wieder im Carpe Diem

Dr Camper heimer scho am haubi Nüni abgä. Mir si früeh dranne gsi dür das isches zügig gange.
Mir hei2 500 km buechet gha. Brucht heimer 2502 km, dä CAD wo mir hätte müesse nachezahle hei si üs gschänkt.
Hüt isch Grossadrang bi Fraserway!
So viu Camper si parat gstange… meh aus dopplet so viu wi wo mir dr Camper überno hei.
Näbeme 15 % Guetschin für üse Campground wo mir vor üser Reis hei übercho, hets hüt bi Fraserway no gratis Hot Dogs gä, das isch öppe Service.
Fraserway chöi mir nume empfhäle, fründlächi Mitarbeiter, fasch für jedi Sprach hei di hie Lüt.
Äs isch haut scho gäbig, we uf CH-Dütsch oder D-Dütsch aues erklärt überchunsch. Usstattig vom Camper etc. super! Säuber fahre, ichoufe u choche etc. muesch aber säuber😜😂.

Mir si düre Canyon uf gfahre. Isch interessant u abwächsligsrich. Damit mir nid aues ufem Hwy 1 wo i die Richtig viu Verchehr het, müesse fahr, si mir vo Langley bis Hope nid über Hwy 1 sondern über No 7 am Fraser River entlang. Isch ke gueti Idee gsi, No 7 wird vergrösseret! Mir hei statt ä Stung u 20 Minute fasch 2 ä haub Stung gha. Ungerwägs in 100 Miles House heimer no müesse für die nächschti Wuche ichoufe. Uf Williams Lake heimer nid wöuä, wiu das ä Umwäg wär gsi u äs findet no d Stampede (Rodeo) dert statt.

Nach über 8 ä haub Stung simer du im Huus Carpe
Diem acho.
Ufem Wäg zum Huus heimer no müesse ä Boumstamm vo dr Zuefahrts-Strass rume. Zum Glück isch dä Stamm fei morsch gsi, so isches eifacher gange. Zwar müehsam wius o no, wi fasch uf dr ganze Fahrt, „gschiffet“ het!
Am viertu vor. Achti simer du bim Huus gsi.Read more