Sevilla

Die letschtä 2 Täg simr in Sevilla gsi. Eigentlech wär nur einä dänkt gsi, abr womr gmerkt hei, dassmr viu no gar nid hei gseh, heimr entschidä no ä 2. Tag z' gah.
Auso am Tag 1 simr grad us ersts i sone Stadtteil, ufdr angere Sitä vom Fluss. Dert hets widr hübschi Gässli gha u vorauem ganz viu chliini u grossi Beizli. I eis simr när o ga Zmittag ässä – u äs isch herrlech fein gsi!
Mit vouä Büüch simr über d Brügg u it Kathedralä. Die z' Sevilla isch die gröschti goteschi Kathedralä vor Wäut! Und tatsächlech, imposant ischsi gsi. Die einzelnä Kapällenä si mega prunkvou gstautet gsi, mit verschidenstä Muster, Farbä u Verzierigä. O d' Chiuchäfänster si dr Wahnsinn gsi! Äs isch jedesmau widr iidrücklech, wie fiin u durchdacht die Fänster gstautet si u wie ungloublech starch ihri Farbä lüüchtä. Wunderschön gsi zum bestuunä!
Itz isch du äbä scho Aabä gsi u so simr ufnä Camping, chle usserhaub vo Sevilla.
Am Tag 2 simr auso nomau los it Stadt. Dismau simr no dr Räscht gah bestuunä. Unger angerem simr ines Viertu, wos ganz viu chliini Lädeli u Gässli het gha. Dert hets üs sehr gfauä u äs isch mega viu gloffä. Witr simr dürnä wunderschönä Stadtpark u si grad no anä Märit härägloffä. Sie hei hie o mega viu Ässensständ gha vo ganz viunä verschidenä Länder. Hie isch momentan z' Fest vodä Nationä; s' het sehr interessant usgseh. Nach churzem Düreschlenderä simr auso witr dür die Grüenflächi u si zum Plaza de España cho. Ds isch ä absolut majestätischä Platz! Äs wunderschöns, mega längs Geböide, mitere Fassadä vo schönstä Muster u Farbä, vrlouft ar Gränzä vo däm haubrundä Platz. Äs architektonischs Meisterwärk! Witr steit ä Springbrunnä ir Mitti, ä künstlechä Fluss fliesst umä Platz um u cha mit Hiuf vo verschidenä kunstvouä Brüggä überquert wärdä. Aues i auem ä Platz zum stuunä u zum entdeckä, mit ganz viu Liebi u Hiigab zum Detail!
Zum Abschluss vo Sevilla simr no it Stierkampfarena u hei dert arä Füehrig teilgnoh. Spannend gsi, d' Hingergründ z' erfahrä, d' Furchä vodä Hörner vo däm mächtigä Tier im Houz z' gspürä u dr Gang vomnä Matador i die Arena z' verfougä.
Itz simr no witr gfahrä Richtig Cádiz u dert ir Nööchi ufnä Camping.
Achja, au üses Bsteck u Gschirr hets leider nid bis hie härä gschafft... Mir heis in Sevilla vrgässä. :(Read more