Mumbai - Goa
January 2 in India ⋅ ☁️ 22 °C
✨️ ,,man reist besser mit leichtem Gepäck,, ✨️
...auso los geits Thun - Bärn (Karin chunnt oh no mit) - Basel - Istanbul - Mumbai... Doch jtz afä chli uf dr schnure stöh mir am Gepäck band u warte vergäblech uf üser Ruckseck.... da zMumbay am Flughafe hets meterhöchi Gepäckhüfe wo sicher (er stubschichtnah zurteile) scho ewig dert lige drum - mini Hoffnig isch chlin ufnes widrsehe mit üsne Ruckseck aber mau luege 🤷♀️
Mir fahre auso nach däm mir jtz zerstmau mit dere Indische Bürokratie (oder was oh immer ds gnau isch 😅) si i Kontakt cho zu üsem Hotel...
Bim Ubertaxi acho gseh mir nume sini Füess ir Frontschibe - er pennt no 😅 wie er gnau di Fahrt het agno, so töif schlafend blibt es Rätsu - ufaufäu wecke mirne u er muess afä mau dr Chopf wäsche u ztaxi lüfte bevor mir de chöi zum Hostel fahre 🥴
Mir hei üs vo daheime us scho ä Guide organisiert u mache ä Tour dür di Stadt mit ca 80Mio iwohner.... ja steuet euch ds vor ä Iwohnerzau wi ganz Dütschland i eire Stadt - ja es het eifach viu - viu Outo - viu Hüser - viu Lärm u va viu Mönsche 😅
Zersch si mir ga dr Daravasi Slum aluege... dr grösst Slum vo Südostasie - aber nid so wi sich ds jtz di meiste vorsteue ala ,,zeiget üs mau wi schlächts euch geit,, sondern wi ds organisiert isch: dplastiksammler u teiller u schredderer...80% vom Plastik vo Mumbai wird hie härä bracht ussortiert gschrederet gwäsche u de recyclet di rästleche 20% lande wahrschinlech uf dr strass im wasser wo immer leider....
DKartonsammler u recyvler, dLäder härsteuer, dr Töpfer... es isch düre organosiert u jedes Metier het hie sis Viertu... Mir müesse üs aui no grad chli a dä Indisch akzänt gwahne u hei zwichtigste aber leider nid ganz aues verstande wo dr guide üs het erklärt....
Aus nächsts si mir d Dhobi Ghat di grössti Freimuftwöscherei vo dr Wäut ga aluege... ganz genau hei mir bis am schluss nid verstande wi die jtz gnau chöi wüsse weles vo dene 1000 Hemmli wo häreä ghört aber es funktioniert irgendwie 😅 oh hie het aues si gnau ablouf jede het genau sini Büetz u so funktionierts...🤷♀️
Mir hei de no dr Stadtzug gno... dr erst hei mir verpasst wüu mir üs grad nid drfür hei gha deuböge füre znäh aber scho bim zwöite si mir parat gsi u es het üs nüt chönne ufhaute ,,rein in das Getümmel,, mau dinne heisinis de grad umbedingt wöue la hocke u heinis behandelt aus wäre mir ihri perönleche Gest... zersch nid ine lah u nähr aber so grosszügig 😅
Ufaufäu hite di Idrück u mir möh, nach däm mir no mit gfüeut 1000000mio Inder zGate of India si ga luege, nüm - auso zrügg iz Hostel mau gane Pouse mache...
Am Abe si mir de no ufere Rooftop bar ga znacht ässe. (Rooftop isch geng guet - dusse usem getümmel u chli rueh) leider het sich Karin hie no dr chnöchu verdreit dä gschwiut ah u wird blau 🙈 chüele ufe ha u ab jtz Bett .... hoffentlech ischs morn besser....
Am nächste Morge si mir äxtra früeh a Flughafe - wüu dir möht euch erinnere üses Gepäck fäut no... ja aber wi erwartet isch ds nid da - Mir schickes euch uf Goa... 😅 morn 🤣😅🙈
Goa - Sonne Strand Shopping und gutes Essen 😍
Aus wär Indie per se nid Abetür gnue stöh mir jtz da ohni Gepäck u mit acknackstem Fuess - aber mir hei zbeste drus gmacht im Namaste Beach üses Hüsli bezoge. hei mau di wichtigste Sache gschöpperlet ungerangerem ä bandage für Karins Fuess, es früschs ungerhösi, hahnbürstli u zahnpasta usw... u hei haut mau uf üses Gepäck gwartet... Dävu ud Karin hei schwein gha dene ihres isch cho - mis isch bis zur Abreis nid füre cho u es weiss oh niemer meh wos isch - verschollen im unergründlichen Gepäck chaos der Indischen Fluglinie 😒 jtz reiseni mit Handgepäck dür Indie u findes mittlerwile irgendwie scho gar nüm mega schlimm... 🙈😅 wär cha das scho vo sich phoubte -🙈😅
Siuvester fiire mir am Strand mit dä blute Füess im Sand mitemne feine ässe umne ungloubleche Fürwärch - geng chli ufem passauf wüu weder di Knauer no die wose azünte si vertrouenswürdig - mä gseht ja de oh ds ds züg zum teil äuä uf Temu isch gchouft worde ömu dStöckli 🤣🤣🤣 pffffff machts u es isch düre 😅
DKarin isch ufgrund vo ihrem Unfau chli a Sunneschirm u ligi gfesslet u Dävu u ig hei mau no ä Roller gmietet u si chli ga explore... jtz füeut sichs langsam ah aus wäre mir acho...u eig wärs zum lenger blibe aber mir wei no meh gseh - Drum mir freue üs uf di nächsti Station - Hippie Hochburg Hampi ✨️🥰😍Read more
Happy in Hampi 👳♂️👳✨️
January 2 in India ⋅ ⛅ 18 °C
Dr Zug isch zIndie DAS Transportmittu... jede nimmt dr Zug! Es git verschidnegi Klasse u weme nid wott ir dritte Klass 8h reise (u gloubet mir ds wott niemer😅) de muessme dä Transport vorbueche - 🙈 typisch Indie ischs nie eifach... aber mir hei de ä App gfunde wo mir über Thailand ganz easy dr indisch Zug hei chönne reserviere u bueche 😅
Am Morge si mir auso a BHF zGoa si no ä Ticketschauter ga frage ob ds so wük geit u si nähr mit üsne billette u drü reservierte 2Aklass Plätz mit nume 10min verspätig los gfahre richtig Hampi 🥰 im Zug hei mir mau es Chai trunke u si de chli ad Tür ghöcklet u hei use gluegt zwüschine chli pfuuset mau öppis ds Ässe bsteut, mit dä Nachbare glaferet u Dävu het sich no mitem Schaffner agfründet... dä het kes Wort änglisch chönne aber Dävu het ihn mit sire grosse Kamera, sim Huet u Hemmli so wi wahrschinlech mitem breitischte Hindi ume Finger gwicklet - ufaufäu si di zwe buddies worde 🤣😅
Sowieso chunnt Dävu mit sire alegi dr Kamera u va em Huet sehr sehr guet ah... zwüschine wirdim aube irgend es Chind i Arm drückt u de wei widr aui Fotos mache vonim 😅 u er darf eifach aues würklech aues wüu jede gfüeut schock verliebt isch ihne sigs dr Schaffner dr Guru oder dr Chai verchöifer 😅 eine het gseit - er hätti gueti Chance zBollywood 👳🏾♀️🕺🕺oder de wärdenim oh Kusshänd zue gworfe 😘
Ufaufäu si mir de z Hampi acho u hei usi Loge bezoge - oh hie mit Rooftop zum chli drüber luege. Hampi het viu Tämple u giutet aus piuger Ort für dHindus. Däm entsprächend hets oh immer viu Lüt gha... interessant zum luege fötele, stuune u lafere 😅 Mir hei ganz viu u farbegi Saris, agmauti Gsicheter, elefante, heiligtümer & Sägnige gseh - öppe ä million verschidnegi Grüch wahrgno, u x- viu Melodie ghört -aber am Abe si mir de oh geng tod müed iz Bett gheit - di vile Idrück müesse verschaffet wärde 🤯😍
Mir si vo Hampi uf Anagondi glüffe 6km dert hei mir zbeste Aloo parata vo ever gässe, si bide Ghats am Fluss ghocket u hei eifach chli gaffet (isch übrigens ä lieblings beschäftigung vo dä Inder u jtz haut vo üs😅) idä verschidnige Rooftop Resti hei mir Früchtdrinks bsteut u drzue dAffe verjagt😅
Es het keni Saddus mit Dredlocks meh u es sig schiins viu grösser worde... ä Teil vo Old Hampi het dRegierig la umsidle u so ischs scho nüm ganz dä Hippie Ort wi mir erwartet hei - aber es het üs sehr gfaue u mir hei aui befunde paar Täg meh wäre auso absolut drin gläge 🥰
Vo Hampi hei mir dr Nachtzug gno - mir aus Highlighthunter hei no paar Orte vor üs wo einiges Verspräche - aus nächsts gö mir uf Jaisalmer di guudegi Stadt ✨️✨️Read more
Jaisalmer - goldene Stadt ✨
January 5 in India ⋅ ⛅ 22 °C
Am nami irgendwenn si mir zJaisalmer am Ändi vor Wüesti Thar glandet u si mit üsem Fahrer iz Hotel gfahre. Mir hei no öppis znacht gässe u si de gli mau ga lige - mir wei früeh uf ds Fort sig am schönste am Morge.
Gesagt getan, am morge bi ziite uf u los gloffe richtig Ford... es isch zeinzige wo no bewohnt isch zRajasthan.
Mir steue aber fest, ds üses ,,früech,, viiiiiu zfrüech isch für dInder - es isch no fasch nüt los u es het oh no fasch nüt offe... ja sogar dSunne laht uf sich la warte u es isch eifach nid so agnähm warm 🙈 auso haut afä mau es kaffi u no chli geduude... u de erwachets langsam - es gschäftigs tue überau u ganz viu indeschi Turis... (mir merke ds mir die irgendwie nid so kuhl finde - rücksichtslos, luut & müehsam 🤯) oh di Iheimische säuber sägä dsi ihri eigete Turiste lieber nid wette bewirte...
Tämple im Ford inne si so gar für üs aus ,,nidsotämpugänger,, imposant u interessant. Di millione chliine figüreli i däm guudige Stei si faszinierend.
Mir shoppe no chli kashmir, pashmina und c.o bevor mir de zum See gö ga dr Sunne unger gang luege - hie chamä sich schüsch für weni Gäut uf dr Strass la es Tattoo stäche we öpper interesse hätt? 🤔😅🙉🙈🤷♀️
Am Abe muesses de für Dävu schnäu ga - ab uf ds Wc 🤢🤮 u es zieht sich leider di ganzi Nacht - er isch aber tapfer u meint: ,,weme hie nie dr chotzer het gha ischmä nie richtig zindie gsi 💪,, aber am nächste Tag muesser de scho chli lige u pfuuse was heisst ds dKarin u ig allei los zieh 🤠
Mir gö nomau so es Herrehus (es Haveli) ga luege ä schniiderei u de gö mir no ufnes rooftop ga ds Ford vo usse aluege. Mir het Jaisalmer sehr gfaue - dStadt dLüt dFarb dr Stoub ds Mystische 🥰
Nam Mittag gö mir zrügg iz Hotel packe üsi rästleche sache u fahre richtig Jodhpur. - di blauii Stadt 🩵💙Read more
Jodphur - di blaui & Pushkar - di ruhegi
January 7 in India ⋅ 🌙 16 °C
Mir si de vo Jaisalmer widr mitemne Fahrer uf Jodhpur gfahre - Taxi fahre zIndie isch jedes mau widr ä Überraschig, mä weiss nie was da uf eim zue chunnt... zersch nid schlächt u nähr aber irgendwie geng wi gstresstr ischr gsi dä Fahrer... am schluss ischr blochet u üs ischs oh nüm wük wou gsi 🙈aber zum Glück si mir heil in Jodhpur acho oh wenis de no dr Aschluss Rikshafahrer het über znäst abzoge... Miner Närve si eh scho blank glägä nach dere Fahrt u er het de ds Fass zum überloufe bracht drum hanim de i auer Lutsterchi schlächts Karma vorusgseit u de si mir nähr haut zum Hotel gloffe... Mir hei no öppis znacht gässe u si de nach dere Fahrt cheibe müed iz Bett gheit 😴
Gotte froh ds mir no läbä 🙏🙏
Am nächste Morge si mir zum Fort u hei dert di ganzi Festig mitemne Dütschsprachige Audioguide chönne ga besichtige... bis id 40er Jahr isch ds no vo eim riiche Herrscher bewohnt gsi. Nachem Fort dr wiiss Tämpu u de nähr richtig Blausviertu... Dävus Fotografe oug hets gfiiret aber dKarin u ig mir wärde nid so warm mit dere Stadt... es isch würklech oh für indeschi Verhäutniss sehr deäckig u luut.. mä muess obe unge u vorus luege glichzitig u mir hei zgfüeu mir müesse da richtig sueche zum zschöne gseh... am Abe si mir de fein ga znachtässe u hei üs dr Transport für witr am nächste Tag grad organisiert...
Am Morge het aber dWäut scho widr chli angers usgseh - geng no dräckig u luut aber irgendwie mit chli meh charm 🌤✨️ Dävu isch nomau los mit sire Kamera u mir hei no Gwürz gchouft u schüsch chli gschoppet bevor de üse Driver isch cho - so chli ds vorussschouende Outofahre ischim auso gar nid gä gsi u nachere witere Fahrt mit Schnappatmig si mir zPushkar acho.... by the way- hie het de imfau sogar ds Navi ä indische Akzänt 🤣🤣
Pushkar isch eigendlech für sis Kamelfestival im November bekannt ... es isch ä heilige Ort mitemne heilige See - mir hei es Hotel gno mit Rooftop diräkt a däm See... es isch es ruhigs Örtli mit andurendere OmShanti musig u glöggli glüüt im hingergrund... genau das wo mir jtz bruche nach Jodhpur... Mir gö chli übere Märit, Dävu geit zum barber, mir ässe fein u gaffe eifach vo üsere Dachterrasse dr liebläng Tag abe, bestuune ds gschäftige getue mit farbige Saris, heilige Manne, Chüe Hünd u tuusig Tube... drzue trinke mir Chai, gingerlemontea u ässe ganz viu feini Pakoras 😅 es isch mega gmüetlech u schön idyllisch - mir verlengere no ä Tag wüus üs so gfaut...
Mir bueche de widr über ds Hotel dr Taxi fahrer für wiitr... u das mau schiessesi dr Vogu ab 🙈 er isch nid wi abgmacht ready am morge früech , er het eig ke platz für üses Gepäck (Dävu hetim de zeigt wimä ds amacht dses het ufem Dach), er het ke Luft im Pnööö u bim erste Hoger het dr Chare ke chraft meh... jtz isch gnue Höi dunge ahaute, usstige, zrügg bringe mir wei ä angere Fahrer u es angers Outo... er fingts natürlech rächt unkuhl u i bi sicher er muess sibe mau i däm heilige See bade hüt für dsnä jtz sis Glück nid verlaht - aber mir si dankbar umne aständige Fahrer wo üs sicher uf Agra bringt - obwou mir dr Gloube fasch verlore hei wüsse mir jtz es gitse auso no: die Inder wo guet chöi Outo fahre 🙌🙏Read more
Agra - Taj Mahal
January 13 in India ⋅ 🌙 5 °C
Mir si de äbä wi erwähnt in Agra acho u hei üsi Loge bezoge - es guets zimmer mits im Taj Ganj u vor Dachterrasse perfekti Sicht ufds Taj Mahal.
Nachemne feine zNacht si mir ab iz Näst - schliesslech wei mir früeh uf zum dr Sunneufgang bim Marmormonumänt bestuune ✨️😍
Gesagt getan am 6.00si mir ready gsi u si los zogglet zum Taj 🥰
Für mi scho lang lang uf dr Liste vo dä Sache woni unbedingt wott gseh steits i voller pracht vor mir - ds Taj Mahal -wow! So schön u es het wük fasch keni Lüt! Bim necher cho hets chli näbü gä was ds ganze numeno magischer het gmacht! U wo de dSunne isch ufgange isch di Stimmig perfekt gsi eifach würklech richtig schön 🥰✨️😍 dr Marmor wächslet dFarb vo wiiss zu bläule rosarot u de widr zu wiiss...
Mir si dert ufaufäu no ä momänt uf u ab glüffe u hei gfüeu 500000 Föteli gmacht bevor mir üs de widr use gwaagt hei jtz gewuusel vom Taj Ganj oder de nähr no wiitr use mitem Tuktuk uf Agra ine id Stadt 🙈🙈🙈 dert hets üs aber grad dr Gong gä vor luutr huupe u mir hei üs grad widr la zrügg bringe i üses viertu 😅
Chli lädele shöpperle u fein ässe bis de scho bau ume Abe iach - morb trenne sich dWägä vir Karin u üs fpr paar Tag wüu mir gö jtz no ufd Suchi nachem Tiger 🐅🐯 drücket ps dDüüüme!Read more
Ranthambore Nationalpark & Delhi
January 18 in India ⋅ ☀️ 18 °C
Am Morge früeh si mir bim Hotel in Agra abghout wirde für widr mau ufe Zug richtig Rhantambore Nationalpark - mir wei ä Tiger gseh 🤞
Mit fasch zwöi stund verspätig ischs de los gange ir este Klass im Zug - leider nid im gliche Abteil. Da ig mi allei im Abteil grad gar nid wou ha gfüeut mit au dene Inder - dir möget euch erinnere zlieblingshobby isch ja gaffe - het Dävu gseit i söu zu ihm cho u mir hei üs ä Ligi teilt. So isch de di zit veiechli schnäu verbi gange u mir si in Rhantambore acho scho erwartet vom Hotrl team wo üs am Bahnhof het i Empfang gno.
Da mir ja verspätet si gsi, het jtz aues chli schnäu müesse ga für uf üsi ersti Safari.
Dr Rahantambore Nationalpark isch i 10 Zone ufteilt. Di Verantwortleche für dä Park entscheide jewils churz vor dr Safari i weli Zone ds mä chunnt - so steue si sicher, dass nid aui am gliiche ort härä gö - dses zmingst a eim Ort in Indie nid überfüut isch vo Mönschemasse...I gloube dTier ud Natur dankt! U oh zuegangsziit isch beschränkt. Mir si auso uf üsem dachlose Jeep idi ersti Zone gfahre. Läck het ds guet ta mau us dene Lüt use ir Natur, ke küder kes ghuup früschi Luft mir heis u fest gnosse.
Im gsammte hei mir 4 verschidnegi Safaris gmacht. DZone si aui unherschidlech gsi di schönsti isch ds 10ni gsi no mitemne Fluss drdür umne wunderschöne Waud. Mir hei jensti Tier gseh u ja sogar dr Tiger 🐯😍 Mir si eifach Glückspiuze 😍🐯🤞 Dr Tiger isch di grössti Roubchatz vor Wäut - mir si tief beidruckt wi gross u muskulös so es tier eigendlech isch! U wi schnäu dä trotz sim Gwicht u sire grössi uf dä Bei isch 😬
Usserhaub vom Park, hei mir widr paar haarströibendi Autofahrszenen überläbt 🙈🙈 i gloube ja einersits, ds dür das ds si ad Widrgeburt gloube si eifach ke angst hei vorem stärbe... spiut ja ke roue mä wird ja widr gebore 🤔🤯😵🙄 u angersits ischs haut so ds weme faht afa Rücksicht näh. astah u warte, bire Bevöukerigsdichti vo mehrere milliarde, mä nie dra chunnt... drum, euböge use, stämpu zbode, drücke, überhole u dr ender isch dr gschwinder isch hie zMotto...
Nach dene aber würklech schöne Täg im Rhanthambore si mir de widr erst Klass aber dises mau im gliichee Abteil uf Delhi gfahre DKarin wartet hie scho uf üs 🥰
Delhi het ca 34mio Iwohner dämentsprächend chöit dir öich vorateue wi vou di Stadt isch 🙈
Am morge entschliesse mir: Hüt gäbä mirs üs nomau so richtig u gö ufe iheimisch Markt 😅
Gesagt getan u ja es isch eifach krass... wed hie zgang chunnsch de chunnsch überau zgang.... 😅 es laht sich eig nid i Wort la fasse... es ghuup es gmöög es stinkt es schmöckt mä wird a bättlet mä wird aquatschd, uf drnStrass ä seiltänzer, 7mio bäverschidnegi saaris zum choufe u gwürz soweit das Auge reicht... es het rikschas, chüe, kameu, hüng, velos, tuktuk, stoub, küdder u dräck... Aber mir heis irgendwie nomau gnosse u ine zoge oh wes eigendlech too much isch gsi u eigendlech oh nid schön - eifach interessant u mit dr richtige priise Humor mängisch eifach zum lache...
Indie isch es Land vo dä Superlative es het eifach vo auem sehr viu... sehr viu Outo sehr viu tucktuck sehr viu chüeu sehr viu küdder sehr viu stoub, sehr viu Armuet, sehr viu Richi, sehr viu feins Ässe sehr viu Melodie sehr viu Grüch sehr viu Farbe u va sehr viu wük seeehr viu Mönsche... mä muess nid uf Indie u zgfüeu ha i ga mi jtz da chli ga erhole... erhout ischmä nid - wüu es isch eig oh immer überau lut 😅 Aber mä chunnt hei mitemne Chopf vou nöie idrück u Erinnerige hei... villich steut zeinte oder angere sogar di eigeti Wäutsicht chli ufe Chopf... aber eig ischmä ja genau für das ungerwägs i settige Länder, a settige Plätz - zum überdänke vo eigete Vorstellige u oh widr lehre wi dankbar mä cha si für ds womä het u für das wo mä isch.Read more
TravelerIndie Ferie startä äuä geng irgendwie blöd 🙈😅
TravelerHei so schpannend u intressant gschribe-häbets schön ,witerhin u gueti Besserig ar Karin…😘
TravelerDir sit guet ungerwägs u parat für aui Abetüür! I fröie mi, chli mitzcho! 😊