¡pura vida!

das wird itz natürlech e useforderig, ar spannig vo üsem gspässige reisli chönne ahzchnüpfe. aber mir wei öich ja o nid no meh potenzielle härzinfarkte ussetze u brichte drum vo üsne zwöi wunderbare täg in cahuita. ☀

bevor mir vo cartago hei chönne losfahre, hei mr no dr chare müesse tuusche. grundsätzlech ischs guet gange; dr europcar-typ isch für schwyzer zytverhäutnis leider ender spät cho u mir hei no chli es gliir gha wägem bänzin. item, am 11i hei mr chönne losfahre! 🚖

d strasse si dismau gott sei dank super gsi u mir hei abgseh vom erste bitz zügig chönne fahre. entlang dä wytreichende kafiplantage im hochland abe zu de schiffcontainer u de paumestränd a dr karibikküste si mr nachere vierstündige fahrt im sunnige cahuita ahcho. ds dörfli isch sehr härzig u erinneret i auem starch ad karibik (i bi zwar no nie dert gsi, steue mirs aber so vor 💭).

am nächschte tag hei mir dr nationaupark vo cahuita besichtiget. begägnet si mir entlang vom schöne strandwäg waschbäre, äffli mit babyäffli ufem rügge und natürlech üsem fründ, em fuutier - dismau hei mr das gmüetswäse us nöchschter distanz dörfe bestuune. grad vo dert us hei mr e schnorchutuur im warme atlantik ahghänkt. di farbige fische, oktopusse und rochene z'gseh isch e wahri fröid gsi!🐠

am nami hei mr dr heimleche partystadt vor karibikküste costa ricas, nämlech puerto viejo, e bsuech abgstattet. dä titu het si zu rächt verdient. das chlyne dörfli isch prägt vo reggae-musig und angere afroamerikanische ihflüss. wo mr de plötzlech ine haube karneval-umzug ineglüffe si, hei mr d vibes so richtig ahfah gspüre - don't worry, be happy! (oder pura vida, wie di iheimische würde säge). 🏝

mir si dankbar, nach dene strapazierende täg hie dörfe z'ruhie u z'gniesse. morn geits leider scho a di letschti station vo üsere reis - tortuguero! 🐢

sara - 24.08.19Читать далее