Eusi erst Nacht als Obdachlosi😴

So am Dunnstig hets gheisse zrugg uf Thailand und glichziitig au das dä Countdown vom heicho startet…🤗/🫢 gmischti Gfühl sind da im Spiel.
Hend natüüüürlich uspfusset und denn wieder uf d Minute genau uscheckt. Hend eus bereits gester dä Plan bereit gleit was mer denn no wend mache, da dä Flug erst am 5i isch. Hend gseh das am 14tä November dä neu Film „Red One“ usechunt mit em The Rock. 🪨😍 Deshalb isch dä Plan mit is Kino gah denn eich schnell fix gsi.😅 Sind zerst no was go ässä inärä Mall und denn mit eusem ganze Gepäck is Kino gstürchlät. Und wenni säg stürchlä meini stürchlä. Sind chum zwüschet dä Sitz durre cho mit all dem Palager wommer hend. 😮 Da es en Wiehnachtsfilm isch hends denkt münds d Temperatur im Kinosaal ahpasse und hends gfühlt scho fast schneie lah det drinn…🥶 Zum Glück hemmer Decki, Pulli, Strandtüechli ect. alles griff bereit gha! Dä Film isch mega geil gsi, sind grad bitz i Weihnachtsstimmig cho.🎅🏼
Am 5i simmer denn losgfloge richtig Manila, dete denn 3h Ufenthalt gha und denn wiiter nach Chiang Mai was euses Endziel gsi isch.
In Chiang Mai isch das Wuchenend s berüehmte Laternefest (Also dä Rapunzeltraum vo allne Lüüt) deshalb sind ALLI zahlbare und nöche Underkünft usnahmslos usbuecht…fuck sponti si eimal meh schlächt usecho😅 Hend denn d Wahl gha zwüschet am Flughafe schlafe oder es Hotel wiiit weg z näh. Hend denn nach langem hi und her es Hotel buecht wills nur 200 bath kostet het z dritte für zwei Nächt (5.09CHF)😮 Dä Preis seit au scho alles sind eus nöd mal sicher ob mer det es Bett hend will uf em Foti gseht mer schomal keis.🤣 Wommer denn aber in Chiang Mai glandet sind hemmer d Nachricht becho das d Underkunft canceled worde isch. Okee s Schicksal hets so welle das mer am Flughafe penned. Sind denn am 1i dä Nacht uf Schlafplatz suechi gange. Hend denn gli mal es guets plätzli gfunde doch s Problem ->hunger<- isch nonig glöst gsi. Am Flughafe het alles scho zuegha, ABER zum Glück gits euse gueti Grab wo esse lieferet. Hend zwar öppe 30 minute müsse geduld zeige bis eus en Fahrer mal akzeptiert het (d Noemi und d Jasy hend eich scho nümm drah glaubt) aber denn ischs ratz fatz gange und s esse isch cho. Gschmacklich für eus es 5 ⭐️ Gourmet Menü!😆
So denn hets gheisse ihkuschlä und guet Nacht mal gugge ob mer morn zerst mal is Massage Studio münd.😂Read more