entspannig 2.0

am dsischti morge früeh simer ufe bös für uf paquera z'glange. d reis het wider mau e chlini überraschig für üs parat gha. di ersti heufti het fei echli guet klappet, di zwöiti chli weniger: womer di letsti verbindig uf paquera hei wöue nä, hets gheisse, dä bus fahri im momänt nid. de hei mr haut e angeri verbindig gno, houptsach d’richtig stimmt. am nöie ort ahcho, si mr zimlech im gaggo gsi. di einzigi wyteri verbindig wär d fähri a di angeri chüschte gsi. glücklecherwys isch eine dunger parat gstange, wo üs e taxifahrt bis zum hotel ahbote het🚙.

di nächste zwöi nächt hei mr im hotel "vista las islas" verbracht (nomau merci viu mau mami u papi!💙) unds üs dert lah guet gah. d ussicht isch fantastisch gsi u ds wätter het am ahfang o super mitgmacht. usserdäm si mr i dr ahlag jenste tier begägnet: schlange, chröte, tuusigfüessler, geckos, schmätterlige, chatze und sogar affe. wüus sehr abgläge isch gsi u mir kes outo hei gha, hei mr üs entschlosse, dr ganz tag ir hotelaalag z'verbringe - läse, sünnele, bade und piña colada gniesse🦋.

ei aabe hei mr no e night-kayak-bioluminescence-tour dörfe mache. das tönt itz ganz abgfahre (und ischs effektiv ou gsi). dä ort in costa rica isch nämlech eine vo de einzige orte uf dr ganze wäut (abgseh vo de glüehwürmli) wo me ds phänomen vor biolumineszenz gseht. lut wikipedia wird drmit "die fähigkeit von lebewesen bezeichnet, selbst oder mit hilfe von symbionten licht zu erzeugen". praktisch heisst das, dass mir mitem kajak im dunkle i ds meer si usepaddlet und me bi jedere bewegig unger wasser ganz viu funklendi pünkt het gseh - es einzigartigs erläbnis💎.

am nächste tag isches mit der fähri id hafestadt puntarenas u vo dert us zrugg ids hochland, gneuer gseit uf alajuela (bim flughafe). itz startet nämlech d entdeckigstour vom östleche teu costa ricas mitem mietouto😇.

sara - 14.08.19もっと詳しく