 😉

Sind denn dusse wieder ahcho und es gseht eich immerno öppe glich us: ein chline Tisch und öppe 40 Lüüt rundume wo ihri Tickets wend. 🧶-> so häts öppe usgseh.
Hend denn nach langen warte au endlich mal die berüehmte A4 Blätter mit dä Näme druf dörfe id Hand näh. Hend Blatt für Blatt durä gsuecht doch eusi Näme sind natürlich nöd druf gsi.🙂‍↔️ Hend denn gseh das es ein Compter no het wommer sin Name chan ihgäh und denn suechts dä grad use mit dä däzueghörende Sitzplatznummere. Mir hend aber 3 ganz schlaui vor eus gha wo entweder nöd wüssed wies heissed oder nöd chönd schribe. Eus eich au egal gsi aber ihre Name isch halt nöd uf dä Liste gsi. Statt dä Laptop wiiter z gäh hend sie ihres Hirni uf stumm gschaltet und wiiterhin vor dem umegfuchtlät und mit därä hinderem Tisch gstritte. Mir eus denn wie en Regewurm zwüschet ihrnä Ärm und Computer dure gschlänglet zum dä Name ihgäh und tada: NOEMI PESENTI 3 TICKET. Halleluja hemmer denkt doch mir hend für die 103 CHF wommer pro Person zahlt hend keis Tickets becho sondern eifach ä Nummere uf dä Arm gschriebe becho. (Eich hets für jede es Bändeli gäh aber wills kei ziit gha hend die passende usesueche hends es denn eifach so gmacht)😒 Nöd das wo mer gwünscht hend aber wa wetsch mache. Mir denn mit wieder bitz hoffnig eusi drü Stüehl go sueche. Hend au ziemlich schnell gfunde und grad schomal nach em rechte gügslät ob mer au würkli alli ä Laterne hend. Het alles gstumme somit hemmer denkt mer chönd beruhigt numal am ne andere Buffet go ahstah. Hend nämlich immerno alli en riese hunger gha.🫤
Mir also go ässä hole und zu eusem Gwunder hend d Lüüt plötzlich wieder glernt wie mer i dä Schlange staht (di meiste zumindest) hend denn en Topf Glasnudle plus no en Topf normali Nudle mit scharfersauce becho. Hend das verschlunge wie nüt und es isch echt guet gsi! Kei Ahnig ob mer das jetzt au numal würed sägä aber i dem Moment ischs mega gsi. ☺️ Ouu öppis hani vergässä nach dem mer d Glasnudle gholt hend hemmer welle gmüetlich uf eusi Stüehl sitze zum ässä doch siehe da ein verliebtes Ehepaar sitz uf eunä Plätz. Mir denn gfrögt was für ä Nummere sie hend und tatsachwahr doch di glich wie mir.😳 Toll da sie ghockt sind, sind mal wieder mir di dumme gsi wo wäg hend müsse und go hilf hole. Sind denn zu zwei härä und sie hend gseit sie kümmered sich drum mir sölled nur no chli go ässä und denn wieder da zrugg cho. Nach dem mer euse Platz nümm gha hend ischs Ässä nümme so entspannend gsi wie vorher.🥴 Sind denn numal chli go gugge was mer chönd ässä und denn uf di 20.00 zrugg det härä wo die zwei Lüüt eus gseit hend söll mer sie wieder gfinde. Zu eusem erstunne isch denn dete aber niemert meh gsi. Mir also voller wuet wieder alles use zum ihgange zum dete nahfrögä was denn da bitte los isch. Doch es isch nur no ein Maa det ghockt wo kei Englisch chan. Super! Zu dem Ziitpunkt isch dä Plan eifach hei z gah nümme all zu wiit weg gsi i eusem Kopf.💭
Sind ufs WC (wo JEDES verstopft gsi isch will die Lüüt da wohl nöd nur problem mit Buechstabe hend, sondern au mit Grafike und s WC Papier abe gspüehlt hend) und denn zrugg ufs Festglände. Hend dete denn au eusi helfer wieder gfunde und sie het eus drü neui sitz gäh doch die sind nöd näbet änand gsi. Mir denn gseit nene mir wend näbet änand und hend denn eifach uf irgend welchi Stüehl dörfe hocke wo frei gsi sind. Passend zur erste Laterne simmer den ghocket! 🥰🏮

So Gratulation Kapitel 3 au gschafft aber kei Angst das isch no lang nonig alles gsi vo eusem Tag…🙂😂

Soo zrugg zu dä Laternli dä 4️⃣ti vo 5️⃣ Glückmoment het gstartet! Es isch echt unglaublich gsi die viele Laterne und Füürwerk gseh. Mer cha sogar sägä dä ganz Ärger het sich glohnt für das!😌 Es isch würkli wie en Traum gsi wemmer in Himmel guggt het.🥰 Eusi Luune isch plötzlich wieder ganz ufgfüllt gsi!🤓🔋

Am 21.00 isch denn dä ganz Gspass leider au scho wieder verbii gsi und es isch wieder zum Car gange. Mal wieder hemmer kei Ahnig gha wo härä. Wie au mit eus wird ja dete nöd gredet.🥲 Sind denn eifach am Strom gfolgt. Nur blööd isch dä Strom i di falsch Richtig gloffe. Guet also eimal Kehre und wieder zrugg laufe. Nach wieder viel verlorener ziit simmer im Car ghockt (abeküehlt wie i dä Antarktis🥶) aber langsam het eus nur no eis Sorge gmacht und zwar wie mir wieder hei chömed.😣
Sind denn i dä City vo Chiang Mai ahcho wie gfühlt alli andere Lüüt vom Festival au. Denn het dä grossi Grab Spurt ahgfange…alli hend natürlich hei welle und hend es Grab bstellt. Und ratet mal wer keis Grab becho het will kein normale Grab fahrer 1h is niergendwo wett fahre? Scho wieder richtig, genau mir.😶 Sprich am ahfang isch d Stäge mal volle gsi und nah und nah hets lugge gäh bis am Schluss nur no drüü dete ghockt sind. Und das wäred mir drü gsi.👱🏼‍♀️👩🏽👩🏼
Es git leider nöd mal Foti vo dem Züüg da d Noemi 0% Akku gha het, d Michelle 3% und d Jasy zum Glück no 30%.🪫 Aber wemmer ehrlich sind isch eus det au nöd zum Fötele z muet gsi.😂
Mer hend öppe 50 Minute lang immer und immer wieder en Fahrer gsuecht doch eifach keine het eus welle ahnäh. Hend Taxi gsuecht und au ahglütet doch au det kei Erfolgt gha. Mir sind total verzweifelt gsi will eus ziemlich schnell mal klar worde isch mir gfindet niemert meh wo eus fahrt.😭 Hend ir verzweiflig denn es Grab zum Flughafe bstellt. Zerst ih dä hoffnig dä Grab fahrer z frögä ob er eus chan hei fahre. Hend ihm au Ahbote z zahle was au immer er wett will mer echt einfach zu eusne Sache und is Bett hend welle. Doch er het Nei gseit. Naja sind denn trotzdem an Flughafe gfahre wenns irgendwo es Taxi het denn dete und suscht isch das immerhin en Ort wo mer es Dach überem Kopf hetted. Es Taxi hets nöd gha. Es isch usgstorbe gsi so usgstorbe das dä Grab fahrer denn Mitgleid gha het und gseit het mer münd d fahrt da härä nöd zahle. Er het spöter eus denn au no gschriebe und sich Entschuldigt das er en Fehler gmacht hegi mit eus eifach dete us z setzä quasi. Ja im Nachhinein hets eus halt leider aber au nüt meh gnützt. Sind denn zum ne Sicherheitsbeamte vom Flughafe und hend ihn gfrögt ob er öpper kenni wo eus chönti fahre. Er het eus denn zu somne junge Burscht wiiter gleitet. 🧑🏾 Er isch dä einzig Schimmerschii gsi wommer no gha hend! Immer wenn mer d Adresse hend müsse zeige hend d Lüüt so reagiert: „Oh that’s soo far“ oder au höch im Kurs isch eifach es dreckigs Lache gsi mit denn mä „oh no sorry can‘t drive there“ hinä dri. Hend üs sälte so hilflos gfühlt wie det. Hend so kalt gha und gwüsst au s pfusse am Flughafe wird im Röckli bzw. Ohni Decki echt nöd geil…🚩
Dä Maa hät denn chli ume telefoniert und am 23.20 sind denn sogar grad zwei Autos vor eus gstande. Bis zu dem Ziitpunkt hemmer aber no vo keim es okay ich fahr eu ghört deshalb simmer immerno wie hibligi Chind am hi und her wippe gsi.🫣
Und denn dä lang ersehnti 5️⃣ti vo 5️⃣ Glückmoment!🥰 Mir sind is Auto und los ischs gange no 1h richtig hei. Dihei ahcho isch d Hütt eiskalt gsi sprich mer hend genau no dä Pulli ahzoge, guetzli gässä will mer dä ganz abig eich nie würkli gsättigt gsi sind und denn mit Liecht ihpfusst da mer suscht eusi Handys nöd händ chönä lade. Am nächste Morge mümmer am 7bni i dä Stadt si für di letscht Tour. Mal luege wie das usechunt…🫢

So jetzt ischs s Kapitel vorerst beendet mer hoffed ab morn hemmer wieder s Glück uf eusere Siitä. 😇Read more