Port Antonio and the Mockingbird Hill

Vor 3 Täg simmer in Port Antonio ahcho. Üses Hotel isch zmitzt im Rägäwald und heisst dementsprächend Mockingbird Hill, will die Mockingbirds chönt der eich sozäge direkt is Zimmer flügä. Natur pur, sehr es schöns guet erhaltnigs chlises Hotel wo zwei dütschi Frauä ufbuut hend. (siehe Fotos) Mier sind die einzigä Gäst im Hotel sit 3 Täg. Es isch allgemein aktuell nid Touristeziit in Jamaika, drum gnüssemer d Stränd und alli Tourisachä fascht für üs elei. 🫶🏽

Vorgeschter simmer ad Frenchmens Cove und hend en Tag am schönstä Strand verbracht wo mer je gseh hend. D Chind hend de ganz Tag gsändeled und baded, de Ilai isch am schluss im Wage ohni es Wort friedlich ihpfüseled.

Jetzt öbis wo üs bitzi stört ah dem Hotel: S Zmorgä isch nid Inkl., bi allnä andere Hotel ischs aber. die wüssed genau, dass mer ca. 15 Minutä muess fahrä zum bim nächschte Restaurant Zmorgä ässe. Es Zmorgä für 3 Personä choschted über 60 Chf.
Nicht mit uns, mier hend nämlich zum Glück üsi Kadesha wo üs zu üsem nüe Lieblingsrestaurant gfahrä hed. Voll geils Zmorgä für 4 Personä (inkl Kadesha) hed nur 26.- koschted. 😁 Und mer chund chli unter d Lüüt will die sind ächt cool druf.

Gester simmer ufm Rio Grande mit Bambusfloss go umefahrä. De Fluss isch 48 Meilä (ca. 77 km) lang. Und am Nami simer ah Strand go bädele und hend später det grad nu Znacht gässä ade Strandbar.
Hüt gads wiiter uf Kingston, de Hauptstadt vo Jamaika. 🇯🇲

Nu Update zum Bueb in Ocho Rios:
D Kadesha hed mit einere vom Hotel telefoniert zum nachäfrage wies im gad.
Er läbt und sig teilwiis scho wach, er hed vill Wasser ide Lunge wo zu wiitere Komplikationä füehre chönted und si düend ne etz intensiv betreuä.
Mier bätted wiiter für ihn und sini Family das er wider gsund wird. 🙏🏽Read more