Botanical Hill

Achtung, dä Biitrag esch in Öberlängi. Gnueg Ziit iiberächne förs Läse.

D'Tatsach, dass mer ofere Pferdefarm gsi send, hed d'Jasi gnötzt ond esch weder go usriite. De Traum vomene Galopp am Strand esch aber platzt, wo sie feschtgstellt hed, dass sie ofem Usrett vonere Afängerin begleitet werd. Jetz hed sie doch äxtra de Afänger Dani zrogg gloh... De Usrett esch denn aber trotzdem schön gsi, au wenn d'Charlotte (Guide, frösch ab Abi) chli gar oft de Jasi ehre Sitz ond d'Blickfüehrig bemänglet hed.
I de Zwöscheziit hed de Dani gwössnigs för die nöchschte Täg plant.
Nochdem d'Jasi vo ehrem Usrett retour cho esch, send all zomene Kafi zämeghocket. Die sehr passionierti Bsitzerin vo dem Hof ond Camping hätt üs no de ganz Tag lang en Vortrag öber d'Verkömmerig vo üsne Auge ond Wirbelsüüle als Folg vo de Digitalisierig, wo Riite s'perfekte Heilmettel seig, ghalte, wenn mer üs ned noch Minute vo ehrem Monolog inere Verschnuufpause chönne häted verabschede.
Mer send denn nochem Mettag wiiter noch Kaiteriteri zom Split Apple Rock ond denn zom Kaiteriteri Beach. Det esch de Dani go bade (S'erschte Mol in Neuseeland im Meer? Mer wösseds nömm).
Of de Wiiterfahrt zom Camping heds en Stopp bimene sehr beliebte
Glacé-Stand gäh, em Lieblingsglacélade vo de Tina, wo mer ofem Paparoa Track könneglehrt hend.
Im gliiche Ort hed de Dani no versuecht neui Schueh z'gfende, wil sini tüüre Scarpa noch wenige Mönet Gebruuch (in Südostasie hends meistens im Rocksack dörfe metreise; grondsätzlech heds en Schueh met em Dani sine Füess aber ned liecht) scho de Geischt am Ufgäh, bzw. d'Sohle am verlüüre send ond wiiteri Wanderige i dene ned super clever wäred.
Gfonde hemmer nüüt ond so semmer wiiter is Camping, wo mer, nochdem mer bim Glacéstand scho verbigfahre send - au fascht verpasst hätted. D'Biifahrerin hed ned de bescht Tag gha ;)
Bim Camping send üs leckeri Cherry-Tomate zor Begrüessig abote worde ond chorz drufabe hemmer en Spaziergang am Strand gmacht, wo ned sonderlech zom Bade iiglade hed. Ned öppe wägem starche Wind oder de Chälti, sondern wil am Steistrand öberall toti Qualle (portugiesischi Galeere) omegläge send.
Ob mer parat för de Omstorz oder gsägnet send wie üsi Campingnochbere met de entsprächende Nommereschelder am Auto (UPRISE und BLESYU), wogemer z'bezwiifle. Of üsem stohd KBZ975 😔 Wie gwöhnlech.

De nöchschti Tag esch Waitangi day gsi, de neuseeländisch Nationalfiirtig. För üs zemli onerwartet, wil mer dä bis en Tag vorhär ned ofem Scherm gha hend 🙈
Om de Waitangi Day aber gebührend z'fiire, hemmer üs med de Tina us de Wandergroppe, in Nelson zom Kafi verabredet.
Pönktlech zom Start am nüni semmer am pōwhiri, enere maorische Begrüssigszeremonie, gsi. Bim Iilass semmer denn trennt worde, wil d'Platziiwiserin em Dani gseit hed, är müesi i di zwoit Reihe vöre, det bruuchis Männer (di erschte zwoi Reihe send usschliesslech vo Männer bsetzt gsi). Diräkt hender allne Redner hed de Dani somet Platz gno, keis Wort verstande, bi de maorische Lieder ned chönne medsenge ond sech völlig fähl am Platz gfühlt.
Noch öbe 60 Minute of maori abghaltene Rede esch denn of Änglisch gwächslet worde ond eine vo de Redner hed im Dani sis Onbehage gno, indem är gfrogt hed, wer vo de Awäsende ned us Neuseeland seig ond denn druf higwese hed, dass mer genau so guet seled ufgno wärde wie die damalige europäische Siedler vo de Iiheimische.
Aschliessend hemmer üs denn med de Tina zom Kafi troffe. Si esch scho zemmli vel i de Wält omecho, onter anderem i vellne europäische Skigebiet. Die in Neuseeland seiged nüd, wenn mer Europa ond Japan mol erläbt heig. Bald scho hemmer üs vo de Tina, wo mer för die vele tolle Tipps sehr dankbar send, müesse verabschede, wil üse Aktivitäteplan no en Wanderig of de Mt. Robert vorusgseh hed.
Bevor mer üs vo Nelson zom Nelson Lakes Nationalpark (rond 90 Minute) ufgmacht hend, hemmer nomol en Versuech noch neue Schueh före Dani onternoh. Di erschte zwoi Läde hend nüd passends gha ond so semmer i letscht Lade, wo no zor Uswahl gstande esch.
De Verchäufer esch denn med drü paar Schueh zrogg cho, Brooks, Asics ond On, das sig en Schwizer Marke, ob mer vo dene scho mol ghört heiged. För de Dani esch denn klar gsi, dass eine vo de erschte zwoi passe mues, söscht wörd är leider ohni neui Schueh Nelson verlo müesse. De zwoit hed denn zom Glöck passt. No On.
Los of de Mount Robert Circuit hemmer erscht nochere för üse Campervan usefordernde Afahrt chönne. Med liechtem Gepäck semmer los ond hend de Ufstieg zögig hender üs brocht. Mol weder ned zfrede med de ehm botnige Ussecht hed de Dani sini neue Schueh amene erschte Stresstest onderzoge ond hed no paar Höhemeter meh gmacht - im Laufschritt, wies sech förne Trailrunner ghört. Es hed sech so semi glohnt. Aber d'Schueh hebed.
Zrog bim Parking hemmer üs ofe Wäg zom Camping, 40 Minute vom Rotoiti Lake entfärnt, ufgmacht. De Nelson Lakes Nationalparkt esch eigentlech en Megacity vo Sandflüge, dör de Standort vo üsem Camping wäg vom See hemmer ghofft, dene es betzeli entgo z'chönne. Osserdem send di buechbare Camping bim See bereits voll gsi. Med allne wo mer öber Nelson Lakes gred hend, hend üs vor de Sandflüge gwarnt (de Tina ehri Antwort, öbs be Nelson Lakes vel Sandflies heig: "All of them.")
Üse Platz esch denn im Prinzip en Schofweid mit zwoi Duschklo-Kabine droffe gsi. Nochem Dusche hemmer de Rescht vom Obig im Campervan verbrocht, wäg de Sandflüge. Aber am See wärs wohl no schlemmer gsi :)

De zwoit Tag im Nelson Lakes Nationalpark. Weder semmer ofne Wanderig bim Lake Rotoiti, dasmol aber of de Bärg schräg vis-à-vis.
Die Wanderig esch stränger gsi, steiler ond meh Höhemeter, ond als wörd das ned scho länge, hed d'Jasi i de Nacht praktisch nüd gschlofe. Böse Kombucha, wer hät das chönne wösse? (Öber vo üs heds gwösst ;))
De Ufstieg hed sech aber vel stärcher glohnt als dä am Vortag, d'Ussicht vom Parachute Rock of de See ond di omlegende Bärge, paart med de Rueh ond Einsamkeit, hend sech uszahlt.
Ned för all: Nome 200 Höhemeter wiiter obe hed sech de Gepfel befonde, för d'Jasi esch d'Ussecht vom Parachute Rock aber gnueg gsi. De Dani hed sini Schueh also erneut teschtet. Ond wow, hell begeischteret esch är elei ofem St. Arnaud Range gstande ond hed d'Ussecht of d'Bärgwält gnosse.
Leider nome chorz. Om no möglechscht alles wo mer vor hend, omsetze z'chönne (leider Abel Tasman ned 😪), hemmer no wiiter id Elaine Bay i de Marlborough Sounds müesse, wo mer imene DOC Camping en schöne Platz becho hend. De Wäg det hii hed dör veli ond grossi Wiigüeter gfüehrt, d'Stross esch i de letschte Stond vo de Fahrt leider nömm öberall so guet im Schoss gsi; interessanti Fahrt bis zom Camping of jede Fall.
I de Elaine Bay semmer denn go bade, d'Jasi esch bim Iisteg fascht of en Stachelroche gstande.
Noch de Erfröschig im Sound (es dör en Floss gschaffnigs Tal, wo sech med Meerwasser gföllt hed) hemmer üs med Wasser usem Kanischter "duscht". Frösch gwäsche esch Ziit zom Sönnele ond förne Apèro gsi.
Aschliessend as Reschteufässe-Znacht hemmer üs a Stäg begä, i de Hoffnig wiiteri Roche z'sechte. Es esch ned sonderlech schwär gsi.Read more