Daintree Rainforest & Cape Tribulation

Nochere wiitere verrägnete Nacht esches denn am negste Morge zode Wasserfäll gange. Mer hed medem Auto sone Rondgang chönne fahre ond alli vo dene 10 verschednige Wasserfäll besechtige. S Wätter hätt zwar zom Glöck guet medgmacht ond mer send jeweils au fast die Einzige vor Ort gseh, aber so werkli spektakulär send die etzt au ned gseh wie mer eus das erhofft hend. So hemmer nochem Zwoite beschlosse, dass mer eusi Reis diräkt i Rägewald wiitermöched.

Guet 2h oberhalb vo Cairns hed eim denn en chlini Auto-Fähri i 5min diräkt i Daintree öberebrocht. Wow, chum acho hed mer sech werkli wie ine andere Wält gfühlt. S Klima esch bi fast 100% Loftfüechtigkeit sehr tropisch ond erdröckend gseh. Wo mer no hüfig a graue Fälder oder abebrönnte Wälder verbigfahre send, hed mer done wiit ond breit nor Grüen gseh - wie im tüüfste Jungle enne - NATUR-PUR. Gflasht vo dere idröckleche Omgäbig esches zo eusem Campground, ebeso zmitzt drinne gange. Osser med no 2 andere Campers semmer done praktisch elleige med de Tier ond de Natur gseh.

Leider heds denn gäge Obe zue weder afo seiche. Doch s Feeling med Räge im Rägewald esch demn doch no ergendwie geil gseh. Kaputt ond med vellne neue Idröck semmer denn aber schnell igschlofe.
Am negste Morge esches denn ufne Flossfahrt gange wo mer ghofft hend Krokodil zgseh. Einisch me heds so heftig afo rägne, dass mer osser emene chline Kroki nüd vor d Linse becho hend. Osserdem segs ide Sommer-Ziit sehr schwär Krokodil zgseh, wölls dene eh zheiss esch ond sie mehrheitlech onder Wasser, als a Land send. Trotzdem, wenigstens eis Grosses Ding wär uffregend gseh.
De Räst vom Tag hemmer no gnötzt om de Nationalpark wiiter zerkonde. Es ged velli härzigi Boardwalks zmitzt döre Rägewald döre. Eine defo hed eim zom Cape Tribulation gfüehrt, vo dete hed mer en tolli Ussecht ufe Ponkt wo de Rägewald ufs Great Barrier Reef trifft. Mer hend eus das aber ehrlichsgeid chli interessanter vorgstellt...me so chli en Touriattraktion.

Uf de Röckfahrt zo eusem Camping hemmer no en Zwöschestopp för en chorzi Abfröschig bimene Swimming Hole igleid. En tolle Spot wo mer zmitzt im Wald innere Rägequelle hed chönne bade. Ond chorz vor de Akonft esch eus doch glatt no en Cassowarie (so en lostige, farbige Struss) öber d Stross gsecklet.

Am letschte Tag esches no ufne halbtägigi Schnorchel-Tour im Great Barrier Reef gange. Nochere actionriiche Fahrt medem Speedboot semmer bereits i 25min im Reef dosse gseh. Je 1h a 2 verschednige Spots send ufem Programm gstande. S absolute Highlight send die riese Meeresschildkröt gseh wo diräkt näbe dier medgschwomme send. Sie hend öberhaupt kei Angst gha womet mer super Fotis hends chönne mache. Trotz allem, hemmer eus d Koralleme doch es bezzeli farbefroher vorgstellt. Hättet mer die Schildkröt ned gseh, währed mer doch glaubs scho chle enttüscht zroggange. Aber mer send uf jedefall froh hemmer die Tour gmacht, wöll wer weiss wie langs das bekannte Great Barrier Reef öberhaupt werd gäh?!

Am Obe esches denn as packe gange. Denn morn gämmer noch 28 Täg ond rond 4000 gfahreni Kilometer d Ostköste deruf euse Camper in Cairns zrogg. Onglaublech wie schnell die Ziit etzt glich döre esch. Gäge Schloss esches scho chle hektisch worde med de Ziit. Mer send entweder am Auto fahre, am ichaufe, choche, ässe oder am die negste Täg plane gseh. Glaube ei oder zwoi Woche me ond mer hättets chle gmüetlecher chönne agoh.
Nichts destos trotz hemmer i dere Ziit so vell tolli Sache erläbt wo eus no lang lang werd in Erennerig blibe.

Mer gniessed etzt no die letschti Nacht, bevors denn morn ide Nacht medem Flog noch Ayers Rock wiitergod. Dete erwartet eus denn en 4 tägigi Tour zmitzt im Outback, wo bestemmt weder sehr abentüürrich werd. Wenns nor scho mol chle weniger Räge ond me Sonne ged, semmer scho mol happy.

Gmäss Infos seged mer dete werkli abseits wo jeglecher Zivilisation - es chan also si, dass mer au kei Internet hend ond leider au kei Zwöschebricht chönd döregäh. Hoffe er chönd d Ziit glich chle döreschloh. Omso me chönder euch ja denn also uf en usfüehrlechere Review noch de Tour freue. :-)

Bis bald!Read more