Tag 83 - Diving with Sharks, Malapascua

Hüt morge am viertel ab 5i het de Wecker glütet.
Mer hend beid nöd würkli möge ufstah und so hemmer schlussendlich na en halbe Sprint id Tauchschuel müsse herelege zum einigermasse pünktlich sii 😅
(Da hemmer nanig gwüsst wie sehr sich s früehne ufstah wird lohne ☺️🙌)

Am 6i isch es ufs Boot gange und denn simmer au scho zum erschte Tauchspot gfahre.

De erschti Spot, Monad Shoal isch nanig bekannt gsi für Thresher Sharks, sondern meh eifach allgemein für Haie. Aber d Wahrschinlichkeit, dass mer die gseht isch unglaublich chli und d Divemasters gönd amel nöd devo us, dass mer wüki Haie gseht. Isch sehr sehr selte und d Guides hend selber sit mehrere Wuchene nüt gseh.

Nach es paar Minute under Wasser hemmer aber so es unbeschriiblich grosses Glück gha und en Tiger Shark gseh. Nöd eine, sondern sogar zwei! 😱

Sogar euse Guide isch so komplett überrascht gsi und het am Janis grad d Kamera us de Hand grisse zum de Moment uf Video chöne fescht z hebe 😅😱

Eine z gseh isch ultra selte. Mir hend innerhalb vo eim Tauchgang 2 Tiger Sharks gseh.

Eigentlich hemmer "de" gar nöd unbedingt wele gseh, wel mer (aso vor allem d Tanja) Angscht devor gha het 🙈🙆‍♀️ Isch nemli nach em Wiise Hai de zweit gfährlichsti Hai für Mensche. Aber wo s denn so gsi isch, isch die Angscht i dem Moment vergesse gsi und mir hend nume gstuunet.

Als wär das nöd gnueg gsi, hemer denn sogar na en White Tip Shark gseh. Aber im Vergliich zu de Tiger Sharks eifach en herzige chliine Hai gsi für ois haha.

Unvergesslich. Unfassbars Glück.

De Guide het denn allne uf em Boot oisi Videos zeigt (ca 20 lüt). Si hend nemli alli nüt gseh. Mer sind die einzige gsi.

Bim nächschte Spot (Kimud Shoal) hemmer denn die andere zwei Tauchgäng na gmacht. Det hemmer ganz viel Treshersharks und en grosse Tintefisch gseh ☺️
Unicorn fish, Frog fish, Scorpion Fish.

Nach em Tauche hets na en feine Lunch uf em Boot geh und mer sind wieder zrugg an Land gfahre.

Als wer das nöd scho meh als gnueg simmer uf em Rückweg vo öppe 10 Delfine begrüesst worde. Unfassbar... 😍😍😍

Zrugg ih de Tauchschuel het de Janis schnell d Videos gspeicheret und 5 mal kontrolliert ober die Ufnahme au wüki uf sim Handy het. Im Hotel schnell under d Duschi und d Sache zemepackt.

Bim Tauche hemmer de Arnold kenneglernt, wo gern euses scho buechte Zimmer für die nächscht Nacht übernoh het. So hemmer ihm na de Schlüssel übergeh und sind nachher wieder an Strand führe und mit em Boot zrugg zum Maya Port (Cebu) gfahre.

Hend denn uf em Boot na mit anderne Taucher gredet und sind all niidisch gsi, wills alli zur gliiche Ziit am gliiche Tauchspot gsi sind und absolut gar nüt gseh hend.

Am Hafe ahcho, hemmer eich vor gha mit em Bus zrugg uf Cebu City fahre. Am Hafe wartet aber ganz viel Taxifahrer, wo e günschtigi Fahrt ime shared Minivan ahbütet. So hemmer eus zwei anderne ahgschlosse, da mer so dütlich schneller ahchömed als mit em Bus.

Am halbi 9ni am Abig simmer denn au wieder im Hotel ih de Stadt ahcho.

Wow... Was für en Tag!
So Erlebnis lönd eus die vorherige Strapaze grad wieder vergesse und mer sind mega dankbar was mir hüt alles hend döffe gseh! ☺️

Apropo, gseht uf Kamera alles so schnusig chli und herzig us 😅 Chamer uf Video leider nöd guet festhalte und nahvollzieh.Læs mere