Reset search
m i a m i & c o s t a r i c am i a m i & c o s t a r i c a
SatelliteEdit route
dür d‘grossstadt ab i dschungu! Read more
  • 20footprints
  • 3countries
  • 32days
  • 13photos
  • 17videos
  • 21.9kkilometers
  • 19.1kkilometers
Follow Calendar Share Bucket list
Date ascending
  • m i a m i & c o s t a r i c a

    ready, steady, go!

    July 30, 2019 in Switzerland ⋅ ⛅ 21 °C

    nach wuchelanger vorbereitig simer ändlech a dem punkt aacho, wome aus gepäck uf z‘bett usleit, nach farb sortiert u gfüäuht stunde nachem perfekte winku suecht für es foto z‘mache (u sech de schliesslech glich eifach für d’0815 aasicht vo obe entscheidet).🤦🏽‍♀️

    nei seich, um was es würklech geit, isch der fakt, dass mer no hüt aabe uf züri gö u morn em 13:20 abflüge - next stop: miami!🏙✈️

    d‘ruckseck si packt u mit 7kg gar nid so schwär fürne frou wo 4 wuche drus läbt - oder?☝🏻

    uf jedefau wärdet dir hie ufem loufende phautet was mir i üsne ferie so erläbe u tolls tüä!💙

    jael - 30.07.19    Read more

  • m i a m i & c o s t a r i c a
    1
    Day 1

    d'reis uuf miami

    July 31, 2019 in the United States ⋅ ⛅ 31 °C

    nach ere länge nacht simer uspfuuset z‘züri erwacht u vou parat gsi für e nöi tag!✨

    chum em flughafe aacho, isch aues rächt schneu gange u mir si de schlussändlech mit 40‘ verspätig doch no id luft cho.

    abgseh vo iigschlaafne füäss, unruhige ching u ere schier ändlose reis heimer di 11h flüge fei echli guet hinger nis bracht - das dank feinem ässe u guete fiume womer gluegt hei🍦. zudem si paar wc-pousene u churtzi spaziergäng dür d‘sitzgäng e wiukommnegi abwächslig für üser haub tote füdläbacke gsi.

    de z‘miami aacho simer zersch mau dürne grossi kontroue cho u hei üser fingerabdrück gfüäuht 10x ufnes sehr hygienisches grätli drückt🥴 (houz aalänge dasmer ni gad irgend e piuz ufgläse hei🤞🏻). zum glück heimer ke dräck em stäcke u si so ohni problem derdür. dr rucksack heimer o sofort gsattlet u si de bi mindistens 137° ussetemperatur ufemne bänkli em sunne ungergang entgäge ghöcklet☀️. nach erste startschwirigkeite mit „i wele bus iistige oder doch lieber z‘taxi?“ über „wie löstme es billet?“ zu „wo fahrt de dr bus überhoupt?“ heimers de fasch 3h nach landig ids air bnb gschafft🤩.

    dr wäg dört häre isch für zwe jungi froue aus angere aus lustig. wartet me ere bus station u es dunklet ii, versteitme, wiso eine aahautet u seit es sig gfährlech für üs um die ziit (u mir rede vo 8i em aabe) elei desume z‘loufe u er warni üüs witer z ga.😳 jedes outo wo eine oder mehreri manne dinn hocke, hupet, hautet aah, wot di mitnä oder streckt der rächt provokativ d‘zunge entgäge. u weni säge jedes, de meini o jedes outo - so dassde numeno bättisch dass dr bus gli chunt🙌🏻.

    a aui mamis u papis u lüt wosech süsch itz gad sorge mache... mir verzichte itz uf üsem trip uf witeri aabetoure elei. drum - ke angst, mir si ja itze sicher aacho💛. + au zwe sekunde ghörsch wi im fium dr polizeistreife ume husegge fahre - vo däm här si die emu sicher parat.

    itz simer mau e rundi müäd u fröie üüs nach ere duschi ungere z‘gah u morn usgschlafe i nöi tag z‘starte.

    jael - bi üs isch dr 31.07.19 - bi öich eue scho der 01.08 - trittst im morgenrooot daheer...🇨🇭    Read more

    See translation
  • m i a m i & c o s t a r i c a
    Day 2

    sech ir grossstadt z'rächt finde...

    August 1, 2019 in the United States ⋅ ☁️ 27 °C

    ou in miami brucht me - wie i jedere nöie stadt - viu zyt, bis me weiss "wie me sech z'verhaute het"🤷🏻‍♀️.

    üse erscht tag het scho viu spannends, aber ou useforderige und überraschige mit sech bracht: riisegi hochhüser, farbigi art déco promenade in miami beach, UBER taxis wo di innerhaub vo 10 sekunde chöme cho abhole, "churzi" (auso 4-stündigi) u heftigi rägegüss wo eim bis uf d ungerhose dürnesse, etc☔️. dä umstand het ou drzue gfüehrt, dass mir relativ gly nachem mittag mit de no gmachte ihchöif vo üsere miami-beach-tour si heigange und üs hei uf di nächschte täg vorbereitet.

    mir si uf jede fau gspannt, was no chunnt und was mr no wärde erläbe🎆.

    sara - 01.08.19    Read more

    See translation
  • m i a m i & c o s t a r i c a
    Day 3

    5 kilomètres à pied, sa üüse sa üüse...

    August 2, 2019 in the United States ⋅ ⛅ 28 °C

    ou hüt simer scho früä em moorge usem näst u direkt loos marschiert. erst stopp: calle ocho - little havana. es anders stadtviertu vo miami mit latinamerikanische iiflüss u bekannt für di vile farbige hüser u süschtige werk🎨.

    nach guet 5km loufe simer de ume im downtown miami glandet u heinis im öbbe einzige grüäne park unger paar paume nider gla🌴. wo de z’wätter plötzlech isch uu warm u tüppig worde simer wiiter ume ad miami beach gange u hei dört d‘füäss im meer badet. zwüsche luft u wassertemperatur isch chuum e ungerschid z‘gspüre u eifach nume herrlech😍. so wi z‘wätter hie tuet, isches de em nami dismau glücklecherwiis würk nume churtz cho schiffe u de simer o ume hei.

    kulinarisch isches hie leider ke höhepunkt u mir si was das aabelangt no ni wük fündig worde mit irgend emne feine ässe... momentan bewege mer üs zwüsche convenience food und vergammletem öpfuu🥫🍎. aber besser das aus nüt denke mer jede tag u si de doch froh we öbbis bruchbars im mage landet.

    süsch gitz vo hüt nümm so viu z‘verzeue ussert dasmer üs fei echli e sunnebrand hei iigfange u itz (19:10) scho kaputt im bett lige🙈.

    jael - 02.08.19    Read more

    See translation
  • m i a m i & c o s t a r i c a
    Day 4

    it was nice to meet you - miami!

    August 3, 2019 in the United States ⋅ 🌧 30 °C

    ersch no grad aacho, isch hüt scho üse letst tag in miami. rückblickend uf di 3 tolle täg gitz fougends derzue z‘säge:

    * miami: e metropole mit viune hochhüser🌆.

    * vom üsserste zipfu uf der miami beach insle het me e fantastische blick uf d‘skyline🔭.

    * es het e grossi viufaut a gebäudestile je nach viertu (modern, art déco, latinamerikanisch, streetart etc.)🏚.

    * ds stadtviertu wynwood isch üses persönleche highlight gsi🎨.

    * d‘luft ir stadt isch sehr dräckig u schwär, am meer aber eifach nume herrlech früsch🌬.

    * hie herrscht konstant ä enorm höche lärmpegu (flugi, outo...)🔈.

    * schlächte öv aber supper uber (taxi)🚕.

    * entweder triffsch u härzlechi oder sehr mürreschi iiwohner - git kes zwüschedrin🤝.

    * 90% rede hie spanisch, mit änglisch chunsch nid geng eso wit📙.

    * wätter: durchgehend chläbrigi huut, kombiniert mit entweder viu räge oder sunnebrand☀️.

    * bus, taxi & läde füähle sech aa wine chüeuhschrank (öppe 15° ungerschid zur ussetemperatur)🌡.

    * spontani hunde-rettigs-aktione (vom pierre, dä tubbu, wo zum fänster use gumpet isch) uf ere 19-spurige chrützig, mit aaschliessendem verkehrschaos ghöre hie zum lifestyle🐕.

    * spannendi begägnige mit freiläbende hüähner uf der strass oder leguane und schlange zmitzt ir stadt kenne mer vo europa ou nid🐓.

    * für zwe bächere glace oder drü schibli tomate mozzarella salat zautme doch gärn 15$...💰

    * a der houptpromenade isch d‘ufdringlechkeit vom servierpersonal scho bau unagnähm👨🏼‍🍳.

    * u augemein vom ässe müässe mer hie gar nid afa verzeue🥴🍔

    o wenn hie oder da paar useforderige ufnis gwartet hei, isch miami e einzigartegi u spannendi stadt✨.

    sara & jael - 03.08.19    Read more

    See translation
  • m i a m i & c o s t a r i c a
    1
    Day 7

    and i would walk 500 miles... key west!

    August 6, 2019 in the United States ⋅ ⛅ 25 °C

    zum glück nid ganz. erschtens: es si nume öppe 140 meile und zwöitens: mir si im luxus vomne wysse toyota gsi🚐.

    nach 4 täg ir grossstadt hei mir ds privileg gha, mitemne mietouto dörfe i tropisch süde bis a ungerscht punkt vom nordamerikanische festland uf key west abezdüse🗝.

    am erste tag si mr ds outo go hole (het aues super klappet u d jael het - trotz 19i - sogar ou dörfe fahre) und hei üs nach erste orientierigsschwirigkeite uf de 7-spurige outobahne vo miami relativ gly ufem dixie highway richtig "south" wiedergfunde. di guet vierstündigi outofahrt isch es wahrs erläbnis: me fahrt vo inseli zu inseli wo nid säute dür mords längi brügge verbunde sy - highlight hie isch uf au fäu d'seven mile bridge (ja, 7 meile ei strass umgäh vom töifblaue atlantik)🌊.

    nid fähle darf uf somne roadtrip natürlech di passendi musig. kreativ wi d jael isch, het si für optimali 360-grad soundqualität z'garantiere sogar schnäu us irne ungerhose (scho früschi, ke angscht) e hauterig bastlet. schibe abe, lut drzue singe und gniesse🎙!

    d insle ufem wäg nach key west si vorauem mit jeglechschte bunte hüser uf stelze (resorts und hotels) und palme usgstattet, aber ou schiudchrötli-spitäler und geckos am strasserand fingt me hie u da🐢🦎.

    am früeche nami hei mr de ändlech üses ziu erreicht. perfekts wätter, aber (wi geng) ou dört e brutali hitz. zimlech erschöpft u hungrig si mr uf d suechi nach öppis ässbarem gange u si imne härzige innehof vore italienische beiz fündig worde. Leider wird eim ou ds key west grosszügig (18%) trinkgäud verrächnet - henu, was me nid aues füre hungrige mage macht💸.

    früsch gstercht si mr dür das wahre kunstwärch vomne stedtli gloffe u hei natürlech o bi de touri-hotspots "mile-0" und "southernmost point" haut gmacht. zum dessert hets no e traditionelle key lemon pie gäh.

    dr abe hei mr i üsere super unterkunft verbracht und si ahgnähm vor tatsach, dass mr e balkon, e pool u e whirlpool hei, überrascht worde (me muess mängisch o glück ha)🛁.

    ds einzige problem isch du schlussändlech gsy, dass e härzegi euteri amerikanerin e drink spändiert het unds e regurächte ufstand vo syte barpersonal het gäh, wo isch uscho, dass d jael ja no nid 21i isch... aui ahwäsende gescht heis aber mit humor gnoh und trunke het si dr drink trotzdäm🍾🍸.

    am nächschte morge hei mr ds typisch amerikanische zmorgebuffet mit bagels, waffle und peanutbutter gnosse, bevor mr d rückreis ahträte hei🍽.

    ungerwägs hei mr dismau e lengere stopp amne schöne strand in marathon ihgleit und si schlussändlech am spetere nami wieder in miami ahcho. morn geits de ändlech wyter uf costa rica - mir fröie üs💚!!

    sara - 05.08.19    Read more

    See translation
  • m i a m i & c o s t a r i c a
    Day 8

    vamos a san josé!

    August 7, 2019 in Costa Rica ⋅ 🌧 19 °C

    nachere tolle wuche in florida isches für üs geschter am haubi 9i am morge mit dr american airlines ändlech wyter gange: MIA - SJO
    miteme shuttle si mr vom hotel relativ schnäu am flughafe gsi. mir hei je e fänschtersitz gha, zwöi reie hingerenang. dür das hei mr beidi e super sicht ufe wunderschön karibisch ozean gha und uf di räschtleche überflogene gebiet⛰.

    in san josé ahcho hei mr zersch grad chli e misserfolg gha, wüu mr wäg de stränge importgsetz au üsi "kostbare" frücht hei müesse furtschiesse🍏.

    wüu dr flughafe im benachbarte alajuela isch, hei mr vo dert us no es taxi gnoh. dr pablo het üs de zum hostel gfahre, wo mr d'zyt mit facetime überbrückt hei, bis mir am nami ids zimmer hei chönne. ou üses erschte costa-ricanische-zmittag hei mr für zäme 9$ (!) dörfe gniesse: e riiise portion ris mit bohne, hamburger-plätzli, chochbanane, zucchetti u salat - wahrhaftig e wiukommeni abwächslig zu florida, sowohl kulinarisch wie ou pryslech🥗.

    in costa rica si mr nomau zwöi stung hinger dr zyt in miami, darum hei mr üs a däm länge tag es namitagsschläfli gönnt. wüu d täg hie öppe vo 6i am morge bis 6i am abe göh, hei mr relativ gly üses znacht bsteut (pizza hawaii 🍍), mit de angere reisende ustuuscht und si de früeh go schlafe.

    am nächschte tag hei mr a dr "san josé free walking tour" teilgnoh. dr esteban, üse guide, isch sehr enthusiastisch gsi u het üs i 3h20min (!) viu über d gschicht vom land u di zueghörige orte verzeut. luschtigerwiis si mr i dr gruppe sehr viu schwyzer, dütschi und dütschsprächendi vom glyche hostel gsi. mir hei üs aui super verstande und drum när dr mittag bi - wi chönnts ou anders sy - arroz con frijoles (ris mit bohne) zäme verbracht. di guete gspräch hei üs uf d idee bracht, dass mr ou am abe zäme chönnte znacht ässe - säuberkocheti pasta mitere gmüessauce. so si mit emne tolle aabe viu spannendi gspräch entstande u nöii bekanntschafte knüpft worde💚!

    sara - 07.08.19    Read more

    See translation
  • m i a m i & c o s t a r i c a
    Day 9

    la fortuna mit tarzan & jane

    August 8, 2019 in Costa Rica ⋅ ⛅ 26 °C

    scho früä em morge simer uf, hei aus zämepackt, hurti z‘morge gässe u si de losgloffe für üse bus - richtig la fortuna - z‘sueche. dank der beschribig vo üsem hostel vatter heimer dä de recht schneu gfunde u nume knapp 5$ pro person für die mehrstündegi reis zaut. d‘fahrt isch wäg der wunderschöne natur womer hei dörfe betrachte schneu verbi gange. so simer de vier stund u e ghirnerschütterig spöter im hochland costa ricas direkt näbem vulkan arenal aacho🌋.

    üsi ungerkunft (air bnb) isch glücklecherwiis nume drü minute fuessmarsch vor bushatesteu entfernt gsi u somit are supper lag! o hie heimer e guete gmacht u für 35$ zäme für zwe nächt es ganzes appartment mit riise bett. wiso si das so günstig chöi aabiete latmer no paar frage la ufwärfe... villech lehre mer ja de ir nacht no paar mehrbeinegi mitbewohner kenne🕷.

    z‘klima isch ume plütter warm u me schwitzt o bim nüt due. aber dank paar spontane rägeduschine machts das ganze totau erträglech🌦.

    nachdem mer üs hurti iigrichtet hei simer uf empfählig vom air bnb vermieter zum ne flussbecki gloffe. dört heimer üs im wunderbar erfrüschende wasser abküählet u de lüt bim „amne seili itz wasser gumpe“ zuegluegt. wo de plötzlech o di 7 jährige stünggle ohni wenn u aber gringsvora us paar meter iche gumpet si, heimer de ono der muet gfunde u si wie tarzan u jane a üsere liane (mit oder ohni schrei) ab itz wasser💦.

    ufem heiwäg simer no go iichoufe u hei zu üsere fröid ändlech ume paar gueti frücht gfunde🍑.

    jael - 08.08.19    Read more

    See translation
  • m i a m i & c o s t a r i c a
    Day 10

    wandere düre dschungu am arenal

    August 9, 2019 in Costa Rica ⋅ ⛅ 25 °C

    hüt isch ds erchunde vom gebiet rund ume aktiv "volcano arenal" im zentrum gstande.

    mir si am morge bi zyte los, hei dr bös gnoh, u üs bir ahkunft füre "parque ecologico" entschide. nid ganz üsne erwartige entsprächend, wie dass de sone naturpark usgseht, si mr schlussändlech vier stung im dschungu ufe und abe glüffe - graduus ischs nume säute gange🍃.

    ou bezüglech arteviufaut si mr chli enttüscht worde. u glych hei mr sehr viu dörfe gseh, z’highlight isch aber sicher d’begägnig mit de tukane, wo mr i de boumchrone hei dörfe bestuune🌳.

    drufab hei mr no e abstächer zu de hot springs gmacht (öppe 35 grad warms wasser!) und si när nachem mittag sehr erschöpft uf la fortuna zrugg. trotzdäm hets guet tah, sech nach langer zyt körperlech wieder mau usezfordere🤸🏽‍♀️.

    dr nami hei mr gmüetlech mit lädele und glacé ässe im stedtli verbracht🍨.

    sara - 09.08.19    Read more

    See translation
  • m i a m i & c o s t a r i c a
    Day 11

    monteverde - up in the hills!

    August 10, 2019 in Costa Rica ⋅ ☁️ 17 °C

    üse gestrig tag chönnt me churz aus power-tag mit wenig power zämefasse: mir hei sehr viu ungernoh, aber eigentlech überhoupt nid möge wüu mr beidi e vercheutig ufgläse hei (mini hypothese: klimaahlag i de bösse, jael ihri: malaria u ebola zäme)🤒.

    d churzversion vo üsne statione wär fougendi:

    - jeep-boat-jeep vo la fortuna übere arenal-see nach monteverde
    - in monteverde: zip-line adventure park und am abe no e night-tour düre rägewaud uf dr suechi nach de nachtaktive tier

    und für die usduurendere no chli e usfüehrlechi, persönlechi version😊.

    ds ziu vo däm tag isch gsi, vo la fortuna wyter nach monteverde zcho. üse airbnb gastgäber het üs e sognannti jeep-boat-jeep tour ermüglechet, wode zersch mitem outo ungerwägs bisch u när uf ds boot umstigsch u dr letscht bitz nomau mitem outo machsch. d tour isch okay gsi, aber wägem rägnerische wätter het me leider nid viu gseh vor landschaft rund ume see. ou dr vulkan, wo sech am erschte tag so schön präsentiert het, isch vo de wulche umhüut blibe. amüsant isch när aber dr letscht abschnitt gsi: mir si über steili "strasse" (eher schottrigi wanderwägli) bis ids i de bärge ligende monteverde gfahre. d fahrt vo san josé uf la fortuna isch da drgäge grad es nasewasser gsi! u glych si mr guet ahcho u hei einisch meh d hiufsbereitschaft vo de ticos (iheimischi) dörfe erläbe:

    di ersti situation isch gsi, dass mir wiedermau ke gnaui adresse vo üsem airbnb hei gha. in costa rica hei si nämlech kener husnummere u mir hei nume d information "everyone knows miguel, so just ask the taxidriver" gha. da het dr fahrer vom jeep churzentschlosse üsem gastgäber ahglüte u üs diräkt vorem huus abglade🚌.

    di zwöiti situation isch gsi, dass d bütelisuppe, wo mir bi üsne hosts hei wöue choche, wortwörtlech "ids wasser gheit" isch. da het d maria (airbnb-mama) gseit: "hacemos una sopa en familia" - "chumm, mir mache itz zäme e familiesuppe". das isch üs i üsem chränkleche zuestand natürlech sehr entgäge cho. währenddesse het dr miguel (airbnb-papa) aui toure für üse churz ufenthaut in monteverde organisiert - eifach dr hammer✨.

    wo mr mitem ässe und em brichte (uf spanisch - irgendwie geits, wenns muess) mit dr familie si fertig gsi, hei mr di ersti tour in ahgriff gnoh: 100% aventura!

    monteverde isch bekannt für sini seilpärk höch im und überem dschungu - das hei mr üs nid wöue la entgah. mir hei öppe 9 statione gha und si uf jedere plattform super fründlech "abgfertiget" worde. d highlights si när di letschte 3 statione gsi:

    zwöi mau si mr ligend à la "superman" über d wäuder gfloge u hei fantastischi sicht gnosse! di letschti station het sech "tarzan swing" gnennt und glicht am ahfang amne bungee-jump, aber me schwingt när wiene pänduuhr hin u här - am ahfang het me wük zgfüu, so itz ischs fertig. ds gfüu när isch drfür umso schöner gsi😍!

    zytlech si mr gad perfekt pünktlech fertig worde, so dass mr am 6i am abe üsi night watching tour hei chönne starte. usgrüschtet mit rägepellerine, föteler u taschelampe si mr miteme füehrer düre dunku waud glüffe, uf dr suechi nach nachtaktive tier. d tour isch sehr ihdrücklech gsi! mir hei salamander, skorpione, tarantle(🥴), schmätterlige und ds heiss ersehnte fuutier gseh!

    todmüed deheim ahcho, het üs d maria no e warmi schoggi gmacht und mir hei de schön ufgwermt chönne go pfuuse🔥.

    sara - 11.08.19    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English