Reset search
TFBO goes Cambodia
  • Kelly Joss
  • Cheyenne Blatter
  • Flo Von Allmen

TFBO goes Cambodia

Bangkok & Kambodscha mit der TFBO ✈️
Im Rahme vo üsem Tourismusstudium erkunde mir Kambodscha und nähme öich mit uf üsi Reis. Read more
FollowInsightsInsightsCalendarCalendarShareShareBucket list
Newest first
  • Trip start
    October 28, 2022
  • TFBO goes Cambodia

    Bangkok hat uns jetzt ☝🏼

    October 29, 2022 in Thailand ⋅ ⛅ 32 °C

    Am Morge am 5i simer safe & sound in Bangkok glandet. Zur Schwizerzyt ersch Mitternacht u dämentsprächend müed, simer üs im Hotel ga früsch mache u direkt uf Entdeckigstour.
    Mir hei üs klassisch vomne Tuktuk Fahrer la abzocke… 😂 Si ufene Bootsfahrt, dr Wat Arun ga besichtige, dürt Khao San Road gschländert u erhole üs ize am Hotel Pool. ☀️Read more

    See translation
  • TFBO goes Cambodia
    Stoffhose us Sunneschutz
    Wat PhoDr goldig BuddhaHop on Hop offWat PhoChina TownKönigspalastKönigspalast

    Bangkok Tag 2

    October 30, 2022 in Thailand ⋅ ⛅ 32 °C

    Nachem erholsame Schlaf (mir si am 20:00 Uhr im Bett gsi.. 😂😍) si äs paar vo üs am Morge früeh dr Königspalast ga ahluege. Dr Königspalast isch 1782 uf dr östliche Site vom Fluss erbout worde. Dr Palast isch augemein sehr goldig und pompös gsi.

    T‘Michelle und Kelly hei dä scho mau gseh u drum heimer üs aui derna när bim Wat Pho troffe. Nach dr Besichtigung vom Wat Pho (mitem goldige, 42m länge, liegende Buddha) simer fein ga Zmittag ässe. Tipp: wär scharf nid mah verlide bsteut „no spicy“ oder „less spicy“. 😉

    Eigentlech heimer när ufe hop on hop off Bus wöue, aber ds isch schwieriger gsi ausmer dänkt hei. Mir si gfüut 3x ume Königspalast gloffe, zum die Bushautsteu z’finge. Mir hei scho fasch ufgäh, womer irgendwenn are Hautsteu chli i Schatte si ghockt. Nach 20Min. heimer üs entschide zrüg is Hotel z’gah. Plötzlech isch aber dä Bus usem Nüt uftoucht u mir hei üs doch no ä 2 stündigi Stadtrundfahrt chönne gönne. Mir hei vorauem viu Stou gseh, aber es isch glich no idrücklech gsi. 🚌

    Ize liegemr wieder ah üsem Hotelpool u stürze üs am Aabe is Touristegewimmel ar Khao San Road.

    Morn Nami geits när witer nach Siem Reap, Kambdoscha. ✈️    Read more

    See translation
  • TFBO goes Cambodia

    Khao San Road 🍹

    October 31, 2022 in Thailand ⋅ ⛅ 32 °C

    Gester simer am Aabe no at Khao San Road, we de öpis „Reizüberflutung“ perfekt zämefasst, de isches die Strass.. 😂
    Bar, Clubs, Street Food, viiiiu z luti Musig, viiiu z viu Lüt, grusligi Insekt (zum Ässe) und Iheimischi wo dä unzählige Touriste öpis wei ahdräie fingt me hie ah jedem Eggä.
    Mir hei glich ä gueti Zyt gha, hei üs günstigi Drinks gönnt, si ga Karaoke singe und am Schluss nochli ga tanze.. lenger aus 1h hetmes aber bi däm Lärmpegel i däm Club nid usghaute. 😅

    Hüt Morge hei sech äs paar vo üs no ä gueti Massage gönnt und ize simer am Flughafe u warte uf üse Flüger nach Siem Reap. ✈️

    Dert trenne sech t‘Wäge vo üsere Gruppe scho zum 1. Mau. Mir 3 (Flo, Cheyenne und Kelly) schlafe imne Homestay u dr Räst geit is Hotel, womer üs morn mitem Räste vor Klass träffe. Es si nämlech leider nid nur Ferie hie… 👩‍💻    Read more

    See translation
  • TFBO goes Cambodia
    am Monyharch sis Tuktuk
    Pagodafloating villagelocal marketüse Host Monyharchüse Gastdr Flo bim Ching beschäftigeüses Zimmerliund üses Bad

    Welcome to Cambodia

    November 1, 2022 in Cambodia ⋅ ⛅ 30 °C

    Gester simer in Siem Reap ahcho und hei 2h uf üses Tuktuk gwartet wöu üse Host Monyharch gmeint het, dasmer ersch am nächste Tag ahchöme.. 🤣
    Är isch aber mega nätt gsi u äs isch sehr idrücklech gsi, bimne Iheimische daheime z schlafe. Är wohnt in Puok, ds isch ufem Land ca. 20 Min. entfernt vo Siem Reap.

    Mir hei fein Znacht gässe i sim Restaurant u si wit und breit die einzige Touriste gsi i däm Dörfli. Sini Ching hei ds oh cool gfunge und mit üs zäme chli zeichnet. Gschlafe heimer imne sehr eifache aber härzige Zimmer, nachdäm üs dr Flo vorere riese Spinnele het grettet.. 🤯

    Hüt Morge hets när Noodles zum Zmorge gäh u dr Monyharch het üs no dr local market und t Pagoda i sim Dorf zeigt und mit üs ä Usflug zumne schwümmende Dorf gmacht (inkl. Krokodilfarm)

    Nachdäm heter üs mit sim Tuktuk it Stadt gfahre u ize simer im Hotel Tara Angkor womer üs am 17.30 Uhr mit dr Klass zum Kick Off vo üsem Uslandseminar träffe.    Read more

  • TFBO goes Cambodia
    Sophea 🥰

    Siem Reap

    November 2, 2022 in Cambodia ⋅ ⛅ 28 °C

    Nachem offizielle Kick Off gester Aabe hets es richtig guets 4 Gang Menü mit dr ganze Klass gäh. Anschliessend heimer üsi Projekt bimne gmeinsame Drink besproche und dr Aabe ar Pubstreet la usklinge.

    Mir übernachte für üses Projekt uf üsere Reis bi verschidene Homestays und wei die Art vo Übernachtig so bi Schwizer bekannter mache u vorauem zeige, dass es sicher und sehr idrückleck isch so z‘reise.

    Hüt heimer mit dr ganze Klass ä Tuk Tuk Rundfahrt dür Siem Reap gmacht wo mir ungerangerem Apopo, ä buddhistische Tempel und z Haven bsuecht hei.

    Apopo ische Organisation wo duet Hamsterrate usbiude wosi zum Finge vo Bodemine chöi isetze. Die Hamsterratte erschnüffle Mine wo när so chöi entschärft und dür das viu Mönscheläbe grettet wärde.

    Z‘Haven isch äs Restaurant wo vo Schwizer gründet isch worde Jugendliche ir Gastronomie usbiudet, damit die ä besseri Zuekunft und ä Perspektive hei. Mir hei dert Zmittag gässe und es isch top gsi.

    Am Nami heimer tatsächlech nochli ah üsem Projektpapier gschaffet, liege ize wiedermau am Hotel Pool und gönne üs am Aabe wieder äs guets Znacht.    Read more

    See translation
  • TFBO goes Cambodia

    3 temples and a sunset

    November 3, 2022 in Cambodia ⋅ ⛅ 26 °C

    Hüt heimer volls Programm gha mit üsere Klass.
    Nachemnä witere usgiebigä z morgä buffet, simer zum Angkor Wat gfahre ds isch di grössti Tempel-Aalag vor Welt & mega beidruckend.
    Direkt drna heimer dr Tempel Wat Thom besichtigt. Ou dä isch mega beidruckend gsi, dä het ursprünglich über 50 Türmli ka mit jewils 4 Gsichter wo richtig Norde, Oste, Süde und Weste gluegt hei. Mittlerwile stöh aber nur no 37 dervo. Was so speziell a dänä Tämplä isch, isch das si vor über 800 Jahr erboue si worde, im 12. und 13. Jahrhundert, si si auso no äuter aus z.B. d Maya Stätt in Mexico.

    Nacheme feine Zmittag im Restaurant "Street27" simer grad nomal gane Tempel aluege im Gebiet vo Angkor Wat, dr Ta Prohm Temple, dört heisi Tomb Raider mit dr Angelina Jolie dräit - drum wird er ou "Tomb Raider Temple" gnennt. Dä isch ufne ganz anderi Art dr Wahnsinn gsih, will dr Urwald dr Tämpu quasi het ignoh & ganz viu Böim si über und uf de Muure gwachse, was ganz e mystischi stimmig het generiert. Es isch o die Tämpu-alag gsi wo ändlich chli chüehler isch gsi, wius dür d böim o schatte ka het.

    Ganz zum Schluss simer zum Phnom Bakheng (ä Tämpu ufemnä Hügu) zum über ganz Siem Reap und die verschidnige Tämpu-alage dr Sunneundergang ga aluege.    Read more

    See translation
  • TFBO goes Cambodia

    Battambang 🦇

    November 4, 2022 in Cambodia ⋅ ☁️ 24 °C

    Dr hütig Tag Tag het scho am 05:30 Uhr gstartet, wöu mir am 06:30 Uhr für üse Transfer vo Siem Reap nach Battambang si abghout worde.
    Ds isch aber nid eifach ä gwöhnleche Transfer gsi, mir si nämlech mitemne Boot nach Battambang gfahre.
    Uf dere 6 stündige Reis simer ah idrückliche Landschafte und spannende Floating Villages (Schwümmende Dörfer) verbi gfahre.

    Am „Hafe“ simer scho vo üsem Tuk Tuk Fahrer erwartet worde, wo üs iz 2. Homestay vo dere Reis bracht het. Mir si froh, dass es dasmau ä Klimaalag het. 😅

    Mir si de när grad direkt witer zu de Killing Caves und Bat Caves gfahre. Bi de Killing Caves si währendem Regime vodä Rote Khmer unzähligi Lüt tötet worde. Und bi dä Bat Caves heimer chönne beobachte, wie bim Sunneungergang 2 Millione Flädermüüs us dr Höhli si gfloge. Beidi Höhline si ufeme schöne Fels mitemne Tämpu wo ä wunderbari Ussicht bietet. Usserdäm hets seehr viu rächt frächi Affe gha. 🐒

    Nachdäm Usflügli simer im Stedtli (es het nid würklech ä Stadtchärn u sehr weni Touriste) no ga Znacht ässe und wieder zrüg i üses Homestay.

    Morn schaffemr nochli ah üsem Projekt und de geit üsi Reis scho wieder witer. 🚌    Read more

    See translation
  • TFBO goes Cambodia

    Where the streets have no name

    November 5, 2022 in Cambodia ⋅ ⛅ 24 °C

    Hüt isch bis uf d Fahrt vo Battambang nach Pursat ä relativ ruhigä Tag gsi. Mir si am 8ti ufgstande und hei bi üsem homestay host, dr Sarin, z morgä gässä. Es het Omelette und Toast gä, d Omelette het zwar mehrheitlich us Pfeffer bestande 🌶️
    Nachem z morgä heimer as churzes Interview für üsi Arbeit mitem Sarin gfüehrt und ner a üsere Arbeit witer gschribe und mitem Video agfange.
    Zum z mittag simer ines Noodle Soup Resti gange wo d Charte nur uf Khmer isch. Obwohl ds relativ schwierig isch gsi mit verständige heimer glich es feins z mittag becho 🥘 zum dessert simer ines coffee house ga donuts ässä 🍩
    Am 3 simer de langsam zum Busunternähme gange und hei dört knapp e stund dörfä warte, wiu Kambodschaner d schwizer pünktlichkeit nid kennä. Dr Fahrer vo däm Bus isch chline Kamikaze gsi drum heimer da äuä wieder chli zyt guet gmacht. Nach 2 Stund Bus fahre, simer de irgendwo in Pursat are Tanksteu abglade worde. ⛽️ Chli verlore heimer ar Sina, üsem Host für die nächste zwöi Nächt, aglüte u si isch üs de cho holä. Mir si ihri erstä Gäst, da si ihres Homestay während Covid uftah het unds in Pursat öppä 10 Touris pro Jahr het. Wiu si mit ihrem roller isch cho, het si es no es tuktuk bsteut. Bisher heimer immer rächt es Bagage ka mit üsnä Rucksäck und wie z Tuk-Tuk optimau z belade, hüt isch aber besser gange wiud Cheyenne bir Sina hinde uf z Töffli isch. D Sina het üs zum z Nacht zum Pizza Restaurant vo ihrere Nichte bracht. Es isch ds erste Pizza Resti in Pursat 🍕
    Jez simer i üsem grümige Homestay Zimmer und fröiiä üs morn de ä Usflug z mache ir Gegend.    Read more

    See translation
  • TFBO goes Cambodia

    Into the wild

    November 6, 2022 in Cambodia ⋅ ⛅ 28 °C

    Hüt het üse Tag gmüetlech gstartet. T‘Sina het üs äxtra äs „westlechs“ Zmorge gmacht, wöu sie Angst het gha, dasmer ihres nid gärn hei. 😅
    Nachem Zmorge heimer ihre no paar Frage für üsi Arbeit dörfe steue u sie het üs viu spannendi Sache verzeut.

    Wöu Pursat überhoupt nid touristisch isch, heimer scho im Vorus ä Transfer buecht, wo üs hät söue zum Floating Village vo Kampong Luong bringä. Da mir aber i dere Wuche scho 2x äs schwümmends Dorf hei gseh, heimer dr Fahrer spontan gfragt, ober üs zum Chang L‘Eang Wasserfall bringt und t‘Sina heimer grad mitgno. 😊

    Für dä Wäg hätme eigentlech nur 1.5h brucht, aber mir si öpe 1h im Stou gstange u hei drum meh aus 2.5h brucht. Dä Wasserfau isch ganz es idrücklechs Erläbnis gsi, nid unbedingt nur wäg dr Natur säuber, sondern wäg dä Lüt. Es het nämlech usschliesslech Iheimischi gha dert und mir si wit und breit die einzige Touriste gsi. Mega viu Lüt hei üs agstrahlet, Hallo gseit und zum Teil sogar Fotos vo üs wöue mache. Mir si auso churzerhand grad zure Attraktion worde.

    Ize simer wieder ufem Wäg nach Pursat und wärde hüt Aabe äuä wieder i Sina ihrem Pizza House Znacht ässe, wöu t‘Müglechkeite hie eher beschränkt si.

    Morn Morge bringt üs de üse Fahrer vo Pursat nach Kampot, wo mir wieder dr Räscht vo üsere Klass wärde träffe und mir wieder zrüg it Zivilisation chöme. 😊    Read more

    See translation
  • TFBO goes Cambodia

    Schlaglöcher, Iced Coffee & Chips

    November 7, 2022 in Cambodia ⋅ ☁️ 25 °C

    Hüt heimer üs uf die längi Reis vo Pursat uf Kampot begäh.
    Am 08:15 Uhr simer losgfahre und ca. am 16:30 Uhr ändlech i üsem Hotel in Kampot, im Süde vo Kambodscha ahcho.
    Näbst dä viele Schlaglöcher und Strasse wo eher Schotterpiste si gsi, heimer ungerwägs no dr Tempel vo Oudong bsuecht. Oudong isch früecher t‘Houptstadt vo Kambodscha gsi.

    Bis zum Tempel ufe sis ca. 500 Stägestritte gsi, aber mir si froh gsi dasmer üs chli hei chönne bewege. Verschwitzt aber happy heimer när no die letste 3.5h vo üsere Reis i Agriff gno. Nach 2 Iced Coffees undeme Sack Chips zum Zmittag simer de ändlech in Kampot ahcho. Ändlech wieder Reunion mit dr TFBO. 🥳

    Nachemne gmeinsame Znacht (inkl. Pfäffer Glace zum Dessert fürne Teil vor Klass) heimer de no z‘Stedtli uskundschaftet, wägem Wasserfest hets meeega viu Lüt gha und oh hie simer fasch die einzige Touriste gsi. Mir hei üs ä Drink für je 2 Dollar gönnt und üs ufenes klapprigs Rieserad gwagt.

    Morn Morge düemer chli ah üsne Projekt schaffe und am Nami machemr ä Usflug uft Pfäffer Plantage, Kampot isch nämlech berüehmt für si Pfäffer.    Read more

    See translation
  • TFBO goes Cambodia

    Dert wo dr Pfäffer wachst

    November 8, 2022 in Cambodia ⋅ ☁️ 26 °C

    Hüt am Morge heimer üs no üsne Projekt gwidmet womer morn (ändlech) abschliesse und hei am Namitag ä Usflug it Umgäbig gmacht. Mir si vomne Minibus abghout worde und hei „La Plantation“ bsuecht - ä Pfäfferplantage. Nachemne feine Zmittag (mit guetem Pfäffer) heimer t‘Plantage besichtigt und ahschliessend verschideni Sorte Pfäffer chönne teste und ichoufe.

    Us Abschluss vo däm Tag simer imne indische Restaurant gsi womer viu z viu Ässe bsteut hei dass es für morn ono grad längt.

    Morn isch scho dr letst Tag vo üsem Seminar und de geits ändlech richtig it Ferie.    Read more

    See translation
  • TFBO goes Cambodia

    Grande Finale & ab auf die Insel

    November 10, 2022 in Cambodia ⋅ ⛅ 27 °C

    Gester isch dr Abschluss vo üsem Seminar gsi und mir hei dörfe üsi Projekt präsentiere, wo mir ide letste 10 Täg in Kambodscha und scho fasch es Jahr zum Vorus ir Schwiz bearbeitet hei.

    Nachem Pflichtteil heimer de no dr Abschluss ufere gmüetleche Dinner Rivercruise gfiiret und si ahschliessend ire Karaokebar glandet.

    Ire Stung wärde mir abghout und fahre mitem Bus nach Sihanoukville, wo üs z‘Boot uf die troumhafti Insle Koh Rong Sanloem erwartet. ⛵️

    Und de chöi üsi richtige Ferie ändlech ahfah. 🍹    Read more

    See translation
  • TFBO goes Cambodia

    Welcome to Paradise

    November 11, 2022 in Cambodia ⋅ ⛅ 29 °C

    T‘Fahrt nach Sihanouville het sech aus schwieriger usegsteut, aus mir dänkt hei. Scho womer i dä Bus si igstige heimer dänkt es schmöckt chli komisch, aber naiv wimer si heimer üsi Gedanke miteme „mir si hie haut z Kambodscha“ wieder la zieh.

    Nach 2h ufere seeeehr holprige u seeehr stoubige Strass (mir si soo verwöhnt ir Schwiz!) het de dr Fahrer mau aghaute und plötzlech afah üses Gepäck umebige. Mir hei de när gmerkt, dass er vore näbem Länker ä Klappe ufduet wo dr Motor drinne isch u hei numeno Rouch gseh. De heimer de oh checkt, dass ds nid guet isch u si sofort usgstige. Nach 2-3 Telefonat und 30 Min. ir pralle Sunne isch de när ä Ersatzbus cho und üsi Fahrt isch witergange.

    Z‘Sihanoukville simer de ufnes chics Speedboat umgstige, wo üs (oh sehr holprig..) zu üsem wunderbare Resort „La Passion“ uf Koh Rong Sanloem bracht het.
    Hie laht sechs die nächste vier Täg guet lah läbe… 🤩

    Mir hei de dr Aabe am Strand und bimne feine Znacht (wo mir oh ewigs gwartet hei, Effizienz isch hie kes Thema) lah usklinge u gönne üs hüt ä gmüetleche Strandtag.    Read more

    See translation
  • TFBO goes Cambodia

    Koh Rong Sanloem

    November 11, 2022 in Cambodia ⋅ ☁️ 28 °C

    Dr hütig Tag heimer gmüetlech am Pool/Strand verbracht, drum gits nid viu z‘verzeue… 😊

    Leider isch ou uf dere Trouminsle dr Abfall es grosses Thema u und usserhaub vom Resort isch dr Strand sehr dräckig…

    Mir gniesse no dr Aabe und luege, was es idä nächste Täg no z‘erkunde git. ⛵️    Read more

    See translation
  • TFBO goes Cambodia

    uf, im und unger Wasser

    November 12, 2022 in Cambodia ⋅ ⛅ 27 °C

    Hüt ische Teil vo üsere Gruppe gah touche und t‘Nid-Touchgänger si mit ga schnorchle. Wie richtigi Schwizer simer punkt 08:59 Uhr (Träffpunkt isch am 09:00 Uhr gsi) vor dr Touchbasis gstange.

    Nach paarne Infos und Instruktione simer de ufnes Schiff und ah 2 verschideni Touch-/Schnorchelspots gange. Mir hei viu schöni Fische, no 2-3 lebändigi Koralle (die meiste si leider läblos), Seeigle und Oktopusse gseh.

    Dr asträngend Tag heimer am Pool la usklinge und de am Aabe gmüetlech im Hotel Znacht gässe und bim strömende Räge nochli Chartespieli gspiut.

    Morn gömer no ä angere Strand gah uskundschafte und übermorn geits witer uf die nächsti Insle. 🐬    Read more

    See translation
  • TFBO goes Cambodia

    Lazy Sunday @ Lazy Beach

    November 13, 2022 in Cambodia ⋅ 🌧 26 °C

    Dr hütig Tag het mit üsere Lieblingsbeschäftigung gstartet: am Pool liege und läse und ab und zue chli gah bädele. Am Namitag heimer de gfunge mir müesse nochli öpis nöis gseh u si 20 Min. uf die angeri Site vor Insle ah Lazy Beach gloffe.

    Dä Strand isch ganz angers aus uf dr Site vo üsem Resort: gäubbrune Strand, glasklars Wasser und fasch mönscheläär. Nachemne feine Zmittag heimer dä schön Strand chli gnosse und si bis zum Sunneungergang dert blibe. Übrigens heimer glehrt, dass Plankton im Wasser uf dr Hut brönnt. 😅

    Dr Aabe heimer wieder bim Spieli spiele lah usklinge und si gspannt, was üs morn uf Koh Rong erwartet.    Read more

    See translation
  • TFBO goes Cambodia

    Koh Rong

    November 14, 2022 in Cambodia ⋅ 🌧 27 °C

    Hüt Morge heimer in Koh Rong Sanloem uscheckt und die letste Stunde ah üsem luxuriöse Pool gnosse. T‘Fotoshooting uf dr Strandschoukle und es letsts Klassefoto het natürlech oh nid dörfe fähle.

    Nachem Mittag heimer üs de mitemne seeehr langsame Boot ufe Wäg uft Nachbarsinsle Koh Rong gmacht. Üsi Ungerkunft, t’Treehouse Bungalows hei ä eigete Pier wo üs dr Captain nach es paarne Kommunikationsschwierigkeite de grad direkt het häre gfahre. Nachdäm mir i üsi Bungalows mit Meerblick und Meeresrusche icheckt hei und is Restaurant ghöcklet si ischs de verbi gsi mitem sunnige Wätter und äs het ä Troperäge gäh.

    Mir hei üs när ä gmüetleche Nami/Aabe bimne Powerpoint-Karaoke gmacht, im Treehouse Restaurant Znacht gässe und si früeh is Bett, dasmer morn parat si zum d’Insle z‘erkunde.    Read more

    See translation
  • TFBO goes Cambodia
    üses Bungalow
    dr Strand vorem Bungalow2üse Nachbardr Nachbarsstrandüse +1

    TFBO +1

    November 15, 2022 in Cambodia ⋅ 🌧 27 °C

    Hüt heimers (wieder mau) gmüetlech lah ahgah und hei nachem Zmorge dr Nachbarsstrand uskundschaftet. Dert isch üs per Zuefau dr Nicola us Züri übere Wäg gloffe, wo uf dr Suechi nachemne Hostel isch gsi. Da är niene meh äs freis Zimmer het gfunge, heimerne de churzerhand i üsere Gruppe und somit i üsem Bungalow ufgno.

    Am Aabe simer de no zum Koh Toch Beach gloffe u hei dert chli glädelet und Znacht gässe, ds isch dr bekanntist und dür das oh dr am meiste touristisch Ort uf dr Insle.

    Ize simer auso füre Momänt z‘8. ungerwägs und wage üs morn ufene Insle Tour mitem Roller. 🛵    Read more

    See translation
  • TFBO goes Cambodia

    Tour de Koh Rong 🛵

    November 17, 2022 in Cambodia ⋅ ⛅ 28 °C

    Gester heimer ä ufregende Inseltag gha. Mir hei 4 Roller gmietet und hei aui zäme (inkl. üsem Ahang dr Nicola) t‘Insle erkundet.

    Roller fahre isch fürne Teil vor Gruppe no Neuland gsi, drum isch z‘übere Strand fahre scho mau die ersti Challenge vom Tag gsi. T‘Strapaze hei sech aber glohnt, es hei sech nachem „Dörfli“ nämlech tatsächlech aständigi Strasse und atemberoubendi Ussichte und wunderschöni Stränd eröffnet.

    So simer aus ersts bim Long Beach glandet und hei glasklars Wasser und schneewisse Sand gnosse. Üsi Reis het üs witer gfüehrt zum Golden Beach Resort, wo mir guet Zmittag hei gässe. Dert hättemr eigentlech no ä Wasserfall wöue sueche, aber mir hei üs de glich nid derfür gha ide Flipflops oder sogar barfuess es haubs Dschungeltrekking z‘mache.

    Ufem Rückwäg heimer nomau amne schöne Strand ä Stopp gmacht und si de wieder „hei“ zue gfahre, bevors dunkel isch worde.

    Hüt steit scho üse letst Tag uf dr Insle ah, bevors morn it Houptstadt Phnom Penh und übermorn scho wieder heizue geit. 🇨🇭    Read more

    See translation
  • TFBO goes Cambodia
    Gwitter im Paradies
    Joss Shotsufem Wäg ah PierStrandspaziergang am Long Set BeachThe Nest Beach Club

    Goodbye Paradise

    November 18, 2022 in Cambodia ⋅ ⛅ 28 °C

    So lang heimer uf die Insleferie planget und so schnäu sie si wieder verbi gsi. Mir hätte dr gestrig letzt Tag im Paradies am Strand wöue gniesse, aber z‘Wätter het üs leider ä Strich dürt Rächnig gmacht und äs het nacheme sunnige Morge leider nur no dr ganz Tag gschiffet.
    So heimer dr Tag vorauem mit läse, liege, nappe, und wos mau ke Räge het gäh mit spaziere verbracht.

    Am Aabe simer de zum Ferieabschluss no i Nest Beach Club gange womer einisch scho mau düre Tag si gsi. Dr Wäg düre Dschungel isch auso bi Tagesliecht 10x mau weniger furchtiflössend aus im Stockdunkle. Mit Handyliecht und ar Cheyenne ihrer Stirnlampe simer de aber doch relativ guet häre und paar Stung speter wieder zrüg cho.

    Im „The Nest“ heimer feini Burger gässe und üs ä „Joss Shot“ gönnt. Mir hei no probiert eine gratis z‘becho, ds söt ja z‘mindeste si we öper vor Gruppe Joss heisst.. 😉 aber sie ar Bar het leider nüt dervo wöue wüsse. Übrigens besteit dä Shot us Vodka und useme Energy-Brausepulver wo sech „Extra Joss“ nennt. Kelly Extra Joss tönt eigentlech gar nid so schlächt.
    Übrigens hets i dere Bar pro Joss Shot ä Punkt fürs jewilige Land gäh u mir si de scho chli stouz gsi, dasmer bi Switzerland vo 7 uf 12 hei chönne erhöche.

    Mir si de froh gsi hets ufem Heiwäg nümme grägnet u so simer de guet wieder i üsne Bungalows ahcho. Hüt Morge heimer uscheckt und müesse die troumhafti Insle Koh Rong leider scho wieder verlah.

    Mir si grad ungerwägs mit dr Ferry uf Sihanoukville wo üs de när ä Van erwartet und üs hoffentlech ufere aständige Strass nach Phnom Penh, it Houptstadt vo Kambodscha bringt.    Read more

    See translation
  • TFBO goes Cambodia
    2

    Phnom Penh & die trurigi Realität

    November 19, 2022 in Cambodia ⋅ ☁️ 29 °C

    Nachere 6 stündige statt 3 stündige Fahrt (wöu üse Fahrer het gfunge Highways si überbewärtet..) simer gester Aabe am 19:30 Uhr de doch no in Phnom Penh ahcho. Hie in Kambodscha weissme nie genau uf was dasme sech ilaht und obs de klappt oder nid, ds heimer relativ schnäu gmerkt. Aber immerhin het üs de dä Fahrer grad direkt zum Hotel bracht.
    Dert heimer dr Aabe bimne Znacht und am Hotelpool ufem Rooftop lah usklinge.

    Hüt am Morge heimer z Tuol Sleng Genocide Museum bsuecht. Das Museum isch äs Gfägnis gsi wo die Rote Khmer ide 70er Jahr unzähligi Lüt hei gfange ghaute, gfoltert und umbracht. Es isch sehr informativ und idrücklech, aber ou sehr bedrückend und trurig gsi. Näbst dä Gfägniszellene (zum Teil inkl. Bluetspure) heimer Porträts vo dä Opfer, Biuder vo Tote, Schädle und Folterinstrument gseh. Dr Audio Guide het üs sehr guet dür ds dunkle Kapitel vo Kambodscha gfüehrt. Es macht ds Ganze no viu schlimmer wemä bedänkt, dases no nid mau 50 Jahr här isch wo schetzigswiis 2 Millione Mönsche (1 Drittel vor ganze Bevölkerig) währendem Regime vo dä Rote Khmer si tötet worde. I däm Gfängnis si ca. 17‘000 Lüt gstorbe und nur 7 hei überläbt wöu sie ihri Fähigkeite brucht hei, z.B. isch eine dervo Mechaniker gsi. Zwöi vo dene 7 Überläbende si sogar vor Ort gsi, ds isch einersits idrucksvoll gsi aber angersits oh chli trurig wie sie die 2 Lüt vermarktet hei idäm mä z.B. äs Föteli mit ihne hät chönne mache.

    Nach däm spannende Museum heimer öpis Zmittag gässe, die letste Souveniers bsorgt, üs teilwiis ä Massage gönnt und no ä letste Schwumm im Pool gno, bevor mir i 2h abgholt und ah Flughafe bracht wärde.    Read more

    See translation
  • TFBO goes Cambodia

    FindBackpacks & back home

    November 20, 2022 in Switzerland ⋅ ⛅ 5 °C

    Üsi Heireis isch komplizierter worde aus mir hei dänkt. Es het scho mitem Flughafe Transfer ahgfange, mir si zwar pünktlich am 18:00 Uhr abghout worde, aber hei fürne Wäg vo ca. 30 Min. schlussändlech ungefähr 1.5h brucht wöu schinbar no dr chinesisch Präsident ir Stadt isch gsi und vor Polizei eskortiert isch worde.

    Am Flughafe simer scho fasch chli nervös worde wöumer dänkt hei äs wärdi no knapp u hei no schnäu online icheckt, schlussändlech het üse Flug vo Phnom Penh uf Bangkok aber über 2h Verspätig gha. Dür das isches de in Bangkok seeehr knapp wurde und mir si düre Flughafe zum nächste Gate gsprintet. Kelly het sogar nomau zrüg zum Security Check müesse, wöu sie ihre Pass het lah lige… Es het aber när zum Glück no aune guet glängt und so simer de doch no im Flüger richtig Züri ghockt.
    Mir hei scho die erste Vorahnige gha u scho dänkt, dass üses Gepäck dä knapp Ahschluss nid gschafft het u ca. 12h speter heimer de t‘Bestätigung becho.

    Guetglöibig heimer zwar no bir Gepäckusgab gwartet, es isch aber relativ schnäu klar worde dass ds mit üsem Gepäck (und däm vo ca. 30 angerne) hüt nüt me wird. Aber zum Glück simer wieder ir speditive Schwiz und hei nur churz es Formular müesse usfülle und de wird üses Gepäck hoffentlech gli direkt zu üs hei gschickt.

    Iz hocke mir im Zug richtig Bern - Thun - Spiez - Visp / Interlake u hoffe, dasmer uf dä letste paar Kilometer keni Überraschige meh wärde ha.

    Mir hei die 3 Wuche in Kambodscha sehr gnosse, viu über das spannende Land glehrt und unzähligi tolli Momänte gha.    Read more

    See translation
    Trip end
    November 20, 2022
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice