Reset search
The Boys in Croatia
  • Chrigl
  • Didier Amaudruz
  • Simon Ballat
  • Lukas Imhof
  • Jonas Arnold

The Boys in Croatia

5 feschi Jungselle im Van ufere chaotische Rundfahrt dur Istrie, de Insle Cres & Krk und vo Zadar wieder zrugg uf Zagreb. Zabavi se! Read more
FollowInsightsCalendarShareShareBucket list
Newest first
  • Trip start
    April 27, 2024
    The Boys in Croatia

    Und es gad wieder looos!

    April 27, 2024 in France ⋅ ⛅ 13 °C

    Die vier hübsche, junge und flotte Junggselle us Irland hend Unterstützig vom ne wiitere Landammaa becho.
    Jetzt also z 5te mached sie sich ufe Weg is Flugzüg, wo denn aschliessend uf Zagreb flatteret. Doch bereits de Guinness-haltigi weg zum Flughafe Basel erwiist sich als usefordernd, zerchenne am Chrigl miteme ganz mieserable Nüsaafall…

    Obs die 5 Jungs tatsächlich bis uf Kroatie schaffed? Mier werdits gseh...    Read more

    See translation
  • The Boys in Croatia

    Motovun das Trüffelparadies

    April 27, 2024 in Croatia ⋅ ☁️ 10 °C

    Nach üsere gediegene Landig im Land der Kroaten hend mir es treus Vehikel gfunde und das uf de Name Plötze tauft.
    Da simmer also, d Plötze und füf potänti Männer, gstrandet imene völlig fremde Land und ufem Weg richtig Istrie. Natürlich isch öppis vom Wichtigste s Striich- und Blasinstrumental verstärchti Rundum-Soundgerät uuszteste. Breitgfächereti Uswahl hemmer da troffe, vo bekannte Flöte-Bass-Mischige, bishin zu Präriesongs hets alles gäh. So sind mir durch das fremde Land duregrössled, hend de grossi Teich gseh, Schnee und interessanti Schnellstrasse-Ampel-Krüzigssystem. Nach knapp 3h Fahrt simmer denn in Motovun acho, emene idyllische, mittelalterliche Dörfli ufeme Hügel, wo als Trüffelparadies bekannt isch. Da hets denn au genüsslich Speis und Trank gäh, letzteres sogar so guet, dass es denn plötzlich a gwüssne Lüt d Fontanelle vom Kopf blase het…
    Vollgfresse und bereit für die nächschte Schritt meldet sich jetzt die 5 Muskeltier und d Plötze für hüt ab.    Read more

    See translation
  • The Boys in Croatia

    E wiitere Hügel in Sicht!

    April 28, 2024 in Croatia ⋅ ☁️ 17 °C

    S hütige Abentüür het üs nach Grožnjan gfüehrt, emene chliine Dörfli ufeme Hügel.. mal wieder.
    Hie hemmer wie die waschechte Touris Föteli gmacht, sind dur d Altstadt gwatschlet und hend es gediegens Kaffee und O-Saft imene härzigä Bistro trunke.
    Drufab sind mier wieder id Plötze iigstiege und hend üsi Fahrt fortgsetzt. Nach 5 Minute het de Fahrer aber en Vollbrems gmacht und anere Klippe zueche gschwind es Wendemanöver duregfüehrt, us Sicherheits- und üebigstechnische Gründ, sicher nid, will mir falsch gfahre sind…    Read more

    See translation
  • The Boys in Croatia

    Küstestädt, Jetski und Poolboys

    April 28, 2024 in Croatia ⋅ ☁️ 16 °C

    Nachdem mir d Richtig denn wieder gfunde hend, isches wiiter nach Novigrad, emene härzige Küstestädtli, wos es usgwognigs Zmittag gäh het, bimene Chellner wo z'Affoltere am Albis Schwiizerdütsch gleert hed. Nachem Zmittag hets denn en Schnaps ufs Huus gäh wo mir em Restaurant und sinere treue Gfolgschaft grosszügig mit güldenen Dublonen entlohnt hend. Spöter sind mir chli ade Küste entlanggschlenderet, hend wiiter Memorie i üsem Knips-Bum-Bild Apparat ufgnoh und sind zrugg zu üsem Vehikel.
    Hüa, Plötze, uf zu üsem nächschte Örtli uf üsere Lischte, nämlich Poreč.
    Ded hemmer öppis faszinierends und sehr intellektuell fordernds für mediterrani Städt gseh: en Parkplatz mit Bedachig, damits eim ned immer grad de Schinke vom Arsch brated, wenn mer zrugg is Auto chunnd…
    Uf jede Fall hemmer det es Jetski-Renne bstuunt und drüber diskutiert, wieviel Rössli und wieviel Zylinderli i somene Ding verbuut sind. Stellt sich use, nach inniger Usenandersetzig, so eis het 320 Pferdestärke und en 4-Zylinder Motor. Die warmi Brise het üs denn d Entscheidig über es Gelato sehr eifach gmacht, nur de Priis het üs verwunderet, für 2 Kugle het mer 4€ zahlt, für 3 Kugle 6€, aber Portionsmässig hets fascht gliich viel gäh…? Denn hend mir üs aber au wieder ufe Heiweg gmacht zum am letzte Tag i üsere Residenz no de Pool z teste und chli z sünnele. Mier meldet üs für hüt ab. Danke fürs Lese und bis Bald. Üchi füf Ferie-Globis.    Read more

    See translation
  • The Boys in Croatia

    Pula, Prematura und Whirlpool(a)

    April 29, 2024 in Croatia ⋅ 🌙 14 °C

    Bibibibibip. De Wecker schellet. 8i am Morge in Motovun. S Früehstück wird zuebereited, Kaiserschmarrn, Brot und Cornflakes gits hüt. Nachem Abwasch simmer id Plötze ghöcklet und ab in Süde vo Istrie nach Prematura kesslet. Det hemmer de wunderschöni Usblick ufs Meer gnosse und sind zum Zmittag ines versteckts Dschungel-Camp-Bistro go Gyros, Cevapcici und Chäs-Sandwich fuetere. Das Zmittag hemmer brucht, will mir denn ca. 2h nacheme Plätzli für zum go Bädele gsuecht hend, und eifach ned fündig worde sind, sigs wäge Seeigel oder z gföhrliche Klippe… defür hets es paar gueti Seichföteli gäh.
    Aschlüssend simmer uf Pula gschosse und det chli go umeschuene. Imene Café hemmr en „Kaffee-über-Rucksack“ Erfahrig gmacht… jaa, denn hets halt chli weniger Trinkgeld gäh. Vo det uus simmer wiiter ufnes Fort wo stolz ufemne Hügel trohnt hed.
    Nach Pula simmer denn direkt zu üsere nächschte Ferieresidenz in Kanfanar und hend üs dete en selbergmachti Pizza einverleibt. Erschöpft vo dem Tag simmer spöter in Whirlpool ineghöcklet und hend de wohlverdienti Met trunke. Wie in Irland. Miteme Met us Irland wo mir extra es Jahr lang ufbewahrt und mitgno hend.
    Soo, das ischer gsii de Mäntig. Einigi würed ez säge, see you later älligator, mir seged: Ade merci, bis morn!    Read more

    See translation
  • The Boys in Croatia

    Eroberig vo de Insle Cres

    April 30, 2024 in Croatia ⋅ ☀️ 20 °C

    Umzzumzzumzz ertönts us de chuchi am 8i am morge. Da sind wohl zwei früehi Reisevögel mit luuter EDM Musig am Pancakes vorbereite. Nach em gmüetliche Zmorge ufem Balkon gahts au scho los mit de wilde Fahrt. S hütige Ziel isch d Insel Cres. Damit mier bi de Überquerig vom Meer nid undergönd hend mier üs es riesigs Floss mit Motor zur Überfahrt gsicheret.

    Uf Cres acho, hemmer nach ere staubige Fahrt uf sehr enge Strasse Lubenice am Mittag erreicht, emene Mini-Dörfli, mitten im Nirgendwo. Det hemmer graschtet, es paar schöni Föteli gschosse und es vorzüglichs Chäs-Sandwich gnosse (Nicht. Die 35 Chlatte währed sogar im Puff besser ufghobe gsii).
    Später hemmer in Osor no en chlini Kaffi-Pause igleid. De Kaffepriis hed üs alli hert troffe. So hemmer für 5 Espressi läppischi 6.5 Euro zahlt. Das het üses Tagesbudget wieder grettet :)    Read more

    See translation
  • The Boys in Croatia

    Steinige Abstieg zum Meer

    April 30, 2024 in Croatia ⋅ ☁️ 18 °C

    Nach de Kaffepause in Osor hemmer üses wunderschöne AirBnB bezoge. Zersch simmer üs nid sicher gsi ob mier wirklich richtig sind, denn so en Luxusbude hemmer für 170 Euro nid erwartet. Doch tatsächlich, die allesamt mit Steibode und Steiwänd uskleidete zwei Badzimmer, zwei Schlafzimmer und wundschöni Chuchi sind in der Tat üsi nächtlichi Behuusig.

    Doch lang hemmers nid gnosse, denn mier hend no en Mission gha: Bade im Meer. Ufem üsserschte Zipfel vo de Insle hend die gfindige Google Maps Benutzer en chlini Bucht zum Bädele gfunde. Doch die Erfahrig söll hert erarbeitet si. So hend mier mit üsne Sneaker en steinige Wanderweg as Meer abe bezwunge was sich aber für die Bilderbuech-Bucht glohnt hed. Leider het de Meeresbode au hiä schwarzi stacheligi Meeresgenosse beherbergt und so hemmer müsse mit gröschter Vorsicht is Gewässer stige zum üs abchüehle. Nachdem mer denn de steinig Wanderweg bergufwärts wieder gmeischtered hend (schweissgebadet) hemmer üs die feini Pizza im Hafe vo Mali Lošinj redlich verdient.

    Im spaate Abigsdunkel simmer zrugg zude Underkunft gritte, hend üs en Schlummertrunk genehmigt und so het de herrlichi Tag es Endi gfunde. Wies witergaht erfahred mier und ier morn, danke fürs lese :)    Read more

    See translation
  • The Boys in Croatia
    2

    Baška, Malinska und... Oh Kurwa?!

    May 1, 2024 in Croatia ⋅ ☁️ 20 °C

    De sunnigi Morge hend mier bim ne richhaltige Zmorge uf de Terrasse vo üsere Prachtshütte gnosse. Mega leckeri Pancakes ghöred scho fascht zur Tagesordnig. Kurz vor de 10ne hend mier denn d Plötze gsattlet und hend welle losfahre, da chund eim dsinn, dass mier no Vorrät hend im Küehlschrank…
    Vollständig simmer nachere Stund Fahrt bi de nächschte Floss-Fähri gsi. Die het üs denn fründlicherwis uf d Insle Krk überegschifft. Denn simmer einisch die ganz Insle bis i Süde abekesslet uf Baška, wo mier fascht alli es Zmittag gnosse hend. Öper vo üs hed s Zmittag nur gässe, weniger gnosse... (Reminder @Jonas: Du hesch nid gern Gorgonzola, muesch es au nümme probiere in Zuekunft).
    In grosser Vorfreud uf üsi hütigi Übernachtigsmöglichkeit sind mier früehzitig richtig Malinska gfahre, hend no es Glace schnabuliert und sind denn au scho izoge id "Villa Ana". Leider het üs die nid ganz so überzügt wie die bisherige Nächtigungs-Ort. Alles schmökt hervorragend nach Hund und es paar chläbrigi Schubladegriff hend de Ufenthalt trüebt. Hie würdi mer dere Underkunft au „Kurwa“ sege, aber besser nehmed ihr das Wörtli ned i Wortschatz uuf… wie au immer, Guet Nacht :)    Read more

    See translation
  • The Boys in Croatia

    Ab zude Dalmatiner

    May 2, 2024 in Croatia ⋅ ☀️ 18 °C

    Nach enere Nacht im Ned-so-Dufte-Apartment, hemmer üsi siebe Sache packt und sind uf direktem Weg ines Restaurant go es richtigs Schmackofatz-Zmorge schnabuliere.
    Nachher simmer wiiter uf Senj gfahre, hend dete d Altstadt abklapperet, mal wieder für 6 Euro Espressi gsoffe und sind es stolzes Fort go aagüggsle. S spezielle dadraa, d Stadt het no alti Verteidigungsruine ghaa, s Fort isch aber en halbe Kilometer usserhalb vode Stadt gsii.

    Vo Senj und sim Fort heds üs nach Sveti Juraj gfüehrt, womer lecker Zmittag gspiese hend und mit Stei im Meer am bobbere gsii sind. D Lüt hend üs sicher für jungi Spinncheibe ghalte, aber mir hend de Gspass ghaa und das isch ja s Wichtigscht! Usserdem währeds ja gar ned so wiit vode Realität entfernt gsii... hehe    Read more

    See translation
  • The Boys in Croatia

    Coast-Road, Maslenica-Bridge und Zadar

    May 2, 2024 in Croatia ⋅ ☁️ 17 °C

    Mit volle Fleisch- & Fischplatte-Büch simmer wiiter de Süde go unsicher mache. Mit luutstarker Musig und viel Enthusiasmus hemmer die kurvig Küstestrass bändigt. Die Strass isch nüt für schwachi Mäge chönnd mir üch säge. Ufe, abe, links und rechts isch nur de Aafang. Mit Vollgas überholt us ide gröbschte Kurve ohni Vorussicht de no en Car - mier hoffed das ded kei Lüt dinne ghocked sind.
    Bide rote Brugg vor Zadar hemmr es Päuseli gmacht und chli gseicht hets auno, mier unne, de Himmel obe. Am Abig simmer denn i üsem Kabäuschen acho, wo nach de gestrige Wohnig eifach nur de Hammer isch. Und demit e schöne Hinicht! Bis morn! ;)    Read more

    See translation
  • The Boys in Croatia

    Touris-Falle Nationalpark

    May 3, 2024 in Croatia ⋅ ☁️ 16 °C

    Friitig-Morge: Pancakes, Cornflakes, Brot und Banane sind bereit. Hüt müend mir gstärkt usem Huus gah. Mir gönd nämlich anes Örtli wo viel Nerve brucht.
    Nach einere Stund Fahrziit vo Zadar simmer denn au im Nationalpark Krka acho, bzw. amene Vorörtli ufem Parkplatz wo 8 Bucks kostet het. Z Fuess und mit Trekkingschueh bewaffnet simmer dur s Dörfli gloffe und zum Schalter vom Krka Park gange. Det het mer üüs wiiteri 20 Chlöte pro Person us de Täsche gfischet und het üs denn gseid, mir müessted jetzt uf die ander Strassesiite und denn ines Bötli iistige.
    Gesagt getan und nach ca. 15 minütiger Warteziit isch denn s Bötli au lostuckerlet. Mir hend üs da richtig komisch gfühlt, es sind nämlich mal ned mier die komische Vögel gsii sondern de Rest uf dem Bötli…
    Nach 20 Minute fahre simmer denn im „offizielle“ Park gsii und hend üs det zerschmal öppis z Esse gegönnt. Wies so isch i dene Touriste-Attraktions(-falle), alles isch übertüüret, s Esse isch durchschnittlich und es het z viel (beschränkti) Lüt. Mir hend üsi Nerve da ufd Prob gstellt, aber mir müend sege de Park isch scho sehr schön gsii. Es het en Rundgang gäh und ufem Rückweg hemmer üs dezue entschiede, zrugg z wandere, anstatt midem Schiffli zfahre. Nachdem mir retour gloffe sind, hemmer en Steistrand als Belohnig und en Abküehlig für d Füess ghaa.
    Ziitlich simmer scho nach de 15:00 gsii also hemmer üs dezue entschiede, no churz is nöchglegne Städtli Šibenik z fahre und dete de Namittag usklinge z lah. Es Spaziergängli dur d Altstadt, geili Burger und es Glace hemmer da reingeorgelt und hend üs denn uf d Heifahrt gwagt.
    Bsunders erwähnenswert vo hüt: Mir hend ca. 20‘000 Schritt gmacht (chunnt uf d Beilängi drufah). Und demit wünsched mir üch en schöne Abig und bis morn. Wanderglobis, over and out.    Read more

    See translation
  • The Boys in Croatia

    Ziitreis im Aerodrom Željava

    May 4, 2024 in Croatia ⋅ ⛅ 17 °C

    Früehstück, ufstah & et cetera ersparemer üch mal. Mier fahrid los und es stinkt... s'Flüssigbrot zeigt wirkig. Uf de Country Roads simmer mit em Major Conspiracy zunere verlassne Flugzügkaverne unterwegs. Im Grenzgebiet zu Bosnie chnurred üs us dunkle Kavernetor seltsami Grüsch entgege. Mier füf Gwundernase irred im usghöhlte Berg umher und entdecked kristallisierte Stoff - isch das ächt gsund? Doktor GuuGuu seid üs im aschluss, dass mier im kontaminierte Bereich umenandgstürchled sind - au z'erwähne sig, dass s Land vorem Igang vermiint isch. Eis Glück sind mier nid diä erschte i dem "Lost Place" und fahred mitere Gschichtsstund schlauer zude Unterkunft wo üs de Dejan im Töff- & Tourireise-Restaurant scho erwarted.Read more

    See translation
  • The Boys in Croatia

    Frisches, klares Süsswasser

    May 5, 2024 in Croatia ⋅ ☀️ 18 °C

    Nach de rustikale Hütte-Übernachtig wo sich Fuchs & Haas guet Nacht seged, heds üs i d’Welt vode iisblaue, klaare Teich und dichte Menscheschlange zude Plitvicer Seeä gfüehrt. Am liebschte wäred mier direkt, i diä zum Bade amächelige Seeli, ineghüpft, aber das wär em internationale Publikum und de Flora & Fauna rundume nid eso genehm gsi. Brav sind mier de Holzstegweg gfolged bis mier am Endi vom Pfad midem Unimog-Bus zum Parkplatz zruggtuckered sind. Wiiter gads is schnusige Dörfli Rastoke womer inere Restaurant-Grotte Pizza schnaused und aschlüssend es paar Akrobate bestuuned, wo in farbige Tüecher undere Brügg umetänzled. Nach intensive Roseduft-Inhalatione und Mami-Whatsapp-Profilbilder gad üsi Reis im strahlende Namitagswetter wiiter...langsam em Endi entgege.Read more

    See translation
  • The Boys in Croatia

    Usklinge in Zagreb

    May 5, 2024 in Croatia ⋅ ⛅ 24 °C

    Immer dichter wird de Verchehr wo mier id Hauptstadt inefahred. Schnell hend mier e Parkplatz neb üsere letschte Unterkunft gfunde und hend üsi Inspektion gstarted. Nachdem mier üsi Better und Dechene i dem Kabäuschen "entdeckt" hend, ischs nacheme einigermasse churze Päuseli is Stadtinnere Sightseeing go betriebe. De Stadtfüehrer Jonasž füehrt üs dur d'Gässli hii bis zu de Musig. Es stellt sich use, dasses au hiä luutstarchi Ire gid, mitme grosse Appetit ufs schwarze Flüssiggold. Nachme churze Blick über Zagreb und enere Abigsverpflegig gads zrugg i üsi Raubtierhöhli. Mer lönd de letschti Abig ide eigne vier Wänd usklinge und bereitet üs für de morgig Wulcheflug vor.Read more

    See translation
  • The Boys in Croatia

    Doviđenja i Hvala!

    May 6, 2024 in Croatia ⋅ ☁️ 23 °C

    Da simmer wieder, wo d Reis gstartet het, hört sie au wieder uuf. Mir sind alli truurig, sind üsi Ferie da scho z‘End, aber es freued sich au wieder alli uf ihres eiget Bett.
    Jede vo üs het es Bild vo Kroatie im Kopf ghaa, keis vo dene het sich als richtig usegstellt. Kroatie isch es facetteriichs Land und mir hend sehr viel Iidrück gsammlet, wie ihr sicher au ade Text und de Bilder gseh hend.
    Danke üch fürs Lese, mir hoffed ihr hend soviel Spass bim lese, wie mir bim schriebe ghaa und möcheds guet.
    The Boys in Croatia, over, out, Sendeschluss.    Read more

    See translation
  • The Boys in Croatia

    BSFF - Behind the Scenes Facts & Fötäli

    May 6, 2024 in France ⋅ ☁️ 15 °C

    - Kroatie hed über 1200 Insle
    - für Kahoot muesmer de Bildschirm vom Spielefüehrer gseh
    - Plötze (üse Van) isch s'Pferd vom Hexer Geralt us de Witcher-Saga
    - Gschwindigkeitsbegrenzige in Kroatie sind nur Empfehlige - mer fahrt nach Gfühl oder bechund i jedere Kurve e Herzinfarkt
    - Diä meischt g'hypte Songs uf üsere Reis: "Hörst du die Regenwürmer husten" & "Kurwa Raketa"
    - Kurwa Bober ~ Verdammte Biber isch en Usdruck vo Freud
    - Velofahrer sind au z'Kroatie nid gern gseh
    - Östricher und Dütschi au nid
    - es gid kei Sandstränd, nur Stei
    - für schwarzi Flüssiggold-Liebhaber: Guinness gids nur im Lidl & Spar
    - ide Unterkunft Ana uf de Insle Krk gids e gratis Pastapackig im Tüüfchüehlfach
    - es Bibi lauft inzwüsche im Wald vo Rudanovac umenand
    - en Car ohni Lüüt isch e huere Rennmaschine
    - en Golf hed alles, au Klima
    - D'Gisela macht alli "verrückt"
    - De Wii us Motovun, Jahrgang 24, isch sehr z'empfehle
    - de Jonas hed nid gern Gorgonzola
    - fascht jedi AirBnB-Vermieteri heisst Martina... ääh Marina

    PS: Fötäli aluege uf eigeni Gfahr...
    PPS: Jetzt isch aber würkli suuber fertig.    Read more

    See translation
    Trip end
    May 6, 2024
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice