Suche zurücksetzen
Europa Roadtrip
  • Dadaste Tröbewi
  • Dadaste Tröbewi

Europa Roadtrip

Ein 113-Tage Abenteuer von Dadaste Weiterlesen
+14
FolgenÜbersichtÜbersichtKalenderKalenderFotosFotosTeilenTeilenBucket List
Neuste zuerst
  • Beginn der Reise
    3. August 2017
    Dadaste TröbewiEuropa RoadtripReisender
    z' Abentüür geit los!
    Wiudgäns überem Wörthsee

    1. Tag

    3. August 2017 in der Schweiz ⋅ ☀️ 27 °C

    Nach Gipfeli u adiä-wou simr gen Norden. Üses erstä Ziu isch Münchä. Nach erster Verwirrig bir Campingplatzsuechi simr i Kontakt cho mitem dütschä Vouk u prompt globt wordä fr üsi Oldschool-Navigation. #gratisMünchächartä
    Schlussändlech heimr am Wörthsee ufem Camping übernachtet. Dr See het am Aabä u am Morgä frnä wiukommeni Abchüelig gsorget u d Wiudgäns frne idyllische Sunneungergang (u am Morgä frnes vrschissnigs Badeinseli).
    Gschlafä heimr übrigens nid im Alj, sondern z dritt imnä zwöier-Wurfzäut, mir si z' spontan gsi fr dä Camping...
    Morn geits witr uf Münchä.    Weiterlesen

  • Dadaste TröbewiEuropa RoadtripReisender
    1. Stadt, Münchä
    Sicht vom Rathuus-TurmSicht vom Rathuus-Turm ufd Frouächiuchä

    München

    4. August 2017 in Deutschland ⋅ ⛅ 26 °C

    Hüt simr gah d' Stadt Münchä aaluegä. Nacherä Besichtigung vom Rathus-Turm us, simr när unger im Rathus-Chäuer gah Käsespätzle ässä.
    Am spätä Nami simr los ufne witere Camping wo ca. uf hauber Strecki zwüsche Münchä u Prag ligt. Wägem Stou u dr Zit heimr üs ner umentschide u si schlussendlech z' Landshut ufeme Camping glandet. Hüt hets sogar ä Platz fre Alj gha u so heimr z' erstä Mau im Alj pfuuset.
    Morn geits witr gen Prag.    Weiterlesen

  • Dadaste TröbewiEuropa RoadtripReisender
    TrdelníkAstronomischi UhrZytgloggä toppts nid

    Prag

    6. August 2017 in Tschechien ⋅ ☁️ 20 °C

    Wo mir nach paar Stung z Prag si acho, het d' Campingsuechi aagfange. Mir si ca. 1h über Stock u Stei greiset, hei z' Chinatown vo Prag bsüechlet u si de schlussändlech ufeme Camping aacho. Camping Prager heisster u d' Nachbarä si Papageiä u Kakadus. Am Aabä simr no chle ufem Camping gsi u ner gah pfuuse.
    Hüt simr dr ganz Tag Prag gah erkundschaftä. Mir hei ungloublech schöni Geböide u interessanti Lüt gseh. Gässä heimr ä Härdöpfuchips-Spiess und e Trdelník (ds isch sones Teiggebäck wo chle usgseht wienes Vanillecornet). Sehr guet gsi! Gah aaluege simr d' Prager Burg u speter no dr riesig Spiuzügladä. Dert heimr z' wäutgröschtä Puzzle gseh mit 40'320 Teili!
    D' Nacht isch sehr chaut gsi...
    Morn geits witr ufnä längi Reis nach Warschou.    Weiterlesen

  • Dadaste TröbewiEuropa RoadtripReisender
    Hradec Králové
    Dr Dave am Notfauznacht machä

    Poznań

    7. August 2017 in Polen ⋅ 🌙 13 °C

    Hüt het dr Tag früeh gstartet. Mir si am 7i ufgstange u am 9i losgfahre vo Prag richtig Warschou.
    Ungerwägs heimr gmerkt, dass mir nid so schnäu vorwärts chömä wiemer dänkt hei.. Mir hei üs verfahre, hei Landstrasse statt Schnäustrasse verwütscht, si ar Outobahnbousteu mehrmaus begägnet u schlussendlech isch d' Zit üsä Hänker worde.
    Bi au denä Umwägä hei mir abr ganz schöni Plätzli entdeckt, womr mitem Navi nid hättä gseh. D' Umgäbig vo Tschechie u Polä isch sehr schön, mir hei immer widr gstuunet ab schönä Gärtä, blitzblankä Huusdecher (z' Polä), schönä Wäuder u Wisä u tollä Boutä.
    Nach etlächä Stung heimr fang d' Heufti vor Strecki erreicht u hei z' Poznań ä Camping afah sueche. Leider isch niene, wo ä Camping hätt söuä si, einä gsi. Chliises Gedicht dadrzue: "Nach langem hin und här, ob Luxus oder Bär, hei mir üs entschide im Sichere gah z' lige." U so vrbringemer die 5. Nacht im Hotel u dr Alj ufem Hotelparkplatz.
    Dr Dave het üs 3 no es Notfauznacht kochet, ir Militärgamelle u ufem Notchocher im Hotäuzimmr, Pasta Napoli.    Weiterlesen

  • Dadaste TröbewiEuropa RoadtripReisender
    Kultur- und Wüsseschaftspalast

    Warschau

    8. August 2017 in Polen ⋅ ⛅ 19 °C

    Am 9i simr z Poznań richtig Warschou gstartet. Dr Wäg isch 1 längi Outobahn gsi u so simr mega guet vorwärts cho. Ungerwägs heimr no tanket, äs Gipfeli u äs Energy Drink zmörgelet u si du schlussändlech dank dr Offline-Map difig u praktisch ohni Problem ufem Camping z Warschou acho. Nachem Check-in simr grad los it Stadt.
    D' Stadt isch sehr interessant, viu grösser u imposanter aus mirs üs hei vorgsteut. U d' Autstadt isch bezoubernd mit dä vilä farbigä u autä Boutä, dä huufä Chiuchä u dä charmantä Sitägässli.
    Morn geits witer gen Vilnius.    Weiterlesen

  • Dadaste TröbewiEuropa RoadtripReisender
    St. Kasimir Chiuchä
    Znacht im Lokys

    Vilnius

    9. August 2017 in Litauen ⋅ ⛅ 22 °C

    Am Morgä isches losgangä gen Vilnius. Mir si am 10i gstartet u ca. am 5i ufem Camping aacho. D' Fahrt isch ohni Problem gange, da dr Dave o dismau d' Offline-Map het abeglade. Schono gäbig!
    Wo mir über dr Gränzä si gsi, heimr gstuunet: atemberoubendi Natur mit wunderschönä Wisä, Wäuder u Seeä. Zudäm heimr gmerkt, dass hüfig d' Hüser amnä See bouä si, so het praktisch jedä äs eigets Hüsli miteme eigetä See u viu eigetem Land!
    Nachdäm mir dr Alj ufem Camping hei abgsteut simr ufe Bös u ab it Stadt. Mir si rächt erchlüpft, wie schlächt zwäg und unspektakulär die Stadt z' si schiint u umso überraschter simr gsi, wo mir d' Autstadt hei entdeckt. Sie isch bezoubernd, mit ihrnä härzigä Höf, Sitägassä, Kafis u Bars. U d' Lüt si sehr sympathisch. Nach chliinä Schwirigkeite mitem Self-Checkout imnä Ladä (völlig unbekannts System fr üs Schwizer) simr när ines tolls Restaurant, Lokys heissts (sehr empfählenswärt!) u hei Litauische Food gnossä. D' Dana het Biber psteut u mir hei aui drvo probiert. D' Källnerin het sogar dütsch gret, u no besser: sie het äs Ustuschjahr ir Lerbermatt gmacht.
    Morn geits witr nach Riga.    Weiterlesen

  • Dadaste TröbewiEuropa RoadtripReisender
    Mater-Dolorosa-Chiuchä (hie isch z' Hochzyt gsi)

    Riga

    10. August 2017 in Lettland ⋅ 🌙 15 °C

    Hüt simr vo Vilnius nach Riga gfahre. Aues isch tiptop gange u mir hei dr Camping schnäu gfunge.
    Riga, dert muesch hiigah. D' Stadt isch grösser aus erwartet (die grösti Stadt vo dä 3 baltische Houptstädt) und ihres Flair mit dä autä Hüser, chliinä u schönä Restaurants u Pärkli mit Fluss isch einzigartig.
    Was ufgfaue isch, isch dass ah viunä Eggä u i viunä Sitegassä Musig mit ungerschidlechschte Instrument gmacht wird. Sigs Klavier, Cello odr Xylophon, d' Lüt in Riga schiinä musikalisch z' si. Vorauem Ching heimr gseh spilä.
    Morn geits witr uf Tallinn.

    Ah, und bi Trouigä ir Chiuche chasch cho u gah widä wosch...    Weiterlesen

  • Dadaste TröbewiEuropa RoadtripReisender
    Rathaus TallinnZ' feinä Ässä im Hortus

    Tallinn

    11. August 2017 in Estland ⋅ ⛅ 15 °C

    Hüt simr uf Tallinn greist. Nachdäm mir ufem Camping acho si, simr mitem Alj ab it Stadt.
    Ungerwägs fr it Stadt heimr Bekanntschaft gmacht mit 3 Alj-würdige Outos (Limusinä sis gsi). Die ganzi längi Strass heimr änang geng widr ungerhaute, bis sich üsi Wägä trennt hei. #AdiosAmigosDiLimos
    Ir Stadt simr widerum d' Autstadt gah aaluege. Oh hie isch widr ä Charme ume gsi, mit au denä tollä Hüser, Chiuchenä, Restaurants u Lüt.
    Nachdem mir chle si umegspaziert heimr es Restaurant gsuecht u si schlussendlech im "Hortus" glandet. Hie isstmä im mittuauterlichä Elfäland u nachdem mir vomne fründleche Elf bedient si wordä, heimr die userläseni Choscht gspisä. Sehr empfählenswärt das Beizli!    Weiterlesen

  • Dadaste TröbewiEuropa RoadtripReisender
    Selfie nachem Sturm

    Fähre Tallinn - Helsinki, Järvenpää

    12. August 2017 in Finnland ⋅ 🌧 18 °C

    Nachdäm mir usgschlafe hei, simr ab a Hafä vo Tallinn. Vo dert uus heimr d' Fährä nach Helsinki gno.
    Z' Helsinki aacho, simr dr Camping gah sueche u hei üs iigrichtet. Nachdäm mir üses Vorzäut gspannet hei, Tisch ufboue u d' Steffi het aafah Wöschä, hets liecht afah blitzä überem See. Ufzmau hets pressiert! Ds Gwitter isch nöcher u nöcher cho, dr Sturm isch cho z' blasä u d' Rägätropfä si uf üs abäprasslet. Im auerletschtä Momänt heimr no d' Zäutstange chönnä a Bodä legä u d' Türenä vom Alj zuetue. Mir hei üs vorem Alj chlii zämägrüppelet u z' Vorzäut ganz nöch abegspannet. Da ds frd Steffi doch grad z' viu Action unger praktisch freiem Himmu isch gsi, heimrs du schlussendlech irgendwie doch no gschafft i Alj inäzcho u hei de z' Gwitter im Trochenä usgharret.
    Morn göhmr dr ganz Tag gah Helsinki aaluege.    Weiterlesen

  • Dadaste TröbewiEuropa RoadtripReisender
    Luther-Kathedralä
    NotwöschhänkiSo chochämr

    Helsinki

    13. August 2017 in Finnland ⋅ ☀️ 16 °C

    Nach däm stürmischä Wätter die Nacht, heimr am Morgä müesse afah ufruumä.
    Nachdäm ds erledigt isch gsi, hetsech o d' Sunnä mau widr zeigt u so simr mitem Alj uf Helsinki inä.
    Ir Stadt simr ines Parking u wüumr ja no geng nassi Wösch hei gha, vom Wöschä, heimr die prompt im Parkhuus übere Alj ghänkt (speter heimr gmerkt, dass ds nüt bringt...).
    Mir si i Monki (Chleiderladä), ines Mumins-Kafi (d' Mumins si vorauem ar Dana iri Chinderheldä) u si gah d' Luther-Kathedralä aaluege. Die isch sehr imposant gsi, het i ihrem Wiss miter Sunnä um d' Wett gschunä u het üs mit ihrne türkisblau-goldige Kuppä lah stuunä. I ihrem Innerä hets ä riiiiiiesegi Orgelä gha, wo mir aui gärn hättä ghört.
    Speter simr no witr dür d' Stadt gloffä u si no zure witere Chiuche.
    Dr Aabä heimr ufm Camping vrbracht, hei für üsi Wösch, wo ir Iisteuhaue äbä nid trochä isch wordä, ä Wöschhänki bbouä, drzue Tortellini kochet u ner gmüetlech ah dä letschtä warmä Sunnästrahlä ggässä.
    Morn geits witr i Nordä vo Finnland, geng nöcher as Nordkap.    Weiterlesen

  • Dadaste TröbewiEuropa RoadtripReisender
    Dr touristisch nördlechscht Punkt
    Dr würklech nördlechscht Punkt – KnivskjeloddenKorvalaKarigasniemi

    Oulu, Korvala, Karigasniemi, Nordkapp

    18. August 2017 in Norwegen ⋅ ⛅ 10 °C

    Nachdem mir z' Järvenpää los si, simr uf Oulu gfahre. Ds isch ca. ir Mitti vo Finnland. Nach Oulu simr witr i Nordä u ungerwägs heimr no dr Santa imnä Park wöue bsueche. Leider het dä abr scho zue gha; d' Päckliproduktion isch anschiinend scho i vouem Gang. Am Aabe heimr z' Korvala ufeme härzigä Camping mit eigetem See gschlafe. Sogar e chliini Ruederboot-Tour isch dinnglägä u dr Dave u d' Dana hei ihri Ruederkünst bewisä. Troumhaft schön gsi! Znacht heimr Würst u Gwürzbrötli brätlet. I dere Gägend si üs mehrmaus Renntier-Herdenä begägnet, die si am Strasserand odr loufe direkt über d' Strass. Sehr lustegi u interessanti Tier!
    Nach Korvala simr uf Karigasniemi gfaahrä, dsch direkt vor dr norwegischä Gränzä. Mir hei dert am Fluss chönnä si u näbst dä Muggä ischs sehr dr Fridä gsi.
    Am nächschtä Tag simr ner bis az Nordkap.
    Dr Wäg as Nordkap isch atemberoubend. Mega viu Felsä, Seeä u ruuchi Küste. Z' Meer isch ganz töif blau u dürä Wind schlahts u viu Wällä.
    Am Nordkap hets gluftet wi vrruckt, abr es isch mega iidrücklech wemä so wit cha gseh. Mir hei auso üses erstä Ziu erreicht!
    Ir Nacht am 00.00 Uhr heimr üs ufä Wäg gmacht uf üsi Nachtwanderig a würklech nördlechscht Punkt vo Europa, Knivskjelodden heisster. Mir si ir Nacht gangä, wüu mir dert am 03.08 Uhr dr Sunneufgang hei wöuä luege. Aacho simr am 03.00 Uhr, auso isch üse Zitplan perfekt ufgangä. D' Wanderig isch wortwörtlech über Stock u Stei gange, mir hei üs vo Steimandli zu Steimandli müesse orientiere, angeri Wägbeschilderig hets nid gäh. Gottseidank chame hie sogar ir Nacht ohni Liecht ungerwägs si, äs isch nämlech dank dr Mitternachtssunnä geng no rächt häu!
    Mir hei üs no chle im Wäg toschä u so heimr zimlech ä steilä Wäg überne riisä Feusä am Meer abä müesse. Isch aber aues guet gange!
    Ändlech am Ziu aacho simr vomne bezoubernde Aablick vom Meer u Morgärot begrüesst wordä. Ungloublech gstuunet heimr u üsi Härzä si warm wordä! Ä wahnsinns Fläck Ärdä – u mir si dert gsi!
    D' Sunnä heimr leider nid ganz gseh, d' Wulche si z' dicht gsi. Abr dr Himmu u z' Meer hei trotzdäm äs wunderbaars Schouspiu botä i dä ungloublechschtä Farbä!
    Bevor mir üs platziert hei, fr ds Schouspiu z' gniessä, isch d' Steffi z' vorderst ufdä Feusä uf Möwescheisse usgrütscht u hingertsi härätätscht. S' paar Meter witr vor u sie hät dr nördlechscht Schwumm vo Europa gno...
    Ufem Rückweg heimr du die richtegi Routä gno u hei mehrmaus Rentierherdä krützt. Sehr z' frideni u ruhigi Tier.
    Widr bim Alj aacho simr am 06.45 Uhr u hei üs ner ufgmacht gahne Camping z' sueche. Dert aacho heimr ä warmi Duschi gno, üs bettfertig gmacht u si i Alj gah ruhie. Mir wärdä morn witr gah dür Norwegä u ds Wikingerland entdeckä!    Weiterlesen

  • Dadaste TröbewiEuropa RoadtripReisender
    Hammerfest
    Die zwe Walä u dr LachsGammelstad KyrkstadÜsä erst Euch!Umeå

    Hammerfest, Luleå, Umeå, Östersund

    23. August 2017 in Schweden ⋅ ⛅ 9 °C

    Am Morgä heimr wöuä startä richtig Hammerfest. Am Alj hets abr so guet gfaue am Nordkap, daser gar nid het wöuä wägfahrä. Äs isch üs de när öpper cho häufä u so heimr chönnä loslegä. Zum Leid vom Dave het üs ä Opel usem Schlamassu ghulfä.
    Ds Hammerfest aacho, simr ines Fischrestaurant gah ässä. D' Dana u dr Dave hei beidi Wal probiert, d' Steffi isch bim Lachs blibä. Sehr fein gsi aues! Z' Restaurant het "Havørna" gheissä, empfählenswärt! Hammerfest isch mega lebändig gsi u isch ä sehr interessanti Stadt (die nördlechschti Stadt vo Europa übrigens), s' het üs sehr gfauä! Am nächschtä Morgä si no 2 Rentier ufä Camping cho zmörgelä u si fasch i Alj gschlüffä, so nöch sisi cho.
    Mir si witr richtig Luleå. Leider heimr üs chle ufdr Routä verlorä, drum hets nid ganz bis uf Luleå glängt, sondern bis uf Pello. Am nächschtä Tag heimrs du när gschafft u si nach ca. 3h z' Luleå acho. Mir si z' Gammelstad it Church Town (Kyrkstad), eis vo 16 Chiuchä-Dörfli. Ganz härzig die rot-wissä Hüsli! Gschlafe heimr ufemne 4-Stärn-Camping z' Luleå. A üsem 20. Reisetag simr uf Umeå. Churz vor Umeå die riiiiiiese Überraschig: mir hei ä ächtä, freiläbendä Euch gseh! Direkt näbdr Strass ischer am Waudrand gstangä u het graset. Mir si hin und wäg gsi ab däm prächtigä Tier! Stouz u o chle verwirrt isches da gstangä u het üs beäugt. Ganz ä sanftä Riis uf die Distanz, abr mir si üs einig gsi, dassmr somnä Tier allei im Waud nid wettä begägnä. Z' Umeå simr churz dürnä Stadtteil gloffä, gah ässä u när ufä Camping.
    Hüt simr uf Östersund gfahre. Ds isch grad zimlech ir Mitti vo Schwedä. Ufem Wäg heimr no ä Abstächer ines Outlet gmacht u d' Steffi hetsech ä tolli Rägäjaggä kouft.
    Z' Östersund simr ufemne kuulä Camping, hei Köttbullar (zum zwöitä) mit Gnocchi u Mais gmacht u gniesse itz no dr Aabä.    Weiterlesen

  • Dadaste TröbewiEuropa RoadtripReisender
    Trondheim
    Ristafallet, ÅreNidarosdom, TrondheimAquarium Ålesund

    Trondheim + Ålesund

    27. August 2017 in Norwegen ⋅ 🌙 9 °C

    Dr Tag het hüt unfreiwiuig miteme Früehligsputz vo paar Chistä aagfange. Mir hei z' Wätter ir Nacht nid richtig erchennt u drum am Morgä zersch mau müesse d' Chistene tröchnä u putze. Tja, o das muess mau si...
    Speter simr losgfahre nach Trondheim. Ungerwegs heimr d' Tipps vomnä St. Galler-Paar, womer am Aabä vorhär hei troffä, bsuecht: ds Lundhags-Outlet (Outdoor-Chleider) u dr Ristafallet-Wasserfau. Dr Wäg nach Trondheim isch wunderhübsch, füehrt dür chlini Dörfli, ruhigi Wälder u ah schönä Gwässer vrbi. Zimlech am Aafang heimr no ufne chliini Fährä müesse, wo üs ufnä Inslä het bracht u änä widr drab. Mir si vor Trondheim ufnä Camping direkt am Meer u hei dr Sunneungergang, dick iipackt, gnossä.
    Mir hei dr Tag gmüetlech gstartet u si ner nachem Zmorgä ab uf Trondheim. Dert aacho simr los zur Burg, üsem erstä Ziu. Ufem Wäg heimr d' Stadt scho chönnä entdeckä u si hin und weg gsi: absolut bezouberndi Stadt! Am Fluss reihesech vili chliini farbegi Hüsli wosech im stiuä Wasser spieglä. D' Stadt isch so lebändig u trotzdäm sehr ruhig! Für zur Burg muessme ä mega Stutz ufä u fausmä da mitem Velo ufäsött, gits ä Velolift! Ä wahnsinns Erfindig, abr nid ganz eifach, wiemer speter hei chönnä beobachtä. Vor Burg us hetmä när über die ganz Stadt gseh, hervorragende Ussichtspunkt auso. Widr dunger simr no ga dr Dom luege. Womer ume Eggä si cho, heimr gstuunet: ar Fassade si 60 grossi Figure vo (mir nämä ah) Heiligä, gschichtsträchtigä Mönschä u vo Jesus gsi. Äs mega Kunstwärk! Gässä heimr imnä Auerwäutsrestaurant, "Egon" hets gheisse u gspisä heimr vom Pizza- u Salatbuffet.
    Speter simr no so wit gfahre wiemer hei mögä u wie d' Zit het zuegla u so simr z' Ellingsgården ufeme Camping glandet. Dsch sonä Raststättcamping gsi u dämentsprächend heimr scho gli mau nach Pommes u Öu gschmöckt. Drfür heimr z' erstä Mau Elektrizitä gha u dadrmit dr Alj chönnä heizä u d' Liechterchötti lah lüchtä.
    Am nächschtä Tag simr uf Ålesund gfahre. Uf däm Wäg heimr 2 Fährä müessä näh. Rächt lustig, ds isch eifach dr normau Strasseverlouf. Ufdr eintä Fährä hetsech ä euteri Damä mit ihrere Tür no ah üse Alj verewigt u speter no mit dr Ungerschrift unger ihrem Wärk. Lustegi Begägnig gsi!
    Am speterä Nami simr ufeme Camping aacho u hei gwöschet, Alj putzt u Znacht kochet. Äs het Couscous mit Fischstäbli gäh.
    Hüt simr gah z' Aquarium vo Ålesund bsueche. Äs härzigs Schmuckstückli wo Iiblick git it Ungerwasserwäut vor norwegischä Küstä u dä norwegischä Fjorden.
    Morn geits witr uf Bergen.    Weiterlesen

  • Dadaste TröbewiEuropa RoadtripReisender
    Bergen
    StavangerUfem Wäg ufä Kjerag2LysebotnÜberau si Steimandli bboue – sehr hübsch!

    Bergen, Stavanger, Lysebotn

    31. August 2017 in Norwegen ⋅ ☀️ 14 °C

    Hüt simr uf Bergen gfahrä. Bergen isch ä sehr spezieui Stadt u mir heis wie fougt erläbt:

    Viu Natur hei mir erläbt
    u de het üses Härz nach Bergen gsträbt.
    So si mir gfougt däm Ruef vor Stadt
    u si vorwärts cho mit Fährä, Strass u langsamer Fahrt.

    Z' Bergen aacho simr umeg'irrt
    – ganz verwirrt.

    Nachem Botanischä Gartä
    heimrs chuum chönnä erwartä,
    die berüehmtä farbigä Hüsli z' bestuunä.
    Abr – bi soviu Ghüder vrgeit eim d' Luunä.

    So viu Guets u Schöns heimr ghört
    u itz si mir sehr empört!
    Äs isch weniger schön aus erwartet gsi
    und o sehr schnäu vrbi,
    wüu Bergen isch ou mega chli.

    Nach Bergen simr witr Richtig Stavanger gfahre.
    Ungerwägs heimr ufeme Camping pfuuset mit wunderbarem Blick ufä Fjord. Ir Nacht isch sogar no äs Chrüzfahrtschiff düregschlichä u dr Himmu isch so klar gsi, dassmr d' Miuchstrass hei chönnä gseh. Am nächschtä Tag heimrs du de uf Stavanger gschafft.
    Z' Stavanger aacho simr ufnä Parkplatz u när ab it Stadt. Mir si churz it Touristäinformation gah Infos holä frd Wanderig ufä Kjeragbolten u när ufä Camping. Dert heimr Tikka Masala mit Riis kochet, hei gläsä u brichtet zämä u si gah pfuusä.
    Am nächschtä Tag simr uf Stavanger is "XO Steakhouse" gah Burger ässä – Burger zum Zmorgä vrtribt Chummer u Sorgä. Stavanger isch gmüetlech u härzig. Widr ufem Parkplatz fr witr, heimr dr Alj nümm chönnä aalah (übrigens scho zum 2. Mau ah däm Tag). Mir hei ä hiufsbereiti Frou gfungä wo üs het überbrüggt u de heimr loschönnä – mitem Alj wirds nie längwilig.
    Witr simr Richtig Kjerag. Dr Wäg dert ufä isch steil, kurvig u ungloublech schön gsi! Hie hets widr die ruuchi, steinigi Umgäbig gha, womr scho ufem Wäg as Nordkapp gseh hei. U glich hets si ganz eiget Charme mit dä einzigartigä Hüsli, klarä Flüss u zottligä Schaaf am Strassärand. Dobä aacho het üs dr Parkplatzwart erklärt, dassmr nid dert chöi schlafä, sondern abä ufä Camping müesse. Dass Bärner langsam redä, schiint o hie bekannt z' si...
    Auso simr abä uf Lysebotn u hei dert gnächtiget.    Weiterlesen

  • Dadaste TröbewiEuropa RoadtripReisender
    2

    Kjeragbolten

    1. September 2017 in Norwegen ⋅ ☀️ 9 °C

    Hüt simr früeh am Morge los fr uf dä Kjeragbolten. Z' Wätter isch nid strahlend schön gsi, äs het bitzli grägelet u Näbu gha. Auso heimr üsi Rägäsachä gsattlet u si los.
    Bim Parkplatz aacho heimr widr dä fründlech Platzwart troffä u är het gmeint, die Wanderig sig fr üs Schwizer wine Spaziergang... Auso simr motiviert gstartet.
    Aber – scho dr Aafang isch happig gsi. Äs längs Stück gredi ufä u das über Feusä. A bsungers steilä Steuä gits Chöttinä womesech cha dran ufezieh odr sech cha dranhäbä.
    Dr ganz Wäg isch ufä u abä gangä u praktisch nur über Feusä. Einzelni Steuä heimr uf aunä 4nä gno, hei stets ufdr Huet müesse si, dasmr ufdä nassä Feusä nid usrütschä.
    D' Ussicht isch troumhaft gsi! Obschons näblig u rägnerisch isch gsi, heimr absolut gstuunet ab dr Umgäbig. Ds Zämäspiu vo Feus, Wasser, Näbu u Bärgä het es einzigartigs Biud gäh.
    Ungerwägs simr no ungere Rägäwulchä dürä cho, si froh gsi wo die isch witrzogä.
    Z' letschtä Stück heimr no dürnes trochnigs Bachbett müesse loufä u plötzlech isch dr Kjeragbolten i sirä ganzä Pracht vor üs gsi. Ä majestätischä Aablick, dä Stei zwüschä denä zwe Bärgä!
    Mir hei üs äs Süppli kochet u zuegluegt, wie die Erstä ufä Stei ufä si. Äs isch eim scho chle mulmig, zwüssä, dasses ungerem Stei eifach z' Loch ab geit... u glich heimr üs ds nid wöue lah entgah. Mir si mit viune angere is Gspräch cho u hei gmerkt, dasses dä meistä so geit. Schlussendlech heimrs gschafft u jede isch nachenang uf dä Kjeragbolten krackslet. Äs mega Gfüuh dert druf z' stah.
    Nachdem mir äs Wiili bi dem Stei si gsi, heimr üsi Sachä packt u üs ufä Rückwäg gmacht.
    Dr Rückwäg isch o nid ohni gsi, die ganzä stotzigä Steuä dismau abä. Dert womer üs vorhär ar Chötti hei ufäzogä, heimr üs itz ghäbt zum abärütschä. Ungerwägs heimr no ganz kuuli Bärner troffä u churz mitnä gsprächlet.
    O ufem Rückwäg isch eich aues guet gangä. Widr ufem Parkplatz aacho, heimr erfahrä, dasses vom Kjeragbolten 1000m/ 1km z' Loch ab geit!
    Itz heimr üs ufgmacht widr abä Richtig Oslo. Ungerwägs heimr müesse aahautä – d' Brämsä hei ä Abchüehlig brucht.
    Ufem Camping aacho heimr ä Düschu zwickt, Znacht köchlet u si när ab is Bett.    Weiterlesen

  • Dadaste TröbewiEuropa RoadtripReisender
    Vordr Operä
    Königlicher PalastMonolith Vigelandspark "Zyklus des Lebens"d' Operä

    Oslo + Vestby

    4. September 2017 in Norwegen ⋅ ☁️ 13 °C

    Mir hei üs ufgmacht uf Oslo. Z' Oslo aacho heimr ä Camping gsuecht u si fündig wordä. S' bitzi Ärger heimr gha, da sie üs nid im Alj hei lah schlafä u mir überrissä viu zauht hei. So geits mängisch... Nachem Zäut ufbouä heimr afah wöschä u Znacht machä. Nach langem Diskutiere heimr üs geiniget, dasmr rebelliere u trotzdäm im Alj schlafä. #wägächautuso
    Am nächschtä Tag simr dr ganz Tag uf Oslo.
    Mir si sehr gspannt gsi, wüumr ungerwegs vo paarnä ghört hei, dass sech die Stadt nid lohnt ussert mä wott aktiv it Museeä.
    Aber – Oslo het üs umghouä! Absoluti Zouberstadt! Dr Dave isch vor 2 Jahr z' Oslo gsi, abr o är het so viu Nöis gseh. Die Stadt isch mega schnäu am wachsä u so hets s' paar Boutä meh aus denzumau.
    Mir hei üs puduwou gfüuht. Die Stadt het ä offenä, kreativä u stiusicherä Charakter, wo üs bezouberet het.
    Mir si z' Rathuus (leider nur vo uss, wüusi dinn ä Feetä hei gha), d' Operä, dr königlech Palast, d' Burg, dr nöi Stadtteil am Hafä u dr Vigelandpark gah luege.
    Im nöiä Stadtteil simr ganz usem Hüsli gsi, so kuuli Hüser wo aui so ungerschidlech bboue si, mit verschidenä Farbä u Details, rund u eggig. U glich isch z' Ganzä äs mega stimmigs Gsamtbiud.
    Dr Vigelandpark isch sehr interessant, mit au denä bsungrigä Skulpturä vo Mönschä i verschidenä Gmüetszuestäng u Läbeslagä. Zudem ischer sehr pflegt mit schön arrangiertä Bluemebeet. Aues i auem ä Park wosech sehr lohnt u zum Verwilä iiladt!
    Bir Burg u bim Königspalast heimr ar Gardä zuegluegt, wie die iri Formationä zeigä u desumä marschierä.
    Aues i auem isch Oslo absolut empfählenswärt, durch und durch äs Schmucktruckli!
    Am Aabä simr gah dr Alj holä u när richtig Vestby gfahrä fr dert ufeme Camping gah z' schlafä.
    Hüt simr nachem Überbrüggä (d' Nacht isch ume chaut gsi) zum Outlet vo Vestby gfahre u si dert dr ganz Tag dür d' Lädä gschlenderet. Jedä het paar Sachä gfungä u so fahremer itz zfridä u glücklech Richtig Stockholm.    Weiterlesen

  • Dadaste TröbewiEuropa RoadtripReisender
    Vasa

    Stockholm

    6. September 2017 in Schweden ⋅ ⛅ 11 °C

    Vo Vesby uf Stockholm heimr no e Zwüschästopp ir Nöchi vo Karlstad ufeme Camping gmacht. Ufem Wäg dert härä heimr ä zwöitä Euch gseh – sones tolls Tier! Dr Camping isch ganz härzig gsi u dr Typ vom Camping ganz ä kuulä, offnä, euterä Herr. Am nächschtä Tag simr ume Mittag um losgfahre uf Stockholm.
    Am Aabä simr chle usserhaub vo Stockholm ufem Camping aacho. Ganz härzig mit Park, Kafi, Strand u tollä Hüsli. Mir hei no kochet u si de mau ungere.
    Hüt simr gah Stockholm aaluege. O widr ganz ä schöni Stadt mit uffauend viune autä Hüser u Boutä. Nachdem mir chle dür d' Stadt gloffä si, simr is Vasa-Museum. D' Vasa isch äs Schiff wo im 17. Jahrhundert bboue isch worde und ufdr Jungferäfahrt isch ungergange. Idä früeche 1960er-Jahr heisise chönnä bärgä u itz steitsi i däm Museum. Sehr iidrücklech wie viu no ganz isch u mega interessant was sie aues über z' Läbä ufem Schiff, übere Ungergang vor Vasa und ner o über d' Bärgig hei gschribä. Ä Bsuech i däm Museum isch sehr empfählenswärt!
    Speter simr ines Chinarestaurant gah ässä, wo dr Dave vo sim erstä Stockholm-Trip kennt u globt het. "Chopsticks" heissts u mir hei dert so viu ggässä, dasmr när praktisch usegröuelet si. Sehr fein gsi!
    Speter simr i Alj no chle gah läsä u gah pfuusä.
    Morn geits witr Richtig Göteborg.    Weiterlesen

  • Dadaste TröbewiEuropa RoadtripReisender
    FischmäritBotanischä Gartä, GöteborgUsgestopftä Blauwal, Naturhist. Museum GöteborgWiudgansschwarm, Malmö

    Göteborg + Malmö

    10. September 2017 in Schweden ⋅ ☀️ 17 °C

    Dr Wäg uf Göteborg hetsech zogä, abr womer du ändlech si aacho, simr ab ufä Camping. Dä isch erstuunlech vou gsi!
    Z' Wätter isch sehr rägnerisch u chaut, ds scho sit lengerem. Nid so gmüetlech...
    Am nächschtä Tag simr ga Göteborg aluege. Zersch simr grad Richtig Autstadt gloffä u si ungerwegs inä Chiuchä, wo vo uss u o dinn, mau ganz angers isch gsi. Sie isch us häuä, gäublechä Bachsteinä bbouä u innä ganz wiss u mit LED-Chronlüchter. Ir Autstadt aacho simr dür d' Haga Nygata, dsch so d' Houptstrass vor Autstadt hets gheisse. Ganz schmuck, mit vilnä chliinä Lädeli u Kafis. Het üs sehr gfaue! Witr simr ufnä Hoger ufä, womä über die ganz Stadt het chönnä gseh. Widr dunger simr nomau ä Chiuchä gah luege, dises Mau widr ganz ä klasseschi prunkvoui u när witr zum Fischmarkt. Dä heisst "Feskekörka" u isch würklech wiene chliini Chiuche bboue. Gseht ganz toll us u o dinne isches sehr schön gmacht mit vilne Thekä, wome entweder dr Fisch cha chouffe, odr grad direkt öppis Wunderbars cha ässä.
    Glich ufboue mitem Früschverchouf u Ässä si d' Saluhallen. Aues i auem isch Göteborg ä interessanti u tolli Stadt, womä übrigens wunderbar Gäud cha usgäh...
    Dr Platz am Aabä ufem Camping heimr üs no chle müesse erkämpfä, was Närvä koschtet het. Im strömendä Rägä heimr lang gwartet, dass öpper at Reception chunnt, hei anstatt am Petersson am Gustavsson aaglüte u si schlussendlech vomnä guet-usbildetä u uniformiertä Sicherheitstyp ufä Camping glah wordä. Am nächschtä Tag heisech aui Rätsu glöst u mir hei mit derä Kuriosität chönnä abschliessä.
    Itz simr no ab i Botanisch Gartä gfahrä. Dsch dr gröscht vo Europa u dä heimr üs nid wöue lah entgah. Är isch ungloublech gsi, mitere riiiisä Viufaut ah Pflanzä u wunderbarer Umgäbig. Ufem Ussichtspunkt heimr du no entdeckt, dasses ganz ir Nöchi äs grosses Naturhistorischs Museum het mitem einzigstä usgstopftä Blauwal vor Wäut! Spontan heimr entschidä, däm no ä Bsuech abzstattä.
    Ganz es tolls Museum (fr u25-Lüt sogar gratis!), mit meeeeeeega viu Tier (schiins 15 Mio. verschideni) und vorauem dr Blauwal isch sehr iidrücklech gsi!
    Nach dem Bsuech simr witr uf Malmö gfahrä u när ufnä tollä Camping am Meer. Ungerwegs heimr no Hunderti Wiudgäns formatiert i Süde gseh zieh. Biudhübschä Aablick wo z' Nils Holgersson-Härz het lah schmelzä!
    Hüt simr Malmö gah aaluegä. D' Sunne het üs gweckt u isch, begleitet vom Wind, dr ganz Tag nid vo üserä Sitä gwichä.
    Malmö het o widr ä ganz eigeti, fründlechi, offeni u härzlechi Art, wo üs sehr het gfauä. Dürnä Park simr zurä Windmühli cho u dürnä Schlossgartä simr as Meer gloffä. Dert vor heimr d' Atmosphärä u d' Meersicht gnossä u si chle verwiilet. Mir hei scho ufd Brügg gseh, wo uf Kopenhagen füehrt.
    Nach dem chliinä Pöiseli simr witr dür d' Autstadt u hei üs när äs nätts Restaurant frs Zmittag gsuecht.
    Nachem Ässä heimr üs ufä Wäg gmacht fr uf Kopenhagen u si über die riiiiiisä Brügg, wo übers Meer füehrt, gfahrä. Sehr iidrücklech gsi, so rundumä nur Meer z' gseh.
    Z' Kopenhagen aacho isch d' Campingsuechi losgangä. Anschiinend sisi hie nid so Fan vo Schiuder u so isches rächt ahsträngend gsi... Schlussendlech heimr äs Plätzli gfungä, imnä wahnsinns Camping irä autä Festig. Nid günstig, abr rächt kuul. Morn geits uf Kopenhagen.    Weiterlesen

  • Dadaste TröbewiEuropa RoadtripReisender
    NyhavnVor Ferlsers KirkeSt. Alban ChurchMarble Church

    Kopenhagen

    11. September 2017 in Dänemark ⋅ ⛅ 16 °C

    Hüt simr Kopenhagen gah aaluege. Ir Stadt aacho simr grad zersch dürä Rägä zum Nyhavn. Dert aacho hets ghört mitem Rägä u mir hei die schönä farbigä Hüsli chönnä bestuunä. Witr simr übernä kunstvoui Brügg uf Christiania, ämne rächtsfreiä Stadtteil. Sehr interessant wie ds ganzä ufbouä isch. Widr dusse simr d' Vor Frelsers Kirke gah luegä. Die het ä mega imposantä Chiuchäspitz, wo spiraläförmig u i lüchtendem Gold i Himmu ragt. O dinnä ischsi abslout erstuunlech! Näbst goldigä Chronlüchter, Goldstärnä ar Diili, verschidenä Ängufigurä, ämnä imposantä Toufbecki u wunderschönä Stukkaturä, gsehtmä ä riesegi Orgelä us Houz mit fiinstä Schnitzereiä. Tragä wirdsi vo 2 Elefantä. Wases mit denä ufsech het, müessemer de no nacheluege... Witr simr dür d' Autstadt zur Kastellet, ds isch ä stärnförmigboueni Burg. Us nächschts simr ä witeri Chiuche gah luegä, dises Mau eini im Gothik-Stiu. Sehr spezieu, abr schön - mau öppis ganz angers.
    Nachemnä Stückli loufä heimr d' Little Mermaid gfungä, die Statue am Meer, inspiriert vom Märli vom H. C. Andersen.
    Nachemnä Gläci, simr zum Alj zrugg u hei üs ufä Wäg Richtig Odense gmacht, fr dert gah z' nächtigä.
    D' Stadt Kopenhagen het üs, näbst paar müehsamä Situationä ufdr Strass, sehr gfaue u üs mit ihrem Charme umä Finger gwicklet!    Weiterlesen

  • Dadaste TröbewiEuropa RoadtripReisender
    Hafen Hamburg
    OdenseElbphilharmonie

    Hamburg

    13. September 2017 in Deutschland ⋅ ⛅ 13 °C

    Nachdäm mir no churz z' Odense, ir Stadt vom H. C. Andersen, hei ä Äbstächer gmacht u dür ds ruhigä, abr härzigä Stedtli si gloffe, heimr mit Wehmuet dr Nordä vrlah u si uf Dütschland cho. Dr Ungerschied hetmä sofort gspürt, sigs ufdä Strassä, bidä Priisä oder adä Mitmönschä.
    Mir si it Nöchi vo Hamburg gfahrä, si gah iichouffä u när ufnä härzigä Camping.
    Hüt am Morgä simr mit prasselndem Rägä erwachet. Nachdäm mir no paar Minutä ä Rägäpousä hei abgwartet, heimr aues tröchnet u vrruumt, hei üs parat gmacht fr los u si gah uscheckä. Währenddessä heimr no Tipps bcho, wasmr müesse gseh z' Hamburg u wo parkiere. Dankbar heimr die Tipps agnoh u si losgfahre.
    Nachdäm mr müehsam ä Parkplatz hei gsuecht u dr Alj ines Parkhuus hei ineziirklet, simr miter U-Bahn it Stadt. Dert simr us ersts grad zur Elbphilharmonie, äs nöiers Geböidä irä bewundernswärtä Architektur. Vo dert gsehtmä überä Hafä u i d' Stadt. Aber: da mir ä stürmischä Tag fr üsi Hamburgtour vrwütscht hei (Sturmwarnigä ir ganzä Stadt u Umgäbig) heisi d' Baukön zuetah u mir hei nur hinger dä Schibä chönnä abälinsä.
    Itz simr miter Bahn it Stadt inä u si dert gah Käsespätzle ässä. Ir Stadt isch ä spezieui Stimmig gsi, mit däm Sturm wo het desumägfägt. D' Lüt u die ganz Stadt isch nervös gsi u äs isch ä Aaspannig spürbar gsi.
    Nachem Zmittag simr ine Thalia u hei üs mit DVD's u Büecher iideckt, dasmr itz sichr frä Räscht vor Reis mediätechnisch vrsorgt si.
    Itz isch d' Zit scho langsam widr knapp wordä u mir si miter U-Bahn zrugg. O uf derä Strecki het dr Sturm gwüetet (mehreri entwurzleti Böim ufde Gleis) u so heimr müessä usstigä u ar augemeine Unsicherheit fouge, nid grad gueti Vorussetzigä fr müglechscht schnäu zum Alj zcho. Nach paar Minutä Böslinie sueche u ratlos umästah, heimr per Outostopp öpper gfungä, wo üs het as Ziu bracht.
    Nachdem mir dr Alj no chle hei müessä zämächläbä (äs Dichtigsgummi hetsech ufdr Fahrt glöst, Panzertape hilft!), simr los uf d' Outobahn Richtig Bremen.    Weiterlesen

  • Dadaste TröbewiEuropa RoadtripReisender

    Amsterdam

    15. September 2017 in den Niederlanden ⋅ ☀️ 14 °C

    Nach paar Stung fahrä dürä Rägä u Alj flickä ufem Pannästreifä, simr z' Amsterdam ufem Camping aacho. Dä isch meeega vou gsi u äs isch uuuu viu gloffä. Wüus so het gschiffet u chaut isch gsi, heimr z' Znacht im Alj ggässä u si när schnäu ungerä.
    Hüt het dr Tag sunnig gstartet u isch, bis uf paar Rägäminutä, o sunnig u einigermassä warm blibä. So louft ds übrigens meistens: we mir uf guets Wätter aahgwisä si frnä Stadt aazluege odr wüumr süsch iwie dussä si, de ischs trochä. So guet!
    Amsterdam isch die ersti Stadt uf üsere Reis, wo mir aui scho mau vorhär si gsi. So heimr ganz glassä u ohni Stress irgend ä Sehenswürdigkeit müesse z' gseh, die Stadt chönnä gah bsüechlä.
    Ir Stadt aacho simr dür die lebändigä Strassä gschlenderet, si vo Ladä zu Ladä zogä, hei öppis z' Ässä gschnappt, si dä Velos u dä Tram usgwichä und hei d' Atmosphärä vo Amsterdam gnossä.
    Bim Bluememärit simr gah schnöiggä u hei au die verschidenä Sortä beguetachtet. Speter simr is Anne Frank Huus. Sone iidrücklechä u berüehrendä Ort, wo sehr spannend und informativ gstautet isch. Ä Abstächer isch absolut lohnenswärt!
    Ahja übrigens, Überbrüggä ghört mittlerwilä zur Tagesornig...    Weiterlesen

  • Dadaste TröbewiEuropa RoadtripReisender
    Grand PlaceManneken Pis

    Brüssel

    16. September 2017 in Belgien ⋅ ⛅ 14 °C

    Hüt simr gah Brüssel luege. Vo derä Stadt heimr nur gwüsst, dass dert dr EU-Houptsitz und dr Manneken Pis isch, süsch heimr üs ganz lah überraschä. Und überrascht simr wordä!
    Brüssel isch es Bijou, mit sehr schönä autä Hüser u tollem Mix vo autä u nöiä Boutä. Usserdäm isches mega multikulti, wasmr ah verschidenä Fest vo ungerschidleche Kulture gseh hei. Sehr interessant gsi zum zueluege u -losä.
    Chuum hetmä umnä Eggä gluegt, isch es nächschts hübsches Geböide fürächo u so isches cho, dasmr ganz unerwartet anä grossä Platz si cho, wo rundumä wunderschöni Hüser het gha! Die Hüser si majestätisch gsi mit verschidenä goldenä Verzierigä u steinernä Figurä dran, richtegi Kunstwärk.
    Nach däm Platz simr zum Manneken Pis. Chliner aus erwartet isch die Statue plötzlech ganz unschiinbar umnä Huuseggä gsi.
    Speter heimr üs no ä richtegi belgischi Wafflä gönnt (je 2 = je 1 zviu) u si ner mitem Alj Richtig Luxemburg.
    Gschlafä heimr ufemnä Camping, wo eim nidmau z' WC-Papier gönnt wird...    Weiterlesen

  • Dadaste TröbewiEuropa RoadtripReisender
    Notre Dame de Luxembourg
    Sicht vor Schlossbrügg us

    Luxemburg

    17. September 2017 in Luxemburg ⋅ ⛅ 9 °C

    Hüt simr uf Luxemburg. Sones schöns Stedtli! D' Hüser si us ganz häuem Stei gmacht, ds macht z' ganzä Biud sehr fründlech. Zudäm ischs mega lebändig gsi, mit Märit a verschidenä Ortä. Mir si no d' Notre Dame de Luxembourg gah aluege, ä sehr schöni Kathedralä mit umwärfendä Chiuchäfänster. Die auti Schlossbrügg, womä abä ufnä Stadtteil (Grund heisstr) gseht, isch ungloublech schön – absolut sehenswärt!
    Nachdäm mir das aues hei gseh, simr zrügg zum Alj u hei üs ufgmacht uf Frankriich. Ahja u o hüt heimr widr mega Glück gha mitem Wätter: dr ganz Tag schönsti Sunnä u womer im Alj hockä u am Fahrä si, fahts ah rägnä u haglä.
    Itz fahremer die nächschtä Täg uf Bordeaux.    Weiterlesen

  • Dadaste TröbewiEuropa RoadtripReisender

    Dune du Pilat

    20. September 2017 in Frankreich ⋅ ☀️ 17 °C

    Die letschtä 2 Täg heimr ar gröschtä Dünä vo Europa - ar Dune du Pilat - vrbracht.
    Z' Wätter isch grandios gsi! Churzi Hosä, Bikini, Sunnäbrüuä, Sunnäcremä, blutti Füess – z' vouä Summerprogramm!
    Gester simr ufd Dünä ufä. So iidrücklech die riiiiisä Mängi Sand und die wunderschöni Umgäbig rundumä: ufdr eintä Sitä z' Meer, ufdr angerä Sitä dr Waud und zum Kontrast vom häuä Sand z' sattä Blau vom Himmu.
    Fr zrügg simr a Strand gah loufä u hei so üsä Camping, wo ufdr angere Sitä vor Dünä isch gsi, um 3km vrpasst. Fr sichr z' gah, dass üs ds nid no einisch passiert, simr haut ar Strass nah zrugggloffä.
    Widr bim Alj heimr üs öppis z' Ässä gönnt u si när mit Bikini, Strandtuech u Buech ungerem Arm, ab a Strand.
    Mitem wunderbar-farbigä Sunnäungergang u ämnä guetä Znacht heimr dä Tag lah usklingä.
    Ändlech im Schlafsack iignistet, heimr no Wiudtierbsuech becho, wo Inträssä a üsnä Ghüderseck het zeigt... No bevors usgartet isch, simr us üsnä Schlafseck krochä u si d' Ghüderä gah entsorgä.
    Hüt heimr üs zum Zmorgä Croissants gönnt, hei no d' Drohnä lah flügä u si när, nachem mittlerwilä obligatä Überbrüggä, Richtig Spanie ufbrochä.    Weiterlesen

  • Dadaste TröbewiEuropa RoadtripReisender
    So heimr am Aafang no ghuusetAutstadt vo Cambrils

    Cambrils

    2. Oktober 2017 in Spanien ⋅ ☀️ 23 °C

    Die letschti Wuche heimr in Cambrils, mitr ETG Bärn (Chiuchgmeind vor Dana), vrbracht.
    Mir si mega härzlech ufgnoh wordä, hei super fein ggässä im Hotäu vom Estival Eldorado Resort, viu gsünnelet am Strand, Meerschwümm gnossä, Beachvolley gspiut, tolli Gspräch gfüehrt, Gmeinschaft gnossä u ganz starch Gottes Liebi u Güeti dörfä gspürä (speter meh zu däm).
    Da mir miteme kaputtä Alj si da härä cho, isch klar gsi, dasmrne am Mänti it Garage bringä. So heimr fr die ganz Wuche kehs Daheim gha u hei Ungerschlupf bide Schwostä vor Dana u bi 2 guete Fründä usdr Gmeind gfungä. Da z' Hotäu überbuechet isch gsi, heisi die 4 Frouä ine Villa usquartiert u so heimr die Chancä gnützt u si zersch no 2 Nächt im Alj ufem Villaparkplatz gsi u när, wo dr Alj furt isch gsi, heimr üs zersch ufdr Terrassä äs Plätzli gsuecht. Da mir aber zimlech unruhig hei gschlafe (Spinneleangst bir Steffi & Rasäspränklerattacke), heimr üs entschide, üses Schlafgemach inezverlegä. So heimr die witere Nächt ufem Sofa und ufdä Mätteli vrbracht.
    Jedä Tag simr nacheme inspirierendä Preach vor Livi (Schwoscht vor Dana), ab ah Strand gah badä, sünnelä, gsprächlä u spörtlä. Am Aabä heimr chönnä as Buffet gah schlemmä u hei när dr Tag mit verschidenä Spiu lah usklingä.
    Am Mittwuch simr no dr Märit vo Cambrils u z' Stedtli gah bsuechä. Ganz äs hübsches Plätzli!
    Am Friti hät eigendlech dr Alj abhoubereit söue si, waser du aber schlussendlech doch nid gsi isch... So simr vorerä Useforderig gstange: mir hei es nöis Daheim brucht fr no witeri 2 Nächt, wüu d' ETG am Samsti abgreist isch. Nach langem Hin- und Här heimr üs entschidä, dassmr ufnä Camping göh. Z' Wätter het abr leider nid ganz e so mitgspiut u het ä liechtä Rägä u Cheuti gschickt. Wägä denä Umstäng isch ar Dana u ar Steffi d' Abentüürlust u d' Fröid am Zäutlä vrgangä u mir hei üs sehr nach üsem Alj gsehnt. Nach verschidenä Tipps u Ratschleg vo wiisä Lüt, heimr arä Familie aaglüte, wo d' Dana d' Tochter letschts Jahr z' Cambrils het kenneglehrt u wo ä eigeti Villa ufem Gländ hei.
    Prompt heisi üs Ungerschlupf gwährt u si so üsi Retter in Not gsi. Ä riiisä Sägä!
    Zudem heimr üsi Chistenä mit üsne paar Habseligkeitä im Gepäckruum vom Hotäu chönnä deponierä! Estival Eldorado Resort – sehr empfählenswärt! Super feins Buffet u sehr fründlechi Lüüt.
    So heimr no 2 witeri Täg in Cambrils vrbracht u si no einisch is Stedtli füre. Dert heimr üs no mit Souvenirs iideckt (z.B. im "Ale-Hop", ä sehr kuulä Ladä) u hei no Glace ggässä; unger angerem Peanut/Honey – wäutsguet!
    Widr zrügg ir Villa, heimr einisch meh gmerkt, wie chli d' Wäut isch, wo am Tisch vo üsnä Gastgäber praktisch Nachbarä vo üs hockä – ä Familie vo Bümpliz. Augemein si üsi Gastgäber u ihri Gest (es isch no es Paar vo Dütschland bi ihne gsi) mega offeni, härzlechi u totau kuuli Lüüt u mir hei üs sehr wiukommä u wouh gfüuht.
    So isch Mänti wordä u d' Spannig, obmr dr Alj chöi holä odr nid, isch gstigä. Dr Dave isch ufd Reception gah aalüte u när mit super Nöiigkeitä zrüggcho: mir hei dr Alj am Mittag chönnä gah holä!
    So si d' Dana u dr Dave vor Garage abghout wordä u hei när dr Alj widr ganz zruggbracht. Mir si is Hotäu üsi Chistenä gah holä u hei aues widr packt. När heimr üs vo üsnä Retter in Not verabschidet u si los Richtig Madrid.
    Uf zimlech haubem Wäg, nämlech z Zaragoza heimr ufeme Camping übernachtet.

    Übrigens: vodä Unruhä z' Barcelona u augemein z' Kataloniä heimr näbst Wahlplakat nüt gmerkt. Wasmä glich het gseh isch, wie gspautä ds Land isch. Chuum heimr Kataloniä vrlah, isch ihri Flaggä vrschwundä u Spanieflaggä si überau z' gseh gsi. Und sehr hüfig isch ä riesigä Stier näbdr Outobahn ufdä Höger gstangä – majestätisch u vouer Stouz luegesi übers Land.    Weiterlesen

  • 2025© FindPenguins
  • Start
  • Über uns
  • Gruppen-Tracking
  • Presse
  • Nutzungsbedingungen
  • Datenschutz & Cookies
  • Hilfe-Center
  • Impressum