Dulce Nombre

Nochdem mer jetzt ei Woche chrüz ond quer dörs Land greist send, esch höt de Tag cho zom zode Gastfamelie vode Julia zreise. 🤗 Met vier verschedene Büss semmer vo La Fortuna öber Tilarán, Cañas ond Liberia bes uf Nicoya gfahre. 🚌 Noch 7h Reis semmer denn z Nicoya acho, wo ide Julia eres Gastmami (Giselle) ond d Schwöster (Julissa) üs abgholt hend. 🥰 Bim erste Träffe sett 7 Johr send d Ouge ou chli füecht worde. 🥹 Schliesslech esches metem Outo wiiter gange uf Dulce Nombre, emmer wiiter us de Zivilisation use öber d Ärdstrosse. 🏡 Im Dorf hed sech ned vell veränderet - wie scho vor 10 Johr geds emmer no kei Empfang ond Internetzuegang ond d Büss fahred sogar no sältener als 2x am Tag - ongloublech. 😯 Nochere feine Stärkig met Salot, Riis ond Bohne esches ou scho uf gange zom de rästliche Familie 'Hola' z säge. 🙋🏽‍♀️ D Grosseltere (Gaby & Luva) hend sech riisig gfreut, d Julia weder z gseh. 😍 Ufem Schaukelstuehl met Bleck of de schöni Garte send Gschechte ond Neuigkeite ustuuscht worde. 🌸🌴 De Gastbrüeder (Randy) esch ou no met sim Töff vorgfahre - d Julia hed zerst mösse abwarte wär onderem Helm zom vorschiin chonnt. 🫣 De 'Bueb' vo vor 10 Johr esch mettlerwiile nömm ei Chopf chliiner, sondern zwe Chöpf grösser. 🤯 Zom Znacht semmer weder zrogg zom Eigeheim gloffe, wo vom Gastvater (Henry) liebevoll renoviert worde esch.🔨 Es hed e neui Chochi, neui Böde, e neui Terasse, e anderi Wandfarb - verständlech, dass de oberi Stock wiiterhiin e Boustell esch. 🙈 De Obe hemmer uf de Terasse lo usklenge, zämme metem Onkel (Heiner) ond de Tante (Grace) ond natürlech em treue Hond Lupo. 🐶 Mer verbrenged die nöchste Täg gmüetlech met de Famelie. 🥰Read more