Porto

Mitem Bös simr vom Camping it Stadt inägfahre. Und scho diä Fahrt hets in sich gha: dür ängschti Gässli u über Pflastersteinä het dr Chauffeur ds riisä Gfährt gstüüret, het gwartet bis d' Fuessgänger d' Büüch hei iizogä, damiter Platz het, het Hüsereggä müessä uswiichä und het hupend scharfi Kuurvä hinger sich glah. Dr Charme vo derä Stadt, het üs scho vom Bös us zwüschä dä Hüsli zuegwunkä u mir heis chuum chönnä erwartä, diä Perlä gah z' erchundä.
Aber, z' Porto aacho heimr nach derä rasantä Fahrt u derä drückendä Wermi grad us ersts ä Pousä u öppis chauts u süesses z' Trinkä bruucht.
Nachem Vrschnuufä simr los. Grad us ersts simr über d' Brügg widr äs Stück zrügg. Dert hetmä ä wundervouä Blick uf diä typischä farbigä Hüsli vom Hafä vo Porto gha u het dä Charme vom Bös vori, itz huutnah chönnä gspürä.
Witr simr unger derä grossä Brügg dr Hoger uf it Stadt. Dä Wäg isch so hübsch gsi mit dä schmaalä Hüsli, wo zwüschä dä Brüggäpfiiler bbouä si u obädrüber d' Stauhbrügg, wo äs mächtigs Biud het gä. Scho hiä isch öppis ufgfauä, wo när praktisch zur Reglä isch wordä: d' Hüsli si mit gmusteretä u ganz farbigä Plättli gschmückt gsi. Ds het jedes Huus einzigartig gmacht!
Ir Houptstrass aacho hets vo Souvenirlädeli gwimmlet. I Jedem hets Stoffsardellä gha, Korktäschä, Portwiiä, u plättleti Mitbringsel – aues wo z' Tourihärz begehrt.
Itz simr is HardRock Cafe gah Nachos ässä u när no i nöier Stadtteil. Ir ganzä Stadt isch übrigens mega viu los gsi.
Widr zrügg simr zur Kathedralä. Ungerwägs het d' Aabäsunnä äs Spektaku bbotä: diä prunkvouä Boutä hetsi majestätisch lah lüüchtä u d' Stadt isch zumnä dramatischä Biud wordä. So heimr üs churzerhand entschidä, no ä Abstächer zurä anderä Chiuchä zmachä. Dert heimr när erchennt, vo wo diä fasch unnatürlechi Belüchtig chunnt: d' Sunnä isch imnä sattä korallrot am Himmu gstangä u hetsech geng widr veränderet, bis sie rot-orange gsi isch. Äs wahnsinns Schouspiu!
Schlussändlech heimrs de doch no zur Kathedralä gschafft. Da sie scho so aut isch, si d' Fänster no mega chli u nur ganz obä. Denzumau heisi ds wägä Gründ vor Stabilität so gmacht. I einigä Kathedralenä heisi ds mitem nöiä Wüssä umbouä u grossi, fründlechi Fänster inätah, hie abr nid.
Widr dussä simr no ufnä Plattform womä übernä Teil vor Stadt het gseh – sehr bezoubernd au diä Farbä!
Itz simr no gah Znacht ässä u när widr zum Wasser abä. Dert hets plötzlech so dunkli Tropfä afah rägälä u mir hei üs gfragt, was ds isch. Irgendeinisch heimr dr Rouchgruuch wahrgno u d' Dana het o vrzeut, wrum d' Sunnä äuä so rot isch gsi – irgndwo hets vrmuetlech brönnt. Die Rägätropfä si auso so dunku gsi, wüusisech mit Äschä hei vrmischt. #Ascheregen
Morn göhmr de witr uf Lissabon.Read more