Tag 26 - Tauchkurs Open Water Tag 3/3

Tag 3/3 vo eusere Usbildig.
Hüt hets definitiv nur 1x gregnet, oder besser gseit abegleert.. und zwar durchgehend de ganz Tag.
Gfühlt simmer scho go tauche gsi, bevor mer überhaupt is Wasser sind 😂🌧️

Vo de Tauchschuel us simmer zerscht mal mit em Taxi (mir sind hinedruf uf eme Jeep ghockt ohni Dach - drum det scho pflotsch nass 😅) uf die anderi Siite zum Hafe gfahre.
Es het leider zu viel Welle uf eusere Siite gha, drum hemmer müsse uf die anderi.
Nach de Erfahrig vo geschter hemmer beidi es Itinerol gno, sodass mer das mitem chotze nöd namal wiederholed 🙈
Uf em Boot simmer denn zum erschte Tauchspot gfahre.

Dur de Rege isch es mega chalt gsi und mir sind beidi froh gsi, dass es im Wasser dütlich ahgnehmer gsi isch (de Janis isch am schlottere gsi und het ganz blaui Lippe gha).

Im Wasser hemmer namal Üebige gmacht, aber hend au Ziit gha es paar schöni Fisch und e Moräne ahzluege.

Da dur de Rege würkli alles nass gsi isch, hemmer leider nöd mal es Foti vo eus chöne mache..

Nach em zweite Tauchgang simmer wieder retour an Hafe und vo det wieder zrugg id Tauchschuel.
Beidi simmer froh gsi um e Duschi und trochni Chleider. Langsam het d Chälti doch chli ahghenkt gha. Aber wenigstens isch eus nöd schlecht worde! ☺️

Schnell en 15 minütigi Pause, umzieh und denn hemmer na eusi schriftlichi Prüefig gschriebe und hend bestande 🥳

Ez simmer offiziell SSI Open Water Divers und dörfed bis uf 18m Tüüfi go tauche. 🤿🐠🤗Læs mere