we're coming home!

u scho het üses aabetür es ändi gno u mir si vo tortuguero uf alajuela zrüg greist.

em tag druf simer früä uuf, hei aus packt u hei üsi schuufle unuffäuig im garage vo üsne gastgäber plaziert. da mir unagnähme frage wi "wiso um himuswiue heit dir e schufle derbi?" oder "was heiter mit dere gmacht?" hei chönne usem wäg ga, isch üs z'unuffäuige häresteue oder nenne mers nid persönlechs schänke aus di besti lösig iigfaue. ni dass no missverständnis ufchöme umer wäg verdacht uf mord u vergrabe vor liiche no id chiste chöme⚰️.

wiiter simer de zum flughafe u hei der erst flug ni näbnang verbracht. das heimer aber für di 3h gad knapp verchraftet👌🏻.

guet glunet simer de zum aaschlussflug u aus het sowit klappet - bis d'mäudig isch cho: your flight has 2 hours delay. so hets de gheisse, kaputze uche, u em bode fängs chli voorpfuuse. hani schomau gseit: schlimmer geht immer? dem sprichwörtli heimer o dises mau ume chönne vertroue u zwar isch üse flug usgfaue u mir hei d'info becho - me weis ni wie u wenn mer hei chöme. ou wenns üs brutau aagschisse het, muesme säge, dass d'swiss (abgseh vom flüge) e guete job gmacht het u sofort wägem gepäck u ere ungerkunft gluegt het 🏨.

mir si ines sehr nobus hotel bracht worde u hei pro person es riiise bequems doppubett becho. zudem heimer no essensguetschiine gha u si rundum versorgt worde. em aabe isch de d'mäudig cho, dasmer ersch em späte friti chöi über orlando flüge u de em samsti morge em 11i z'züri achöme 💬.

so heimer di zwe täg em hotelpool verbracht oder si fürs guete gwüsse mit de pijama hose (wöu aus süsch ir wösch isch gsi) chli ids fitness 💪🏻.

so isch de dr friti cho u mir hei em flughafe nomau es riise knortz gha, wöusech irgendwie kene wük verantwortlech für üses checkin gfüäuht het. vor luter umbueche heisi es gnuusch mit de flugnummere gmacht u ner heimer das puff dörfe usbade idem mer 5x dr ganz (!) flughafe uche u ache gseklet si - immer mit de nöiste infos vo airline zu airline ✈️ (git ds miami ja zum glück keni telefon oder so...)

irgendwenn heimer de schweissbadet chönne abflüge uf orlando u vo dört us witers uf züri! glücklecherwiis het üs dr hurricane gad verfäuht u zieht ersch di nächste täg über florida🌪.

mir si guet dahei aacho u hei üs uf z'widersehe mit üsere familie & fründe fest gfröit.

a dere steu möchte mer ono öich aune merci säge für z'mitverfouge vo üsem reisli u au dene liebe kommentär!💗

jael - 31.08.19Read more