Höfn

Dr 25.02. startet früeh, 07:00 lütet üsä Wecker für dasmer in Rueh chöi düschälä & üs parat mache fürd witerreis.
S richhautigs Z‘morgä im Hotel Geysir für dsmer üsi 6stündigi Fahrt i agriff chöi näh.
Spontan fahrä mir bim Selijalandsfoss Wasserfall dürrä womer natürlech e chlinä Stopp hei igleit.
D‘ Füess chli verträtte und dä Imposant Wasserfall beguetachte.
Zimli viu Mönsche hets gha… e Rägezäue natürlech oscho wieder ober üs & mir pflutschnass. Nach ca. 1h simer zum Outo hei öppis warms trunkä & si witer gfahrä.

Scho lang heimer nümme so viu Räge erläbt zum Glück dörfe mer deckt und ar wermi si.
Gfüut 1000 Päss später chunnt plötzlech usem nüt e troumhafti Landschaft mit sogar Sunne.
Mir chöi üsne Ouge fasch nid trouä womer usem Räge fahrä und hei ungloublech fescht fröid.
Mir säge bir nächste Usfahrt gömer usä für dsmers churz chöi gniessä.
Per Zuefau isches dr Jökulsárlón Glacier Lagoon wome ufe gwautig Gletscher cha luegä.
D‘ Abesunne zouberet e Stimmig häre wo me nid cha beschriebä.
Wo sech d Sunne langsam hingere Wolke versteckt entscheidä mr üs zum witerfahrä.

Ca. 10‘ später gsemer rächts e wunderschönä schwarze Strand und grossi Wäue.
O dört heimer aghaute und dä Moment gnossä.
Womer zrügg bim Outo si fragt einä öbmer die Skulpturä gse heigä u mir hei gfragt was fürigi?
Är het gmeint da sig dr Diamond Beach wo sehr spezieui schöni „is - Skulpturä“ sött ha. Leider hetmä sä a däm Tag nid gse.

In Höfn acho üsem „günstigste“ Hotel vor Reis erklärt üs d Frou ar Reception dsmer im 3. Stock sigä und d‘ Stäge grad hinger üs😂
Mir hei scho dänkt wieso üs di Mönsche ir Lobby so aluegä…
E nätte junge Typ het de gfunge er treit üs üsi Köffer ufä🤣
Obä im Zimmer acho heimer gse dsmer sogar Meerblick hei. Wieso ds Hotel so günstig isch heimer zu däm Zitpunkt no nid gwüsst.

E Pizza zum Z‘nacht es Glas Wissä zur Erholig. Di Reis het einiges mit üs gmacht, müed simer beidi gsi.
Ar Reception heimer ihm gseit är söu üs alütä wenn dr Aurora- Alarm isch.
Mir si ca. 21.30 müed ga schlafä.
23.00 tschädderet ds Telefon im Zimmer so lut ds heimer beidi no nie erläbt.
3x hingerenang hets glüttä, aber am Telefon het niemer gredt. Mir beidi „liecht- gnärvt“ überlege wasmer iz söue. Dussä isch nüt sichtbar, wie o bi denä vilä Liechtiflüss.

Üses chline Tröimli laht üs la ufstah und no einisch is Outo sitzä. ohni Plan simer losgfahre ine richtig wos dunku isch. Nöime usgstigä heimer när beschlossä dsmer wieder zrügg is Bett gö.
Zrügg im Hotelzimmer ghöre mer üse Bettnachbar schnarchlä, mir hei beidi vor übermüedig nurno glachet u hätte am liebstä grännet - das iz ou no.🤪😄
So isch dä läng Tag z‘ Änd gangä.Lue lisää