Tag 42 - Sumatra 2D1N Jungle Trek 1/2

De erschti Tag vo eusem Dschungel Abentür!
Da s nanig Hauptsaison isch, hemmer s Glück gha nur z zweite uf de Tour zsii und somit hemmer e Privatour gha ☺️

Nach eme churze (brutal fettige) zmorge simmer au scho losglofe richtig Dschungel.
Es isch da mega füecht und drum isch eus scho nach paar Minute de Schweiss nur so abetropft.. aber es wird sich lohne!
Nach nur ca. 30min laufe hemmer scho Orang Utans döfe gseh! 😍🦧
Sumatra isch eine vo zwei Ort weltwiit, wo s na frei lebendi Orang Utans git. Drum isch das au d "Hauptattraktion" vo da.

Nach ere Fotisession isch es wiitergange dur de Dschungel. Eigentlich hemmer denkt mer laufed ez da chli locker dur de Dschungel und lueged de Tier zue, aber euse Guide (de Arman) het es ganz schöns Tempo vorgleit und da s da immer wieder sehr steil ufe und abe gaht, hemmer au guet Höhemeter gmacht.

Aber mir sind sehr guet versorgt worde! Am Morge hemmer e Pause gmacht und uh viel frischi Frücht vom Arman zuegschnitte becho und zum Zmittag hets traditionells chalts Nasi Goreng geh. Am Abig hemmer denn sogar en eigene Choch (de Donny) ih eusem Camp gha, wo eus uh feini lokali Sache gchochet het. So simmer meh als guet versorgt gsi!

Uf em Weg hemmer immer mal wieder verschiedeni Affe döffe gseh, riesigi Bäum, spezielli Insekte und uh viel Ameise. Hend en super Guide verwütscht wo ois alles mega guet erchlärt und zeigt het. Er het au verzellt, dass es da im Dschungel ganz wildi Affe und halb wildi Affe git. Drum sind di einte au mega nöch cho und anderi wiiter weg vo eus bliebe.

So ca. am 3 simmer denn scho ih eusem Camp ahcho. Es chunt immer öpe um die Ziit go regne (und zwar so richtig) drum het de Arman s Tempo ahzoge, dass mer möglichscht vorher ahchömed.

Nachere churze Pause simmer denn na Barfuess dur de Fluss zumene Wasserfall füre gloffe, wo mer hend chöne bade. Das het richtig guet tah nach dem viele Schwitze! ☺️😅

De ganz Abig hets denn leider gregnet, sodass mer nüme viel gmacht und ois i oisem chliine Moskitonetz Bunker verchroche hend 😅

Nach em feine Znacht simmer na gmüetlich zeme ghocket und hend mit em Arman chli über s Lebe da in Indonesie gschwätzt. Dur das isch eus wieder mal bewusst worde, was für es Privileg s isch ih de Schwiiz gebore z sii. In Indonesie gits leider viel Korruption, was d Entwicklig vom Land mega erschwert und s drum viel Armuet git.
Zum Bispil hemmer ihn gfrögt wo er gern wür hireise, wenn er chönt, und er het nur gseit er wür gern mal uf Bali. (En Flug vo Sumatra uf Bali choschtet vlt öpe 50.-)
Er het au überhaupt kei Angscht. Er isch sehr religiös und vertraut druf, dass alles guet chunt, solang er selber en guete Mensch isch.
Isch uf jede Fall es sehr spannends Gspröch gsi und het eus en guete Ihblick i s Lebe vo da geh.

Nach eme frische Ingwertee vom Donny simmer denn au früeh ih euses vorbereitete „Bett“ go schlafe.

Da mer ganz elei mit ih dem Camp gsi sind (alli andere Touris sind ime andere Camp gsi) hemmer ehrlich gseit scho chli Angscht gha, dass irgend es Tier chunt ih de Nacht.. 🙈😅 und mer hend eus au wieder mal gfrögt wieso mer das überhaupt mached? 😅 wenn mer doch eigentlich so es schöns Dihei hend 😂

Aber mer hend en Guide gha wo ide Base nebed ois gschlafe het. Das het ois chli Sicherheit geh. ☺️Læs mere