Tag 52 - Diving im Komodo National Park

Hüt sind eusi erschte richtige Fun Dives uf em Programm gstande 🥳😍
Und s Wetter het au mitgmacht ☺️🙏

Am morge am 7bni isch es losgange uf s Tauchboot. Denn simmer zerscht mal öpe 2h unterwegs gsi bis zum erschte Tauchspot.
Mir hend sogar zmorge und zmittag uf em Boot becho und sie hend s ganze Equipment für eus parat gmacht. Richtig guete Service gsi 🤗

Bim erschte Tauchgang hemmer vieli schöni Koralle und farbigi Fisch chöne gseh. Und sogar en Babyhai versteckt under eme Stei.

Bim zweite Tauchgang simmer zum sogenannte Manta Point (bekannt, dass mer det vieli Mantas gseht). Nachdem mer öpe 45min unterwegs gsi sind ohni würkli öpis gseh z ha, simmer scho chli enttüscht gsi, wo euse Guide s Zeiche zum uftauche geh het (will am Janis sin Tank leer gsi isch).. aber grad wo mer hend wele ufe hemmer denn glich na ein Manta gseh.

Also sofort wieder abe, de Janis bechunt de Notfallschluuch vom Guide, sodass er Luft het. So hemmer doch no öppe 10 Minute chöne en öppe 3m grosse Manta vo nöchem erlebe 😍 das isch uf jefe Fall es Highlight gsi!

Nach em zweite Dive hets denn zerscht en feine Lunch geh und mer hend uf em Boot chöne entspanne ☺️

Am Nami hemmer denn na de letschti, dritti Dive gmacht, wo mer öpe 3 riesigi Schildchrote hend chöne gseh!
Definitiv de Tanja ihres Highlight gsi 😍🐢

Leider hemmer kei Kamera für unterem Wasser, darum chömer die Ihdrück leider nöd teile. 🤷‍♀️

Uf jede Fall au wieder en mega schöne Tag gsi 🥰Read more