Roadtrip Patagonie - Tag 1 & 2

Nach so viel Mönet emmer mit Bus und i Hostels unterwegs si, entscheidemer eus ds wunderschöne südliche Patagonie na mit em Auto zerkunde. Do Hochsaison esch, gits ke Uswahl meh bide Autos, sgit wases git. So wirds en SUV, wo mir aber im Nachhinein super froh sind drum. In Chile isch es sehr sicher und mir dörfe 9 vo 10 Nächt im Auto ir freie Natur übernachte. 1 Nacht verbringemer na imne warme schöne Airbnb.
Am Tag 1 gaht's bereits wunderschön los. Mir fahre in ned touristische Nationalpark Palie Aike und gsehnd ufm Weg dert here, Schafherdene, en huufe wildi Guanakos mit Junge (wildi Art vo Llamas) und Nandus (Strusse). Fürne Stund teilemr eus sAuto na mitme argentinische Hitchhiker, wo im Füürland wohnt. Im Nationalpark machemer zwei chlini Wanderige bevor mir s'erste Übernachtigsplätzli sueche. Mir hei grad wahnsinnig Glück und verwütsche en wunderschöne Spot. Flamingos tummle sich im Teich, zeme mit Gäns und Möwe, Feldhase hopplet überd Wiese, Guanakos graset friedlich und löh sich au vum verbi schlichende Fuchs ned störe. Imne chline Unterschlupf, gschützt vorem Wind, laht sichs gäbig choche und ihkuschlet i eusne Schlafsäck im Auto, gaht de erst erläbnisrichi Roadtrip Tag zEnd.
Tag 2 startet früeh mit Sunneschii, früsche Temperature und herumhockende Adler. Mir mache eus ufe Weg richtig Tierra del Fuego. Mitdr Fähre setzemr ufd Insle über und fahre bimne chline Dörfli verbii. Churz Wasser und en Peperoni ichaufe, wiiter gaht's. Mir chönd ufdr Fahrt erneut e huufe Tier beobachte. Euse Übernachtigsplatz findemr ufere Näbestrass direkt binere grosse Schafsherde, ir Wiiti gsehtme na ufs Meer. Es windet fest und fürs choche versteckemr eus im Windschatte vum Auto. So gaht de zwoit Tag ebefalls rasant verbii. Die Nacht wirds chalt im Auto und sPiji wird mitdr Daune Jacke ufgstockt😅Read more