Manchester ⚽️

Acho in Manchester, semmer us ersts zom Old Trafford Stadion. Det esch en Tour planet.
Go Amälde, Tickets becho, en digitale Füeherer becho ond de eschs los gange met de physische Füehrer dör s Stadion. Eine zvorderst, dese z henders. Dass au jo niemmer cha verlore go🫣.
Die erste Gäng entlang zo de Stäge wo eus ufd Sir Alex Ferguson Stand brocht hed. Scho ide Gäng enne hedmer plötzlech de Groch vo Knobli🧄 ide Nase gha. Mer hend dänkt das esch öppe das, wos im Restaurant zom z Mettag gä hed oder so🤷‍♀️. Womer de aber uf dere Tribüne acho send heds nomeh noch Knobli gschmöckt ond euse Guide hed scho gli gfrogt wasmer do schmöcked. D Erklärig för de Knobligschmack esch aso ned d Chochi gseh, sondern en Maschene wo de Rase pflet. Knobli sell es Wondermettel sii förne gueti Rasepfleg☝️.
Witer eschs gange zo de Omkleidekabine. Vo det us hemmer de grad dör de "Tunnel" chönne laufe, wo au d Speler aligs laufid för ufs Spellfeld. E chorze "Tunnel" esch das..aber sie laufid jo de aligs glich no gnueg😄. Ämu es Paari🤭.
Spannend eschs gseh das Enneläbe zgseh ond au die verschedne Tribüne. Secher au sehr speziell es Spel z gseh aber die cheibe Tschüteler send grad alli ide Ferie🤷‍♀️☀️.
De zwöiti Tag hemmer ide Stadt verbrocht.
Wer s Gfühl hed ide Schwiz heigemer vöu Boustelle, sell mou uf Manchester ine Fahre🥴. Au ide Fuessgängerzone ond drom ome heds ei Boustell am andere gha. Aber söst eigentli en schöni Stadt. Chli dör d Gasse gschländeret semmer, bevor mer denn euse nöchsti Schlofiplatz agstüret hend😁.Read more