Montezuma - Klein aber fein

Vo Santa Teresa si mir geschter uf Montezuma witergreist. Aus erschts hei mir es Taxi chönne Teile mit paarne angere Tourischte bis uf Cobano. Dert ahcho hei mir gseh, dass mir no 3 Stung ufe nächscht Bus hätte müesse warte. 🤦‍♀️ U de hei mir üs entschlosse mau das „hitch hiking“ (Autostöpple, wo hiä sehr viu Lüt mache) usprobiere. Mir si däm gägenüber eher skeptisch ihgstellt bzw. gsi, abr mir hei dänkt, isch besser aus 3 Stung ufe Bus z warte. Mir hei öpe ä haub Stung probiert bis der Erscht het stiu gha. Es isch ä österrichische Tourischt gsi, wo üs het mitgno und grad vorem Hostel het useglah! 🙌🏼🚗

Montezuma.. ja, das isch ganz es chliises, bsungrigs Dörfli wome gfüehlt innert 2 Minute het gseh 😅 Klein aber fein! Es het sehr viu so grümscheli Lädeli und Soda‘s und Kafi‘s wome chli cha Zit vertribe. Es het sogar so öpis wine Buechlade - aso besser gseit hets eifach genau eis Gstell mit Büächer i jedere Sprach, abr es fingt jede öpis. D Stränd si nüme so gäbig zum Bade wöus teilwiis zimmli steinig & felsig isch. Aber es isch seehr gmüätlech, härzig und irgendwodüre hets si Charme😄

Hüt simer ga d Montezuma Wasserfäll aluege. De hets unger jedem Wasserfall sone Pool wome drin cha ga bade. Ganz erfrüschend im Gägesatz zu dä Temperature wo z Meer het und mä isch mau nid vou Sand gsi..wobi das ja gjammeret isch uf höchem Niveau 😉 Item, uf jede fau weme zu dä höcher glägene Pools het wöue, isch Chlättere ahgseit gsi😅 Aso üses Workout hei mir somit ou gha💪🏼

Mir blibe da iz no paar Täg, bevors de witer geit richtig Jungle🦜🌴Read more