19. Tag in Brighton 29.6.16

Hüt isch eine vo de gruusigschte Däg gsi. Es het dr ganz Dag in ströme gschifft und es het di fascht drvo blose, wenn de usem Bus usgstige bisch :/ Dr Schirm isch sogar kaputt gange vo däm Wind :/ Ich ha mit em Oskar u d dr Abby gredet und die hänn gsait, dass das Wätter nid normal sig füre Juni... ganz geil :/ Mir blibe optimistisch und hoffe uf d Sunne :) Hüt isch sone guete Dag gsi zum in dr Schuel z hogge. Mini Lehrer wärde vo Dag zu Dag besser :) Hüt hänn mr am Nommidag e Ushilf ka und dä isch hammer gsi. Dä het David gheisse umd dä het e sone abartig tiefi Stimm ka :) Es sinn drei gueti Stunde gsi 👍 S z' Nacht isch wie immer guet, aber ohni Salz gsi :)
Ou das hätti fascht vergässe z verzelle... Gescht hänn mr e kleini,pinligi Nachtaktion ka... Gescht zobe hanni e riise Falter in mim Zimmer ka(ihr kennet mi mit so Viicher) Dä Falter isch diräkt uf mi zue gfloge, do binni ufgsprunge und usem Zimmer gsegglet. Immer wenni wider e Schrit ins Zimmer gmacht ha, het sich das schiss Viich wider bewegt! Denn hanni mr überleggt, wasi könnt mache und denn isch mr die super Idee ko, dass ich s Liecht im Zimmer könnt abmache, damit dr Falter vom Liecht im Gang azoge wird. Do isch s nägschte Problem ko.. Ich has Nachttischliecht aa ka und das isch uf dr andere Site vom Ruum, wo leider dr Falter ghoggt isch, sodass ich das Liecht nid ha könne abmache. Denn sinn d Italie Girls usem Zimmer ko und hänn mir versuecht z hälfe dä Falter us mim Zimmer z beko, irgendwenn hänn mr en eif nümm gfunde und denn isch s Drama erschträcht losgange... Mir hänn dä wie die blöde gsuech und hänn en erscht nachdäm mr sinn go Zehnputze wider gfunde. Denn hänn mr beschlosse d Abby z wecke. Die hets glaub nid so toll gfunde, aber si isch uns denn ko hälfe und het dä Falter ganz liebevoll entfärnt, wo si ins Bett het welle hann ich e zweite Falter in mim Zimmer entdeckt, wo si denn, nachdäm mr au dä wider hänn miesse sueche, use do het. D Abby isch denn go schlofe und denn het d Martina afo Drama wäggem Gwitter mache wo dusse gherrscht het. Es het abartig gstürmt, Strosselampe hänn bedrohlig gwacklet und me het könne wit dusse ufem Meer eme Schiff zueluege wies über d Wälle spiggt, denn hänn mr si no miesse beruhige, bevor mr denn ändlig hänn könne go schlofe.
Umd das isch e guets Stichwort, ich gang nämmlig jetzt denn au go schlofe, guet nacht :)Read more