2 Tage in Ocho Rios 🌺

Nach 5 Täg in Negril simmer ade Ostküste wiiterzoge uf Ocho Rios.
Mier hend wiitere paradiisische Ort gfunde. D Natur isch da numal ganz andersch als in Negril, sehr sehr grüen, die Stadt isch umgäh vo Rägäwald. S ganzä Ökosystem isch atemberaubend. Mängisch müemer wider dureschnufä zum das ganzä Fasse was mier da dörfed erläbä. 🤭
Üses Hotel isch direkt am Meer id Klippe inebuut und heisst Hibiscus-Lodge… Überall schöni Hiboskusstrücher und zmitzt innä en wunderschönä Poinciana Baum (de rot) ziert die schöni Landschaft.
Wo mer vorgeschter ahcho sind hemmer zerscht mal de Pool gnossä wo direkt vor üsem Hotelzimmer isch und am Abig hed üs d Kadesha es Local-Restaurant zeigt womer superfein Znacht gässä hend.
Geschter hemmer en Actiontag gha. Zerscht simmer zumene Naturpark wo d Mila und de Dani hend dörfä mit Delfinä schwimme, wo mer hend chönnä Vögel ih allnä Farbä füettere und wo ich han dörfä en Leguan hebä. Ahschliessend simmer zude Duns Riverfalls gangä wo nur wenigi Minute vom Naturpark entfärnt sind. Eifach nur wunderschön, zmitzt im Rägäwald, paradiiiisisch schön. D Mila und ich hend dörfe de Wasserfall duruf laufä und de Dani hed mitm Ilai chli im Wasserfall bädeled. Was für tolli Erfahrigä! 😍
Am Abig hemmer im Hotel ultra fein Znacht gässe und de Abig usklungä.

Hüt isch nu öbis ganz schlimms passiert bim Pool in Ocho Rios, en Bueb isch leider vertrunkä, en Mah und ich hend ihn müesse widerbeläbe und ahschliessend ischer uf Kingston is Kinderspital verleid wordä… Mier sind alli sehr trurig über die Erfahrig und das beschäftiged üs grad fescht. 😔 Mier hoffed für d Familie und die Ahghörigä so fescht das er das ohni Schäde überläbt.. Mier bätted fescht für ihn. De Dani hed natürlich d Kind ih derä Ziit betreut und gluegt dass si nid z vill mitbechömed…
So möchted mier üch nid nur immer alles Schönä zeigä, sondern üch au üsi schlächte und/oder trurigä Erfahrigä nöcher bringä..

Hüt gads wiiter uf Port Antonio. Simmer gspannt was üs da wird erwartä.Read more