Reset search
Herbstferien 2025
  • Livia Hasler

Herbstferien 2025

A 10-day adventure by Livia Read more
FollowInsightsInsightsCalendarCalendarPhotosPhotosShareShareBucket list
Newest first
  • Trip start
    October 25, 2025
    Livia HaslerHerbstferien 2025Traveler

    Ferienstart

    October 25 in Switzerland ⋅ ⛅ 3 °C

    Letscht Wucha bini no ghörig am chränkla gse. I bi denn aber am Tipp vu minra Mitarbeiterin gfolgt und ha mer en magic drink i da Apothek kooft. Si hett mers empfohla mit am Kommentar: du hesch ofach a Nohtoderfahrig aber danoch isch alles weg. Ganz so starch ischs denn aber nöd gse. So bini denn ersch am Samstigmorga id Lenzerheid gfahra zum Christian. Zemma hommer denn usgiebig im Hotel zmörgelet. Danoch simmer aber leider numma i üsers Hotelzimmer cho well d Batterie vum Türschloss leer gse isch. Well da Husdienst am Samstig frei hett und sü zwor s Grät ka hond wos brucht hond aber nöd gwisst hond wias funktioniert hommer denn halt no a wili im Gang gwartet. Ahschlüssend simmer denn a Rundi go spaziera. Vum Hotel us noch Tgantieni und über da Globiwanderweg wieder zrugg is Tal und no 1 mol um da Heidsee rundum. Zrugg bim Hotel hommer üs denn da Spa-Bereich nöd entgo loh. Noch am bädala bi i denn no go sauniera und usruaba im Ruheruum. Zum Znacht hommer üs a Pizza bim da Elio gönnt. Dia isch oh super gse. Noch no kli Fernseh luaga simmer denn oh scho ihgschlofa i üserem schöna Hotelzimmer. Am Sunntig hommer usgschlofa. Ganz überraschend hetts denn gschneit wo mer ufgstanda sind. Mür hond üs wieder usgiebig am Zmorgabuffet bedient umd sind denn am 11i oh scho wieder abgreist. Mit ma klina Zwüschastopp im Outlet z Landquart simmer denn wieder Rhintl, resp. Zigerschlitz zua gfahra.Read more

    See translation
  • Livia HaslerHerbstferien 2025Traveler

    Anreise Mallorca

    October 27 in Switzerland ⋅ 🌧 9 °C

    Hüt hani wiedermol usgschlofa. I ha denn no mössa fertig packa und paar Klinigkeita erlediga bevor mini Reis los ganga isch Richtig Flughafa. I ha mini Wohnig mit da 3 klassischa Gepäckstück verloh. (siehe Bild) Noch ma ultra stressiga Umstieg am Bahnhof St. Galla isch denn alles ribigslos abglofa. Ihcheck wora simmer scho automatisch. Gepäck abgeh und ab as Gate. Am Gate hett denn da Herr Bischof glich no a Hüngerli ka. Guat wieder zrugg zum Essa. No kli anaghögglet und i aller rua znacht gessa. Zrugg bim Gate isch denn gad oh scho d Durchsag go to gate cho. I ha da no nöd als boardimg interpretiert und bi no i aller Rua ufs WC. Zrugg am Gate hett mi denn d Frau vum Boarding scho recht hässig ahgluaget. Wo mer ihgstiga sind hommer denn oh gmerkt wieso. mür sind di dritt/viert letschta gse. Total sind 88 Passagier a Bord gse. Es isch aber en Airbus A350 gse, aso 3 mol 3 Plätz pro Reiha (339 Plätz). Sü hond denn oh gse mür töri da Platz nöd wechsla ohni z froga wells sus mit da Gwichtsverteilig numma stimmt. Es sind aber eh maximal 2 Person pro 3 Sitz gse. D Startig isch denn ghörig turbulent gse bis mer über am Nebel und da Wolka gse sind. Es isch zwor nöd mega lang ganga aber i glob so fest gschüttlet hetts bi mir no nia. D Landig isch dafür super gse und üsers Gepäck isch oh bi da ersta gad dabi gse. Noch am Transfer und am Check-in im Iberostar Waves Playa de Muro hommer no kli d Hotelahlag inspziert und gond etz oh scho go pfuusa.Read more

    See translation
  • Livia HaslerHerbstferien 2025Traveler
    Sa Poblamin Flitzer für dia Wucha

    Einrollen auf Malle

    October 28 in Spain ⋅ ☀️ 21 °C

    Hüt simmer am 8i ufgstanda und go zmorga essa ganga. Bi dem grossa Buffet gohts glob no paar Täg bis mer üs zrecht findid. Nochana hommer üs a Routa usagsuacht zum go ihrolla. Plant sind 80km mot 400 Höhameter gse. Noch am Abhola vu da Velos hommer üs denn bi perfektem Wetter uf da Weg gmacht. Noch amna guata Stund Fahrt hett denn da Emanuel a Schlagloch überseh und hett sofort en Platta ka am Hinterrad. Zum Glück isch bi da Velomieti en Schluch, Reifaheber und a Pumpi pro Velo dabi. So hommer üs denn dra gmacht zum dä Schluch wechsla. Da Reifa hommer denn aber nöd ohni nohebla mit am Reifaheber anabrocht. I ha no gset, so machemer sicher da Schluch kaputt. Da isch mer nemli letscht Mol dahom oh passiert. Noch ma riesa Kampf isch denn da Reifa druff gse und zagg bim ufpumpa hett sich usagstellt, dass da neu Schluch bim montiera Schada gno hett und somit hett da Spili vu vorna ahgfanga. I ha jo oh no en Ersatzschluch dabi ka. Bim zwota Versuach simmer denn scho so verzwiflet gse, dass mer üs vu anra Iheimischa Velofahrerin helfa loh hond. Sie hett aber grundaätzlich oh ko Ahnig ka. Hett denn aber noml ona ahghalta zum helfa und z zwota honds denn wieder mit da Reifaheber ummagheblet. I ha denn zimli schnell denkt dä Schluch isch etz scho am Arsch. Fazit: Sü honds oh nöd anabrocht und sind wieder witerzocha. Mür hond denn da Schluch noml usa und tatsächlich honds en oh no kaputt gmacht. Mür hond denn nöd ufgeh und en Verbifahrenda ahgalta und dem zwo Flick abgschnorret. Und witer ischs ganga zum da Reifa druff zbringa. Mit no kli Hilf us am Internet hommers denn gschafft. Bim ufpumpa hett sich aber usagstellt, dass vu luter Pumpa s Ventil verboga wora isch. Da hett denn nu no a onra Stell dicht gmacht aber es hett im Moment to. So hommer üs denn uf da Weg gmacht zrugg is Hotel. Noch öppa 2 km hett denn da Emanuel aber gfunda: i ha vorna fast ko Luft meh. Fazit: Mür hond 6 Schlüch dabi und 4 davo sind kaputt. Do hett s ÖV Kind Livia nünt meh kennt und hett gfunda, wenni di wär würi etz 3km i di nögst grösser Ortschaft laufa und döt uf da Bus goh. I bi denn i dera Zit gmüatlich mit Ruggaluft zrugg gfahra und bi a Rundi am Strand go spaziera und im Meer go bada. Es isch echt no ahgnehm gse. Gfühlsmässig oh wärmer als da Hotelpool verussa. Wo denn oh da Emanuel wieder zrugg gse isch, simmer no 1 km im Hallabad go schwimma und nochana go Znacht essa. Oh do hetts wieder mega viel verschiednes geh. Etz gits no z plana wo mer morn en neua Versucha söllid woga zum go d Insla entdecka denn isch da Tag oh scho gloffaRead more

    See translation
  • Livia HaslerHerbstferien 2025Traveler
    Sant SalvadorPetra

    Sant Salvador

    October 29 in Spain ⋅ ☁️ 20 °C

    Noch dem Palttfuassdesaster vu gester hommer hüt voller Optimismus a längeri Tour plant ka. Mür sind denn noch am zmorga mit volla Büch gstartet. Zersch Richtig Süda und denn is Innere vu da Insla. Zimli schnell hani gmerkt wieso dass dia Routa uf komoot als Wellblech beschriba gse isch. Immer kli abi und wieder ufi, is ganga. Wobi da Schuss vum abi fahra natürli nöd glanget hett zum wieder ufi z cho. Noch knapp 47 km denn d Meldig vum Emanuel, i ha glob hinna kli wenig Luft. I to mol ufpumpa. Do hett aber en Blinda vum Schiff us scho gsecha, dass es en neua schluuch brucht, weller komplett platt gse isch. Guat da hommer jo gest gezwungenermassa güabt. Noch am Usbaua vum Rad hommer denn gsecha, dass da Mech gest noch am wechsla vum Pneu wieder da glich ihgsetzt hett. Da isch dä gse mit 2 Flick und amna halb kaputta Ventil. Es hett sich denn usagstellt dass er noml a Loch ka hett. Da hetter zimli sicher gest scho ka. Scho fast professionell hommer denn en neua Schluch ihgsetzt und noch nöd mol 20 Minuta isch üsri Fahrt witer ganga. Noch da Hälfti simmer denn bim Ahstieg zum Sant Salvador ahcho. Uf am Zruggweg hommer denn no kli Usschau ghalta noch ma Resti oder so. Da isch ger nöd so ofach gse.  I bi mer no nöd sicher ebs dra glega isch dass gad Siestazit gse isch oder eb do allgemein wenig lauft um dia Johreszit. Es isch nemli oh sus nöd viel los hani s Gfühl. Z Petra simmer denn ganz zuafällig ana Cafi anigfahra wos sogär en Veloständer vu üsra Velovermiatig ka hett. Denn hommer natürli nöd zögeret und gfunda da moss jo guat si. Noch ma Stärchig mit ma Fanta hommer üs denn uf di letschta Kilometer gmacht zrugg zum Hotel. Fahrtbilanz vu hüt ca. 110km und guat 1'000 hm und 1 Platta
    Zur Abküahlig simmer denn no schnell is Meer. Noch am duscha hetts denn oh scho Znacht geh. Wo mer morn ani radlid isch no nöd definitiv. Falls öpper no Idea hett dör er/sie sich gern melda. Guat Nacht!    Read more

    See translation
  • Livia HaslerHerbstferien 2025Traveler
    la victoria
    Cap de Formentorüberall hetts Gaissa ghaso öppis wia da Hirschasprung2Bi dem Ussichtspunkt hommer vor 13 Johr a Familifoti gmachtPort de Pollença

    Ab in den Norden

    October 30 in Spain ⋅ ☀️ 20 °C

    Hüt hommer wieder bis am 8i gschlofa und sind denn ohni Stress go zmörgala. Well s Wetter nöd so da Hit gse isch hommers nochana noml kli im Zimmer chillt. So simmer denn ersch am Mittag ufbrocha i Richtig Norda. Zersch hommer wella zum Lüchturm fahra bi Cala Solana. Döt isch denn aber zimli früa d Stross scho gsperrt gse, wells glob no Militärgebiet isch. So simmer denn nu zum Ermita de la Victoria gfahra. Ussicht hetts döt oba nöd würkli geh. Witer simmer denn zu üsrem eigentlicha Ziel am Cap de Formentor. Da isch da nördlichst Punkt vu Mallorca. Di letschta 10 km sind für d Autos gsperrt gse. Nu no d Velos umd da öffentlich Bus hond duri töra. Es isch den choga schö gse zum fahra. S Wetter isch oh all a kli besser wora. Nu mis Knü hett mer je länger je meh weh to. Do ischs mer gad passend cho, dass paar Kilometer vor am Cap a polnisch Pärli am Strossarand Problem ka hett bim Schluchwechsla. Mür hond denn ahghalta und üseri neu glernta Skills bi ma fremda Velo ahgwendet. Noch nöd mol 10 Minuta hett denn dä Kerli oh wieder chönna witerfahra. Er hett nöd mol da Reifa vum Felga brocht, aso seb hond denn mür sogär bim ersta Platta scho könna. D Frau hett denn no gmonnt i sött mini Skills imna Werkstatt ahbüta. Bim Lüchtturm hommer üs denn no a Süassgetränk und en Schoggichuacha zu Touriprisa gönnt. Ursprünglich wär üsi Tour retour via Pollença gse. Ufgrund vu mim Knüü und welli gfunda ha dia Stross da Küsta entlang mit Ruggaluft wär sicher no schöner als mit Gegaluft, simmer denn direkta Weg via Alcudia wieder zrugg is Hotel. Hüt hommer 80 km und guat 1'100 Höhameter gmacht. Noch ma Bad im Whirlpool, amna Saunagang und amna Kalt-Warm-Wechselbad simmer denn parat gse für da Znacht. Hüt isch denn oh da passiert wo da Emanuel gester nu gmonnt ka hett, dass es passiert isch. Er hett sich gester im Tisch vertoo und hett gmonnt da Kellner heg s Züg abgrummt wo er am Buffet gse isch. Tatsächlich simmer hüt mit am Dessertteller zum Tisch gloffa und zagg isch alls abgrummt gse. Do hommer gad kli blöd gluaget, aber nöd nu mür. Oh da Kellner wonner üs gseh hett. Ischem denn ger nöd recht gse. Morn söll s Wetter wieder super si, i hoff mis Knü macht wieder besser mit, so dass mer di plant Routa konnd fahra.
    Fazit vu hüt: selber 0 Platta gfahra aber glich 1 Schluch gwechslet.    Read more

    See translation
  • Livia HaslerHerbstferien 2025Traveler
    Fahrt in die Berge
    beihdruckendi StützmuraPass Nr. 1sehr kurvegi StrossPass Nr. 2Hafa vu Sa CalobraBucht vu Sa Calobra1mis gewollte Bildso öppis wia da Hirschasprungschöni StützmuuraStrecke vu Sa Calobra zum Pass ReisPass Nr. 2 zum zweita (vu da andra Sita)Pass Nr. 3

    Pässejagd

    October 31 in Spain ⋅ ☀️ 22 °C

    Hüt hani da Wecker bizzeli früahner gstellt ka i da Hoffnig, dass mer oh kli bezita losfahra chond. Noch am Zmorga und am parat macha simmer aber zersch no da Outlet und d Boutique vu üsem Veloverleih go uschecka. Hett no paar schöni Kleidigsstuck, mol loga eb do no os mit mir id Schwiz flügt. Schlussendli simmer denn kurz vor am 10ni losgfahra Richtig Sa Calobra. I ha mer denn vor am ersta Ufstieg a eher starchi Schmerpilla gönnt znd so ischs nochana da ganz Tag gloffa wia am Schnürli. Im ersta Ufstieg hommer no ona überholt wo ghörig am Pfuffa gse isch. Man merke sich, der Mann im orangen Trikot. Bis zu da Bucht vu Sa Calobra sind öppa 1'000 Höhameter gse. Noch am letschta Ufstieg is denn ca. 700 Höhameter abi ganga wo mer gwisst ka hond, dass mer döt oh wieder ufimonnd. Es hett ganz en Huufa Spitzkerana ka und d Landschaft und s Wetter sind herrlich gse. Dunna bi da Bucht hani denn mis Föteli us am Tunnel usi, könna macha woni ha wella. Well da Mol ko Schiff i da Bucht gse isch, isches ger nöd so schö wora wia vor 13 Johr. Nochana simmer denn wieder duruf gfahra. Noch öppa 200 Höhameter isch denn der Mann im orangen Trikot am Strossrand gstand und isch uf am Weg abwärts gse. I glob dä hett hüt no en langa Tag ka uf am Velo, bis dä wieder doba gse isch, ischs wohrschindli scho fast dunkel wora. Noch am grössta Ahstieg hommer üs denn no a Pausa mit Cola und Chips gönnt. Uf da letschta Abfahrt hommer am Strossrand no ona troffa wo alo a sim Velo am ummamecha gse isch. Bi dem hommer denn no ahghalt. Meh als en moralisch unterstütza hommer nöd chönna. Bi ihm isch nochdem, dass er da Schluch gwechslet hett ofach d Kassetta vum Rad gheit. Er hett si denn selber wieder drufbrocht. Mür hond denn für üsers guat Karma sina Kollega no usgrichtet, dass er wieder on the road isch. Honds a Fröd ka, well sü sind scho u choga viel witer unna gse und hond sich scho uf da Weg zu ihm gmacht. Noch am statemant Ronny rollt hommer üs denn definitiv uf da Weg is Hotel gmacht. Noch guat 112 km umd 2'100 Höhameter simmer döt guat ahchoo. Da Emanuel isch no schnell is Meer go sich abküahla und in Whirlpool go entspanna und i bi no go schwimma im gheizta Indoorpool. Zum Abschluss hommer no a Wechselbad warm-kalt-warm-kalt gmacht. Söll guat sie für d Regeneration honds gset. Noch am Znacht hetts no a Rundi Ping-Pong geh und denn isch oh scho fast Zit gse für is Bett.Read more

    See translation
  • Livia HaslerHerbstferien 2025Traveler
    Santa Margalida
    Sant JoanEnergie tankaSineuSineuPlaya de Muro nach AlcudiaPlaya de Muro

    Puig de Randa

    November 1 in Spain ⋅ ☁️ 21 °C

    Hüt hett da Wecker wieder am 8i glütet und mür sind da Tag gmüatlich ahganga. So ischs denn oh guat 10ni wora bis mer losgfahra sind. Puig Randa isch hüt s Zwüschaziel gse. Bis döt ani hommer Gegaluft ka und es isch tendenziell immer a kli ufwärts ganga. So sind dia ersta 45km mit öppa 600 Höhameter zimli langsam verganga. Da Ahstieg isch mit 5km und knapp 300 Höhameter ganz ahgnehm gse. Vum Puig Randa us hett mer denn zimli über di ganz Insla gsecha. Vu Palma bis Alcudia. Uf dem Hügel hetts 3 Kloster, alli uf verschiedena Höchena. I bi aber meh a da Radarstation interrssiert gse. Mür hond a (Achtund Wortwitz) strahlendi Ussicht gnossa. Uf am Retourweg simmer denn no imna gmüatlicha Cafi z Algaida go ichera und Energie tanka. So hommer di letschta guat 40 km mit Ruggaluft richtig könna gnüssa. Zrugg bim Hotel hetts denn für mi no a Abküahlig im Meer und a Entspannig im Whirlpool geh. Döt hani a Senioragruppa (alli bestimmt ü70) troffa wo spanisch gredet hett. I ha mit denna a choga Gaudi ka obwohl mer üs nöd verstanda hond. Nochana bini no kli go Lädala und ha döt no a schwizer Verköferin troffa wo eigentli z Glarus wohnt. Si hett gset ka, dass da Herbst viel beständiger isch als da Früahlig und dass sie s ganz Johr do chönn Velofahra und da ohni Hendscha. Noch am letschta Znacht i dem Hotel gits etz no da morgig Tag z plana und denn gohts oh scho wieder is Bett.

    Radfazit vu hüt: guat 100 km unf öppis über 1'000 Höhameter und nu 1 trchnischa Halt well mini Kettla verklemmt gse isch    Read more

    See translation
  • Livia HaslerHerbstferien 2025Traveler
    öppa di onzig Pflanza wo etz no blüat
    LlosetaBinissalems letscht Mol am StrandPalmaZnacht im Burgou

    Ausrollen und Transfer

    November 2 in Spain ⋅ ⛅ 22 °C

    Hüt hett da Wecker 30 Minuta früaner gschellet als sus amel. Bim Zmorga hetts zwor no alles geh aber es sind numma gad viel Gäst umma gse. Liht wohl dra, dass s Hotel hüt zua tuat. Noch am Zmorga simmer denn noml für a klini Rundi ufs Velo. Grösstateils über Nebedstross simmer kli is Landesinnere. Retour is denn da glich Weg gse wia am ersta Tag. Scho no schö wemmer im November no ka mit kurza Hosa und Trikot Velofahra ohni dass mer a Jacka oder öppis brucht. Noch da Usfahrt hani denn no duschet und mis Züg zemmapackt. Bis am 3 hommer us am Hotel mössa si. Nu kli doof, dass da Veloverlei ersch ab am 3 offa hett. So simmer denn zitlich kli in Klinsch cho, aber schlussendlich is denn glich no ufganga. Mit am Bus simmer denn vu üsem Hotel us uf Palma gfahra. Da klappet do zimli guat und isch oh recht simpel. Z Palma ahcho hommer denn dafür kli meh Schwierigkeita ka zum da Stadtbus zu üsem Hotel z finda. Aso hommer kurzerhand entschieda, dass mer laufid. Noch ma öppa 20 Minütiga Marsch simmer denn oh zimli hungrig bim Hotel ahcho. Aso hommer üs oh gad uf da Weg gmacht zum go Znacht essa. Da hommer bim Burgou gmacht. Do hommer üs en Burger selber könna zemmastella. Es sind schlussendli smashed Burgers gse. Isch super fein gse. zrugg simmer denn wieder 30 min zum Hotel gwatschlet.
    I dena 6 Täg woni s Velo gmiatet ka ha, hani guat 540 km gmacht. Für da, dass mer uf da ersta Usfahrt so a Plattapech ka hond, en halba Tag s Wetter nöd guat gse isch und hüt oh nöd als ganza Tag ka zella, würi sega ger nöd sooo wenig.    Read more

    See translation
  • Livia HaslerHerbstferien 2025Traveler
    Llotja de Palma
    Ankunft in Zürich

    Adiós Mallorca

    November 3 in Spain ⋅ ☀️ 22 °C

    Hüt hommer usgschlofa und üs ahschlüssend am für üs neua aber genau so richhaltiga Zmorgabuffet bedient. Ahschlüssend simmer no kli dur Palma gschlenderet und hond denn am 12i uschecked. Mit am Bus simmer an Flughafa gfahra und hond üs döt zum Abschluss no en McFlurry gönnt. Da Flug uf Züri isch sehr ruhig und ahgnehm gse. Pünktlich simmer z Züri glandet und oh üsers Gepäck hetts wieder id Schwiz gschafft. Planmässig sötti am guat halbi 8i wieder dahom si und denn gilts nu no Wösch zmacha und go pfuusa. Morn mossi jo schliesslich wieder go schaffa.Read more

    See translation
    Trip end
    November 3, 2025
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice