Lima 🇵🇪

Üsi letschti Destination in Peru isch d‘Houptstadt gsi „Lima“. Mir hei ou wieder ä Free Walking Tour gmacht, wome mitem nä Guide dür d‘Stadt louft und er Erklärige zur Gschicht und Kulturels git. 😄
Da Lima am Pazifische Ozean ligt, si mir bis zur Küste glüffe und hei es paarne Surfer zuegluegt wi si surfe.
Bim Chatzenpark si mir ou no verbi cho😅🐈‍⬛🐈 Es git im Miraflores Viertel ä Park wo ca. 100 Chatze läbe. Di si eifach dert, frässe u lige chli ume u wärde jede Tag vo viunä verschidnä Lüt wo düre Park loufe gstrichelet. Ä non-Profit Organisation ir Stadt luegt zu dene Chatze, si tüä sä mit Fuetter versorge und ou kastriere. Es sig nid ganz sicher wörum dases so viu Chatze het, abr ei Theorie sig, dass vor Jahre ä Chiuche Chatze heig gha wäge dä Müüs, abr du när di Chatze sige furtglüffe. 🤷🏼‍♀️

Am zweite Tag si mir im nä peruanische Kochkurs gsi. Das isch würkli genial gsi und het Spass gmacht. Mir hei nätti Lüt troffe, gueti Gspräch gha und drzue öpis feins kochet. 😋 De hei mir zersch äs Apéro gmacht, wo mir Banane Chips zäme mit Mango Stückli und are scharfe Sauce hei gässe. Zur Vorspeis hets äs Causa Limeña gä (pürierti, gelbi Härdöpfu, gwürzt mit Limette und Ají, gfüllt mit Quinoa und Avocado) und aus Hauptgricht es Lomo Saltado (bratnigs Rindfleisch, Zwibele, Tomate, Chilischoten, traditionell mit Pommes und Reis serviert). Aus Getränk hei mir es Chicha Morada gha (lila Mais, Ananas, Zitronensaft, Zimt und Nelken) - zeut ou aus Nationalgetränk.
Mir hei üses Kochte jeweils o grad chönne ässe und si auso sehr z‘fride gsi mitem Ergäbnis🙌🏼
Am Schluss hei mir no d‘Rezept übercho und z‘Beschte am ganze Kurs isch gsi - mir hei NÜT müesse abwäsche😂Read more